“Paulo Da Nyɔŋmɔ Shi Ni Ená Ekãa”

Be ni asafo ni yɔɔ Roma lɛ nu akɛ Paulo miiba lɛ, ahã nyɛmimɛi hii komɛi fã gbɛ aaafee kilomitai 64 (mailii 40) jekɛmɔ koni amɛyakpee lɛ. Mɛɛ gbɛ nɔ amɛhe ni amɛkɛshã afɔle lɛ ná Paulo nɔ hewalɛ? Biblia lɛ kɛɛ: “Be ni Paulo hiŋmɛi gba amɛnɔ lɛ, eda Nyɔŋmɔ shi ni ená ekãa.” (Bɔf 28:15) Eyɛ mli akɛ ale Paulo waa akɛ ewoɔ asafoi ni esaraa lɛ hewalɛ moŋ, shi amrɔ nɛɛ ni eji gboklɛfonyo lɛ, lɛ ji mɔ ni awo lɛ hewalɛ.​—2Ko 13:10.

Ŋmɛnɛ lɛ, kpokpaa nɔkwɛlɔi yasaraa asafoi koni amɛwo nyɛmimɛi lɛ hewalɛ. Bei komɛi lɛ, etɔɔ amɛ, amɛyeɔ amɛtsui, ni amɛnijiaŋ jeɔ wui, tamɔ bɔ ni eji yɛ Nyɔŋmɔ webii krokomɛi fɛɛ agbɛfaŋ lɛ. Be kroko kɛ́ kpokpaa nɔkwɛlɔ lɛ kɛ eŋa lɛ basɔmɔ nyɛsafo lɛ, mɛni obaanyɛ ofee kɛwa amɛ ni amɛná ekãa, bɔ ni afee ni ‘nyɛwowoo nyɛhe hewalɛ’?​—Ro 1:11, 12.

• 

  Yaa kpeei kɛhã shiɛmɔ lɛ. Kɛ́ shiɛlɔi kɛ nibii shã afɔle koni amɛná otsi krɛdɛɛ lɛ he sɛɛ kɛmɔ shi lɛ, ewoɔ kpokpaa nɔkwɛlɔ lɛ hewalɛ waa. (1Te 1:2, 3; 2:20) Kwɛmɔ akɛ obaanyɛ osɔmɔ akɛ gbɛgbalɔi awalɔ yɛ nyɔɔŋ ni ebaaba lɛ mli lo. Ani obaanyɛ okɛ lɛ kɛ eŋa lɛ aya shiɛmɔ, loo okɛ amɛteŋ mɔ kome aya o-Biblia mli nikaselɔ ŋɔɔ? Kɛ́ amɛkɛ nyɛmimɛi srɔtoi tee shiɛmɔ lɛ, amɛnáa miishɛɛ waa, ekɔɔɔ he eko kɛ́ nyɛmimɛi nɛɛ ji shiɛlɔi hei, loo shiɛlɔi ni ekolɛ amɛhe esako tsɔ.

• 

  Feemɔ amɛ gbɔ. Ani obaanyɛ ohã amɛ wɔɔhe loo niyenii? Enɛ hãa kpokpaa nɔkwɛlɔ lɛ kɛ eŋa lɛ naa akɛ, osumɔɔ amɛ. Amɛkpaaa nɔ ko haŋtsii gbɛ.​—Luk 10:38-42.

• 

  Bo gbɛtsɔɔmɔ kɛ ŋaawoo ni ekɛhãa lɛ toi, ni okɛtsu nii. Kpokpaa nɔkwɛlɔ lɛ jɛɔ suɔmɔ mli eyeɔ ebuaa wɔ koni wɔna bɔ ni wɔɔfee wɔya wɔhiɛ yɛ Yehowa sɔɔmɔ lɛ mli. Bei komɛi lɛ, ehe bahiaa ni ekɛ hiɛdɔɔ awo wɔ ŋaa yɛ nɔ ko he. (1Ko 5:1-5) Kɛ́ wɔbo eŋaawoo toi ni wɔba wɔhe shi lɛ, emii baashɛ ehe.​—Heb 13:17.

• 

  Jiemɔ hiɛsɔɔ kpo. Hã kpokpaa nɔkwɛlɔ lɛ kɛ eŋa lɛ ale bɔ ni oná amɛsaramɔ lɛ he sɛɛ ohã. Obaanyɛ okɛɛ amɛ tɛ̃ɛ loo oŋma amɛ wolo.​—Kol 3:15.