Wɔwowoo Wɔhe Hewalɛ
1. Mɛɛ hegbɛi krɛdɛɛi saramɔ ni nɔkwɛlɔi gbɛfalɔi basaraa wɔ lɛ haa wɔnáa?
1 Bɔfo Paulo ŋma asafo ni yɔɔ Roma lɛ akɛ: “Miishwe akɛ mana nyɛ, koni mikɛ mumɔŋ duromɔ keenii lɛ eko abaha nyɛ, beni afee ni aŋɔwaje nyɛ, no ji akɛ, ashɛje mi kɛ nyɛ fɛɛ mii yɛ nyɛteŋ, yɛ hemɔkɛyeli ni yɔɔ mi kɛ nyɛ fɛɛ mli lɛŋ.” (Rom. 1:11, 12) Ŋmɛnɛ hu lɛ, kɛ́ nɔkwɛlɔi gbɛfalɔi basara wɔ lɛ, ehaa wɔnáa hegbɛ ni wɔ fɛɛ wɔkɛ wowoɔ wɔhe hewalɛ.
2. Mɛni hewɔ atswaa kpokpaa nɔkwɛlɔ lɛ saramɔ lɛ he adafi kɛtsɔɔ hiɛ lɛ?
2 Hewalɛwoo Kɛha Asafo Lɛ: Bei pii lɛ, atswaa kpokpaa nɔkwɛlɔ lɛ saramɔ lɛ he adafi yɛ asafo lɛ mli aaafee nyɔji etɛ kɛtsɔɔ hiɛ. Enɛ haa wɔnáa be kɛtoɔ gbɛjianɔ bɔni afee ni wɔná esaramɔ lɛ he sɛɛ kɛmɔ shi. (Efe. 5:15, 16) Kɛ́ oji mɔ ni tsuɔ nii yɛ nitsumɔhe ko lɛ, ekolɛ obaanyɛ obi gbɛ bɔni afee ni onyɛ okɛ ohe awo shiɛmɔ nitsumɔ lɛ mli yɛ saramɔ otsi lɛ mli. Mɛi komɛi toɔ gbɛjianɔ ni amɛkɛ amɛhe woɔ gbɛgbalɔi awamɔ nitsumɔ lɛ mli yɛ nyɔɔŋ ni nɔkwɛlɔ lɛ baa lɛ mli. Kɛ́ oto gbɛjianɔ akɛ obaafã gbɛ lɛ, ani obaanyɛ ofee tsakemɔi koni onyɛ ohi shi yɛ nakai otsi lɛ mli?
3. Ákɛ aŋkroaŋkroi lɛ, mɛni ebiɔ ni wɔfee koni wɔnine ashɛ hewalɛwoo nɔ yɛ saramɔ otsi lɛ mli?
3 Yiŋtoo titrii ahewɔ ni kpokpaa nɔkwɛlɔ lɛ basaraa asafo lɛ ateŋ ekome ji ni ekɛ hewalɛwoo kɛ tsɔsemɔ aha mɔ fɛɛ mɔ yɛ shiɛmɔ nitsumɔ lɛ mli. Ani obaanyɛ oto gbɛjianɔ ni okɛ lɛ loo eŋa atsu nii yɛ shiɛmɔ nitsumɔ lɛ mli kɛji akɛ ebote gbalashihilɛ mli? Kpokpaa nɔkwɛlɔ lɛ yɛ he miishɛɛ akɛ ekɛ shiɛlɔi srɔtoi, ni mɛi ni bɛ niiashikpamɔ tsɔ loo amɛhe esako tsɔ lɛ hu fata he lɛ aaatsu nii yɛ shiɛmɔ nitsumɔ lɛ mli. Wɔ fɛɛ wɔbaanyɛ wɔkase nɔ ko kɛjɛ gbɛ nɔ ni etsɔɔ eshiɛɔ lɛ mli, ní wɔkɛ ŋaawoo fɛɛ ni ekolɛ ebaajɛ suɔmɔ mli ekaha wɔ lɛ atsu nii. (1 Kor. 4:16, 17) Kɛ́ ofɔ̃ lɛ nine kɛha niyeli hu lɛ, ehaa onaa hegbɛ kroko ni okɛ lɛ sharaa kɛha hewalɛwoo. (Heb. 13:2) Akɛni wiemɔi ni ehaa lɛ kɔɔ asafo lɛ hiamɔnii ahe hewɔ lɛ, esa akɛ obo toi jogbaŋŋ.
4. Mɛɛ gbɛ nɔ wɔbaanyɛ wɔtsɔ wɔwo wɔkpokpaa nɔkwɛlɔ lɛ hewalɛ?
4 Hewalɛwoo Kɛha Kpokpaa Nɔkwɛlɔ Lɛ: Bɔfo Paulo tamɔ nyɛmimɛi ni esɔmɔ amɛ lɛ nɔŋŋ yɛ gbɛ ko nɔ. Ekɛ naagbai kɛ yeyeeyefeemɔi kpe, ni hewalɛwoo he hia lɛ, ni ená hiɛsɔɔ eha hewalɛwoo ni jɛ nyɛmimɛi lɛ adɛŋ lɛ. (2 Kor. 11:26-28) Beni nyɛmimɛi ni yɔɔ Roma asafo lɛ mli lɛ ná le akɛ ajie Paulo yɛ tsuŋwoo mli ni eeba ebasara amɛ lɛ, amɛteaŋ mɛi komɛi fã gbɛ aaafee kilomitai 74 kɛtee Apiiforo Jara lɛ nɔ koni amɛyakpee lɛ! “Beni Paulo na amɛ lɛ, eda Nyɔŋmɔ shi ni ena tsui.” (Bɔf. 28:15) Bo hu obaanyɛ owo nyɛkpokpaa nɔkwɛlɔ lɛ hewalɛ. Okɛ “woo toi enyɔ” aha lɛ kɛtsɔ miishɛɛ ni okɛaafi esaramɔ lɛ sɛɛ lɛ nɔ. (1 Tim. 5:17) Jiemɔ miishɛɛ kɛ hiɛsɔɔ kpo yɛ mɔdɛŋ ni ebɔɔ yɛ ohewɔ lɛ he. Ekɛ eŋa fɛɛ mii baashɛ amɛhe kɛ́ amɛna ohemɔkɛyeli, suɔmɔ, kɛ otsuishiŋmɛɛ lɛ.—2 Tes. 1:3, 4.
5. Mɛni hewɔ hewalɛwoo he miihia wɔ fɛɛ ŋmɛnɛ lɛ?
5 Yɛ nɛkɛ “jaramɔ bei” nɛɛ amli lɛ, namɔ yɔɔ wɔteŋ ni hewalɛwoo he ehiaaa lɛ? (2 Tim. 3:1) Kpɛɛ oyiŋ bianɛ ní okɛ ohe awo nitsumɔi ni abaatsu yɛ otsi krɛdɛɛ ni kpokpaa nɔkwɛlɔ lɛ baasara nyɛsafo lɛ mli lɛ mli kɛmɔ shi. Kɛ́ nɔkwɛlɔi gbɛfalɔi ji wɔ jio, shiɛlɔi ji wɔ jio lɛ, wɔ fɛɛ wɔbaanyɛ wɔkɛ miishɛɛ awowoo wɔhe hewalɛ. Kɛ́ wɔfee nakai lɛ, ebaaha ‘wɔya nɔ wɔshɛjeshɛjee wɔhe mii, ni wɔha wɔnanemɛi anane amɔ shi.’—1 Tes. 5:11.