Ná Aŋkro Nikasemɔ He Sɛɛ Kɛmɔ Shi

NƆ HEWƆ NI EHE HIAA: Aŋkro Biblia kasemɔ yeɔ ebuaa wɔ ni wɔnuɔ “nɔ ni ji anɔkwale lɛ lɛɛmɔ, kɛ ekɛlɛ, kɛ enɔkwɔlɛ, kɛ emlikwɔlɛ lɛ shishi.” (Efe 3:18) Agbɛnɛ hu, eyeɔ ebuaa wɔ ni wɔyaa nɔ wɔfeɔ mɛi ni shwamɔ kɛ kpa ko bɛ amɛhe yɛ jeŋ fɔŋ nɛɛ mli, ni ‘wɔyaa nɔ wɔhiɛɔ wala wiemɔ lɛ mli kpɛŋŋ.’ (Fip 2:15, 16) Aŋkro Biblia kasemɔ hãa wɔnyɛɔ wɔhalaa nibii ni kɛ́ wɔkase lɛ ebaaye ebua wɔ. Mɛni wɔbaanyɛ wɔfee koni wɔná Biblia lɛ kanemɔ kɛ ekasemɔ he sɛɛ kɛmɔ shi?

BƆ NI OBAAFEE LƐ OHÃ:

• Kɔlamɔ ŋmalɛi, ni oŋmala otii hu yɛ Biblia ni okɛkaseɔ nii lɛ mli​—Biblia diɛŋtsɛ loo nɔ ni yɔɔ tablɛti loo foŋ nɔ

• Be ni okaneɔ Nyɔŋmɔ Wiemɔ lɛ, bi ohe saji nɛɛ: ‘Namɔ? Mɛni? Mɛɛ be? Nɛgbɛ? Mɛni hewɔ? Mɛɛ gbɛ nɔ?’

• Taomɔ nii amli. Okɛ niiamlitaomɔ dɛŋdadei lɛ atsu nii kɛtao nii amli yɛ saneyitsei loo ŋmalɛi ni yɔɔ mli lɛ anaa

• Jwɛŋmɔ nɔ ni okaneɔ lɛ nɔ koni ona bɔ ni ekɔɔ ohe ehãa

• Okɛ nɔ ni okaseɔ lɛ atsu nii daa gbi yɛ oshihilɛ mli.—Luk 6:47, 48

KWƐMƆ VIDIO NI JI, TSƆ AŊKRO NIKASEMƆ NƆ ‘OHIƐ NYƆŊMƆ WIEMƆ LƐ MLI KPƐŊŊ’ LƐ, KONI NO SƐƐ LƐ OHÃ SANEBIMƆI NI NYIƐ SƐƐ LƐ AHETOO:

• Mɛni mɛi komɛi ewie yɛ aŋkro nikasemɔ he?

• Mɛni hewɔ be fɛɛ be kɛ́ wɔyaafee aŋkro nikasemɔ lɛ, esa akɛ wɔsɔle lɛ?

• Mɛni baanyɛ awa wɔ ni wɔnu Biblia mli sane ko shishi jogbaŋŋ?

• Mɛɛ gbɛ nɔ wɔbaanyɛ wɔkɛ kɔlai srɔtoi atsu nii yɛ Biblia ni wɔkɛkaseɔ nii lɛ mli?

• Mɛni hewɔ ehe hiaa waa akɛ wɔbaajwɛŋ nii anɔ kɛ́ wɔmiikase Nyɔŋmɔ Wiemɔ lɛ?

• Mɛni esa akɛ wɔfee yɛ nɔ ni wɔkaseɔ lɛ he?