Bɔ Ni Akɛ Otii Kɛhã Sanegbaa Lɛ Tsuɔ Nii Ahãa

Be saŋŋ nɛ lɛ, akɛ shiɛmɔ wiemɔi loo otii kɛhã sanegbaa woɔ Wɔshiɛmɔ Kɛ Wɔshihilɛ Akɛ Kristofoi​—Kpee Nifeemɔ Wolo lɛ hiɛ. Mɛɛ gbɛ nɔ wɔbaanyɛ wɔkɛtsu nii?

Kɛ́ Ahã Bo Skulbii Asaimɛnt: Esa akɛ okɛ otii kɛhã sanegbaa lɛ mli sanebimɔ, ŋmalɛ, kɛ sanebimɔ ni obaashi lɛ atsu nii. Shi enɛ hu etsɔɔɔ akɛ okɛ otii kɛhã sanegbaa lɛ he vidio lɛ mli wiemɔi lɛ pɛpɛɛpɛ atsu nii. Obaanyɛ otsake shihilɛ, hiɛkpamɔ, niiahesusumɔ, kɛ nibii krokomɛi ni yɔɔ vidio lɛ mli lɛ ahiɛ fioo. Agbɛnɛ hu, obaanyɛ ohã mɔ lɛ Nitsɔɔmɔ Dɛŋdadei Titrii lɛ eko, kɛji awieko nakai yɛ asaimɛnt lɛ he gbɛtsɔɔmɔ lɛ mli po.

Kɛ́ Otee Shiɛmɔ: Akɛ otii kɛhã sanegbaa lɛ hãa wɔ koni wɔna saji ni wɔbaanyɛ wɔwie he yɛ shiɛmɔ nitsumɔ lɛ mli. Kɛ́ mɔ ko nya wiemɔ lɛ he ni eesumɔ ni ele babaoo lɛ, obaanyɛ okɛ lɛ atsa sanegbaa lɛ nɔ, ni kɛ́ ebaahi lɛ, okɛ sɛɛkuukɛsaramɔ lɛ mli wiemɔi lɛ atsu nii. Obaanyɛ otsake otii kɛhã sanegbaa lɛ hiɛ, loo okɛ sane kroko kwraa atsu nii. Ani oshikpɔŋkuku lɛ mli bii lɛ baanya sane ko ni akɛtsu nii yɛ nyɔɔŋ ko ni eho lɛ mli, loo ŋmalɛ kroko kwraa he? Ani mɛi ni yɔɔ he ni oyɔɔ lɛ baasumɔ ni okɛ amɛ agba sane ko ni eba lɛ he sane moŋ? Ekɔɔɔ he eko bɔ ni okɛ otii kɛhã sanegbaa lɛ baatsu nii ohã lɛ, oti ni esa akɛ okɛma ohiɛ ji, ni ‘ofee nibii fɛɛ yɛ sane kpakpa lɛ hewɔ, bɔ ni afee ni ojaje otsɔɔ mɛi krokomɛi.’​—1Ko 9:​22, 23.