Yehowa Tsɔsemɔ Lɛ, Suɔmɔ Ni

Tsɔsemɔ kɔɔ gbɛtsɔɔmɔ kɛ nitsɔɔmɔ he titri, shi ekɔɔ jajemɔ kɛ hiɛkamɔ, loo toigbalamɔ hu he. Yehowa tsɔseɔ wɔ koni wɔjamɔ lɛ asa ehiɛ. (Ro 12:1; Heb 12:10, 11) Bei komɛi lɛ, tsɔsemɔ dɔɔ mɔ moŋ, shi ehãa wɔtsɔmɔɔ jalɔi, ni ajɔɔ wɔ. (Abɛ 10:7) Mɛni esa akɛ mɛi ni tsɔseɔ mɛi, kɛ mɛi ni atsɔseɔ amɛ lɛ, ahã ehi amɛjwɛŋmɔ mli?

Mɔ ni tsɔseɔ mɔ. Asafoŋ onukpai, fɔlɔi, kɛ mɛi krokomɛi bɔɔ mɔdɛŋ waa ni amɛjɛ mlihilɛ kɛ suɔmɔ mli amɛtsɔse mɛi tamɔ Yehowa feɔ lɛ. (Yer 46:28) Kɛ́ ehe bahia ni atsɔse mɔ ko waa po lɛ, esa akɛ ajɛ suɔmɔ mli afee nakai yɛ gbɛ ni sa nɔ.​—Tit 1:13.

Mɔ ni atsɔseɔ lɛ. Ekɔɔɔ he eko nɔ tsɔsemɔ ni akɛbaahã wɔ lɛ, esaaa akɛ wɔkpoɔ, moŋ lɛ, esa akɛ wɔkɛtsu nii oya nɔŋŋ. (Abɛ 3:11, 12) Akɛni wɔyeee emuu hewɔ lɛ, tsɔsemɔ he hiaa wɔ fɛɛ, ni ebaa lɛ yɛ gbɛi srɔtoi anɔ. Sane ko ni wɔbaakane yɛ Biblia lɛ mli loo wɔbaanu yɛ asafoŋ kpee shishi lɛ, baanyɛ afee tsɔsemɔ kɛhã wɔ. Bei komɛi lɛ, ehe bahiaa ni saneyeli ajinafoi akuu ko atsɔse wɔ. Kɛ́ wɔmɔ tsɔsemɔ mli lɛ, no tsɔɔ akɛ, wɔkɔ wala gbɛ lɛ.​—Abɛ 10:17.

KWƐMƆ VIDIO NI JI, “MƐI NI YEHOWA SUMƆƆ LƐ, AMƐ ETSƆSEƆ” LƐ, KONI NO SƐƐ LƐ OHÃ SANEBIMƆI NI NYIƐ SƐƐ NƐƐ AHETOO:

• 

  Shishijee lɛ, te Canon shihilɛ tamɔ tɛŋŋ, ni mɛɛ gbɛ nɔ eshihilɛ tsake?

• 

  Mɛɛ tsɔsemɔ Yehowa jɛ suɔmɔ mli ekɛhã lɛ?

• 

  Mɛni wɔbaanyɛ wɔkase kɛjɛ esane lɛ mli?