NIKASEMƆ 20
Kpojiemɔ Wolo Lɛ—Nɔ Ni Etsɔɔ Akɛ Ebaaba Mɛi Ni Nyɛɔ Nyɔŋmɔ Lɛ Anɔ
“Amɛbua maŋtsɛmɛi lɛ anaa kɛtee he ko ni atsɛɔ jɛmɛ yɛ Hebri mli akɛ Harmagedon.”—KPO. 16:16.
LALA 150 Taomɔ Nyɔŋmɔ Sɛɛ Gbɛ Koni Ehere Oyiwala
NƆ NI ABAASUSU HEa
1. Mɛni Kpojiemɔ wolo lɛ hãa wɔleɔ akɛ Satan miifee Nyɔŋmɔ tsuji?
KPOJIEMƆ wolo lɛ hãa wɔleɔ akɛ, awó Yesu Kristo Nyɔŋmɔ Maŋtsɛyeli lɛ nɔ maŋtsɛ, ni ashwie Satan kɛje ŋwɛi. (Kpo. 12:1-9) Shwiemɔ ni ashwie Satan kɛje ŋwɛi lɛ ehã mɛi ni yɔɔ jɛmɛ lɛ ahe ejɔ amɛ, shi ekɛ naagbai eba Yehowa tsuji ni yɔɔ shikpɔŋ lɛ nɔ lɛ anɔ. Mɛni hewɔ? Ejaakɛ Satan kɛ emlifu lɛ ebato Yehowa tsuji anɔkwafoi ni yɔɔ shikpɔŋ lɛ nɔ lɛ anɔ.—Kpo. 12:12, 15, 17.
2. Mɛni baaye abua wɔ ni wɔye Yehowa anɔkwa?
2 Mɛni baaye abua wɔ ni wɔye anɔkwa yɛ tutuamɔ ni Satan tutuaa wɔ lɛ fɛɛ sɛɛ? (Kpo. 13:10) Nɔ kome ni baaye abua wɔ ji, ni wɔbaale nɔ ni baaba wɔsɛɛ. Akɛ nɔkwɛmɔnɔ lɛ, yɛ Kpojiemɔ wolo lɛ mli lɛ, bɔfo Yohane wie jɔɔmɔi ni etsɛŋ wɔbaaná lɛ ahe. Jɔɔmɔi nɛɛ eko ji akɛ, abaakpãtã mɛi fɛɛ ni nyɛɔ Nyɔŋmɔ lɛ ahiɛ. Agbɛnɛ, nyɛhãa wɔkwɛa nɔ ni Kpojiemɔ wolo lɛ wieɔ yɛ henyɛlɔi nɛɛ ahe kɛ nɔ ni baaba amɛnɔ.
“OKADII” NI HÃA WƆNAA MƐI NI NYƐƆ NYƆŊMƆ LƐ
3. Mɛni ji okadii ni awie he yɛ Kpojiemɔ wolo lɛ mli lɛ ekomɛi?
3 Kpojiemɔ 1:1 lɛ hãa wɔleɔ akɛ, “okadii” sɔŋŋ ni yɔɔ Kpojiemɔ wolo lɛ mli, ni tsɔɔ akɛ, nibii ni awie he yɛ mli lɛ feɔ nibii komɛi ahe mfoniri. Okadii nɛɛ ekomɛi ji kooloi awuiyelɔi ni awie amɛhe yɛ wolo nɛɛ mli lɛ, ni amɛdamɔ shi kɛhã mɛi ni nyɛɔ Nyɔŋmɔ lɛ. Akɛ nɔkwɛmɔnɔ lɛ, awie “kooloo awuiyelɔ ko [ni] miije kpo kɛmiijɛ ŋshɔ lɛ mli kɛmiiba” lɛ he. Ni akɛɛ “eyɛ akolontoi nyɔŋma kɛ yitsei kpawo.” (Kpo. 13:1) No sɛɛ lɛ, awie “kooloo awuiyelɔ kroko ni miije kpo kɛmiijɛ shikpɔŋ lɛ mli” lɛ he. Kooloo awuiyelɔ nɛɛ wieɔ tamɔ drako ni “ehãa la po jɛɔ ŋwɛi baa shikpɔŋ lɛ nɔ.” (Kpo. 13:11-13) Kooloi nɛɛ asɛɛ lɛ, wɔnaa “kooloo awuiyelɔ ko ni tsuɔ waa” ni yoo ashawo ko ta enɔ. Kooloi awuiyelɔi etɛ nɛɛ damɔ shi kɛhã mɛi ni kɛjɛ blema tɔ̃ɔ kɛbashi ŋmɛnɛ lɛ, amɛnyɛɔ Yehowa Nyɔŋmɔ ni amɛteɔ shi amɛwoɔ e-Maŋtsɛyeli lɛ. No hewɔ lɛ, ehe miihia ni wɔle mɛi ni kooloi nɛɛ damɔ shi kɛhã.—Kpo. 17:1, 3.
KOOLOI WUJI EJWƐ
Amɛfã kpo “kɛjɛ ŋshɔ lɛ mli.” (Dan. 7:1-8, 15-17) Amɛdamɔ shi kɛhã nɔyelii ni hi shi kɛjɛ Daniel beiaŋ kɛbaa ni ye maji ni Nyɔŋmɔ webii fa waa yɛ jɛmɛ lɛ anɔ loo amɛwa Nyɔŋmɔ webii lɛ ayi (Kwɛmɔ kuku 4, 7)
4-5. Mɛɛ gbɛ nɔ Daniel 7:15-17 lɛ yeɔ ebuaa wɔ ni wɔnaa nɔ ni okadii ni yɔɔ Kpojiemɔ wolo lɛ mli lɛ feɔ he mfoniri?
4 Shi dani wɔbaanyɛ wɔtsɔɔ mɛi ni kooloi awuiyelɔi nɛɛ damɔ shi kɛhã lɛ, esa akɛ wɔle nɔ ni bei pii lɛ akɛ kooloi awuiyelɔi feɔ he mfoniri yɛ Biblia lɛ mli. Ni Biblia lɛ diɛŋtsɛ yeɔ ebuaa wɔ ni wɔleɔ enɛ. Okadii ni yɔɔ Kpojiemɔ wolo lɛ mli lɛ pii yɛ Biblia woji krokomɛi hu amli. Akɛ nɔkwɛmɔnɔ lɛ, gbalɔ Daniel na “kooloi wuji ejwɛ fã kpo kɛjɛ ŋshɔ lɛ mli” yɛ lamɔ ko ni ela lɛ mli. (Dan. 7:1-3) Daniel tsɔɔ wɔ nɔ ni kooloi wuji nɛɛ damɔ shi kɛhã. Ekɛɛ amɛdamɔ shi kɛhã “maŋtsɛmɛi” ejwɛ loo nɔyelii ejwɛ. (Kanemɔ Daniel 7:15-17.) Enɛ hewɔ lɛ, wɔbaanyɛ wɔmu sane naa akɛ, kooloi awuiyelɔi ni awie amɛhe yɛ Kpojiemɔ wolo lɛ mli lɛ hu damɔ shi kɛhã nɔyelii.
5 Agbɛnɛ, nyɛhãa wɔsusua okadii ni awie he yɛ Kpojiemɔ wolo lɛ mli lɛ ekomɛi ahe wɔkwɛa. Be ni wɔfeɔ nakai lɛ, wɔbaana bɔ ni Biblia lɛ baaye abua wɔ ni wɔle mɛi ni okadii nɛɛ damɔ shi kɛhã. Wɔkɛ kooloi awuiyelɔi srɔtoi lɛ baaje shishi. Klɛŋklɛŋ lɛ, wɔbaakwɛ mɛi ni amɛdamɔ shi kɛhã. No sɛɛ lɛ, wɔbaakwɛ nɔ ni baaba amɛnɔ. Kɛ naagbee kwraa lɛ, nɔ ni enɛ biɔ ni wɔfee.
AHÃ WƆLE MƐI NI NYƐƆ NYƆŊMƆ LƐ
KOOLOO AWUIYELƆ NI YƆƆ YITSEI KPAWO
Eje kpo kɛjɛ “ŋshɔ lɛ mli” kɛba, eyɛ yitsei kpawo kɛ akolontoi nyɔŋma, ni maŋtsɛ faii nyɔŋma bumɔ ekolontoi lɛ anɔ. (Kpo. 13:1-4) Edamɔ shi kɛhã nɔyelii fɛɛ ni eye adesai anɔ kɛjɛ blema kɛbashi ŋmɛnɛ. Yitsei kpawo lɛ damɔ shi kɛhã nɔyelii kpawo ni ye maji ni Nyɔŋmɔ webii fa waa yɛ jɛmɛ lɛ anɔ loo amɛwa Nyɔŋmɔ webii lɛ ayi (Kwɛmɔ kuku 6-8)
6. Mɛni kooloo awuiyelɔ ni yɔɔ yitsei kpawo ni awie he yɛ Kpojiemɔ 13:1-4 lɛ damɔ shi kɛhã?
6 Mɛni kooloo awuiyelɔ ni yɔɔ yitsei kpawo lɛ damɔ shi kɛhã? (Kanemɔ Kpojiemɔ 13:1-4.) Awie akɛ, kooloo awuiyelɔ nɛɛ tamɔ kootsɛ, shi enaji tamɔ oshishibrishi naji, ni enaabu tamɔ jata naabu, ni eyɛ akolontoi nyɔŋma. Nibii ni awie yɛ kooloo nɛɛ he lɛ gbalaa wɔjwɛŋmɔ kɛyaa kooloi ejwɛ ni awie amɛhe yɛ Daniel yitso 7 lɛ mli lɛ anɔ. Ekome tamɔ jata, ekome hu tamɔ oshishibrishi, ekome tamɔ kootsɛ, ni ekroko hu yɛ akolontoi nyɔŋma. Shi kooloo awuiyelɔ ni awie he yɛ Kpojiemɔ wolo lɛ mli lɛ tamɔ kooloi ejwɛ nɛɛ fɛɛ ni akɛtsa. No hewɔ lɛ, kooloo awuiyelɔ nɛɛ damɔɔɔ shi kɛhãaa nɔyeli kome pɛ. Yohane wie yɛ kooloo nɛɛ he akɛ, “ahã lɛ hegbɛ yɛ weku fɛɛ weku kɛ gbɔmɛi srɔtoi fɛɛ kɛ wiemɔ fɛɛ wiemɔ kɛ jeŋmaŋ fɛɛ jeŋmaŋ nɔ.” (Kpo. 13:7) Enɛ hãa wɔnaa lɛɛlɛŋ akɛ, ejeee nɔyeli kome pɛ. Kɛ́ nakai ni lɛ, mɛni kooloo awuiyelɔ nɛɛ damɔ shi kɛhã mɔ? Edamɔ shi kɛhã nɔyelii fɛɛ ni eye adesai anɔ kɛjɛ blema kɛbashi ŋmɛnɛ.b—Jaj. 8:9.
7. Mɛni kooloo awuiyelɔ lɛ yitsei kpawo lɛ ateŋ eko fɛɛ eko damɔ shi kɛhã?
7 Mɛni yitsei kpawo lɛ ateŋ eko fɛɛ eko damɔ shi kɛhã? Kpojiemɔ yitso 17 lɛ wieɔ kooloo awuiyelɔ ni awie he yɛ Kpojiemɔ yitso 13 lɛ he amaga ko he. Ni enɛ yeɔ ebuaa wɔ ni wɔnaa nɔ ni yitsei kpawo lɛ eko fɛɛ eko damɔ shi kɛhã. Kpojiemɔ 17:10 lɛ kɛɔ akɛ: “Maŋtsɛmɛi kpawo yɔɔ: Enumɔ egbee shi, ekome yɛ, ni ekroko lɛ náko aba; shi kɛ́ eba lɛ, esa akɛ ehi shi be fioo.” Yɛ nɔyelii fɛɛ ni eye adesai anɔ kɛjɛ blema kɛbashi ŋmɛnɛ lɛ ateŋ lɛ, kpawo komɛi yɛ ni abaanyɛ abu amɛ akɛ “yitsei,” ejaakɛ amɛná hewalɛ waa. Nɔyelii kpawo nɛɛ ye maji ni Nyɔŋmɔ webii fa waa yɛ jɛmɛ lɛ anɔ loo amɛwa Nyɔŋmɔ webii lɛ ayi. Yɛ bɔfo Yohane beiaŋ lɛ, nɔyelii nɛɛ ateŋ enumɔ eba etee momo. Amɛji Ejipt, Asiria, Babilon, Medo-Persia, kɛ Grees. Be ni Yesu jie ninaa lɛ kpo etsɔɔ Yohane lɛ, no mli lɛ nɔ ni ji ekpaa lɛ, ni ji Roma miiye nɔ. Shi mɛɛ nɔyeli ni yɔɔ hewalɛ waa baafee nɔ ni ji kpawo kɛ naagbee nɔ?
8. Mɛɛ nɔyeli kooloo awuiyelɔ lɛ yitso ni ji kpawo lɛ damɔ shi kɛhã?
8 Tamɔ bɔ ni wɔbaana yɛ kuku ni nyiɛ sɛɛ lɛ mli lɛ, gbalɛi ni yɔɔ Daniel wolo lɛ mli lɛ yeɔ amɛbuaa wɔ ni wɔleɔ nɔ ni kooloo awuiyelɔ lɛ naagbee yitso lɛ, ni ji eyitso ni ji kpawo lɛ damɔ shi kɛhã. Mɛɛ nɔyeli baatsɔ nɔyeli ni he wa waa yɛ naagbee gbii nɛɛ, ni ji “Nuŋtsɔ lɛ gbi lɛ” lɛ mli? (Kpo. 1:10) No ji, United Kingdom (UK) nɔyeli lɛ kɛ United States of America (US) nɔyeli lɛ ni efee ekome. Gbɛ́i kroko ni akɛle nɔyeli ni he wa waa nɛɛ ji, Anglo-Amerika nɔyeli lɛ. No hewɔ lɛ, wɔbaanyɛ wɔwie akɛ nɛkɛ nɔyeli nɛɛ ji kooloo awuiyelɔ lɛ ni atsĩ etã yɛ Kpojiemɔ 13:1-4 lɛ yitso ni ji kpawo lɛ.
KOOLOO AWUIYELƆ NI YƆƆ AKOLONTOI ENYƆ TAMƆ GWANTƐŊBI
Eje kpo kɛjɛ “shikpɔŋ lɛ mli” ni ewieɔ “tamɔ drako.” “Ehãa la . . . jɛɔ ŋwɛi baa,” ni lɛ ji “amale gbalɔ” ni feɔ okadii lɛ. (Kpo. 13:11-15; 16:13; 19:20) Kooloo awuiyelɔ ni yɔɔ akolontoi enyɔ lɛ kɛ amale gbalɔ lɛ fɛɛ damɔ shi kɛhã Anglo-Amerika, ni elakaa mɛi ni yɔɔ shikpɔŋ lɛ nɔ lɛ ni ekɛɔ amɛ akɛ amɛfee “kooloo awuiyelɔ lɛ” ni hiɛ yitsei kpawo kɛ akolontoi nyɔŋma lɛ he “amaga” (Kwɛmɔ kuku 9)
9. Mɛni kooloo awuiyelɔ lɛ ni yɔɔ “akolontoi enyɔ tamɔ gwantɛŋbi” lɛ damɔ shi kɛhã?
9 Kpojiemɔ yitso 13 lɛ hãa wɔleɔ hu akɛ, yitso ni ji kpawo lɛ, ni ji Anglo-Amerika nɔyeli lɛ feɔ enii tamɔ kooloo awuiyelɔ ko ni yɔɔ “akolontoi enyɔ tamɔ gwantɛŋbi, shi ebɔi wiemɔ tamɔ drako” lɛ. Kooloo awuiyelɔ nɛɛ feɔ “okadii wuji, ni ehãa la po jɛɔ ŋwɛi baa shikpɔŋ lɛ nɔ yɛ gbɔmɛi ahiɛ.” (Kpo. 13:11-15) Yɛ Kpojiemɔ yitso 16 kɛ 19 lɛ, atsɛ kooloo awuiyelɔ nɛɛ akɛ “amale gbalɔ lɛ.” (Kpo. 16:13; 19:20) Yɛ Daniel wolo lɛ mli lɛ, awie nɔ ko ni tamɔ nakai nɔŋŋ yɛ Anglo-Amerika nɔyeli lɛ he. Akɛɛ “ebaakpãtã nii ahiɛ waa diɛŋtsɛ.” (Dan. 8:19, 23, 24) Ni nakai pɛpɛɛpɛ eba lɛ. Yɛ jeŋ ta ni ji enyɔ lɛ mli lɛ, aŋmɛɛ okplɛmii loo bɔmbs enyɔ komɛi ahe awo Japan. Okplɛmii nɛɛ kpãtã nii ahiɛ waa ni ehã akpa ta lɛ wuu. Ani ole mɛi ni fee nakai okplɛmii lɛ? Jeŋ shikpalɔi ni jɛ Britain kɛ Amerika fee ekome ni amɛfee. Okplɛmii enyɔ nɛɛ anɔ Anglo-Amerika nɔyeli lɛ tsɔ ehã ‘la jɛ ŋwɛi kɛba shikpɔŋ lɛ nɔ.’
KOOLOO AWUIYELƆ NI TSUƆ WAA
Ashawo ko ni atsɛɔ lɛ Babilon Kpeteŋkpele lɛ ta enɔ. Awie kooloo awuiyelɔ nɛɛ he akɛ maŋtsɛ ni ji kpaanyɔ. (Kpo. 17:3-6, 8, 11) Bianɛ lɛ, ashawo lɛ ni kudɔɔ kooloo awuiyelɔ lɛ, shi sɛɛ mli lɛ kooloo lɛ baakpãtã ehiɛ. Ashawo lɛ damɔ shi kɛhã amale jamɔi fɛɛ ni yɔɔ je lɛ mli. Kooloo awuiyelɔ lɛ damɔ shi kɛhã Jeŋmaji Ekomefeemɔ lɛ. Jeŋmaji Ekomefeemɔ lɛ yeɔ ebuaa nɔyelii ni yɔɔ jeŋ fɛɛ lɛ koni amɛshɛ otii ni amɛkɛmamɔ amɛhiɛ lɛ ahe (Kwɛmɔ kuku 10, 14-17)
10. Mɛni “kooloo awuiyelɔ lɛ amaga lɛ” damɔ shi kɛhã? (Kpojiemɔ 13:14, 15; 17:3, 8, 11)
10 Kpojiemɔ wolo lɛ wie kooloo awuiyelɔ kroko ko hu he. Kooloo awuiyelɔ nɛɛ tamɔ klɛŋklɛŋ kooloo awuiyelɔ ni yɔɔ yitsei kpawo lɛ nɔŋŋ, shi lɛ lɛ etsuɔ waa ni awie ehe akɛ eji “maŋtsɛ ni ji kpaanyɔ.”c Kooloo nɛɛ nɔŋŋ ji “kooloo awuiyelɔ lɛ amaga lɛ.” (Kanemɔ Kpojiemɔ 13:14, 15; 17:3, 8, 11.) Ahã Yohane le akɛ, “maŋtsɛ” nɛɛ baaba, ebaaya, ni ebaasaa eba ekoŋŋ. Nɔ ni awie nɛɛ kɔɔɔ gbɛjianɔtoo ko gbɛjianɔtoo ko he fe Jeŋmaji Ekomefeemɔ lɛ. Jeŋmaji Ekomefeemɔ lɛ yeɔ ebuaa nɔyelii ni yɔɔ jeŋ fɛɛ lɛ koni amɛshɛ otii ni amɛkɛmamɔ amɛhiɛ lɛ ahe. Be ni eba klɛŋklɛŋ lɛ, no mli lɛ atsɛɔ lɛ Jeŋmaji Akpaŋmɔ lɛ. Shi etee be ni awuɔ jeŋ ta ni ji enyɔ lɛ, ni esaa eba ekoŋŋ yɛ wɔbei nɛɛ amli ni abale lɛ akɛ Jeŋmaji Ekomefeemɔ.
11. Mɛni kooloi awuiyelɔi lɛ baafee? Shi mɛni hewɔ esaaa akɛ wɔsheɔ gbeyei?
11 Kooloi awuiyelɔi lɛ loo je lɛŋ nɔyelii lɛ baatsirɛ mɛi ni amɛte shi amɛwo Yehowa kɛ ewebii lɛ. Yohane kɛɛ yɛ gbɛ ko nɔ lɛ, amɛbaabua “shikpɔŋ muu lɛ fɛɛ nɔ maŋtsɛmɛi lɛ” anaa kɛya “Nyɔŋmɔ Ofe lɛ gbi wulu lɛ nɔ ta lɛ” ni ji, Harmagedon ta lɛ. (Kpo. 16:13, 14, 16) Shi esaaa akɛ wɔsheɔ enɛ gbeyei, ejaakɛ Yehowa wɔ-Nyɔŋmɔ Ofe lɛ he baafee oya ni ehere mɛi fɛɛ ni fiɔ enɔyeli lɛ sɛɛ lɛ.—Eze. 38:21-23.
12. Mɛni baaba kooloi awuiyelɔi lɛ fɛɛ anɔ?
12 Mɛni baaba kooloi awuiyelɔi lɛ fɛɛ anɔ? Kpojiemɔ 19:20 lɛ kɛɛ: “Amɔ kooloo awuiyelɔ lɛ, ni amɔ amale gbalɔ lɛ, mɔ ni fee okadii yɛ kooloo awuiyelɔ lɛ hiɛ ni ekɛlaka mɛi ni ná kooloo awuiyelɔ lɛ okadi lɛ kɛ mɛi ni jáa emaga lɛ, afata ehe. Be ni mɛi enyɔ nɛɛ fɛɛ ahiɛ kamɔ lolo lɛ, ashɛrɛ amɛ awo la kpaakpo ni tsoɔ kɛ sɔlfa lɛ mli.” No hewɔ lɛ, nɔyelii nɛɛ anɔyelii lɛ baŋ naagbee ni Nyɔŋmɔ diɛŋtsɛ baakpãtã amɛhiɛ kɛya naanɔ.
13. Mɛɛ naagba Kristofoi kɛbaakpe?
13 Mɛni enɛ biɔ ni wɔfee? Akɛni Kristofoi ji wɔ hewɔ lɛ, esa akɛ wɔfi Nyɔŋmɔ kɛ e-Maŋtsɛyeli lɛ sɛɛ. (Yoh. 18:36) Nɔ ni wɔbaafee ni baatsɔɔ nakai ji, ni wɔbaatsi wɔhe kɛje pɔlitis kɛ maŋ saji ahe. Shi wɔnáŋ lɛ mlɛo akɛ wɔbaafee nakai, ejaakɛ je lɛŋ nɔyelii lɛ baanyɛ wɔnɔ ni wɔkɛ wɔwiemɔi kɛ wɔnifeemɔi atsɔɔ akɛ wɔfiɔ amɛsɛɛ. Mɔ fɛɛ mɔ ni baayafi amɛsɛɛ lɛ baaná kooloo lɛ okadi lɛ eko. (Kpo. 13:16, 17) Shi mɔ fɛɛ mɔ ni baahe nakai okadi lɛ eko lɛ, Yehowa mli baafu lɛ ni ebaakpãtã ehiɛ. (Kpo. 14:9, 10; 20:4) Enɛ hewɔ lɛ, ehe miihia waa ni wɔteŋ mɔ fɛɛ mɔ atsi ehe kɛje pɔlitis kɛ maŋ saji ahe kwraa ekɔɔɔ he eko bɔ ni abaanyɛ enɔ ni ekɛ ehe awo mli.
ASHAWO KPETEŊKPELE LƐ NAAGBEE EHIŊ KWRAA
14. Tamɔ bɔ ni awie yɛ Kpojiemɔ 17:3-5 lɛ, mɛni bɔfo Yohane na ni hã enaa kpɛ ehe naakpa?
14 Agbɛnɛ, bɔfo Yohane kɛɛ ena nɔ ko ni hã ‘enaa kpɛ ehe naakpa.’ Mɛni ena? Ena yoo ko ta kooloi awuiyelɔi ni he yɔɔ gbeyei nɛɛ ateŋ ekome nɔ. (Kpo. 17:1, 2, 6) Akɛɛ yoo lɛ ji “ashawo kpeteŋkpele,” ni atsɛɔ lɛ “Babilon Kpeteŋkpele lɛ.” Ekɛ “shikpɔŋ lɛ nɔ maŋtsɛmɛi” lɛ ‘bɔ ajwamaŋ.’—Kanemɔ Kpojiemɔ 17:3-5.
15-16. Mɛni “Babilon Kpeteŋkpele lɛ” damɔ shi kɛhã? Ni mɛni hewɔ wɔkɛɔ nakai?
15 Mɛni “Babilon Kpeteŋkpele lɛ” damɔ shi kɛhã? Ani edamɔ shi kɛhã je lɛŋ nɔyelii lɛ? Dabi. Ejaakɛ Kpojiemɔ wolo lɛ kɛɛ ekɛ je lɛŋ nɔyelɔi lɛ miibɔ ajwamaŋ. (Kpo. 18:9) Anɔkwa, eta amɛnɔ, ejaakɛ eebɔ mɔdɛŋ akɛ ebaakudɔ amɛ. Agbɛnɛ hu, edamɔɔɔ shi kɛhãaa Satan je lɛŋ jarayeli gbɛjianɔtoi ni shishiuɔ mɛi lɛ. Mɛni hewɔ? Ejaakɛ awie amɛhe sɛɛ mli, ni atsɛ amɛ akɛ “shikpɔŋ lɛ nɔ jarayelɔi lɛ.”—Kpo. 18:11, 15, 16.
16 Bei pii lɛ, kɛ́ akɛ wiemɔ ni ji “ashawo” lɛ tsu nii yɛ Biblia lɛ mli lɛ, ekɔɔ mɛi ni wieɔ akɛ amɛmiisɔmɔ Nyɔŋmɔ shi amɛkɛ amɛhe woɔ wɔŋjamɔ nifeemɔi amli loo amɛkɛ je lɛ bɔɔ naanyo yɛ gbɛ ko nɔ lɛ ahe. (1 Kro. 5:25; Yak. 4:4) Shi bei pii lɛ, Biblia lɛ wieɔ mɛi ni yeɔ Nyɔŋmɔ anɔkwa lɛ ahe akɛ mɛi ni “he tse” loo “oblahii ni kɛ yei náko bɔlɛ dã.” (2 Kor. 11:2; Kpo. 14:4) Ale blema Babilon akɛ he ko ni amale jamɔ he shi yɛ jɛmɛ waa. No hewɔ lɛ, wɔbaanyɛ wɔkɛɛ akɛ gbɛ́i ni ji Babilon Kpeteŋkpele lɛ damɔ shi kɛhã amale jamɔi fɛɛ ni yɔɔ je lɛ lɛ mli lɛ.—Kpo. 17:5, 18; kwɛmɔ sane ni yɔɔ jw.org lɛ nɔ ni yitso ji, “Mɛni Ji Babilon Kpeteŋkpele Lɛ?”
17. Mɛni baaba Babilon Kpeteŋkpele lɛ nɔ?
17 Mɛni baaba Babilon Kpeteŋkpele lɛ nɔ? Kpojiemɔ 17:16, 17 lɛ wie akɛ: “Akolontoi nyɔŋma ni ona lɛ kɛ kooloo awuiyelɔ lɛ, amɛbaanyɛ ashawo yoo lɛ ni amɛbaafee lɛ butuu ni amɛbaajie ehe fɛɛ, ni amɛbaaye eheloo ni amɛkɛ la baashã lɛ kwraa. Ejaakɛ Nyɔŋmɔ kɛwo amɛtsuiiaŋ koni amɛtsu eyiŋtoo he nii.” No hewɔ lɛ, Yehowa baatsirɛ jeŋmaji lɛ koni amɛtsɔ kooloo awuiyelɔ ni tsuɔ waa, ni ji, Jeŋmaji Ekomefeemɔ lɛ nɔ amɛkpãtã amale jamɔi fɛɛ ni yɔɔ je lɛ mli lɛ ahiɛ kwraa.—Kpo. 18:21-24.
18. Mɛni kɛ́ wɔfee lɛ ebaatsɔɔ akɛ wɔtsi wɔhe kɛje Babilon Kpeteŋkpele lɛ he kwraa?
18 Mɛni enɛ biɔ ni wɔfee? Esa akɛ wɔya nɔ wɔhã wɔjamɔ afee nɔ ni “he tse ni abuleko yɛ wɔ-Nyɔŋmɔ kɛ wɔ-Tsɛ lɛ hiɛ.” (Yak. 1:27) No hewɔ lɛ, esaaa akɛ wɔboɔ Babilon Kpeteŋkpele lɛ amale tsɔɔmɔi lɛ toi, ni esaaa akɛ wɔkɛ wɔhe woɔ gbijurɔyelii ni jɛ wɔŋjamɔ mli, jeŋba gbohii, kɛ mumɔi kɛ shãramɔ nifeemɔi ni yaa nɔ yɛ Babilon Kpeteŋkpele lɛ mli lɛ amli! Ni esa akɛ wɔya nɔ wɔbo wɔtsɛ mɛi koni ‘amɛje emli’ ni amɛkɛ lɛ akaná “gbɛfaŋnɔ yɛ ehe eshai lɛ amli.”—Kpo. 18:4.
NƆ NI BAABA MƆ NI NYƐƆ NYƆŊMƆ FE FƐƐ LƐ NƆ
DRAKO KPETEŊKPELE NI TSUƆ TAMƆ LALILƐI
Satan kɛ hegbɛ ehã kooloo awuiyelɔ ni yɔɔ yitsei kpawo lɛ. (Kpo. 12:3, 9, 13; 13:4; 20:2, 10) Abaashɛ Satan, ni ji mɔ ni fe fɛɛ ni nyɛɔ Yehowa lɛ afɔ̃ bu kwɔŋkwɔŋ lɛ mli afii 1,000. No sɛɛ lɛ, abaashɛ lɛ awo “la kɛ sɔlfa kpaakpo lɛ mli” (Kwɛmɔ kuku 19-20)
19. Namɔ ji “drako kpeteŋkpele ni tsuɔ tamɔ lalilɛi” lɛ?
19 Kpojiemɔ wolo lɛ wieɔ “drako kpeteŋkpele ni tsuɔ tamɔ lalilɛi” ko hu he. (Kpo. 12:3) Drako nɛɛ kɛ Yesu kɛ ebɔfoi lɛ wu. (Kpo. 12:7-9) Ewaa Nyɔŋmɔ webii lɛ ayi ni ehãa kooloo awuiyelɔ lɛ loo je lɛŋ nɔyelɔi lɛ hewalɛ. (Kpo. 12:17; 13:4) Namɔ ji drako nɛɛ? Ejeee mɔ ko mɔ ko fe “blema onufu lɛ, ni atsɛɔ lɛ Abonsam kɛ Satan lɛ.” (Kpo. 12:9; 20:2) Lɛ ji mɔ ni kudɔɔ mɛi fɛɛ ni nyɛɔ Yehowa lɛ.
20. Mɛni baaba drako lɛ nɔ?
20 Mɛni baaba drako lɛ nɔ? Kpojiemɔ 20:1-3 lɛ hãa wɔleɔ akɛ ŋwɛibɔfo ko baamɔ Satan, ni eshɛ lɛ efɔ̃ bu kwɔŋkwɔŋ ko mli. Ebaafee tamɔ nɔ ni awo lɛ tsuŋ yɛ jɛmɛ. Enáŋ hegbɛ “[elaka] jeŋmaji lɛ dɔŋŋ kɛyashi be ni afii 1,000 lɛ baaba naagbee.” Naagbee lɛ, abaashɛ Satan kɛ edaimonioi lɛ awo “la kɛ sɔlfa kpaakpo lɛ mli,” ni tsɔɔ akɛ abaakpãtã amɛhiɛ kwraa. (Kpo. 20:10) Kwɛ bɔ ni jeŋ baajɔ ahã kɛ́ Satan kɛ edaimonioi lɛ bɛ dɔŋŋ! Nakai be lɛ, wɔbaaná miishɛɛ waa.
21. Mɛni hewɔ esa akɛ nɔ ni wɔkane yɛ Kpojiemɔ wolo lɛ mli lɛ ahã wɔná miishɛɛ lɛ?
21 Eŋɔɔ wɔnaa waa akɛ wɔnu okadii ni yɔɔ Kpojiemɔ wolo lɛ mli lɛ ashishi. Wɔna mɛi ni nyɛɔ Yehowa lɛ kɛ nɔ ni baaba amɛ nɔ. Lɛɛlɛŋ, “mɔ ni kaneɔ gbalɛ nɛɛ mli wiemɔi lɛ kɛ mɛi ni nuɔ emli wiemɔi lɛ . . . yɛ miishɛɛ”! (Kpo. 1:3) Shi kɛ́ akpãtã mɛi ni nyɛɔ Nyɔŋmɔ lɛ ahiɛ lɛ, mɛɛ jɔɔmɔi adesai ni yeɔ anɔkwa lɛ baaná? Abaahã sanebimɔ nɛɛ hetoo yɛ nikasemɔ ni nyiɛ sɛɛ lɛ mli.
LALA 23 Yehowa Maŋtsɛyeli Lɛ Miiye Nɔ
a Kpojiemɔ wolo lɛ tsɔɔ okadii anɔ eyeɔ ebuaa wɔ koni wɔle mɛi ni nyɛɔ Nyɔŋmɔ lɛ. Daniel wolo lɛ yeɔ ebuaa wɔ ni wɔleɔ nɔ ni okadii nɛɛ damɔ shi kɛhã. Yɛ nikasemɔ nɛɛ mli lɛ, wɔkɛ gbalɛi komɛi ni yɔɔ Daniel wolo lɛ mli lɛ baato gbalɛi komɛi ni yɔɔ Kpojiemɔ wolo lɛ mli ni je nɔ ni yɔɔ Daniel wolo lɛ mli lɛ ahe. Enɛ baaye abua wɔ ni wɔyoo mɛi ni nyɛɔ Nyɔŋmɔ lɛ. No sɛɛ lɛ, wɔbaakwɛ nɔ ni baaba amɛnɔ.
b Nɔ kroko ni hãa wɔnaa akɛ kooloo awuiyelɔ ni yɔɔ yitsei kpawo lɛ damɔ shi kɛhã nɔyelii fɛɛ ni eye adesai anɔ lɛ ji, “eyɛ akolontoi nyɔŋma.” Yɛ Biblia lɛ mli lɛ, kɛ́ akɛ yibɔ ni ji nyɔŋma lɛ tsu nii lɛ, bei pii lɛ, etsɔɔ nɔ ko ni eye emuu.
c Nɔ kome ni sa kadimɔ ji akɛ, klɛŋklɛŋ kooloo awuiyelɔ lɛ yɛ “maŋtsɛ faii” bumɔ ekolontoi lɛ anɔ. (Kpo. 13:1) Shi kooloo awuiyelɔ lɛ amaga lɛ bɛ eko. Mɛni hewɔ? Ejaakɛ “ejɛ maŋtsɛmɛi kpawo lɛ mli” ni amɛ amɛhãa lɛ hewalɛ.—Kwɛmɔ sane ni yɔɔ jw.org lɛ nɔ ni yitso ji, “Mɛni Ji Kooloo Ni Tsuɔ Fɔɔ Ni Awie Ehe Yɛ Kpojiemɔ Yitso 17 Lɛ?”