Yehowa Shiŋ Wɔ Kɔkɔɔkɔ!

1-2. (a) Kɛ́ wɔkɛ naagbai miikpe lɛ, mɛni hewɔ wɔbaanyɛ wɔkɛɛ akɛ Yehowa shiŋ wɔ kɔkɔɔkɔ lɛ? (b) Mɛni he wɔbaasusu yɛ nikasemɔ nɛɛ mli?

KƐ́ WƆKƐ shihilɛi ni mli wawai kpe lɛ, ebaanyɛ ehã wɔnu he tamɔ nɔ ni wɔlaaje yɛ koo hayii ko mli ni wɔnaaa he ni wɔbaatsɔ. Shi yɛ shihilɛi ni tamɔ nakai lɛ amli lɛ, Yehowa wɔ-Tsɛ ni yɔɔ ŋwɛi lɛ shiii wɔ. Enaa shihilɛi ni wɔtsɔɔ mli lɛ fɛɛ, ni ewo shi hu akɛ ebaaye ebua wɔ kɛtsɔ mli. Ekɛɛ: “Maye mabua bo.”—Yes. 41:10.

² Nikasemɔ nɛɛ baaye ebua wɔ koni wɔna gbɛi ni Yehowa tsɔɔ nɔ eyeɔ ebuaa wɔ. Ekomɛi ji: (1) etsɔɔ wɔ gbɛ, (2) ehãa wɔ nɔ ni he hiaa wɔ, (3) ebuɔ wɔhe, kɛ (4) eshɛjeɔ wɔmii. Yehowa miisumɔ ni wɔna akɛ, ekɔɔɔ he eko shihilɛ ni wɔkɛbaakpe lɛ, ehiɛ kpaŋ wɔnɔ kɔkɔɔkɔ. Eshiŋ wɔ ni wɔ kome wɔdamɔ naagba lɛ naa, ebaaye ebua wɔ.

YEHOWA TSƆƆ WƆ GBƐ

3-4. Mɛɛ gbɛ nɔ Yehowa tsɔɔ wɔ gbɛ? (Lala 48:14)

³ Kanemɔ Lala 48:14. Yehowa le akɛ, ja lɛ etsɔɔ wɔ gbɛ dani nibii baanyɛ aya lɛ jogbaŋŋ ahã wɔ. Mɛɛ gbɛ nɔ Yehowa tsɔɔ wɔ gbɛ ŋmɛnɛ? Gbɛ kome ni etsɔɔ nɔ ji, Biblia lɛ. (Lala 119:105) Yehowa tsɔɔ e-Wiemɔ lɛ nɔ eyeɔ ebuaa wɔ koni wɔnyɛ wɔkpɛ yiŋ kpakpai, ni agbɛnɛ hu, wɔnyɛ wɔná sui kpakpai ni baahã wɔná miishɛɛ waa bianɛ ni wɔnyɛ wɔhi shi kɛya naanɔ wɔsɛɛ hu.a Akɛ nɔkwɛmɔnɔ lɛ, ewoɔ wɔ ŋaa ni wɔŋmɛɛ mlifu he, wɔye anɔkwa yɛ nibii fɛɛ mli, ni wɔjɛ wɔtsui mli wɔsumɔ mɛi. (Lala 37:8; Heb. 13:18; 1 Pet. 1:22) Kɛ́ wɔbo ŋaawoi nɛɛ toi lɛ, ehãa wɔtsɔmɔɔ fɔlɔi kpakpai, gbalashihilɛ mli hefatalɔi kpakpai, kɛ nanemɛi kpakpai.

⁴ Agbɛnɛ hu, Yehowa ehã aŋmala mɛi ni hi shi yɛ blema ni kɛ shihilɛi ni mli wawai tamɔ wɔnɔ lɛ kpe ni amɛnu he tamɔ bɔ ni wɔnuɔ he lɛ ahe sane yɛ Biblia lɛ mli. (1 Kor. 10:13; Yak. 5:17) Kɛ́ wɔkane mɛi nɛɛ ahe sane ni wɔkɛ nibii ni wɔkaseɔ yɛ mli lɛ tsu nii lɛ, wɔnáa he sɛɛ, kɛhooo kwraa lɛ, yɛ gbɛi enyɔ anɔ. Klɛŋklɛŋ lɛ, ehãa wɔnaa akɛ, jeee wɔ pɛ wɔkɛ shihilɛ ni mli wa miikpe, mɛi komɛi kɛ eko ekpe pɛŋ ni Yehowa ye ebua amɛ ni amɛnyɛ amɛfi shi yɛ mli. (1 Pet. 5:9) Nɔ ni ji enyɔ lɛ, ehãa wɔnaa nɔ ni wɔbaanyɛ wɔfee koni wɔnyɛ wɔdamɔ shihilɛ ni wɔkɛkpeɔ lɛ naa.—Rom. 15:4.

5. Namɛi hu anɔ Yehowa tsɔɔ etsɔɔ wɔ gbɛ?

⁵ Yehowa tsɔɔ wɔnyɛmimɛi Kristofoi lɛ hu anɔ etsɔɔ wɔ gbɛ.b Akɛ nɔkwɛmɔnɔ lɛ, kpokpaa nɔkwɛlɔi basaraa asafoi lɛ ni amɛwoɔ wɔ hewalɛ. Wiemɔi ni amɛhãa lɛ wajeɔ wɔhemɔkɛyeli lɛ ni eyeɔ ebuaa wɔ koni wɔya nɔ wɔfee ekome. (Bɔf. 15:40–16:5) Asafoŋ onukpai lɛ hu yeɔ amɛbuaa wɔteŋ mɔ fɛɛ mɔ koni wɔya nɔ wɔsɔmɔ Yehowa. (1 Pet. 5:​2, 3) Fɔlɔi yeɔ amɛbuaa amɛbii lɛ koni amɛsumɔ Yehowa. Amɛtsɔɔ amɛ bɔ ni amɛbaafee amɛkpɛ yiŋ kpakpai, kɛ bɔ ni amɛbaafee amɛná sui kpakpai. Agbɛnɛ hu, amɛyeɔ amɛbuaa amɛ koni amɛsumɔ Biblia lɛ kanemɔ, amɛya asafoŋ kpeei, ni amɛshiɛ daa. (Abɛi 22:6) Nyɛmimɛi yei ni edara yɛ mumɔŋ lɛ hu feɔ nɔkwɛmɔnɔ kpakpa amɛhãa nyɛmimɛi oblayei ni baa lɛ, amɛwoɔ amɛ ŋaa, ni agbɛnɛ hu, amɛwoɔ amɛ hewalɛ.—Tito 2:​3-5.

6. Mɛni esa akɛ wɔfee koni wɔná Yehowa gbɛtsɔɔmɔi lɛ ahe sɛɛ?

⁶ Yehowa ehã wɔ nibii fɛɛ ni baaye abua wɔ ni wɔnyɛ wɔkpɛ yiŋ kpakpai ni wɔná miishɛɛ yɛ shihilɛ mli. Mɛni esa akɛ wɔfee koni wɔná nibii nɛɛ ahe sɛɛ? Abɛi 3:​5, 6 lɛ kɛɛ: “Okɛ ohiɛ afɔ̃ Yehowa nɔ kɛ otsui fɛɛ, ni okɛ ohe akafɔ̃ bo diɛŋtsɛ oniiashishinumɔ nɔ.” Kɛ́ wɔkɛ ŋaawoo nɛɛ tsu nii lɛ, ‘Yehowa baahã wɔgbɛi aja,’ ni tsɔɔ akɛ, ebaaye ebua wɔ ni wɔye wɔhe kɛje naagbai babaoo ahe ni wɔná miishɛɛ yɛ shihilɛ mli. Eŋɔɔ wɔnaa waa akɛ Yehowa sumɔɔ wɔ waa ni ewoɔ wɔ ŋaa ni baaye abua wɔ!—Lala 32:8.

YEHOWA HÃA WƆ NƆ NI HE HIAA WƆ

7. Mɛɛ nibii komɛi Yehowa hãa wɔ? (Filipibii 4:19)

⁷ Kanemɔ Filipibii 4:19. Yehowa hãa wɔ nibii ni baaye abua wɔ koni wɔya nɔ wɔsumɔ lɛ waa. Agbɛnɛ hu, eyeɔ ebuaa wɔ koni wɔná nɔ ni wɔbaaye, nɔ ni wɔbaawo, kɛ he ni wɔbaawɔ. (Mat. 6:33; 2 Tes. 3:12) Akɛni wɔfee adesai hewɔ lɛ, bei komɛi lɛ, wɔbaaye wɔtsui yɛ nibii nɛɛ ahe, shi Yehowa woɔ wɔ hewalɛ ni wɔkaye wɔtsui tsɔ. (Mat. 6:25) Mɛni hewɔ? Ejaakɛ Yehowa shiŋ enɔkwa tsuji lɛ yɛ amɛfimɔ beiaŋ kɔkɔɔkɔ. (Mat. 6:8; Heb. 13:5) Wɔbaanyɛ wɔhe wɔye waa akɛ, ni ekɛɛ ebaakwɛ wɔ lɛ, ebaakwɛ wɔ.

8. Mɛni Yehowa fee ehã David?

⁸ Susumɔ bɔ ni Yehowa ye ebua David ehã lɛ he okwɛ. Maŋtsɛ Saul nyiɛ David sɛɛ afii pii, ni no hã David jo foi akɛ kobɔfo. Shi yɛ nakai afii lɛ fɛɛ amli lɛ, Yehowa hã David kɛ hii ni fata ehe lɛ nibii fɛɛ ni he hiaa amɛ. Be ni David susu bɔ ni Yehowa kwɛ lɛ yɛ nakai afii lɛ amli lɛ he lɛ, ewie akɛ: “Tsutsu ko lɛ, gbekɛ ji mi, shi amrɔ nɛɛ migbɔ, shi minako jalɔ ni akwa lɛ pɛŋ, loo jalɔ ni ebii miitao niyenii.” (Lala 37:25) Ekolɛ bo hu ona bɔ ni Yehowa droɔ etsuji lɛ nibii ni he hiaa amɛ lɛ.

9. Ŋmɛnɛ lɛ, kɛ́ oshãrai ba lɛ, mɛɛ gbɛ nɔ Yehowa hãa etsuji nɔ ni he hiaa amɛ? (Kwɛmɔ mfonirii lɛ hu.)

⁹ Agbɛnɛ hu, kɛ́ oshãra ko nina Yehowa tsuji lɛ, Yehowa hãa amɛ nɔ ni he hiaa amɛ. Akɛ nɔkwɛmɔnɔ lɛ, yɛ blema lɛ, be ni hɔmɔ ko ba Yerusalem lɛ, Kristofoi ni yɔɔ je lɛŋ hei krokomɛi lɛ kɛ nibii maje Kristofoi ni yɔɔ Yerusalem lɛ. (Bɔf. 11:​27-30; Rom. 15:​25, 26) Nakai nɔŋŋ Yehowa tsuji yeɔ amɛbuaa amɛnyɛmimɛi kɛ́ amɛyaje fimɔ mli. Kɛ́ oshãra ba lɛ, Yehowa tsirɛɔ etsuji lɛ ni amɛkɛ niyenii, nu, atadei, kɛ tsofa majeɔ amɛnyɛmimɛi lɛ yɛ hei ni oshãra lɛ eba yɛ lɛ. Nyɛmimɛi ni mamɔɔ asafo lɛ tsũi lɛ saa nyɛmimɛi lɛ atsũi kɛ Maŋtsɛyeli Asai ni efite lɛ. Ni nyɛmimɛi lɛ jɛɔ Biblia lɛ mli amɛwoɔ mɛi ni amɛshĩai efite loo amɛwekumɛi egboi lɛ hewalɛ ni amɛshɛjeɔ amɛmii.c

10-11. Mɛni okaseɔ yɛ Borys sane lɛ mli?

¹⁰ Yehowa hãa mɛi ni jáaa lɛ lɛ hu nɔ ni he hiaa amɛ. Esa akɛ wɔkase lɛ ni wɔfee mɛi ni jáaa lɛ lɛ ejurɔ. (Gal. 6:10) Enɛ baanyɛ atsirɛ amɛ ni amɛbakase Yehowa he nii. Naa nuu ko ni atsɛɔ lɛ Borys, ni eji tsɔɔlɔnukpa yɛ skul ko yɛ Ukraine lɛ niiashikpamɔ ni tsɔɔ nakai. Eyɛ mli akɛ ejeee Odasefonyo moŋ, shi ekɛ Odasefoi ni yɔɔ eskul lɛ mli lɛ yeɔ jogbaŋŋ ni ewieee eshiii amɛhemɔkɛyelii lɛ. Be ni ta lɛ ba lɛ, Borys kpɛ eyiŋ akɛ ebaafã kɛjɛ he ni eyɔɔ lɛ kɛya maŋ lɛ mli he ni yɔɔ shweshweeshwe lɛ, ni nyɛmimɛi lɛ ye amɛbua lɛ. Sɛɛ mli lɛ, Borys tee Kristo gbele lɛ Kaimɔ lɛ eko. Be ni Borys susu nibii fɛɛ ni nyɛmimɛi lɛ fee amɛhã lɛ lɛ he lɛ, ewie akɛ: “Odasefoi lɛ jie mlihilɛ kpo amɛtsɔɔ mi ni amɛkwɛ mi jogbaŋŋ. Miida amɛ shi waa.”

¹¹ Esa akɛ wɔkase Yehowa wɔ-Tsɛ ni naa mɔbɔ lɛ, koni wɔjie suɔmɔ kpo wɔtsɔɔ mɛi ni efi amɛ lɛ, kɛ́ Odasefoi ji amɛ jio, jeee Odasefoi ji amɛ jio. (Luka 6:​31, 36) Wɔshwelɛ ji suɔmɔ ni tamɔ nɛkɛ ni wɔbaajie kpo wɔtsɔɔ amɛ lɛ baatsirɛ amɛ ni amɛ hu amɛbatsɔmɔ Kristo kaselɔi. (1 Pet. 2:12) Shi ekɔɔɔ he eko nɔ ni baajɛ mli kɛba lɛ, wɔbaaná miishɛɛ waa ejaakɛ “nɔhãmɔ hãa mɔ náa miishɛɛ.”—Bɔf. 20:35.

YEHOWA BUƆ WƆHE

12. Mɛɛ hebuu Yehowa ewo shi akɛ ekɛbaahã ewebii lɛ? (Lala 91:​1, 2, 14)

¹² Kanemɔ Lala 91:​1, 2, 14. Ŋmɛnɛ lɛ, Yehowa ewo shi akɛ ebaabu wɔhe koni nɔ ko akafite wɔ kɛ lɛ teŋ. Eŋmɛŋ gbɛ kɔkɔɔkɔ ni Satan afite anɔkwa jamɔ. (Yoh. 17:15) Ni kɛ́ “amanehulu kpeteŋkpele” lɛ je shishi lɛ, wɔbaanyɛ wɔhe wɔye waa akɛ, Yehowa baaye shi ni ewo akɛ ebaaye ebua wɔ koni wɔhemɔkɛyeli lɛ mli awa, ni agbɛnɛ hu, ebu wɔhe lɛ nɔ.—Kpo. 7:​9, 14.

13. Mɛɛ gbɛi anɔ Yehowa buɔ wɔhe akɛ aŋkroaŋkroi?

¹³ Mɛɛ gbɛ nɔ Yehowa buɔ wɔhe akɛ aŋkroaŋkroi? Yehowa tsɔɔ Ŋmalɛ lɛ nɔ eyeɔ ebuaa wɔ koni wɔnyɛ wɔna nɔ ni ji ekpakpa kɛ nɔ ni ji efɔŋ. (Heb. 5:14) Kɛ́ wɔkɛ Biblia mli shishitoo mlai tsu nii lɛ, ebuɔ wɔhe koni wɔkafee nɔ ko ni baafite wɔ kɛ Yehowa teŋ, ni agbɛnɛ hu, ehãa wɔkpɛɔ yiŋ kpakpai koni wɔkaye wɔhe awui. (Lala 91:4) Kɛfata he lɛ, Yehowa tsɔɔ asafo lɛ nɔ ebuɔ wɔhe. (Yes. 32:​1, 2) Kɛ́ wɔkɛ mɛi ni sumɔɔ Yehowa ni amɛhiɔ shi yɛ eshishitoo mlai lɛ anaa lɛ bɔ lɛ, amɛwoɔ wɔ hewalɛ ni amɛyeɔ amɛbuaa wɔ ni wɔtsiɔ wɔhe kɛjeɔ efɔŋ he.—Abɛi 13:20.

14. (a) Mɛni hewɔ bei komɛi lɛ, Yehowa ŋmɛɔ gbɛ ni etsuji kɛ naagbai kpeɔ lɛ? (b) Mɛni Lala 9:10 lɛ maa nɔ mi ehãa wɔ? (Kwɛmɔ shishigbɛ niŋmaa lɛ hu.)

¹⁴ Yɛ blema lɛ, Yehowa bu etsuji lɛ ahe bei komɛi koni nɔ ko loo mɔ ko akaye amɛ awui. Shi jeee be fɛɛ be efee nakai. Bei komɛi lɛ, ‘nibii ni baa yɛ be ni akpaaa gbɛ mli lɛ baa wɔteŋ mɔ fɛɛ mɔ nɔ.’ (Jaj. 9:11) Agbɛnɛ hu, bɔ ni afee ni ana akɛ nɔ ni Satan wie yɛ adesai ahe lɛ ji amale lɛ, Yehowa ŋmɛ gbɛ ni awa etsuji komɛi ni hi shi yɛ blema lɛ ayi loo agbe amɛ po. (Hiob 2:​4-6; Mat. 23:34) Nakai nɔŋŋ efeɔ ŋmɛnɛ hu. Eyɛ mli akɛ ekolɛ Yehowa efoŋ naagbai ni wɔkɛkpeɔ bianɛ lɛ asɛɛ moŋ, shi wɔbaanyɛ wɔhe wɔye akɛ eshiŋ wɔ kɔkɔɔkɔ.d—Lala 9:10.

YEHOWA SHƐJEƆ WƆMII

15. Mɛɛ gbɛ nɔ sɔlemɔ, Biblia lɛ, kɛ wɔnyɛmimɛi Kristofoi lɛ shɛjeɔ wɔmii? (2 Korintobii 1:​3, 4)

¹⁵ Kanemɔ 2 Korintobii 1:​3, 4. Bei komɛi lɛ, wɔyeɔ awerɛho, wɔyeɔ wɔtsui, ni wɔhaoɔ. Ekolɛ shihilɛ ko ni okɛmiikpe lɛ ehã ohao aahu akɛ onuɔ he akɛ mɔ ko mɔ ko nuuu bo shishi. Shi Yehowa nuɔ bo shishi. Ele bɔ ni wɔnuɔ he wɔhãa, ni agbɛnɛ hu, ‘eshɛjeɔ wɔmii yɛ wɔmanehului fɛɛ amli.’ Mɛɛ gbɛ nɔ etsɔɔ efeɔ nakai? Kɛ́ wɔsɔle ni wɔfɔse wɔtsuiŋ wɔshwie Yehowa hiɛ lɛ, edroɔ wɔ ‘etoiŋjɔlɛ ni fe niiashishinumɔi fɛɛ’ lɛ. (Fip. 4:​6, 7) Agbɛnɛ hu, kɛ́ wɔkane nɔ ni ekɛɛ wɔ yɛ e-Wiemɔ lɛ mli lɛ, eshɛjeɔ wɔmii. Yehowa kɛɔ wɔ yɛ Biblia lɛ mli akɛ esumɔɔ wɔ, etsɔɔ wɔ nibii ni kɛ́ wɔfee lɛ wɔhiɛ baakã shi, ni ehãa wɔ hiɛnɔkamɔ hu. Ni kɛ́ wɔtee asafoŋ kpeei lɛ, wɔnyɛmimɛi lɛ shɛjeɔ wɔmii ni amɛjɛɔ Biblia lɛ mli amɛwoɔ wɔ hewalɛ.

16. Mɛni okaseɔ yɛ Nathan kɛ Priscilla sane lɛ mli?

¹⁶ Nyɛmi nuu ko ni atsɛɔ lɛ Nathan kɛ eŋa Priscilla ni yɔɔ United States lɛ aniiashikpamɔ lɛ hãa wɔnaa akɛ, Yehowa tsɔɔ e-Wiemɔ lɛ nɔ eshɛjeɔ wɔmii ni ewoɔ wɔ hewalɛ. Afii komɛi ni eho nɛ lɛ, amɛfã kɛtee he ni shiɛlɔi babaoo ahe miihia yɛ koni amɛyaye amɛbua. Nathan wie akɛ: “Wɔhe wɔye waa akɛ Yehowa baahã nibii aya lɛ jogbaŋŋ ahã wɔ.” Shi be ni amɛtee lɛ, hela kɛ nitsumɔ ni amɛnáaa hewɔ lɛ, amɛhe yafi amɛ waa. Sɛɛ mli lɛ, amɛku amɛsɛɛ kɛtee he ni amɛjɛ lɛ, shi loloolo lɛ, amɛnáaa nibii mlɛo. Nathan wie akɛ: “Minaaa nɔ hewɔ ni Yehowa ejɔko wɔ tamɔ bɔ ni wɔsusu akɛ ebaajɔɔ wɔ lɛ. Efee mi po akɛ ekolɛ mifee nɔ ko mishi Yehowa.” Shi sɛɛ mli lɛ, Nathan kɛ Priscilla yɔse akɛ Nyɔŋmɔ shiii amɛ be ni amɛyaje fimɔ mli lɛ. Nathan wie akɛ, “Yɛ nakai jaramɔ be lɛ mli lɛ, Biblia lɛ batsɔ tamɔ wɔnaanyo ko ni hiɛ kã shi ni woɔ wɔ hewalɛ ni tsɔɔ wɔ gbɛ. Wɔjwɛŋmɔ ni wɔkɛma bɔ ni Yehowa ye ebua wɔ ni wɔnyɛ wɔfi shi yɛ nakai shihilɛ ni mli wa lɛ mli lɛ nɔ, moŋ fe ni wɔkɛ wɔjwɛŋmɔ baama naagba lɛ nɔ lɛ esaa wɔ kɛhã naagba fɛɛ naagba ni wɔkɛbaakpe wɔsɛɛ.”

17. Mɛɛ gbɛ nɔ Yehowa tsɔ eshɛje nyɛmi yoo ko ni atsɛɔ lɛ Helga lɛ mii? (Kwɛmɔ mfoniri lɛ hu.)

¹⁷ Yehowa tsɔɔ wɔnyɛmimɛi lɛ hu anɔ eshɛjeɔ wɔmii. Wɔnaa enɛ yɛ nyɛmi yoo ko ni atsɛɔ lɛ Helga ni yɔɔ Hungary lɛ niiashikpamɔ lɛ mli. Ekɛ shihilɛi ni mli wawai srɔtoisrɔtoi kpe afii babaoo, ni enɛ hã ehao waa ni enu he akɛ ehe bɛ sɛɛnamɔ. Shi kɛ́ ekwɛ bɔ ni nibii tee lɛ ehã yɛ nakai afii lɛ amli lɛ, enaa akɛ Yehowa tsɔ nyɛmimɛi lɛ anɔ eshɛje emii waa. Ewie akɛ: “Be fɛɛ be ni Yehowa baana akɛ minitsumɔ lɛ, mibi lɛ ni no mli lɛ ebɛ hewalɛ lɛ kwɛmɔ, kɛ naagbai krokomɛi miisu mitsui lɛ, eyeɔ ebuaa mi. Afii 30 ni eho nɛ lɛ, gbi ko gbi ko bɛ ni eyeee shi ni ewo akɛ ebaashɛje mimii lɛ nɔ. Bei pii lɛ, ewajeɔ mi kɛtsɔɔ wiemɔi ni woɔ mɔ hewalɛ ni nyɛmimɛi lɛ wieɔ lɛ nɔ. Bei pii lɛ, nyɛmimɛi lɛ sɛndiɔ mi tɛs mɛseji, kadi, loo amɛjieɔ miyi be ni mihao waa.”

18. Te wɔbaafee tɛŋŋ wɔshɛje mɛi amii?

¹⁸ Wɔná hegbɛ kpele akɛ wɔbaakase Yehowa ni wɔ hu wɔshɛje mɛi amii. Te wɔbaafee tɛŋŋ wɔfee nakai? Esa akɛ wɔto wɔtsui shi wɔbo amɛ toi, wɔtsɔ wɔwiemɔ nɔ wɔshɛje amɛmii, ni wɔfee nibii kɛye wɔbua amɛ. (Abɛi 3:27) Wɔmiisumɔ ni wɔshɛje mɔ fɛɛ mɔ ni naa nɔ lɛ mii, ekɔɔɔ he eko kɛji ejáa Yehowa loo ejáaa lɛ. Kɛ́ wɔna akɛ wɔkutsoŋnyo ko miiye awerɛho, ebɛ hewalɛ, loo ehao lɛ, wɔyasaraa lɛ, wɔboɔ lɛ toi, ni wɔjɛɔ Biblia lɛ mli wɔwoɔ lɛ hewalɛ. Kɛ́ wɔkase Yehowa, “miishɛjemɔ fɛɛ Nyɔŋmɔ lɛ,” no baahã wɔye wɔbua wɔnyɛmimɛi lɛ ni amɛfi shi be ni amɛkɛ naagbai miikpe, shi jeee no pɛ, ebaahã wɔye wɔbua mɛi ni ebaleko anɔkwale lɛ ni amɛkase Yehowa he nii.—Mat. 5:16.

YEHOWA BAAYE EBUA WƆ BE FƐƐ BE

19. Mɛni Yehowa feɔ ehãa wɔ? Ni mɛɛ gbɛ nɔ wɔbaanyɛ wɔkase lɛ?

¹⁹ Yehowa susuɔ mɛi fɛɛ ni sumɔɔ lɛ lɛ ahe waa. Ekwaaa wɔ be ni wɔkɛ shihilɛi ni mli wawai miikpe. Bɔ ni suɔmɔ tsirɛɔ fɔlɔi ni amɛkwɛɔ amɛbii lɛ, nakai nɔŋŋ Yehowa hu kwɛɔ etsuji anɔkwafoi lɛ. Etsɔɔ wɔ gbɛ, ehãa wɔ nɔ ni he hiaa wɔ, ebuɔ wɔhe, ni eshɛjeɔ wɔmii. Esa akɛ wɔkase wɔ-Tsɛ ni yɔɔ ŋwɛi ni sumɔɔ wɔ lɛ, ni wɔ hu wɔye wɔbua mɛi ni miitsɔ shihilɛi ni mli wawai amli lɛ ni wɔwo amɛ hewalɛ. Eyɛ mli akɛ wɔkɛ shihilɛi ni mli wawai ni suɔ mɔ tsui baakpe moŋ, shi wɔbaanyɛ wɔná nɔmimaa akɛ Yehowa kɛ wɔ yɛ. Ewo shi akɛ: “Kaashe gbeyei, ejaakɛ mikɛ bo yɛ.” (Yes. 41:10) Shiwoo nɛɛ hewɔ lɛ, wɔbaanyɛ wɔhe wɔye waa akɛ, Yehowa shiŋ wɔ kɔkɔɔkɔ.