Okɛma Ohiɛ Akɛ Obaagba Mɛi Nibii Ni Okaseɔ Lɛ

Kɛ́ wɔkase Biblia lɛ, wɔnaa nibii ni hãa wekukpaa ni yɔɔ wɔ kɛ Yehowa teŋ lɛ mli waa, ni enɛ hãa wɔnáa miishɛɛ. Shi kɛ́ wɔmiitao ni miishɛɛ nɛɛ ada lɛ, esa akɛ wɔgba mɛi nibii ni wɔkase lɛ. Biblia lɛ kɛɔ akɛ, “mɔ ni hãa mɛi ahe jɔɔ amɛ” loo amɛnaa miishɛɛ lɛ, “lɛ diɛŋtsɛ hu ehe baajɔ lɛ” loo ebaaná miishɛɛ.—Abɛi 11:25.

Kɛ́ wɔgba mɛi nibii ni wɔkase lɛ, ehãa ekaa wɔyitsoŋ, ni eyeɔ ebuaa wɔ ni wɔnuɔ shishi jogbaŋŋ. Kɛfata he lɛ, mɛi ni wɔbaagba amɛ nibii ni wɔkase lɛ baanyɛ aná he sɛɛ, ni enɛ hu hãa wɔnáa miishɛɛ.—Bɔf. 20:35.

Kaa enɛ okwɛ: Yɛ otsi ni baa lɛ mli lɛ, taomɔ hegbɛ ni ogba mɔ ko nɔ ko ni okase. Mɔ lɛ baanyɛ afee owekunyo, mɔ ko ni okɛyɔɔ asafo mli, mɔ ko ni okɛtsuɔ nii, mɔ ko ni okɛyaa skul, mɔ ko ni okɛyɔɔ akutso mli, loo mɔ ko ni okɛkpe yɛ shiɛmɔ nitsumɔ lɛ mli. Kɛ́ oogba mɔ lɛ nɔ ni okase lɛ, gbaa lɛ bɔ ni baahã emli akã shi faŋŋ ni enu shishi.

Hã enɛ ahi ojwɛŋmɔ mli: Kɛ́ oogba mɛi nibii ni okase lɛ, hã ehi ojwɛŋmɔ mli akɛ, oogba amɛ nibii nɛɛ koni okɛwo amɛ hewalɛ, shi jeee koni okɛhã amɛna akɛ obe.—1 Kor. 8:1.