Dani wɔbaanyɛ wɔya nɔ wɔnyiɛ “akɛ la bii” lɛ, ehe miihia ni Nyɔŋmɔ kɛ emumɔ krɔŋkrɔŋ lɛ aye abua wɔ. Mɛni hewɔ? Nɔ hewɔ lɛ ji, ebɛ mlɛo akɛ wɔbaaba wɔjeŋ jogbaŋŋ yɛ jeŋ ni mli eyi obɔ kɛ jeŋba sha nɛɛ mli. (1 Tes. 4:​3-5, 7, 8) Susumɔi ni mɛi ni yɔɔ je lɛ mli lɛ hiɛ lɛ kɛ Yehowa susumɔ kpãaa gbee, ni mumɔ krɔŋkrɔŋ lɛ baanyɛ aye abua wɔ koni amɛsusumɔi gbohii nɛɛ akaná wɔnɔ hewalɛ. Agbɛnɛ hu, mumɔ krɔŋkrɔŋ lɛ baanyɛ aye abua wɔ ni wɔwo “ekpakpafeemɔ kɛ jalɛ kɛ anɔkwale fɛɛ.” (Efe. 5:9) Gbɛ kome ni wɔbaanyɛ wɔtsɔ wɔ wɔná mumɔ krɔŋkrɔŋ lɛ ji, ni wɔbaasɔle wɔbi Yehowa ni ehã wɔ. Yesu kɛɛ Yehowa ‘kɛ mumɔ krɔŋkrɔŋ lɛ baahã mɛi ni biɔ lɛ lɛ.’ (Luka 11:13) Kɛ́ wɔtee Kristofoi akpeei ni wɔkɛ wɔnyɛmimɛi lɛ fee ekome kɛjie Yehowa yi lɛ, no hu hãa wɔnáa mumɔ krɔŋkrɔŋ lɛ. (Efe. 5:​19, 20) Kɛ́ Nyɔŋmɔ mumɔ krɔŋkrɔŋ lɛ tsu nii yɛ wɔnɔ lɛ, no baaye abua wɔ ni wɔhi shi bɔ ni sa Nyɔŋmɔ hiɛ. w24.03 23-24 kk. 13-15

Ani oona akɛ tsuishitoo he ehia bo? Belɛ, sɔlemɔ obi Yehowa ni eye ebua bo ni oto otsui shi waa. Tsuishitoo fata yibii ni mumɔ lɛ woɔ lɛ he. (Gal. 5:​22, 23) No hewɔ lɛ, wɔbaanyɛ wɔsɔle wɔbi Yehowa emumɔ krɔŋkrɔŋ lɛ koni wɔnyɛ wɔjie eyibii lɛ kpo. Kɛ́ wɔkɛ shihilɛ ko ni naa wa kpe ni wɔna akɛ ewa kɛhã wɔ akɛ wɔbaato wɔtsui shi lɛ, esa akɛ ‘wɔya nɔ wɔbi’ Yehowa ni ehã wɔ emumɔ krɔŋkrɔŋ lɛ koni wɔnyɛ wɔto wɔtsui shi. (Luka 11:13) Agbɛnɛ hu, wɔbaanyɛ wɔsɔle wɔbi Yehowa ni eye ebua wɔ ni wɔna nibii tamɔ bɔ ni enaa lɛ lɛ. No sɛɛ lɛ, esa akɛ wɔhi shi yɛ nɔ ni wɔsɔleɔ wɔbiɔ lɛ naa, ni wɔmia wɔhiɛ wɔto wɔtsui shi daa gbi. Kɛ́ wɔsɔle wɔbi Yehowa ni eye ebua wɔ ni wɔto wɔtsui shi, ni wɔmia wɔhiɛ akɛ wɔbaato wɔtsui shi daa gbi lɛ, Yehowa baaye abua wɔ ni wɔnyɛ wɔfee nakai kɛ́ tsutsu ko lɛ nakai feemɔ wa kɛhã wɔ po. Nɔ kroko ni baaye abua wɔ ji, ni wɔbaahe be wɔjwɛŋ mɛi ni awie amɛhe yɛ Biblia lɛ mli ni to amɛtsui shi lɛ ahe. Awie mɛi babaoo ahe yɛ Biblia lɛ mli ni to amɛtsui shi. Kɛ́ wɔkane amɛhe saji lɛ ni wɔjwɛŋ nɔ lɛ, ebaaye ebua wɔ ni wɔna nibii srɔtoi ni baanyɛ awa wɔ ni wɔnyɛ wɔto wɔtsui shi. w23.08 22-23 kk. 10-11

Yesu hã bɔfo Petro na akɛ Yehowa baaye ebua lɛ. Be ni atee Yesu shi lɛ sɛɛ lɛ, etsɔ naakpɛɛ gbɛ nɔ ehã Petro kɛ bɔfoi krokomɛi lɛ gbe loo ekoŋŋ. (Yoh. 21:​4-6) Ekã shi faŋŋ akɛ, naakpɛɛ nii nɛɛ ni Yesu fee lɛ hã Petro na akɛ, Yehowa baanyɛ ehã lɛ heloonaa nibii aahu. Ekolɛ enɛ hã Petro kai nɔ ni Yesu wie akɛ Yehowa baahã mɛi ni taoɔ Maŋtsɛyeli lɛ klɛŋklɛŋ lɛ amɛhiamɔ nii lɛ. (Mat. 6:33) Enɛ hewɔ lɛ, Petro kɛ shiɛmɔ nitsumɔ lɛ fee enitsumɔ titri, moŋ fe wuoyaa. Yɛ afi 33 Ŋ.B. Pentekoste gbi lɛ nɔ lɛ, ekɛ ekãa shiɛ waa, ni eye ebua mɛi akpei abɔ ni amɛkpɛlɛ sane kpakpa lɛ nɔ. (Bɔf. 2:​14, 37-41) No sɛɛ lɛ, eye ebua Samariabii kɛ Jeŋmajiaŋbii ni amɛbanyiɛ Kristo sɛɛ. (Bɔf. 8:​14-17; 10:​44-48) Ŋwanejee ko bɛ he akɛ, Yehowa ye ebua Petro ni enyɛ eye ebua mɛi srɔtoi kɛba asafo lɛ mli. w23.09 20 kk. 1; 22 kk. 11