Yitso 50
Esaamɔ Koni Akɛkpee Yiwaa Naa
BENI ekɛ gbɛtsɔɔmɔi eha ebɔfoi lɛ yɛ gbɛi ni amɛaatsɔ nɔ amɛtsu amɛ shiɛmɔ nitsumɔ lɛ sɛɛ lɛ, Yesu bɔ amɛ kɔkɔ yɛ shitee-kɛ-wolɔi ahe. Ekɛɛ: “Naa, miitsu nyɛ tamɔ too gwantɛŋi yɛ klaji ateŋ; . . . Shi nyɛhiɛ ahia nyɛhe nɔ yɛ gbɔmɛi ahewɔ; ejaakɛ amɛaaŋɔ nyɛ kɛaatee gwabɔi amli, ni amɛaayi nyɛ yɛ kpee hei lɛ; ni lumɛi kɛ maŋtsɛmɛi ahiɛ tete po akɛ nyɛ aaatee yɛ mihewɔ.”
Yɛ yiwaa ni naa wa ni esɛɛnyiɛlɔi lɛ kɛaakpe lɛ fɛɛ sɛɛ lɛ, Yesu kɛ nɔmimaa wo amɛ shi akɛ: “Shi kɛ amɛŋɔ nyɛ kɛtee lɛ, nyɛkahaoa nyɛhe yɛ bɔ ni loo nɔ ni nyɛaakɛɛ hewɔ; shi aaaŋɔ nɔ ni nyɛaawie aha nyɛ yɛ nakai ŋmɛlɛtswaa lɛ mli nɔŋŋ. Ejaakɛ jeee nyɛ ji mɛi ni wieɔ lɛ, shi moŋ nyɛ-Tsɛ lɛ mumɔ lɛ wieɔ yɛ nyɛmli.”
Yesu tee nɔ akɛ: “Shi nyɛmi aaaŋɔ nyɛmi aha gbele, ni tsɛ aaaŋɔ bi aha, ni bii aaate shi awo amɛfɔlɔi ni amɛaaha agbe amɛ.” Ekɛfata he akɛ: “Ni mɛi fɛɛ aaanyɛ nyɛ yɛ migbɛi lɛ hewɔ; shi mɔ ni hiɛɔ mli kɛyawulaa shi lɛ, lɛ lɛ aaahere eyiwala.”
Shiɛmɔ nitsumɔ lɛ he miihia fe nibii fɛɛ. Yɛ enɛ hewɔ lɛ, Yesu ma bɔ ni ehe hiaa ni akɛ jwɛŋmɔ kpakpa atsu nii bɔni afee ni anyɛ atsu nitsumɔ lɛ kɛgbe naa lɛ nɔ mi. Ekɛɛ: “Shi kɛ amɛmiiwa nyɛ yi yɛ maŋ nɛɛ mli lɛ, nyɛjoa foi nyɛyaa ekroko mli; shi lɛlɛŋ miikɛɛ nyɛ akɛ: Nyɛgbeŋ Israel maji lɛ fɛɛ naa dani gbɔmɔ Bi lɛ aaaba.”
Eji anɔkwale akɛ Yesu kɛ gbɛtsɔɔmɔi nɛɛ, kɛ kɔkɔbɔi lɛ, kɛ hewalɛwoo lɛ ha ebɔfoi 12 lɛ, shi eyɛ kɛha mɛi fɛɛ ni kɛ amɛhe baawo jeŋ muu fɛɛ shiɛmɔ nitsumɔ lɛ mli yɛ egbele kɛ eshitee lɛ sɛɛ lɛ hu. Anaa enɛ faŋŋ yɛ wiemɔ ni ewie akɛ ‘mɛi fɛɛ aaanyɛ’ ekaselɔi lɛ, ni jeee Israelbii lɛ ni etsu bɔfoi lɛ amɛŋɔɔ ni amɛyashiɛ amɛtsɔɔ amɛ lɛ pɛ baafee nakai lɛ mli. Kɛfata he hu lɛ, eka shi faŋŋ akɛ akɛ bɔfoi lɛ eyaaa lumɛi kɛ maŋtsɛmɛi ahiɛ yɛ be mli ni Yesu tsu amɛ yɛ amɛ shiɛmɔ he tafaa kukuoo lɛ mli lɛ. Ni nɔ ni fe fɛɛ lɛ, wekui amlibii ejieee heyelilɔi lɛ amɛhaaa ni agbe amɛ yɛ nakai be mli.
No hewɔ lɛ beni ekɛɛ akɛ ekaselɔi lɛ egbeŋ shiɛmɔ nitsumɔ lɛ fɛɛ naa “dani gbɔmɔ Bi lɛ aaaba” lɛ, Yesu miikɛɛ wɔ yɛ gbalɛ mli akɛ ekaselɔi lɛ egbeŋ Nyɔŋmɔ Maŋtsɛyeli ni ato ama shi lɛ he shiɛmɔ nitsumɔ lɛ naa yɛ jeŋ muu lɛ fɛɛ mli dani Maŋtsɛ ni awo ehiɛ nyam ni ji Yesu Kristo lɛ aaaba akɛ Yehowa blafo nukpa yɛ Harmagedon.
Yɛ be mli ni eyaa nɔ lolo yɛ gbɛtsɔɔmɔi ni ekɛhaa yɛ shiɛmɔ nitsumɔ lɛ he lɛ mli lɛ, Yesu kɛɛ: “Kaselɔ efeee etsɔɔlɔ, ni asaŋ tsulɔ efeee enuŋtsɔ.” No hewɔ lɛ esa akɛ Yesu sɛɛnyiɛlɔi lɛ akpa gbɛ akɛ nɔ fɔŋ ni afee lɛ kɛ yiwaa ni ba enɔ lɛ nɔŋŋ eko baaba amɛnɔ yɛ Nyɔŋmɔ Maŋtsɛyeli lɛ ni amɛshiɛɔ lɛ hewɔ. Shi kɛlɛ ewo amɛ ŋaa akɛ: “Ni nyɛkashea mɛi ni gbeɔ gbɔmɔtso lɛ ni amɛnyɛɛɛ susuma lɛ amɛgbe lɛ agbeyei; shi moŋ nyɛshea mɔ ni nyɛɔ susuma kɛ gbɔmɔtso fɛɛ hiɛ ekpataa yɛ Gehena mli lɛ gbeyei.”
Yesu baafee nɔkwɛmɔ nɔ yɛ sane nɛɛ mli. Ekɛ ekaa baakpee gbele ni baa lɛ naa moŋ fe ni eeeŋmɛɛ enɔkwayeli kɛha Mɔ ni yɔɔ hewalɛ fe fɛɛ, Yehowa Nyɔŋmɔ lɛ he. Hɛɛ, Yehowa ji mɔ ni baanyɛ akpata mɔ ko “susuma” (ni yɛ enɛ mli lɛ etsɔɔ mɔ ko wɔsɛɛ hiɛnɔkamɔ akɛ susuma ni hiɛ ka) lɛ hiɛ, aloo yɛ no najiaŋ lɛ ebaanyɛ etee mɔ lɛ shi ni ebana naanɔ wala mli ŋɔɔmɔ. Mɛɛ ŋwɛi Tsɛ ni yɔɔ suɔmɔ kɛ mlihilɛ Yehowa ji nɛkɛ!
Yesu tee nɔ ewo ekaselɔi lɛ hewalɛ kɛ abɛbua ko ni maa suɔmɔ mli ni Yehowa jɛɔ ekwɛɔ amɛnɔ lɛ nɔ mi. Ebi amɛ akɛ: “Ani aflimatai enyɔ lɛ, jeee hiɛbii nyɔŋma ahɔɔ aheɔ? Shi amɛteŋ ekome folo enyɔɔɔ shikpɔŋ, ja ejɛ nyɛ-Tsɛ lɛ dɛŋ. Shi nyɛyiteŋ tsɔi po lɛ akane fɛɛ. No hewɔ lɛ nyɛkashea gbeyei; nyɛjara wa aahu fe aflimatai babaoo.”
Maŋtsɛyeli lɛ he sane ni Yesu faa ekaselɔi lɛ ni amɛyashiɛ lɛ baagbala shiai amli, ejaakɛ shia lɛ mlibii lɛ ateŋ mɛi komɛi baakpɛlɛ nɔ ni mɛi krokomɛi ekpɛlɛŋ nɔ. Etsɔɔ mli akɛ: “Nyɛkasusua akɛ miba ni mabaha hejɔlɛ aba shikpɔŋ lɛ nɔ; jeee hejɔlɛ hamɔ miba, shi moŋ klante.” No hewɔ lɛ ebiɔ ekaa dani weku mli nyo ko anyɛ akpɛlɛ Biblia mli anɔkwale lɛ nɔ. Yesu kɛɛ akɛ: “Mɔ ni dɔɔ tsɛ loo nyɛ he fe mi lɛ, esaaa mi; ni mɔ ni dɔɔ binuu loo biyoo he fe mi lɛ, esaaa mi.”
No hewɔ lɛ beni ekɛ efamɔi lɛ baa naagbee lɛ, Yesu tsɔɔ mli akɛ mɛi ni hereɔ ekaselɔi lɛ miihere lɛ diɛŋtsɛ hu. “Ni mɔ fɛɛ mɔ ni aaaha mɛi bibii nɛɛ ateŋ mɔ kome nu hɔlɔ kpulu kome pɛ enu yɛ kaselɔ gbɛi anɔ lɛ, lɛlɛŋ, miikɛɛ nyɛ akɛ enyɔmɔwoo eŋmɛŋ lɛ gbi ko gbi ko.” Mateo 10:16-42.
▪ Mɛɛ kɔkɔbɔɔi Yesu kɛha ekaselɔi lɛ?
▪ Mɛɛ hewalɛwoo kɛ miishɛjemɔ ekahɛ amɛ?
▪ Mɛni hewɔ ni Yesu gbɛtsɔɔmɔi lɛ kɔɔ ŋmɛnɛŋmɛnɛ beaŋ Kristofoi hu ahe lɛ?
▪ Mɛɛ gbɛ nɔ Yesu kaselɔ efeee etsɔɔlɔ lɛ yɛ?