Yehowa Jɔɔ Mɛi Ni Peleɔ Amɛhe Lɛ

“Nyɛpelea agbo fiŋtɔɔ lɛ mlibotemɔ he, ejaakɛ . . . mɛi pii aaatao mli abote, shi amɛnyɛŋ”​—Luka 13:⁠24

NƆNI adesai ni yeee emuu lɛ sumɔɔ akɛ amɛfee ji akɛ yɛ nɔfɛɛnɔ mli lɛ amɛkɔ̃ nɔni waaa. Bei pii lɛ mɛi sumɔɔ akɛ amɛna nii babaoo yɛ shihilɛ mli shi amɛnine shɛɛɛ nɔni amɛtsui shweɔ nɛɛ nɔ ejaakɛ amɛsumɔɔɔ akɛ amɛtsuɔ he nii bɔni sa. Mɛikomɛi taà shi amɛlàa lamɔi kɛkɛ ni ekolɛ kɛji eyɛ mli aahu lɛ, amɛkaa amɛshade kpakpa amɛkwɛɔ yɛ asɔshwɛmɔ mli kɛ hiɛnɔkamɔ akɛ amɛ aaana shika ni amɛkɛhe nibii ni amɛlàa he lamɔi lɛ. Nitsulɔi babaoo bolɔɔ ni amɛpeleɔ he akɛ aha amɛnyɔmɔwoo aya hiɛ ni atse gbii abɔ ni amɛkɛyaa nitsumɔ daa otsi lɛ moŋ nɔ. Mɛi pii susuɔ akɛ shika ni amɛnaa lɛ hiɛyaa kɛ nii ni amɛtsuɔ lɛ nɔtsemɔ moŋ ji nii ni sa. Shi mɛikomɛi hu yɔseɔ akɛ nɔko yɛ ni jara wa kwraa fo heloonaa nifalɛ. Mɛni ji no?

Mɛni kwraa jara aaanyɛ awa aha wɔ fe wɔhe tsui ni Nyɔŋmɔ aaana ni kɛ wɔ aaabote naanɔ wala mli lɛ? Ani wɔmiikpa gbɛ akɛ wɔnine aaanyɛ ashɛ no nɔ kɛji wɔtĩii wɔhe kwraa? Nyɔŋmɔ etsu nɔni he hiaa kɛha adesa yiwalaheremɔ lɛ fɛɛ moŋ, shi ani no tsɔɔ akɛ mɔfɛɛmɔ baana yiwalaheremɔ kɛkɛ ni ehe ehiaaa ni atsuɔ nɔko yɛ he? (Tito 3:​4-7) Yesu Kristo ha enɛ hetoo beni abilɛ akɛ “Ani mɛi fioo kɛkɛ yiwala abaahere?” lɛ. Eha hetoo akɛ: “Nyɛpelea agbo fiŋtɔɔ lɛ mlibotemɔ he, ejaakɛ miikɛɛ nyɛ akɛ, mɛi pii aaatao mli abote, shi amɛnyɛŋ.”​—Luka 13:​23,24

Ani obaasumɔ ni opele ohe beni afee ni ona Nyɔŋmɔ jalɛ gbɛjianɔtoo hee lɛ mli ohi? Mɛi pii yɛ ni kɛji amɛ aaana hegbɛ amɛhi wala mli yɛ shikpɔŋ nɛɛ nɔ ni hela kɛ gbele gbaŋ amɛnaa lɛ, kulɛ amɛ aaasumɔ. Shi kɛji aawo nɛkɛ gbɔmɛi nɛɛ nɔŋŋ ekaa akɛ amɛkase Biblia lɛ, amɛkɛ naajiemɔi komɛi ni mɔɔɔ lɛ haa. Ni kɛji amɛkã he amɛsumɔɔɔ ni amɛtsuɔ nɔko beni afee ni amɛle Nyɔŋmɔ lɛ, ehaŋ Nyɔŋmɔ ana amɛhe tsuijurɔ. Esa akɛ mɛi fɛɛ ni sumɔɔ akɛ Yehowa Nyɔŋmɔ ana amɛhe tsui lɛ ana he miishɛɛ akɛ ‘amɛ aaapele amɛhe’ yɛ nɔyaa ni amɛ aaafee akɛ etsuji lɛ gbɛfaŋ ni amɛbale Bɔlɔ lɛ jogbaŋŋ ni amɛhi shi yɛ nɔni amɛle yɛ ehe lɛ naa. Lɛ hu ebaawa amɛ kɛtsɔ emumɔ lɛ nɔ, kɛji amɛŋmɛ gbɛ ni no kudɔ amɛ.

Yɛ anɔkwale mli lɛ kɛji mɔko epeleee ehe lɛ, hegbɛi pii aaanyɛ ajo edɛŋ yɛ shihilɛ mli saji saŋŋ amli. Abɛi Awolo 26:15 haa wɔ enɛ he nɔkwɛmɔnɔ ko ni mli wa waa, ni ekɛɔ akɛ: “anihaolɔ ŋɔɔ enine etsɔɔ kã mli, ewaa ehe akɛ ekɛ aaawo edaaŋ tete.” Yɛ mumɔŋ niyenii gbɛfaŋ hu, bei pii lɛ sane lɛ tamɔɔ bɔni abɛ lɛ fee mfoniri eha lɛ nɔŋŋ. Mɛi pii ni yɔɔ Biblia yɛ amɛshiai lɛ miiye hɔmɔ yɛ mumɔŋ gbɛfaŋ ejaakɛ amɛbɔɔɔ mɔdɛŋ akɛ amɛ aaakpã amɛniji amli ni amɛkɔ Biblia lɛ yɛ heni ekã ni amɛkane.

Yɛ anihao ni ekolɛ mɔ aaasumɔ akɛ efee sɛɛ lɛ, esani mɔ awuu ashi jwɛŋmɔ gbonyo namɔ kɛji eeepele ehe. Akɛ nɔkwɛmɔnɔ lɛ, kɛji esusuɔ akɛ mɛi aŋɔɔ ni aaaya yɛ amɛshiai amli ni ayagba amɛ Biblia mli sane lɛ wa fe nine lɛ, no haŋ ni ebɔ ehe mɔdɛŋ akɛ eeeka ekwɛ po. Shi bei pii kɛji ekolɛ eka ekwɛ lɛ, eeenyɛ etsu no yɛ Nyɔŋmɔ mumɔ lɛ yelikɛbuamɔ naa.

Kɛlɛ beikomɛi hu bɔni nɔko ni ajieɔ yi akɛ afee lɛ yɔɔ mɛlɛɔ ni ebɛ sɔkɔtrelee eha lɛ moŋ haa mɛikomɛi ayiŋ feɔ amɛ kɔshikɔshi yɛ ehe sɛɛnamɔ he. Ekolɛ eeefee akɛ amɛnaaa jwɛŋmɔ ni yɔɔ mli lɛ. Naeman ji mɔko ni shwɛ fioo egbee tsɔne nɛɛ mli. Efã gbɛ kɛtee Israel tɔ̃ɔ kɛ hiɛnɔkamɔ akɛ aaatsa ekpiti lɛ ahalɛ. Akɛni eji gbɔmɔ agbo yɛ emaŋ hewɔ lɛ, ekpa gbɛ akɛ gbalɔ Elisha kɛ woo krɛdɛɛ ko baahalɛ. Shi Elisha diɛŋtsɛ ejeee kpo ebaninaaalɛ po, shi moŋ etsu etsulɔ lɛ koni eyakɛɛ Naeman akɛ eyaju ehe shii kpawo yɛ Yordan Faa lɛ mli. Naeman susu akɛ ojeee mɔni sa akɛ ejuɔ ehe yɛ Yordan Faa ni emli nu hiɛ tseee lɛ mli. Kulɛ eekpa tsamɔ ko ni yɔɔ naakpɛɛ gbɛ. Eji eyabooo etsuji lɛ aŋaawoo toi kulɛ, Naeman baaku esɛɛ kɛya Damasko kɛ ekpiti lɛ nakai nɔŋŋ. Shi eye Elisha akpɔi ni bɛ sɔkɔtrelee lɛ anɔ ni atsalɛ.​—2 Maŋts. 5:​9-14.

Agbɛnɛ hu beikomɛi lɛ gbeyei ni mɔko sheɔ akɛ anyaŋ nɔni eeefee lɛ he aloo mɛi ni hiɛ hegbɛ lɛ tseŋ amɛhiɛ amɛhaŋlɛ lɛ baatsi enaa ni etsuŋ nɔkpakpa ko ni sa akɛ etsuɔ. Nehemia ni hi shi yɛ afii oha ni ji enumɔ D.Ŋ.B mli lɛ ji mɔko ni fee nɔkwɛmɔnɔ kpakpa akɛ mɔ ni eŋmɛɛɛ gbɛ ni gbeyeishemɔ atsi enaa. Eyɛ mli akɛ ehiɛ gbɛhe wulu ko akɛ daawolɔ yɛ Maŋtsɛ Artashasta we lɛ moŋ, shi Nehemia haaa ejwɛŋmɔ akɛɛlɛ akɛ maŋtsɛ lɛ ekpɛlɛŋ nɔni ebaakɛɛlɛ lɛ nɔ aloo emli baafu, ni no aha efee dioo. Beni hegbɛ lɛ ba lɛ, Nehemia sɔle ekpa Yehowa fai yɛ heshibaa mli, kɛkɛ ni ekɛ enibimɔ lɛ fɔ̃ maŋtsɛ lɛ hiɛ yɛ bulɛ mli. Maŋtsɛ lɛ kpɛlɛ enibimɔ lɛ nɔ dani agbɛnɛ hu eŋmala woji eha Nehemia ni ekɛha hegbɛ akɛ efã gbɛ kɛya Yerusalɛm ni efolɔ tsei hu kɛjɛ maŋtsɛ lɛ diɛŋtsɛ koo lɛ mli ni akɛyasaa atswa Yerusalem gbogboi kɛ agbói lɛ.​—Neh. 2:​1-8.

Ni wɔ hu? Eeenyɛ ebalɛ akɛ Kristofoi komɛi aaashe gbeyei akɛ amɛ aaabi gbɛ kɛaajɛ amɛnitsumɔhei akɛ amɛkɛmiiya kpeei ni amɛkɛ amɛnyɛmimɛi heyelilɔi krokomɛi ayabua he naa. Eyɛ mli akɛ eji amɛyahi nakai gbɛ lɛ kulɛ ekolɛ aaaha amɛ, shi gbeyei ni amɛsheɔ akɛ akpɛlɛŋ amɛnibimɔ lɛ nɔ lɛ haa mumɔŋ wiemɔkɛtsɔɔmɔ kpakpa nɛɛ ŋmɛɔ amɛ. Kristofoi yeigbayei komɛi naa asafoŋ kpeei lɛ fã pɛ mli gbɛfaŋnɔ ejaakɛ amɛ moŋ amɛsusuɔ akɛ amɛwumɛi ni heee yeee lɛ nyaŋ he kɛji amɛtee kpeei lɛ bɔni fa fe nakai. Kɛlɛ eeenyɛ efee akɛ amɛteaŋ mɛikomɛi biko gbɛ nakai kɛjɛko amɛwumɛi adɛŋ pɛŋ. Shi mɛikrokomɛi ni yɔɔ nakai shihilɛ nɔŋŋ mli lɛ aaanyɛ agba niiashikpamɔi babaoo ni woɔ ekaa, yɛ gbɛ ni amɛbi amɛwumɛi hewɔ. Yɛ anɔkwale mli lɛ, yɛ saji sɔrɔtoi pii amli lɛ, kɛji wɔbiii lɛ, wɔnine shɛŋ nɔ.​—Kɛto Mateo Sanekpakpa 7:​7-11 he okwɛ.

Hɛɛ, kɛji wɔmiitao Yehowa jɔɔmɔ lɛ, ebiɔ ni wɔpele wɔhe. Yɛ enɛ hewɔ lɛ, kaaŋmɛ hejɔfeemɔ gbɛ, kaaha nɔko ni sa akɛ otsu lɛ dalɛ wo ohe gbeyei, loo bɔni ejeee nɔko ni yɔɔ haŋtsii eha lɛ je onijiaŋ wui, ni kaaha ebalɛ akɛ obiii nii ni sa akɛ obiɔ lɛ yɛ gbeyei ni osheɔ akɛ abaatsi ohiɛ lɛ hewɔ. Kɛji ebalɛ nitsumɔ ni kɔɔ anɔkwa jamɔ he gbɛfaŋ lɛ, obaanyɛ oye omanye yɛ Nyɔŋmɔ mumɔ lɛ yelikɛbuamɔ naa.