‘Nyɛpelea Hemɔkɛyeli Lɛ He Waa’
“Suɔmɔ mɛi, . . . minu akɛ ehe miihia ni maŋmanyɛ ni mikɛwonyɛ ŋaa ni nyɛpelea hemɔkɛyeli lɛ ni atuu awo krɔŋkrɔŋbii lɛ adɛŋ shikome nyɔŋlo lɛ he waa.”—Yuda 3, NW.
1. Mɛni ji nibii komɛi ni he yɔɔ sɛɛnamɔ kɛha Satan yɛ eyaka mɔdɛŋ ni ebɔɔ ni ekpata anɔkwale Kristo jamɔ hiɛ lɛ mli?
1 ESA akɛ Yehowa tsuji kɛ shiŋŋfeemɔ awuu amɛha anɔkwale hemɔkɛyeli lɛ. Amɛhenyɛlɔ, Abonsam, lɛ taoɔ ni etsɔ shitee kɛ woo diɛŋtsɛ kɛ “ŋaatsɔɔi” ni baa nigii lɛ nɔ afite wekukpaa ni jara wa ni ka amɛkɛ Yehowa Nyɔŋmɔ teŋ kɛtsɔ Yesu Kristo nɔ lɛ. (Efesobii 6:11, Kingdom Interlinear Translation; 1 Petro 5:8) Yɛ mɔdɛŋ ni Satan bɔɔ ni kulɛ ekpata anɔkwale Kristo jamɔ hiɛ ni enɛ feɔ yaka lɛ fɛɛ sɛɛ lɛ ebɔɔ mɔdɛŋ hu yɛ bei komɛi amli ni egbɔjɔ amɛ, aloo enyiɛ amɛshishi. Nibii ni fiteɔ mɔ waa ni baanyɛ atsu eyiŋtoo he nii lɛ ekomɛi ji: (1) Apasa tsɔɔmɔ; (2) jeŋba shara; (3) hemɔkɛyeli ni bɛ; (4) bulɛ ni abɛ kɛha hegbɛ ni Nyɔŋmɔ eto ema shi; (5) huhuuhu wiemɔ kɛ mligbigbilimɔ loo wiemɔ kɛ shimɔ; (6) mɛi ni akɛ woo loo yijiemɔ haa ni akɛtao pɛsɛmkunya sɛɛnamɔ.
2. Mɛni awie yɛ biɛ ni kɔɔ Yuda wolo lɛ he?
2 Yehowa kɛ nɔ ni he hiaa yɛ mumɔŋ lɛ diɛŋtsɛ haa ni ekɛbu etsuji ahe ni amɛkɛwuu amɛshi Shishiulɔ Nukpa Abonsam lɛ. (Yesaia 59:1) Nɛkɛ gbɛjianɔtoo ni jɛ ŋwɛi nɛɛ ekome ji Yuda wolo ni jɛ mumɔŋ lɛ. Eka shi faŋŋ akɛ kaselɔ Yuda ŋma enɛ yɛ Palestina dani afi 66 ŊB, ejaakɛ etsiii Cestius Gallus ni batutua Yerusalem yɛ nakai afi lɛ nɔ aloo beni nakai maŋtiase lɛ gbee shi yɛ Romabii lɛ ahiɛ yɛ Tito shishi yɛ afii 70 N.Ba lɛ ta.
3. Mɛɛ gbɛi anɔ nɛkɛ Yuda mumɔ naa wolo Iɛ baanyɛ afee nɔ ni he yɔɔ sɛɛnamɔ kpele ŋmɛnɛ?
3 Eyɛ mli akɛ afii ohai abɔ nɛ ni aŋma moŋ, shi Yuda wolo lɛ he yɛ sɛɛnamɔ kpele kɛha wɔ ŋmɛnɛ. Nɔkwɛlɔi Kristofoi ni ajɛ mumɔŋ ahala amɛ lɛ baanyɛ ni amɛkɛ enɛ atsu nii akɛ nɔ ni amɛbaadamɔ nɔ ni amɛkɛ ŋaawoo aha. Agbɛnɛ, kɛji akɛ wɔkɛ sɔlemɔ kɛ heshibaa kase ewolo lɛ, ebaanyɛ eye ebua wɔ diɛŋtsɛ. Nakai eji titri kɛ wɔnu he akɛ apasa tsɔɔmɔ loo lakamɔ ko ni gbalaa mɔ kɛyaa ajwamaŋbɔɔ mli, aloo akɛ wɔyoo akɛ wɔhemɔkɛyeli miigbɔjɔ, aloo wɔyoo yɛ wɔtsui mli akɛ etamɔ nɔ ni wɔkɛ bulɛ haaa hegbɛ ni Nyɔŋmɔ kɛha lɛ, ni wɔmiiwie huhuuhu kɛmiishi nibii aloo wɔmiijie aŋkroaŋkroi komɛi ayi kɛha wɔ diɛŋtsɛ wɔ pɛsɛmkunya sɛɛnamɔi ahe osharai miite shi lɛ. Be mli ni wɔsusuɔ mumɔ naa wolo nɛɛ kuku fɛɛ kuku he lɛ, ŋwanejee ko bɛ he akɛ wɔbaana bɔ ni wɔɔfee ni wɔkɛ emli ŋaawoo ni hiɔ shi daa lɛ atsu nii yɛ wɔ diɛŋtsɛ kɛ agbɛnɛ yɛ asafo lɛ mli.
Aaabi Ni Omɔbɔnalɛ, Hejɔlɛ Kɛ Suɔmɔ Afa Babaoo
4. Te Yuda tsɔɔ mɔ ni ji Iɛ lɛ mli eha tɛŋŋ, ni mɛni wɔyooɔ yɛ enɛ he?
4 Yuda kɛ nɛkɛ wiemɔi nɛɛ je ewolo lɛ shishi:
“Yuda, ni ji Yesu Kristo tsulɔ kɛ Yakobo nyɛmi lɛ ŋma yaha mɛi ni atsɛ amɛ ni afee amɛ krɔŋkrɔŋ yɛ tsɛ Nyɔŋmɔ lɛ mli ni aŋɔ amɛ ato aha Yesu Kristo lɛ.” (Yuda 1)
“Yesu Kristo tsulɔ,” etsɔɔɔ akɛ Yuda jeee mɔ ni eba ehe shi kwraa akɛ etsɔ nyɔŋ. Shi moŋ, nɛkɛ ‘tsulɔyeli’ nɛɛ damɔ anɔkwale ni eji ákɛ akɛ ela ni jara wa lɛ ehe Yesu sɛɛnyiɛlɔi kɛha mlihilɛ sɔɔmɔ nɛɛ, yɛ naanɔ wala hewɔ. Yesu suɔmɔ lɛ ŋɔ amɛ nom ni amɛjɛ amɛsuɔmɔ mli amɛkɛ amɛhe ha lɛ. (Mateo 11:29, 30; okɛto Efesobii 5:21-33 he.) Yuda kɛɛ akɛ eji Kristo “tsulɔ” kɛ “Yakobo nyɛmi,” ni eka shi faŋŋ akɛ Yakobo ni ji Yerusalem asafo lɛ mumɔŋ “akulashiŋ” lɛ mlinyo kɛ “Nuŋtsɔ lɛ nyɛmi” lɛ ni. (Galatabii 2:9; 1:19; okɛto Bɔfoi lɛ Asaji 12:17; 15:13-31 he.) No hewɔ lɛ odaseyeli lɛ tsɔɔ akɛ Yuda ji Yesu nyɛ bi, shi eba ehe shi ejaakɛ etaooo ni ale lɛ yɛ Nyɔŋmɔ Bi lɛ wekunyo ni eji hewɔ.—Marko 6:3.
5. (a) Namɛi ji “mɛi ni atsɛ amɛ” lɛ? (b) Yɛ mɛɛ gbɛ nɔ ‘abaa’ “mɛi ni atsɛ amɛ” Iɛ ayi aha Kristo? (d) Yɛ “mɛi ni atsɛ amɛ” lɛ asɛɛ lɛ, namɛi hu Yuda wolo Iɛ woɔ amɛ hewalɛ?
5 Ato ni aja Yuda wolo lɛ yɛ he fɛɛ he. Akɛha “mɛi ni atsɛ amɛ” ni ji akɛ, mɛi ni Nyɔŋmɔ tsɛ amɛ kɛtee e-Bi lɛ anunyam ŋwɛi maŋtsɛyeli lɛ mli lɛ. (Yohane 6:44; okɛto Bɔfoi lɛ Asaji 16:14 he.) Yehowa sumɔɔ nɛkɛ “mɛi ni atsɛ amɛ” nɛɛ, ni eŋɔɔ enaa akɛ ekɛ maŋtsɛyeli lɛ aaaha amɛ kɛ amɛ diɛŋtsɛ lɛ amɛhiɛ mumɔŋ nɔkpɛlɛmɔ shihilɛ lɛ mli yɛ ehiɛ. (Luka 12:32; Roman 8:38, 39; okɛto Yesaia 52:11 he.) ‘Aŋɔ amɛ ato aha Yesu Kristo’ kɛ shishinumɔ akɛ Yehowa Nyɔŋmɔ bu amɛhe akɛni amɛkɛ e-Bi lɛ efee ekome hewɔ, akɛni amɛji egbɔmɔtso lɛ mlibii hewɔ. Kɛ amɛye anɔkwale lɛ, amɛbaafata Yesu he yɛ emaŋtsɛyeli lɛ mli. (Efesobii 4:15, 16; 2 Timoteo 1:12; 1 Petro 1:3-5) Shi ŋaawoo kpakpa ni yɔɔ wolo nɛɛ mli lɛ bɛ kɛha “mɛi ni atsɛ amɛ” lɛ pɛ. Ebaanyɛ efee hewalɛwoo kpele eha “asafo babaoo” ni ji anɔkwafoi krokomɛi ni ŋmɛnɛ amɛkɛ Kristo mumɔŋ “nyɛmimɛi” lɛ feɔ ekome kɛsɔmɔɔ yɛ maŋtsɛyeli lɛ he lɛ.—Mateo 24:14; 25:34-40; Kpojiemɔ 7:4, 9, 15.
6. Ajie Nyɔŋmɔ mɔbɔnalɛ lɛ kpo atsɔɔ Yuda nanemɛi jalɔi lɛ yɛ mɛɛ gbɛi anɔ?
6 No sɛɛ lɛ, Yuda kɛ henumɔ wie akɛ:
“Mɔbɔnalɛ kɛ hejɔlɛ kɛ suɔmɔ babaoo aha nyɛ.” (Yuda 2)
Akɛ ŋwɛi mɔbɔnalɛ, hejɔlɛ kɛ suɔmɔ ha mɛi ni aŋma Yuda wolo lɛ ayaha lɛ yɛ be mli ni amɛbatsɔmɔ heyelilɔi ni amɛjɔɔ amɛhe nɔ ni agbɛnɛ Yehowa kɛ amɛhe eshai lɛ ke amɛ kɛtsɔ Yesu Kristo nɔ lɛ. Ajie Nyɔŋmɔ mɔbɔnalɛ kpo kɛtsɔ kpɔmɔ he gbɛjianɔ ni eto kɛtsɔ Yesu nɔ lɛ nɔ. (Tito 3:4-7) Nyɔŋmɔ mɔbɔnalɛ lɛ kpojiemɔ kroko hu ji Mose mla lɛ nyɔŋyeli shishi ni amɛbɛ dɔŋŋ, blema saji ni jɛɛɛ ŋmalɛi lɛ amli, kɛ jeŋba kɛ nibii krokomɛi ni tamɔ nakai ni gbeɔ Nyɔŋmɔ he guɔ lɛ ashishi ni amɛbɛ dɔŋŋ. (Romabii 7:4; Galatabii 5:13; 1 Petro 1:18, 19; okɛto Kpojiemɔ 18:1-5 he.) Eji mɔbɔnalɛ hu yɛ Yehowa gbɛfaŋ akɛ ebaa amɛyi eha Yesu Kristo, koni amɛbasɔmɔ akɛ etsuji, tamɔ “sanekpakpa” lɛ ni amɛshiɛɔ lɛ nɛkɛ. (Marko 13:10) Yuda sɔlemɔ ji akɛ ŋwɛi mɔbɔnalɛ afa babaoo aha enanemɛi jálɔi lɛ.
7. Mɛni hewɔ ni yɛ mɛɛ gbɛ nɔ Kristofoi naa hejɔlɛ?
7 Yuda sɔle hu ni enanemɛi heyelilɔi ana hejɔlɛ loo toiŋjɔlɛ babaoo. Akɛni Yehowa Odasefoi, ejɔɔ amɛhe nɔ kwraa amɛha Nyɔŋmɔ ŋmɛnɛ hewɔ lɛ amɛkɛ lɛ yɛ wekukpaa ko ni mli wa mli. No hewɔ lɛ toiŋjɔlɛ loo hejɔlɛ ka amɛkɛ Yehowa teŋ ni agbɛnɛ amɛyɛ “Nyɔŋmɔ hejɔlɛ ni fe jwɛŋmɔi fɛɛ lɛ,” tsuiŋ kɛ jwɛŋmɔŋ hejɔlɛ ni mɛi ni heee yeee lɛ nuuu shishi. (Filipibii 4:6, 7; Kolosebii 1:19, 20) Agbɛnɛ hu, amɛdiɔ hejɔlɛ loo toiŋjɔlɛ sɛɛ ni amɛjieɔ su nɛɛ ni ji Nyɔŋmɔ mumɔ lɛ yibii lɛ kpo amɛtsɔɔ, ni amɛkɛ amɛnanemɛi adesai hiɔ shi yɛ hejɔlɛ loo toiŋjɔlɛ mli. (Galatabii 5:22, 23; Hebribii 12:14) Agbɛnɛ, anɔkwale Kristofoi sheee wɔsɛɛ be loo gbele diɛŋtsɛ gbeyei, shi moŋ amɛhe ejɔ amɛ, akɛni amɛle akɛ Yehowa kɛ amɛ yɛ ni ehaa enitsumɔi fɛɛ tsuɔ nii kɛyeɔ buaa mɛi ni sumɔɔ lɛ lɛ.—Mateo 10:28; Romabii 8:28.
8. Ajie Yehowa suɔmɔ lɛ kpo atsɔɔ wɔ yɛ mɛɛ gbɛ nɔ?
8 Yehowa suɔmɔ kpeteŋkpele lɛ je kpo yɛ e-Bi ni ekɛha lɛ mli, “bɔni afee ni mɔ fɛɛ mɔ ni heɔ enɔ yeɔ lɛ hiɛ akakpata shi moŋ ena naanɔ wala.” (Yohane 3:16) Be ni wɔka he wɔji eshafeelɔi ni wekukpaa ko bɛ wɔkɛ Yehowa teŋ lɛ, no mli ejie esuɔmɔ lɛ kpo etsɔɔ wɔ. (Romabii 5:8) Shi ehe miihia ni wɔhi Nyɔŋmɔ suɔmɔ lɛ mli kɛ hemɔkɛyeli yɛ nakai kpɔmɔ nɔ he gbɛjianɔtoo lɛ mli. Yuda hu sɔle ni suɔmɔ afa aha mɛi ni eŋmaa ewolo lɛ eyaha lɛ.
9. Mɛni hewɔ mɔbɔnalɛ, hejɔlɛ kɛ suɔmɔ ni fa babaoo he hiaa Yuda nanemɛi heyelilɔi lɛ?
9 Yuda sɔle ni Nyɔŋmɔ mɔbɔnalɛ, hejɔlɛ loo toiŋjɔlɛ kɛ suɔmɔ afa aha enanemɛi heyelilɔi ni esumɔɔ amɛ lɛ ejaakɛ aawo amɛmumɔŋ hilɛ kɛhamɔ he gbeyei. No hewɔ lɛ, Nyɔŋmɔ mɔbɔnalɛ, hejɔlɛ loo toiŋjɔlɛ kɛ suɔmɔ babaoo he miihia amɛ fe be fɛɛ.
‘Nyɛpelea Hemɔkɛyeli Lɛ He Waa’
10. Kulɛ Yuda to eyiŋ akɛ ebaaŋmɛ yɛ mɛni he?
10 No sɛɛ lɛ Yuda ma bɔ ni hiɛdɔɔ yɔɔ saji komɛi ahe lɛ nɔ mi, akɛ:
“Suɔmɔmɛi, eyɛ mli akɛ miibɔ mɔdɛŋ fɛɛ ni manyɛ koni maŋma nyɛ wɔ fɛɛ wɔyiwalaheremɔ lɛ he sane moŋ, shi mina akɛ ehe miihia ni maŋma nyɛ ni mikɛwo nyɛ ŋaa ni nyɛpelea hemɔkɛyeli ni atuu awo krɔŋkrɔŋbii lɛ adɛŋ shikome nyɔŋlo lɛ he waa.”—(Yuda 3)
Wiemɔ ni taa mɔ tsuiŋ ni Yuda kɛtsu nii, “Suɔmɔmɛi,” lɛ ma bɔ ni esumɔɔ enanemɛi jálɔi lɛ eha yɛ bɔ ni eshɛɛ wiemɔ lɛ mli wa ha lɛ fɛɛ sɛɛ lɛ nɔ mi. (Yohane 13:35; okɛto Romabii 1:7; 3 Yohane 1, 2 he.) Kulɛ eto eyiŋ akɛ ebaaŋma mɛi ni “atsɛ amɛ” kɛha ŋwɛi maŋtsɛyeli lɛ ‘amɛ fɛɛ amɛyiwalayeremɔ lɛ he sane.’ (Galatabii 3:26-29) Ekɔɔ yiwalaheremɔ he hiɛnɔkamɔ ni jara wa ni Kristofoi yɔɔ “yɛ hemɔkɛyeli koome lɛ nɔŋŋ gbɛfaŋ” yɛ Yuda gbii lɛ amli lɛ he.—Tito 1:4.
11. Mɛni ji ‘hemɔkɛyeli lɛ ni atuu awo krɔŋkrɔŋbii lɛ adɛŋ’ lɛ?
11 ‘Hemɔkɛyeli lɛ ni atuu awo krɔŋkrɔŋbii lɛ adɛŋ’ lɛ fɛɛ ji tsɔɔmɔi fɛɛ ni kɔɔ Yehowa Nyɔŋmɔ kɛ emaŋtsɛyeli lɛ he lɛ ni Yesu kɛ ekaselɔi ni mumɔ lɛ kɛ amɛ tsu nii lɛ tuu wo Kristofoi lɛ adɛŋ lɛ. Eka shi faŋŋ akɛ atuu awo amɛdɛŋ “shikome nyɔŋlo” kɛ shishinumɔ akɛ Yesu sɛɛnyiɛlɔi ni afɔ amɛ mu lɛ, “krɔŋkrɔŋbii” lɛ, anine shɛ nɔ afii ohai nyɔŋma kɛ nɛɛhu ni eho nɛ akɛ sanekpakpa kome pɛ ni yɔɔ. Eka he eji “hemɔkɛyeli lɛ” ni ŋmɛnɛ Yehowa Odasefoi yɔseɔ akɛ esa akɛ amɛkɛ amɛhe akpɛtɛ he gbagbalii lɛ, sanekpakpa kroko ko loo yiwalaheremɔ he sane ko ni sa akɛ ahe aye diɛŋtsɛ bɛ. (Galatabii 1:6-8) Ni nakai ‘sanekpakpa lɛ mli nɔ ko ni he hiaa waa ji akɛ Yesu gbo kɛha adesai aje muu lɛ fɛɛ. No hewɔ lɛ ehe hiaa “asafo babaoo” lɛ ni jɛ “tooi krokomɛi” lɛ ateŋ lɛ waa yɛ wɔgbi nɛɛ mli.—Yohane 10:16; 1 Yohane 2:1, 2; Kpojiemɔ 7:9.
12. Mɛni hewɔ Yuda ŋma koni ekɛwo nanemɛi heyelilɔi lɛ ŋaa ni ‘amɛpele hemɔkɛyeli lɛ he waa’ lɛ?
12 Yɛ Yuda gbii lɛ amli lɛ no mli lɛ apasa tsɔɔlɔi ni kɛɔ akɛ amɛfata Kristo jamɔ he lɛ miibɔ mɔdɛŋ ni amɛnyɛ Nyɔŋmɔ webii lɛ anɔ ni amɛhé sanekpakpa ko ni ji kantafit ni ji apasa nɔ amɛye. (Mateo 24:13; 2 Korintobii 11:3, 4) No hewɔ lɛ, bɔni afee ni ekɛte shi ewo nii ni yaa nɔ nɛɛ, kɛ agbɛnɛ bɔ ni mumɔ krɔŋkrɔŋ Iɛ kɛ suɔmɔ tsirɛ lɛ ha hewɔ lɛ, Yuda “na akɛ ehe miihia” ni eŋma enanemɛi heyelilɔi lɛ ni ewo amɛ ŋaa ni ‘amɛpele hemɔkɛyeli lɛ he waa.’
13. Bɔni afee ni wɔjo shishiumɔ loo lakamɔ kɛ heremɔ ni wɔɔlaaje naa foi lɛ, mɛni esa akɛ Odasefoi afee ŋmɛnɛ?
13 Kɛ wɔ, akɛ ŋmɛnɛŋmɛnɛ gbii nɛɛ amli Yehowa Odasefoi Kristofoi lɛ, wɔɔya nɔ wɔye Yehowa anɔkwale, ni wɔɔjo shishiumɔ kɛ yiwalaheremɔ ni wɔɔlaaje naa foi lɛ, belɛ esa akɛ wɔ hu, ‘wɔpele hemɔkɛyeli lɛ he waa’ wɔshi apasa sanekpakpa ko ni akɛaaba, ni wɔkɛ hiɛdɔɔ ate shi awo, ni wɔwuu wɔshi mɔdɛŋ ko ni aaabɔ ákɛ akɛ nɔ ko aaafata Yehowa mumɔ naa Wiemɔ ni yɔɔ krɔŋŋ lɛ mli tsɔɔmɔi lɛ ahe aloo aaajie nɔ ko kɛjɛ mli. (5 Mose 4:2; Abɛi 30:5, 6; Kpojiemɔ 22:18, 19) Esa akɛ wɔkɛ Nyɔŋmɔ Wiemɔ muu Iɛ fɛɛ ato tsɔɔmɔ hee fɛɛ tsɔɔmɔ hee ni wɔleee lɛ he, ni wɔmɔ hemɔkɛyeli ni kɛ mɔ yaa yiwalaheremɔ mli lɛ mli kpɛŋŋ.—Hebribii 1:1, 2; 2:3, 4.
14, 15. (a) Yuda tsɔɔ nɔ hewɔ ni etsake yiŋtoo ni yɔɔ ewolo ni eŋmaa lɛ sɛɛ lɛ mli yɛ mɛɛ gbɛ nɔ? (b) Mɛni hewɔ ni apasa tsɔɔlɔi yeŋ omanye yɛ Kristofoi asafo muu lɛ fɛɛ ni amɛaafite lɛ loo amɛaawo he muji lɛ mli?
14 Yɛ be mli ni etsɔɔ yiŋtoo hewɔ ni ha etsake eniŋmaa lɛ mli lɛ, Yuda jaje akɛ:
“Ejaakɛ gbɔmɛi komɛi eju shi ebabote mli, mɛi ni blema beebe ajɛ aŋma amɛhe sane afɔ shi aha fɔbuu [kojomɔ] nɛɛ, nɔshafeelɔi [mɛi ni leee Nyɔŋmɔ] ni ŋɔɔ wɔ Nyɔŋmɔ duromɔ lɛ amɛbɔɔ nyenyeŋtswi, ni amɛkwaa Nyɔŋmɔ ni ji nɔyelɔ kome pɛ lɛ kɛ wɔ Nuŋtsɔ Yesu Kristo lɛ.” (Yuda 4) Mɛi ni “eju shi ebabote” anɔkwale Kristofoi ateŋ lɛ tsɔɔ apasa yɛ gbɛ ni yɔɔ nigii nɔ. (Okɛto Galatabii 2:4; 1 Yohane 2:19 he.) Yesu etsɔ hiɛ egba henyɛlɔi akuu ko ni ato he gbɛjianɔ koni efite Yehowa webii efɔ shi, ejaakɛ etsɔɔ akɛ Abonsam baatɛo “jwɛi” aloo apasa Kristofoi ewo “ŋmaa” aloo Kristo sɛɛnyiɛlɔi anɔkwafoi lɛ ateŋ. (Mateo 13:24-30, 36-43) Agbɛnɛ hu bɔfoi lɛ ebɔ hemɔkɛyeli kwamɔ he kɔkɔ, Petro je gbɛ etsi “amale tsɔɔlɔi” atã.—2 Petro 2:1; Bɔfoi lɛ Asaji 20:29, 30; 2 Tesalonikabii 2:3.
15 Shi kɛlɛ, nakai gbɔmɛi fɔji lɛ yeŋ omanye yɛ asafo lɛ fɛɛ fitemɔ loo ebulemɔ lɛ mli. “Blema beebe,” dani anɔkwafo Henok aaagba lɛ no mli lɛ ato nɛkɛ gbɔmɛi nɛɛ aha Nyɔŋmɔ fɔbuu kojomɔ. (1 Mose 3:15; 5:21-24; Yuda 14, 15) Nɔ ni nyiɛ sɛɛ baa yɛ Yuda wolo lɛ mli lɛ tsɔɔ nɔ ni nɛkɛ “fɔbuu [kojomɔ] nɛɛ” ji.
16. Mɛni hewɔ “nɔshafeelɔi” aloo gbɔmɛi ni leee Nyɔŋmɔ lɛ yeɔ fɔ yɛ “ŋɔ ni amɛŋɔɔ Nyɔŋmɔ duromɔ lɛ amɛbɔɔ nyenyeŋtswi” lɛ hewɔ, ni mɛni ejaaa yɛ amɛsusumɔ he?
16 Nakai apasa tsɔɔlɔi lɛ ji “nɔshafeelɔi” [mɛi ni leee Nyɔŋmɔ] aloo “mɛi ni bɛ woo kɛha Nyɔŋmɔ.” (The New Testament in Modern English ni J. B. Phillips tsɔɔ shishi) Amɛkɛ yiŋtoo ni he tseee kɛ hiŋmɛi ni bɛ krɔŋŋ kwɛɔ Yehowa webii ni atsuu amɛhe lɛ. Nakai hii ni kɛ woo haaa Nyɔŋmɔ lɛ susuɔ yɛ gbɛ ni ejaaa nɔ akɛ akɛni Nyɔŋmɔ kɛ tsutsu ajwamaŋbɔlɔi, wɔjalɔi, gbalafitelɔi kɛ mɛi krokomɛi ahe eshai ke amɛ hewɔ lɛ, ebaana mɔ ni jɛɔ esuɔmɔ mli ediɔ eshafeemɔ nibii nɛɛ asɛɛ lɛ mɔbɔ aahu akɛ ekɛ ehe eshai baake lɛ ekoŋŋ. Amɛsusu yɛ gbɛ ni ejaaa nɔ akɛ amɛbaanyɛ amɛku Nyɔŋmɔ jeŋba he mlai lɛ amli bɔ ni amɛsumɔɔ, ni agbɛnɛ amɛkɛɛ akɛ amɛtsake amɛtsui ni amɛhi Yehowa webii ateŋ kɛyashi be kroko mli ni eshafeemɔ aaaba amɛtsine akɛ amɛkɛ amɛhe aaawo mli, ‘ni amɛlaka susumai ni nane mɔ ko shi lɛ,’ kɛya jeŋba shara mli. (2 Petro 2:14) No hewɔ lɛ “nɔshafeelɔi” aloo mɛi ni leee Nyɔŋmɔ nɛɛ yeɔ fɔ akɛni amɛŋɔɔ “wɔ Nyɔŋmɔ duromɔ lɛ amɛbɔɔ nyenyeŋtswi” hewɔ. Amɛleee ni amɛkpɛlɛɛɛ nɔ diɛŋtsɛ akɛ Nyɔŋmɔ naa mɔbɔ yɛ heyelilɔi ahe esha ni ekɛ Kristo la lɛ fɔ hewɔ, koni yɛ no sɛɛ lɛ amɛtiu jalɛ gbɛ lɛ.—Romabii 6:11-23; 1 Korintobii 6:9-11.
17. Yɛ mɛɛ gbɛ nɔ amɛteŋ mɛi komɛi ‘kwaa amɛ Nɔtsɛ kɛ Nuŋtsɔ kome pɛ lɛ’, ni mɛni mɛɔ amɛ?
17 Kɛji akɛ wɔteŋ mɔ ko, akɛ Yehowa Odasefoi ni wɔjɔɔ wɔhe nɔ lɛ ŋmɛɛ wɔhe wɔha gbɔmɛi ni leee Nyɔŋmɔ lɛ ni wɔbatsɔmɔ esha nyɔji kɛha pɛsɛmkunya heloo lɛ akɔnɔ ni wɔɔgbe hewɔ lɛ, belɛ ‘wɔmiikwa’ mɔ ni kɛ ela ni jara wa lɛ he wɔ lɛ. Wɔmiikwa Yesu Kristo akɛ Nɔtsɛ kɛ Nuŋtsɔ lɛ. (1 Korintobii 7:22, 23) Akɛni hiɛkpatamɔ mɛɔ mɛi ni feɔ enɛ hewɔ lɛ, kwɛ bɔ ni ehe hiaa waa akɛ wɔte shi wɔwo gbɔmɛi fɔji ni tamɔ nɛkɛ!
Ŋaawoo Ni Mli Wa Kɛha Wɔ Gbi Nɛɛ
18, 19. (a) Mɛɛ eshafeemɔ gbɛ mɛi ni tsɛɔ amɛhe Kristofoi lɛ ateŋ mɛi komɛi enyiɛ nɔ? (b) Enɛ ena mɛi krokomɛi anɔ hewalɛ yɛ mɛɛ gbɛ nɔ? (d) Mɛɛ mumɔ naa ŋaawoo esa akɛ eye ebua anɔkwale Kristofoi ni amɛtsɔmɔ mɛi ni awula amɛ jogbaŋŋ koni ‘amɛpele hemɔkɛyeli lɛ he waa’?
18 Ŋmɛnɛ, mɛi fioo ko yɛ ni kɛ amɛhe ebɔ Yehowa Odasefoi asafo lɛ ni amɛyasumɔ akɛ amɛaagbɛ apasa tsɔɔmɔ kɛ jeŋba shara amɛshwa yɛ mli. Gbɔmɛi ni bɛ jeŋba kpakpa he gbɛjianɔtoo nɛɛ kuɔ amɛhiɛ amɛshwieɔ Nyɔŋmɔ jalɛ tɛi ni efolɔ eshwie shi lɛ anɔ ni amɛji oshara diɛŋtsɛ kɛha anɔkwale Kristofoi.
19 Eyɛ awerɛhoo akɛ aaawie akɛ apasa tsɔɔmɔ kɛ jeŋba gbonyo baanyɛ ana hewalɛ yɛ Yesu Kristo sɛɛnyiɛlɔi ni tsuɔ nii waa ni diɔ jalɛnifeemɔ sɛɛ lɛ anɔ. Shi Yuda ŋaawoo ni mli wa lɛ baawo anɔkwafoi lɛ hewalɛ bɔni afee ni amɛkaŋmɛɛ amɛhe amɛha nɛkɛ Satan mɔdɛŋbɔɔ nɛɛ koni efite wekukpaa ni ka amɛkɛ Yehowa Nyɔŋmɔ teŋ lɛ. Yɛ be mli ni wɔyaa nɔ yɛ Yuda wolo ni jɛ mumɔŋ lɛ he susumɔ nɔ lɛ, eba akɛ enɛ aaawula wɔ ni ‘wɔpele hemɔkɛyeli lɛ he waa.’b
[Shishigbɛ niŋmai]
a Kwɛmɔ Aid to Bible Understanding bf. 978. 979; “All Scripture Is Inspired of God and Beneficial,” bf. 259, 260, ni Watchtower Bible and Tract Society, New York. Inc. fee.
b Ajie kɛjɛ August 15, 1982 blɔfo Buu-Mɔɔ lɛ mli.
Ani obaanyɛ oha sanebimɔi nɛɛ ahetoo?
□ Mɛni Yuda wolo lɛ wieɔ he, ni baanya ekɛ oshara diɛntsɛ aba anɔkwale Kristofoi anɔ?
□ Yuda wolo lɛ he yɛ sɛɛnamɔ kpele kɛha wɔ ŋmɛnɛ yɛ mɛɛ gbɛ nɔ?
□ Mɛni hewɔ mɔbɔnalɛ, hejɔlɛ kɛ suɔmɔ babaoo he hiaa mɛi ni Yuda ŋma amɛ lɛ?
□ Mɛni ji “hemɔkɛyeli lɛ ni atuu awo krɔŋkrɔŋbii lɛ adɛŋ shikome nyɔŋlo lɛ”?
□ Mɛɛ yiŋtoo hewɔ Yuda wo enanemɛi heyelilɔi lɛ ahewalɛ ni ‘amɛpele hemɔkɛyeli lɛ he waa’ lɛ?
[Mfoniri ni yɔɔ baafa 10]
Ani ‘opeleɔ hemɔkɛyeli lɛ he waa’ tamɔ anɔkwale Kristofoi lɛ yɛ be fɛɛ mli?