Klɛŋklɛŋ Saramɔ yɛ Gbɛ ni Mɔɔ Shi Nɔ
1 Sanegbaa shishijee yɛ sɔɔmɔ lɛ mli baanyɛ afee nɔ ni kaa mɔ waa ejaakɛ gbɔmɛi bɛ deka kɛ amɛ diɛŋtsɛ amɛ nibii afeemɔ loo amɛhiɛ jwɛŋmɔi sɔrɔtoi yɛ jamɔ he. Mɛni wɔbaanyɛ wɔha ahi wɔjwɛŋmɔ mli ni baaye abua wɔ koni mɛi aŋɔɔ ni wɔyaa klɛŋklɛŋ kwraa lɛ afee nɔ ni mɔɔ shi?
2 Obaanyɛ ogbala jwɛŋmɔ kɛya Yesu Kristo nɔ kɛtsɔ wiemɔ akɛ:
“Eji anɔkwasane ni anyɛŋ aje he ŋwane akɛ Yesu Kristo ena adesa yinɔ sane nɔ hewalɛ waa, kɛ shihilɛ yɛ shikpɔŋ nɔ hu kɛtsɔ eshikpɔŋ nɔ sɔɔmɔ lɛ nɔ. Gbɔmɛi akpekpei abɔ kɛɔ akɛ amɛji esɛɛnyiɛlɔi ŋmɛnɛ. Mɛni ji nɔ ni osusuɔ akɛ Yesu diɛŋtsɛ feɔ bianɛ?” Ŋmɛɛ gbɛ ni eha hetoo. Kɛkɛ lɛ obaanyɛ okɛ shiatsɛ lɛ akane Kpojiemɔ 6:2, ni tsɔɔ akɛ Yesu ta okpɔŋɔ yɛŋ nɔ ni eeya ni eyaye ekunim egbe naa lɛ. Wiemɔ maŋtsɛ ni eji lɛ kɛ bɔ ni enɔyeli lɛ kɛ naanɔ sɛɛnamɔi baaba abaha adesai toibolɔi fɛɛ lɛ he.
3 Kɛ okɛ March 1 nɔ ni hiɛ sane “Akɛ Klantei Aaasɔ Kɔii—Mɛɛ Be? Yɛ Mɛɛ Gbɛ Nɔ?” lɛ miiha lɛ, obaanyɛ okɛɛ:
◼ “Adesai miitao toiŋjɔlɛ, shi tawuu efee adesai agboshinii ni yɔɔ mɔbɔ kɛjɛ blema ni aleee. Maŋ kome mli tawuu po miiya nɔ bianɛ yɛ Afrika maji komɛi amli. Ani hiɛnɔkamɔ ko yɛ akɛ anɔkwa jeŋ muu fɛɛ toiŋjɔlɛ baaba yɛ wɔsɛɛ be ko mli? Buu-Mɔɔ lɛ maa Nyɔŋmɔ shiwoo nɔ mi ni etsɔɔ nɔ hewɔ ni wɔbaanyɛ wɔna nɔmimaa akɛ akɛ tawuu nii baafee toiŋjɔlɛ nibii yɛ wɔsɛɛ be mli lɛ.” Kanemɔ Lala 46:9, 10 kɛ Mika 4:3, 4 ni okɛye he odase.
4 Obaanyɛ okɛ April 15, 1992 “Buu-Mɔɔ” lɛ atsɔɔ kɛtsɔ sɔlemɔ he sane lɛ nɔmimaa nɔ, akɛ:
◼ “Gbɔmɛi sɔleɔ kɛhaa kunimyeli yɛ tawuu be mli. Ani osusuɔ akɛ Nyɔŋmɔ boɔ sɔlemɔi nɛɛ atoi ni edamɔɔ afa kome eshiɔ afa kroko? [Ŋmɛɛ gbɛ ni aha hetoo.] Susuma Biblia lɛ hetoo nɛɛ he.” Kɛkɛ lɛ kanemɔ 1 Petro 3:12 ni otsɔɔ mli. Beni otsɔɔ mli kuku sɛɛ lɛ, gbalamɔ ejwɛŋmɔ kɛya Buu-Mɔɔ lɛ mli sane ni baakanya mɔ lɛ miishɛɛ ni ekane wolo tɛtrɛɛ lɛ nɔ. Wo lɛ hewalɛ ni eshɛ.
5 Ha ahi ojwɛŋmɔ mli akɛ oti ni ma wɔhiɛ ji ni wɔfee Biblia mli nikasemɔ. Yɛ be mli ni wɔ fɛɛ wɔtswaa wɔfai shi akɛ wɔbaatsu nii waa yɛ May lɛ, wɔbaana hegbɛi babaoo po ni wɔkɛna aŋkroaŋkroi ni sumɔɔ akɛ amɛaakase Biblia lɛ. Ekolɛ mɛi komɛi miifee gbɛgbalɔi awalɔi yɛ May. Shi kɛji akɛ shihilɛ ni wɔyɔɔ mli lɛ eŋmɛɛɛ wɔ gbɛ ni wɔfee gbɛgbalɔi awalɔi yɛ May po lɛ, wɔ fɛɛ wɔbaanyɛ wɔkɛ Biblia mli nikasemɔ ni wɔɔje shishi lɛ afee oti ni ma wɔhiɛ.
6 Shiɛlɔi komɛi kɛ dɛhiɛmɔ woji bibii etsu nii ni amɛkɛje Biblia mli nikasemɔi ashishi klɛŋklɛŋ kwraa ni amɛyaa mɛi aŋɔɔ.
Kɛ okɛ dɛhiɛmɔ wolo “Shihilɛ yɛ Toiŋjɔlɛ Jeŋ Hee Ko Mli” lɛ miiha lɛ, obaanyɛ okɛɛ akɛ:
◼ “Wɔji gbɔmɛi ni wɔtu wɔhe wɔha ni wɔba okutso nɛɛ mli. Hemɔ nɛkɛ dɛhiɛmɔ wolo bibioo nɛɛ, ni tsɔɔ bɔ ni wɔnitsumɔ lɛ ji lɛ. Ani osusuɔ akɛ je lɛ baatsɔ tamɔ nɛkɛ gbi ko?” Kɛ eha hetoo lɛ, obaanyɛ okɛ lɛ asusu klɛŋklɛŋ kukuji fioo lɛ ahe, ni oma Mateo 6:9, 10 kɛ Lala 37:29 nɔ mi.
7 Susumɔ gbɛ ni oootsɔ nɔ otsɔɔ mɔ ni oji lɛ he jogbaŋŋ. Akɛ ŋaawoo ni hi jogbaŋŋ eha yɛ Reasoning wolo lɛ mli yɛ baafai 9-15. Nɛkɛ hiɛkpamɔ wiemɔ nɛɛ ni okɛaatsu nii kɛ hesaa lɛ baaha oklɛŋklɛŋ saramɔ lɛ amɔ shi jogbaŋŋ.