Ani Obaanyɛ Oye Obua Yɛ He Ni Hiamɔ Lɛ Da Yɛ Lɛ?

¹ Ni nyɛaatsɔmɔ midasefoi . . . kɛyashi shikpɔŋ lɛ naagbee hei lɛ.” (Bɔfoi 1:⁠8) Yesu gbalɛ nɛɛ miiba mli ŋmɛnɛ yɛ shikpɔŋ fe 210 nɔ yɛ he ni Odasefoi fe akpekpei 4 kɛ ekaa shiɛɔ sanekpakpa lɛ yɛ lɛ. Aagbele hei ni yɔɔ banee lɛ babaoo kɛmiiha Maŋtsɛyeli shiɛmɔ nitsumɔ lɛ yɛ Ghana. Akɛ nɔkwɛmɔ nɔ lɛ, asafoi 35 ni ato yɛ sɔɔmɔ afii enyɔ ni ho lɛ mli lɛ ateŋ 12 jɛ maji ni tsutsu lɛ asafo ko kwraa bɛ jɛmɛ lɛ amli.

² Shi hei babaoo yɛ ni dara ni miibi yelikɛbuamɔ​—ŋa lɛ nɔ, yɛ Ghana, yɛ Northern, Upper East kɛ Upper West Niiaŋ. Nɛkɛ hei ni gbɔmɛi ni yɔɔ jɛmɛ lɛ ayikulɛ ji akpekpei 2.3 lɛ yɛ asafoi 11 pɛ kɛ emli shiɛlɔi 309. Kɛ aja mli lɛ, esa akɛ shiɛlɔ 1 ashiɛ aha gbɔmɛi 7,680, yɛ be mli ni kɛ akɛto maŋ muu lɛ fɛɛ nɔ he lɛ, esa akɛ shiɛlɔ 1 ashiɛ aha mɛi 424! Yɛ anɔkwale mli lɛ, ŋmaakpamɔ nitsulɔi ahe miihia waa yɛ kooyigbɛ. ‘Agbele shinaa agbo ni kɛ mɔ yaa nitsumɔ mli lɛ naa yɛ nɛkɛ Kpokpai nɛɛ anɔ. (1 Kor. 16:9; Mat. 9:​37, 38) Ani obaanyɛ oŋɔ hegbɛ ni tamɔ nɛkɛ ni okɛlɛɛ gbɛfaŋnɔ ni onaa yɛ sɔɔmɔ lɛ mli lɛ mli?

³ Bɔ Ni Mɛi Komɛi Toɔ Gbɛjianɔ Koni Amɛkɛ Amɛhe Awo Mli: Nyɛmimɛi komɛi kɛ amɛ gbɛhamɔ loo beni amɛba hejɔɔmɔ fioo lɛ tsuɔ gbɛgbamɔ nitsumɔ yɛ maŋ ni amɛhalaa lɛ mli yɛ Kooyigbɛ. Mɛi ni hiɛ amɛ diɛŋtsɛ amɛnitsumɔ lɛ hu kɛ nyɔji komɛi tsuɔ nii yɛ jɛmɛ. Wekui komɛi ni amɛfee ekome hu toɔ gbɛjianɔ koni amɛye amɛbua amɛwekui lɛ amlibii lɛ ateŋ mɔ kome loo mɛi komɛi koni amɛyasɔmɔ yɛ Kooyigbɛ. Kɛfata he lɛ, nyɛmimɛi fioo ko hu eto gbɛjianɔ koni amɛnitsumɔ lɛ ajie amɛ kɛya Kooyigbɛ hei komɛi ni amɛhe baaba sɛɛnamɔ aha esafo ni yɔɔ nakai maŋ lɛ mli lɛ yɛ be mli amɛtsuɔ heloo gbɛfaŋ nitsumɔ yɛ jɛmɛ lɛ. Nɔ ni woɔ mɔ hewalɛ hu ji akɛ, obalaŋtai komɛi ehala akɛ amɛaafee amɛ National Service lɛ yɛ Kooyigbɛ koni amɛkɛ asafo ko loo nyɛmimɛi ni yɔɔ he ko banee atsu nii. Obalaŋtai ni yɔɔ National Service nitsumɔ mli ni sumɔɔ lɛ baanyɛ aŋma abaha Asafo lɛ koni atsɔɔ amɛ gbɛ ni amɛaatsɔ nɔ amɛbua mɛi ni yɔɔ wiemɔ lɛ he miishɛɛ lɛ anaa ni afee amɛ kui ni he wa ni yɔɔ hei banee. Amɛtsɔ hiɛ amɛŋma dani amɛya.

⁴ Aŋkroaŋkroi komɛi hu ni nyɛɛɛ amɛfa gbɛ kɛjɛ Wuoyigbɛ ni amɛyashiɛ yɛ Kooyigbɛ lɛ hu nyɛɔ amɛkɛ amɛhe woɔ mli yɛ gbɛ kroko nɔ. Yɛ mɛɛ gbɛ nɔ? Kɛtsɔ shika gbɛfaŋ yelikɛbuamɔ ni amɛkɛaaha nyɛmimɛi ni sumɔɔ lɛ koni amɛnyɛ amɛya.

⁵ Hesaamɔ Diɛŋtsɛ He Miihia: Asafo lɛ ŋmɛɔ aŋkroaŋkroi ni faa kɛjɛɔ Wuoyigbɛ koni amɛyaye nyɔŋ kome loo babaoo akɛ gbɛgbalɔi awalɔi yɛ Kooyigbɛ lɛ gbɛ koni amɛhe woji wuji kɛ woji tɛtrɛbii yɛ gbɛgbalɔi ajara lɛ naa. Shi mɔ lɛ diɛŋtsɛ hesaamɔ ni tsɔɔ hiɛ he baahia, ejaakɛ mɔ lɛ diɛŋtsɛ baahe eniyenii, etao ewɔɔhe, gbɛfaa kɛ nibii krokomɛi. No hewɔ lɛ, dani mɔ lɛ aaaya lɛ, esa akɛ etsɔ sɔlemɔ nɔ ebu akɔntaa loo esusu nibii ahe jogbaŋŋ.​—Luka 14:⁠28.

⁶ Gbɛ ni Atsɔɔ nɔ Abiɔ Enɛ: Kɛ nyɛmi ko kpɛ eyiŋ akɛ ebaafee gbɛgbalɔ yɛ be kukuoo mli yɛ Kooyigbɛ lɛ, esa akɛ ebi gbɛ kɛjɛ Asafo lɛ dɛŋ, etsɔɔ egbɛi, esafo lɛ gbɛi, afii abɔ ni eye, be ni abaptisi lɛ, ni etsɔɔ kɛ eji daa gbɛgbalɔ loo gbɛgbalɔi awalɔ, onukpa loo asafoŋ sɔɔlɔ. Esa akɛ etsɔɔ bei abɔ ni ebaaye kɛ he ni ebaasɔmɔ yɛ lɛ hu. Kɛ eesumɔ ni akɛ lɛ aya he fɛɛ he hu lɛ, ekɛɛ nakai. Kɛ nyɛmimɛi komɛi yɛ ni eesumɔ ni ekɛ amɛ atsu nii lɛ, esa akɛ etsi enɛ hu ta. Wɔmiisumɔ ni kɛ hoo lɛ, nyɛmimɛi enyɔ abi ni amɛtsu nii kutuu yɛ he kome fe mɔ kome pɛ.

⁷ Esa akɛ akɛ gbɛbimɔ woji lɛ fɛɛ atsɔ onukpai akuu lɛ nɔ koni sɔɔmɔ ajinafoi lɛ kɛ amɛwao naa gbɛi awo shishi ni akɛmaje Asafo lɛ. Ebaahi akɛ aaaŋma wolo ni tamɔ nɛkɛ nyɔji etɛ kɛtsɔ be ni asumɔɔ ni aya lɛ hiɛ. Gbɛjianɔtoo nɛɛ hu kɔɔ nyɛmimɛi yei ahe. Akɛ amɛ eyaŋ Kooyigbɛ shi hei yɛ Wuoyigbɛ ni abaanyɛ akɛ nyɛmimɛi yei ni yɔɔ ekaa aya jɛmɛ.

⁸ Ghana ‘ŋmɔ lɛ eyɛ futaa kɛha kpamɔ bianɛ.’ (Yoh. 4:35) Wɔmiiwo nyɛmimɛi hii kɛ yei fɛɛ ni baanyɛ lɛ hewalɛ ni amɛye amɛbua ni atsu babaoo yɛ shikpɔŋkuku ni akɛwoko mɔ ko dɛŋ lɛ amli. Amɛbaana akɛ mumɔŋ hewalɛwoo babaoo yɛ mli, ni wɔle akɛ Yehowa baajɔɔ nɔ hu.