Gbekɛbii—Ani Nyɛhiɛ Sɔɔ Mɔdɛŋ Fɛɛ ni Nyɛfɔlɔi Bɔɔ Lɛ?
1 Wɔ fɛɛ wɔmli filiɔ wɔ akɛ wɔɔna gbekɛbii babaoo yɛ Yehowa gbɛjianɔtoo lɛ mli. Amɛji gboshinii ni jɛ Yehowa ŋɔɔ. (Lala 127:3) Esa akɛ ajie amɛyi yɛ toiboo ni amɛfeɔ amɛhaa fɔlɔi atsɔsemɔ, kɛtsɔ kpee ni amɛyaa daa ni amɛkɛ amɛhe woɔ Kristofoi akpeei amli lɛ hewɔ. Enɛ ŋɔɔ Yehowa, ni kudɔɔ fɔlɔi koni amɛfee amɛbii Kristo kaselɔi lɛ naa. (5 Mose 31:12; Kol. 3:20) Akɛni jeee onukpai pɛ ji mɛi ni sa akɛ amɛya shiɛmɔ hewɔ lɛ, aakpa gbɛ akɛ gbekɛbii baanyɛ ana mli gbɛfaŋnɔ yɛ Ŋmalɛ naa. Kɛ gbekɛ ji bo lɛ, ani onaa shiɛmɔ nitsumɔ lɛ mli gbɛfaŋnɔ daa otsi? Awoɔ gbekɛbii lɛ titri hewalɛ akɛ: “Nyɛjiea Yehowa gbɛi lɛ yi.”—Lala 148:7, 12, 13.
2 Obalahii kɛ obalayei bibii pii kɛ miishɛɛ kpɛlɛ nine ni afɔ atsɛ amɛ koni amɛbajie Yehowa yi lɛ nɔ yɛ Biblia bei amli. Gbekɛbii ni amɛwiemɔ yɔɔ mlɛo kɛ amɛ anɔkwayeli lɛ, etsirɛ onukpai koni amɛtsu nɔ ko he nii. Naeman ji gbɔmɔ wulu ko waa, ni lɛ ji Aram maŋtsɛ lɛ asraafonyo nukpa. Shi kpitiyelɔ hu ni. Gbekɛ yoo fioo ko ni ji Israelnyo ni aŋɔ lɛ nom lɛ kɛ ekãa kɛɛ ewura lɛ akɛ: “Miná ni mi-nuntsɔ yaje gbalɔ ni yɔɔ Samaria lɛ ŋɔɔ, kulɛ eeetsa ekpiti nɛɛ eha lɛ kwa!” Atsa Naeman hela lɛ yɛ heshibaa ni ejie lɛ kpo ni etsu gbekɛ yoo fioo lɛ wiemɔi lɛ ahe nii lɛ hewɔ. (2 Maŋ. 5:2, 3, 14) Beni Yesu ye afii 12 lɛ, ejie ehe kpo akɛ mɔ ni baanyɛ atao mumɔŋ nibii asɛɛ gbɛ. (Luka 2:46-50) Samuel “sɔmɔ Yehowa” beni eji gbekɛ nuu fioo.—1 Sam. 2:11.
3 Mɛi komɛi Miisumɔ ni Amɛfee Toiboo: Nyɔŋmɔ bɛ mɔ ni kɛ mligbigbilimɔ sɔmɔɔ lɛ ni no hewɔ lɛ ehe bahiaa ni mɛi krokomɛi atsirɛ lɛ daa koni efee Nyɔŋmɔ suɔmɔnaa nii lɛ he miishɛɛ. (Lala 110:3; okɛto Hebribii 10:38 he.) Kɛ bo, ni ji gbekɛ lɛ, sumɔɔ Yehowa lɛlɛŋ lɛ, bo hu obaasumɔ ni obo lɛ toi kɛtsɔ egbɛi kɛ Maŋtsɛyeli he sane lɛ ni oookɛɛ mɛi krokomɛi lɛ nɔ, taakɛ gbekɛbii pii feɔ ŋmɛnɛ po lɛ. Enɛ haa Yehowa tsui nyaa!—w90 7/1 kk. 29-30; w87 12/1 bf. 21.
4 Eyɛ mli akɛ obalahii kɛ obalayei bibii komɛi ena nilee kɛtsɔ Biblia lɛ kasemɔ nɔ moŋ, shi amɛshashaoɔ shi akɛ amɛaafã amɛ hemɔkɛyeli lɛ he yɛ skulbii kɛ mɛi krokomɛi ahiɛ. Kɛ nakai eji yɛ ogbɛfaŋ lɛ, mɛni ji naagba lɛ? Fɔlɔi, mɛni ji nɔ ni nyɛnaa akɛ no ji naagba lɛ? Mɛni hewɔ otsɔɔɔ sɔlemɔ nɔ ni okɛ ofɔlɔi agba enɛ he sane kɛ agbe kpee nɛɛ naa nɔŋŋ lɛ?
5 Tsu Gbɛnaa Nii Babaoo He Nii: Yehowa ji adesai a-Tsɛ kɛ weku gbɛjianɔtoo lɛ Shishijelɔ hu. (Efes. 3:15) Efee nɔkwɛmɔ nɔ ni yeɔ emuu eha tsɛmɛi fɛɛ kɛtsɔ e-Wiemɔ kɛ tsulɔ anɔkwafo kɛ nilelɔ lɛ ni etsɔɔ nɔ etsɔseɔ wɔ jogbaŋŋ lɛ nɔ. (Yoh. 6:45) Fɔlɔi Kristofoi kɛ mumɔŋ niyenii haa amɛbii lɛ daa. Akɛ gbekɛ lɛ, ani okɛ amɛ miifee ekome yɛ shiɛmɔ nitsumɔ lɛ mli ni oona mli gbɛfaŋnɔ hu? Ani okɛ shiɛmɔ wiemɔi kukuji ni yɔɔ dɛhiɛmɔ woji kɛ woji krokomɛi amli lɛ saa ohe? Yɛ be mli ni okɛ ofɔlɔi yaa shiɛmɔ lɛ, ani okaneɔ Biblia mli ŋmalɛi ni owieɔ saneyitsei ni ohala lɛ ahe yɛ shiɛmɔ wiemɔi kukuji amli? Fɔlɔi yɛ amɛ gbɛnaa nii ni Nyɔŋmɔ kɛha amɛ akɛ amɛtsɔse amɛbii yɛ sɔɔmɔ nitsumɔ lɛ mli. (Efes. 6:4; okɛto Yeremia 35:6-10 he.) Gbekɛbii hu yɛ Ŋmalɛ mli gbɛnaa nii akɛ amɛkpɛlɛ amɛfɔlɔi amɔdɛŋbɔɔ lɛ nɔ kɛtsɔ toiboo ni amɛaafee amɛha fɔlɔi atsɔsemɔ lɛ nɔ.—Efes. 6:1-3.
6 Aabi ni fɔlɔi kɛ gbekɛbii fɛɛ ajie hiɛsɔɔ kpo yɛ hegbɛ ni amɛna akɛ amɛaajie Yehowa yi lɛ he. Shi mɛni onukpai kɛ mɛi krokomɛi ni yɔɔ asafo lɛ mli lɛ baanyɛ afee koni amɛkɛye amɛbua fɔlɔi kɛ gbekɛbii koni amɛtsu amɛ nitsumɔi sɔrɔtoi lɛ ahe nii? Akɛ wɔsɛɛ be mli sane kroko baatsu enɛ he nii.