Yehowa Ji Wɔ Bɔlɔ
1 Mɛi akpekpei abɔ heɔ yeɔ akɛ Nyɔŋmɔ bɔ wala. Mɛi krokomɛi babaoo heɔ sutsakemɔ amɛyeɔ. Agbɛnɛ mɛi yɛ ni bɛ nɔmimaa yɛ nɔ ni amɛaahe amɛye lɛ nɔ. Life—How Did It Get Here? By Evolution or by Creation? wolo lɛ yɛ kɛha mɛi fɛɛ ni tamɔ nakai lɛ. Wolo nɛɛ kɛ bɔ ni fee ni wala baje biɛ kɛ nɔ ni enɛ tsɔɔ kɛha wɔ wɔsɛɛ be lɛ he sane mlitsɔɔmɔ ni agbɛlɛ shi jogbaŋŋ akɛtsu he nii lɛ haa. Wɔkɛ wolo fɛfɛo nɛɛ baaha yɛ June.
2 Jeŋ nilee he nikaselɔi ateŋ gbɔmɛi wuji lɛ po ekpɛlɛ wolo lɛ mli sane naatsɔɔmɔ lɛ nɔ. Jeŋ nilee he saji amlitaolɔ ni yɔɔ Netherlands lɛ ŋma akɛ: “Wolo nɛɛ yaa hiɛ kwraa fe nɔ fɛɛ nɔ ni wɔkpaa lɛ gbɛ lɛ diɛŋtsɛ. Bɔ ni akɛ sane naatsɔɔmɔ ni ja etsɔɔ yitsei lɛ amli aha kɛ amɛmli mfonirii lɛ yɛ ebe naa pɛpɛɛpɛ yɛ jeŋ nilee naa aahu akɛ onyɛŋ otee saji ni baate shi awo lɛ ashi.” Mla he nitsulɔ ko jaje akɛ: “Mikane lɛ shii ejwɛ ni nikasemɔ ni yaa hiɛ, nilee, kɛ saji ni abua naa akɛfee wolo lɛ etee nɔ ena minɔ hewalɛ.” No hewɔ lɛ wɔbaanyɛ wɔna nɔmimaa akɛ mɛi krokomɛi yɛ lolo ni hiɛ baasɔ wolo nɛɛ.
3 Ekolɛ obaasumɔ ni okɛ shiɛmɔ wiemɔ kuku ko tamɔ nɛkɛ aha:
◼ Gbelemɔ baafa 6, ni okɛɛ akɛ: “Mɛi pii susuɔ akɛ wɔ shikpɔŋ fɛfɛo kɛ wala ni yɔɔ nɔ lɛ ba trukaa. Mɛni osusuɔ akɛ eji sane mlitsɔɔmɔ ni nilee yɔɔ mli ni tsɔɔ bɔ ni fee ni enɛɛmɛi fɛɛ ba? [Ŋmɛɛ gbɛ ni ewie.] Odaseyelii babaoo maa Biblia mli sane ni tsɔɔ Bɔlɔ ni jeee akɛ ehe wa waa pɛ kɛkɛ, shi esumɔɔ wɔ waa diɛŋtsɛ hu lɛ nɔ mi. Lɛ ji anɔkwa Nyɔŋmɔ lɛ, ni egbɛi ji Yehowa.” Kanemɔ Lala 83:19, ni otsɔɔ bɔ ni eyiŋtoo ji akɛ ebaatsake shikpɔŋ muu lɛ fɛɛ efee lɛ paradeiso lɛ mli kuku.
4 Kɛ oosumɔ ni okɛ oti lɛ ama shi oya lɛ, obaanyɛ okɛɛ akɛ:
◼ “Ani osusu sanebimɔ nɛɛ he pɛŋ?” Tsɔɔmɔ wolo lɛ saneyitso, ni ogbele baafa 7, ni okane sanebimɔi ni yɔɔ kuku 2 lɛ, ni otsɔɔ mli akɛ wolo lɛ kɛ hetooi ni haa mɔ tsui nyɔɔ emli ni jɛ Biblia lɛ mli haa. Okɛ wolo lɛ aha ni otsɔɔ shia Biblia mli nikasemɔ he gbɛjianɔ ni ato lɛ mli.
5 Aloo obaanyɛ oka enɛ okwɛ:
◼ “Ani osusu bɔ ni fee ni shikpɔŋ lɛ ba shihilɛ mli lɛ he pɛŋ? Mɛi pii maa nɔ mi akɛ enɛ jɛ nɔ ko ni fɛ́ waa diɛŋtsɛ ni shikpɔŋ lɛ jɛ mli kɛba lɛ. Mɛni osusuɔ? [Ŋmɛɛ gbɛ ni ewie.] Biblia lɛ tsɔɔ akɛ Nyɔŋmɔ bɔ shikpɔŋ lɛ akɛ wɔnaanɔ shia. Esoro no yɛ shibɔlemɔ ŋulamii krokomɛi ni yɔɔ wɔ ŋulami kusha wulu lɛ mli lɛ he. Taakɛ wɔle lɛ, no pɛ ji nɔ ni yɔɔ jeŋ muu lɛ fɛɛ mli ni yɔɔ nibii sɔrɔtoi babaoo ni he hiaa kɛha wala.” Gbelemɔ kuku 5 yɛ baafa 130, ni otsɔɔ nɔ hewɔ ni shikpɔŋ lɛ ji Gbɛjianɔtolɔ ko ni He Esa lɛ nitsumɔ.
6 Gbɛ kroko ni obaatsɔ nɔ lɛ baanyɛ afee tamɔ nɛkɛ nɔŋŋ:
◼ “Mɛi komɛi susuɔ akɛ wɔtsake kɛjɛ gbɔmɛi ni tamɔ aduji amli. Amɛkɛɔ akɛ wɔ blematsɛmɛi lɛ tamɔ nɛkɛ. [Tsɔɔmɔ mfoniri ni yɔɔ baafa 89 lɛ.] Mɛni osusuɔ yɛ he?” Ŋmɛɛ gbɛ ni ewie. Tsɔɔmɔ nɔ ni atsɔɔ yɛ kuku 20 lɛ, ni okane Bɔfoi lɛ Asaji 4:24 lɛ ni tsɛɔ Yehowa akɛ wɔ Bɔlɔ kɛ Wala-Halɔ lɛ. “Wolo nɛɛ pɛiɔ sutsakemɔ tsɔɔmɔ lɛ fɛɛ mli yɛ nɔ ni Biblia lɛ kɛɔ lɛ naa.” Tsɔɔmɔ emli saji ni yɔɔ baafa 5 lɛ, ni otsɔɔ saneyitsei komɛi, tamɔ nɔ ni yɔɔ yitsei 1, 7, 15, kɛ 19 lɛ.
7 Wolo nɛɛ baanyɛ afee jɔɔmɔ aha gbɔmɛi anɔkwafoi ni mɛi ni bɛ Yehowa loo e-Wiemɔ lɛ mli hemɔkɛyeli lɛ elaka amɛ lɛ. Anɔkwa saji ni yɔɔ Creation wolo lɛ mli lɛ baanyɛ aye abua mɛi ni tamɔ nɛkɛ koni amɛhiɛ asɔ wɔ Bɔlɔ ni kɛ suɔmɔ susuɔ wɔhe lɛ babaoo.