Okɛ Obe Atsu Nii Jogbaŋŋ
1 Yehowa kɛ be tsuɔ nii waa. Eesumɔ ni wɔ hu wɔhiɛ ahi be nɔ. Etsɔɔ egbɛjianɔtoo lɛ nɔ eyeɔ ebuaa wɔ koni wɔkɛ be atsu nii jogbaŋŋ. Awoɔ wɔ hewalɛ daa ni wɔna “babaoo feemɔ yɛ Nuntsɔ lɛ nitsumɔ lɛ mli.” (1 Kor. 15:58, NW) Yɛ nɛkɛ gbɛ nɔ lɛ, wɔbaanyɛ wɔfee mɛi ni he esa waa yɛ Yehowa sɔɔmɔ mli.
2 Be falɛ kometoo lɛ nɔŋŋ wɔ fɛɛ wɔyɔɔ daa otsi—ŋmɛlɛtswai 168. Te wɔkɛ wɔbe tsuɔ nii jogbaŋŋ wɔhaa tɛŋŋ? Ani wɔtsɔɔ akɛ wɔle he ni wɔshɛ diɛŋtsɛ yɛ Yehowa jwɛŋmɔ naa? Ani nifeemɔi ni he ehiaaa miigbala wɔjwɛŋmɔ?
3 Ehe miihia ni wɔto wɔgbɛjianɔ jogbaŋŋ. Mɛi pii ŋmalaa nɔ ni he hiaa akɛ amɛtsu he nii klɛŋklɛŋ lɛ yɛ wolo nɔ, ni amɛbɔɔ mɔdɛŋ amɛkɛtsuɔ nii. Aŋmalaa nibii lɛ fɛɛ eko awoɔ wolo nɔ yɛ bɔ ni ehe hiaa ha lɛ naa. Te abaafee tɛŋŋ anyɛ ale enɛ? Biblia lɛ kɛɛ akɛ, esa akɛ gbɔmɔ “[a]ye nii kpakpai amli ŋɔɔmɔ yɛ edeŋmegbomɔ fɛɛ mli.” (Jaj. 3:13) Nitsumɔi komɛi woɔ yibii kpakpai fe ekrokomɛi. Susumɔ yibiiwoo ni eko fɛɛ eko kɛbaaba lɛ he. Ani nitsumɔ lɛ ni aaagbe naa lɛ kɛ sɛɛnamɔi ni sa kadimɔ baaba? Ani ‘obaaye’ onitsumɔ ni wa lɛ mli “nii kpakpai”? Kɛ jeee nakai lɛ, ekolɛ ebafeŋ nitsumɔ ni he hiaa fe fɛɛ.
4 Yɛ Wɔ Sɔɔmɔ Nitsumɔ lɛ Mli: Wɔhiɛ sɔɔ akɛ mɛi krokomɛi baaba kpeei kɛha shiɛmɔyaa lɛ yɛ be naa, ni amɛbo nitsɔɔmɔ lɛ toi jogbaŋŋ, ni amɛshi kɛya shikpɔŋkuku lɛ mli mra. Wɔkɛ hiɛdɔɔ baashiɛ moŋ fe ni wɔɔmɛ. Eka shi faŋŋ akɛ Paulo nu yɛ bɔ ni ehe hiaa ni ato gbɛjianɔ jogbaŋŋ lɛ he waa, beni eŋma akɛ: “Áfee nii fɛɛ bɔ ni yɔɔ fɛo kɛ gbɛnaa-gbɛnaa.”—1 Kor. 14:40.
5 Be mli ni wɔshiɛɔ lɛ, wɔbaanyɛ wɔfite be ni he baa sɛɛnamɔ lɛ yɛ be mli ni wɔjɔɔ wɔhe kɛyeɔ nɔ ko fioo lɛ. Shi kɛlɛ, kɛ kɔɔyɔŋ tsakemɔ lɛ mli bawa waa lɛ, wɔhe ni wɔɔjɔɔ fioo lɛ baaha wɔna hewalɛ ekoŋŋ ni eye ebua ni wɔtsa nɔ. Shi kɛlɛ, mɛi babaoo sumɔɔ ni amɛkɛ hiɛdɔɔ aye mɛi odase, ni amɛsumɔɔɔ ni amɛkɛ nyɛmimɛi bɔɔ yɛ hejɔɔmɔ be kɛha nɔ ko fioo yeli, beni eji be ni ato ama shi kɛha shiɛmɔ nitsumɔ lɛ. Ehe miihia ni aŋmɛ pɛpɛɛpɛ.
6 Bɔni afee ni efee klalo eha fɛ̃ibe hewɔ lɛ, Biblia lɛ kɛɔ akɛ, “klitso tete . . . le ebe” ni ekɛfãa kɛyaa, ni tsatsu “taoɔ eniyenii etoɔ yɛ latsaabe mli.” (Yer. 8:7; Abɛi 6:6-8) No mli gbɛ ni atsɔɔ nɔ akɛtsuɔ be he nii jogbaŋŋ lɛ yɔɔ. Esa akɛ wɔ hu ‘wɔle wɔbe.’ Esa akɛ wɔkɛ be atsu nii jogbaŋŋ, tsɛbelɛ, wɔfeee kpɛŋŋ fe nine. Jeee nɔ ni ehe hiaa ni wɔfee lɛ pɛ kɛkɛ esa akɛ wɔle, shi be ni ehe hiaa ni akɛfee lɛ hu. Esa akɛ saji ni asusuɔ he kɛtsɔɔ hiɛ lɛ afee wɔsubaŋ, ni wɔshi be fioo kɛha naatsii nibii bibii komɛi lɛ. Ni ehe miihia ni wɔsumɔ hu akɛ wɔfolɔ nifeemɔi komɛi anɔ kuku ni wɔna be wɔha nɔ ko ni he hiaa babaoo lɛ, tamɔ wɔhesaamɔ kɛha kpeeyaa, shiɛmɔ nitsumɔ, kɛ teokrase nifeemɔi krokomɛi.
7 Wɔmiisumɔ ni wɔtsɔ tamɔ wɔ ŋwɛi Tsɛ, Yehowa Nyɔŋmɔ ni tsɔɔ wɔ akɛ “nɔ fɛɛ nɔ yɛ ebe ni ato” lɛ. (Jaj. 3:1) Wɔbaanyɛ ‘wɔgbe wɔsɔɔmɔ lɛ naa kwraa’ kɛtsɔ wɔbe ni wɔkɛaatsu nii jogbaŋŋ lɛ nɔ.—2 Tim. 4:5.