Okɛ Obe Atsu Nii Jogbaŋŋ
1 Mɔ fɛɛ mɔ yɛ be falɛ kome too lɛ nɔŋŋ ni ekɛaatsu nii daa otsi. Emli nɔ ni wɔtuɔ wɔwoɔ sanekpakpa lɛ gbɛɛ-kɛ-shwamɔ mli lɛ ji nɔ ni jara wa titri, ejaakɛ eji be ni wɔkɛtsuɔ nii yɛ yiwalaheremɔ nitsumɔ lɛ mli. (Rom. 1:16) Wɔtsɔɔ hiɛsɔɔ ni wɔyɔɔ kɛha enɛ kɛtsɔ wɔhe ni wɔsaa jogbaŋŋ kɛhaa shiɛmɔ nitsumɔ ni ato he gbɛjianɔ lɛ nɔ, ni wɔyashɛɔ kpeei ni afeɔ kɛha shiɛmɔyaa lɛ shishi yɛ be naa, kɛ agbɛnɛ hu, ni wɔɔshi kɛya shikpɔŋkuku lɛ mli oya. Ebaahi akɛ wɔkɛ hiɛdɔɔ aaashiɛ moŋ fe nɔ ni wɔɔmɛ lolo yɛ jɛmɛ. Akɛni Yehowa etsɔɔ wɔ akɛ “nɔ fɛɛ nɔ yɛ ebe ni ato” hewɔ lɛ, ehe miihia ni wɔkɛ be ni wɔto kɛha shiɛmɔ nitsumɔ lɛ atsu nii jogbaŋŋ diɛŋtsɛ.—Jaj. 3:1.
2 Okɛ Nilee Atsu Obe lɛ He Nii: Wɔnáa jɔɔmɔi babaoo kɛ́ wɔkpɛtɛ be ni baaha wɔkɛ wɔhe awo shiɛmɔ nitsumɔ lɛ mli daa lɛ he kpɛŋŋ lɛ. Bei pii lɛ, esa akɛ yibiiwoi kpakpai ni wɔnáa yɛ shiɛmɔ nitsumɔ lɛ mli lɛ kɛ be ni wɔyeɔ yɛ shiɛmɔ nitsumɔ lɛ mli lɛ aye egbɔ. Kɛ wɔfee tsakemɔi fioo ko yɛ wɔ daa gbi nitsumɔi amli lɛ, ani wɔbaanyɛ wɔtu bei babaoo wɔwo shiɛmɔ nitsumɔ lɛ mli? Ákɛ nɔkwɛmɔnɔ lɛ, kɛ́ wɔgbe Hɔɔ woji tɛtrɛbii kɛhamɔ nitsumɔ lɛ naa lɛ, ani wɔbaanyɛ wɔkɛ be fioo ko hu afee sɛɛsaramɔi fioo komɛi? Kɛ wɔkɛ wɔhe ewo shiɛmɔ nitsumɔ lɛ mli fioo Hɔgbaa lɛ, ani wɔbaanyɛ wɔkɛ be ko hu afee sɛɛsaramɔi loo wɔfee Biblia mli nikasemɔ? Ani wɔbaanyɛ wɔfee gbɛjegbɛ nɔ odaseyeli kɛfata wɔ shia-kɛ-shia nitsumɔ lɛ he? Yɛ enɛɛmɛi amli loo gbɛ̀i krokomɛi anɔ lɛ, ekolɛ wɔbaanyɛ wɔha wɔshiɛmɔ nitsumɔ lɛ aya hiɛ.
3 Kɛ wɔtee shiɛmɔ lɛ, wɔbaanyɛ wɔfite be ni he hiaa lɛ, kɛ́ wɔkwɛɛɛ jogbaŋŋ. Shi yɛ anɔkwale mli lɛ, kɛ́ kɔɔyɔŋ tsakemɔi lɛ amli wa lɛ, hejɔɔmɔ fioo ko baaha wɔná ekãa ekoŋŋ koni eye ebua ni wɔya nɔ wɔtsu. Shi kɛlɛ, ŋmɛɛ pɛpɛɛpɛ, ejaakɛ jeee be fɛɛ be hejɔɔmɔi ni tamɔ nɛkɛ he baahia.
4 Yɛ nyɛsɛɛ afii nɛɛ amli lɛ, ebafee nɔ ni wa waa be fɛɛ be akɛ aaana gbɔmɛi yɛ shia. Bɔni afee ni atsu shihilɛ nɛɛ he nii lɛ, shiɛlɔi babaoo feɔ amɛ shinaai anaa odaseyeli lɛ yɛ gbi lɛ mli be kroko mli. Mɛni hewɔ okaaa odaseyeli okwɛɛɛ beni shwane be lɛ miihe aho kwraa aloo beni jeŋ ebɔi namɔ kpaako lɛ?
5 Eji nɔ ni hi jogbaŋŋ kɛ́ wɔkɛ wɔhe egbaaa sane yɛ be mli ni wɔkɛ wɔhe woɔ gbɛjegbɛ nɔ odaseyeli nitsumɔ lɛ mli lɛ. Yɛ no najiaŋ lɛ, mɔ kome ashi mɔ kroko lɛ kɛyadamɔ he kroko ni nyɛbɛŋkɛa gbɔmɛi lɛ bɔni afee ni nyɛkɛ amɛ aje sanegbaai ashishi. Kɛtsɔ nakai feemɔ nɔ lɛ, akɛ be baatsu nii jogbaŋŋ diɛŋtsɛ ni abaaná miishɛɛ babaoo yɛ nitsumɔ lɛ mli.
6 Okɛ Hegbɛi Atsu Nii Koni Okɛye Odase: Beni shiatsɛ ko kɛɛ akɛ ebɛ he miishɛɛ lɛ, Odasefonyo lɛ bi kɛji mɔ kroko hu yɛ shia lɛ ni ebaanyɛ ekɛ lɛ agba sane. Enɛ ha ekɛ nuu ni yɔɔ shia mli ni ehe éye aahu afii babaoo ni saa nɔ sɔŋŋ ekãa daa lɛ gba sane. Hiɛnɔkamɔ ni atsɔɔ yɛ Nyɔŋmɔ Wiemɔ lɛ mli lɛ ha ená shihilɛ mli miishɛɛ ekoŋŋ. Etsɛɛɛ ni ená hewalɛ, ni ebɔi kpeeiyaa yɛ Maŋtsɛyeli Asa lɛ nɔ, ni ekɛ mɛi krokomɛi gbaa hiɛnɔkamɔ hee ni ená lɛ he sane!
7 Nyɛmi yoo ko ni yeko afii nyɔŋmai enyɔ kɛ ŋaawoo ni tsɔɔ akɛ akɛ he awo shiɛmɔ nitsumɔ lɛ mli beni eshwɛ ŋmɛlɛtswaa kome ni abaaje Asafo Woloŋ Nikasemɔ shishi lɛ tsu nii. Beni eshɛ klɛŋklɛŋ shinaa lɛ naa lɛ, ekɛ gbekɛ yoo ko ni eye afii 13 ni bo lɛ toi waa diɛŋtsɛ ni he wolo kome lɛ kpe. Enɔ jetsɛremɔ lɛ, nyɛmi yoo fioo lɛ na nɛkɛ gbekɛ yoo nɛɛ nɔŋŋ yɛ skul. No sɛɛ lɛ, etsɛɛɛ ni ekɛɛ ekɛ lɛ baakase Biblia lɛ, ni gbekɛ yoo lɛ kpɛlɛ nɔ.
8 Ha Be lɛ Afee Nɔ ni He Yɔɔ Sɛɛnamɔ: Shiɛmɔ nitsumɔ lɛ ni wɔkɛ wɔhe woɔ mli daa lɛ yeɔ ebuaa koni eha wɔhe asa jogbaŋŋ yɛ sanekpakpa lɛ shiɛmɔ mli. Ani obaanyɛ oha nyɛmɔ ni oyɔɔ akɛ oooje sanegbaa shishi yɛ shinaa naa lɛ aya hiɛ kɛtsɔ hiɛkpamɔ wiemɔ ni mɔɔ shi waa ni okɛaatsu nii lɛ nɔ? Ani obaanyɛ ofee tsɔɔlɔ ni he esa babaoo beni ofeɔ shia Biblia mli nikasemɔ? Kɛtsɔ nakai feemɔ nɔ lɛ, obaanyɛ okɛ be ni okɛwoɔ shiɛmɔ nitsumɔ lɛ mli lɛ atsu nii jogbaŋŋ ni oha oshiɛmɔ nitsumɔ lɛ awo yibii babaoo.—1 Tim. 4:16.
9 Akɛni “be lɛ fáaa dɔŋŋ” hewɔ lɛ, esa akɛ Kristofoi anitsumɔi ayi wɔshihilɛi amli obɔ. (1 Kor. 7:29) Esa akɛ wɔha shiɛmɔ nitsumɔ lɛ aye klɛŋklɛŋ gbɛhe, kɛ́ wɔmiijara wɔbe lɛ mli wɔha nifeemɔi srɔtoi yɛ wolo nɔ lɛ. Nyɛhaa wɔkɛ wɔhe awoa shiɛmɔ nitsumɔ lɛ mli jogbaŋŋ kɛ ekãa. Be ji nikeenii ni yɔɔ naakpɛɛ ni Yehowa kɛha wɔ. Okɛ nilee atsu he nii koni efee nɔ ni mɔɔ shi.
[Akrabatsa ni yɔɔ baafa 8]
Susumɔ Ŋaawoi Nɛɛ Ahe Okwɛ:
◼ Shɛ́ he ni afeɔ kpeei kɛha shiɛmɔyaa lɛ yɛ be naa.
◼ Yɛ yiŋtoo kpakpa hewɔ lɛ, esa akɛ aha kui ni yaa odaseyeli lɛ afee kui bibii.
◼ Esaaa akɛ ofiteɔ be dani oyaa shikpɔŋkuku lɛ mli.
◼ Tsu nii yɛ shikpɔŋkuku lɛ mli be mli ni mɛi babaoo yɔɔ shia.
◼ Okome too pɛ otsu nii yɛ bei komɛi amli be mli ni oshara bɛ he akɛ ooofee nakai.
◼ Feemɔ sɛɛsaramɔi ni bɛŋkɛ he ni ofeɔ shia-kɛ-shia nitsumɔ lɛ yɛ lɛ.
◼ Ohiɛ adɔ kɛ shiɛmɔ yɛ be mli ni afiteɔ mɛi ni fata ohe lɛ abe yɛ shinaa ko naa lɛ.
◼ Be fɛɛ be ni eeehi nakai feemɔ yɛ bɔ ni shihilɛi lɛ ji ha naa lɛ, tsɛɛ yɛ shiɛmɔ mli.