Okɛ Obe Atsu Nii Jogbaŋŋ yɛ Shiɛmɔ Nitsumɔ lɛ Mli
Yɛ afi 2014 sɔɔmɔ afi lɛ mli lɛ, Yehowa Odasefoi kɛ ŋmɛlɛtswai 1,945,487,604 tsu nii yɛ shiɛmɔ nitsumɔ lɛ mli—odaseyeli ni tsɔɔ faŋŋ akɛ wɔkɛ hiɛdɔɔ miitsu Yehowa nitsumɔ lɛ! (Lala 110:3; 1 Kor. 15:58) Akɛni “be ni eshwɛ lɛ faaa” hewɔ lɛ, ani wɔbaanyɛ wɔkɛ be ni wɔyɔɔ lɛ ashiɛ ahã mɛi babaoo?—1 Kor. 7:29.
Kɛ́ wɔkɛ wɔbe aaatsu nii jogbaŋŋ yɛ shiɛmɔ nitsumɔ lɛ mli lɛ, ebiɔ ni wɔtsake wɔhe wɔwo shihilɛ lɛ mli. Akɛ nɔkwɛmɔnɔ lɛ, kɛ́ oyeɔ ŋmɛlɛtswaa kome loo nɔ ni fa fe nakai yɛ shiɛmɔ nitsumɔ lɛ fã ko mli ní okɛ mɔ ko egbaaa sane lɛ, ani obaanyɛ ofee tsakemɔi koni onyɛ oná mɛi babaoo ni okɛ amɛ agba sane? Esoro shihilɛ ni yɔɔ he fɛɛ he. Shi ŋaawoi ni nyiɛ sɛɛ nɛɛ baanyɛ aye abua bo koni okɛ obe atsu nii jogbaŋŋ, ni okafee mɔ ni “mamɔɔ kɔɔyɔɔ atswɛrɛ.”—1 Kor. 9:26.
Shĩa Fɛɛ Shĩa Odaseyeli: Afii pii nɛ lɛ, shiɛlɔi kɛ amɛhe woɔ shĩa fɛɛ shĩa odaseyeli lɛ mli kɛjeɔ amɛshiɛmɔ nitsumɔ lɛ shishi. Kɛ̃lɛ, akɛni mɛi babaoo tsuɔ nii yɛ gbi lɛ mli hewɔ lɛ, mɛni hewɔ okaaa shĩa fɛɛ shĩa odaseyeli lɛ gbɛkɛnaashi be ni mɛi pii yɔɔ shĩa ni amɛmiijɔɔ amɛhe lɛ okwɛɛɛ? Kɛ́ wɔye mɛi odase yɛ gbɛjegbɛi ahe loo yɛ amɛnitsumɔhei yɛ gbi lɛ mli lɛ, wɔbaaye omanye waa.
Maŋ Odaseyeli: Esa akɛ akɛ okpɔlɔi loo shwiilii amamɔ hei ni mɛi fɔɔ tsɔmɔ yɛ asafo lɛ shikpɔŋkuku lɛ mli lɛ. (Kwɛmɔ July 2013 Wɔ Maŋtsɛyeli Sɔɔmɔ lɛ, bf. 5.) Kɛ́ ebalɛ akɛ mɛi ni tsɔɔ hei nɛɛ anɔ gbɔ lɛ, Asafoŋ Sɔɔmɔ Ajinafoi lɛ baanyɛ akpɛ mli akɛ akɛ okpɔlɔ loo shwiili lɛ ayama he kroko ni mɛi fɔɔ tsɔmɔ moŋ fe he ni eyɔɔ tsutsu lɛ.
Sɛɛkuukɛsaramɔi kɛ Biblia mli Nikasemɔi: Ani obaanyɛ oyafee sɛɛkuukɛsaramɔ kɛ Biblia mli nikasemɔ yɛ bei ni onyɛŋ ona mɛi babaoo kɛ́ ootsu shiɛmɔ nitsumɔ lɛ fãi krokomɛi lɛ amli? Akɛ nɔkwɛmɔnɔ lɛ, kɛ́ onaa mɛi pii yɛ shĩa fɛɛ shĩa shiɛmɔ nitsumɔ lɛ mli Hɔɔ leebi lɛ, ani obaanyɛ oyafee Biblia mli nikasemɔ lɛ shwane loo gbɛkɛnaashi? Kɛ́ wɔmiifee sɛɛkuukɛsaramɔi lɛ, ani wɔbaanyɛ wɔya mɛi ni wɔkɛkaseɔ nii ni yɔɔ akutso kome mli lɛ fɛɛ aŋɔɔ dani wɔshi kɛya he kroko, bɔ ni afee ni wɔkɛ wɔbe atsu nii jogbaŋŋ?
Eyɛ mli akɛ kɛ́ wɔtee shiɛmɔ lɛ, wɔŋmaa bei abɔ ni wɔkɛtsuɔ nii lɛ moŋ, shi mɛi babaoo ni wɔkɛgbaa sane lɛ ji nɔ ni hãa wɔná miishɛɛ waa. Kɛ́ ona akɛ onaaa mɛi pii yɛ shiɛmɔ nitsumɔ lɛ fã ko mli lɛ yɛ be pɔtɛɛ ko mli lɛ, kaa fã kroko okwɛ. Sɔlemɔ obi Yehowa, ni ji “nikpamɔ Nuŋtsɔ lɛ” ni etsɔɔ bo gbɛ koni onyɛ okɛ obe atsu nii jogbaŋŋ yɛ shiɛmɔ nitsumɔ lɛ mli!—Mat. 9:38.