Ye Obua Mɛi ni Bɛ Hemɔkɛyeli Lɛ
1 Ní aaabu mɔ ko akɛ ele woloŋ ni eyaa ehiɛ yɛ esaji ahesusumɔ mli lɛ ebafee nɔ ko ni yaa nɔ waa yɛ ŋmɛnɛŋmɛnɛ be nɛɛ mli. Awoɔ adesa jeŋ nilee kɛ tsɔɔmɔi ni akaa yiŋ awieɔ lɛ hiɛ nyam, yɛ be mli ni akuɔ hiɛ ashwieɔ mumɔŋ nibii ni jara wa lɛ anɔ. Gbɔmɛi anɔkwafoi ni yɔɔ anɔkwa saji ni mli ka shi faŋŋ kɛ anɔkwalei ni shishinumɔ yɔɔ mli lɛ ahe miishɛɛ lɛ baakpɛlɛ hegbɛ ni amɛkɛaapɛi Life—How Did It Get Here? By Evolution or by Creation? wolo lɛ mli amɛkwɛ lɛ nɔ. Wolo nɛɛ baanyɛ aye abua mɛi ni bɛ hemɔkɛyeli lɛ. (Rom. 1:19, 20) Kwɛmɔ ni ofee sɛɛsaramɔ yɛ mɛi ni tsɔɔ he miishɛɛ lɛ ahe.
2 Obaanyɛ oje osanegbaa lɛ shishi nɛkɛ:
◼ “Miyɛ nɔmimaa akɛ ole akɛ tsɔɔlɔi babaoo fiɔ hemɔkɛyeli ni tsɔɔ akɛ adesa weku lɛ baje biɛ kɛtsɔ sutsakemɔ nɔ lɛ sɛɛ. Nɔ ni etsɔɔ ji akɛ, nɔ fɛɛ nɔ ba shihilɛ mli trukaa. Te onuɔ he ohaa tɛŋŋ? [Ŋmɛɛ gbɛ ni ewie.] Ayaa nɔ atsɛɔ yiŋsusumɔ nɛɛ lolo akɛ tsɔɔmɔ ni akaa yiŋ awieɔ. Tsɔɔmɔ ni akaa yiŋ awieɔ lɛ ji ‘nɔ ko ni asusuɔ yiŋ awieɔ’ loo ‘sane he yiŋsusumɔ ko ni odaseyeli bɛ he.’ Afii ohai abɔ nɛ ni mɛi he amɛye akɛ shikpɔŋ lɛ yɛ tɛtrɛɛ; amrɔ nɛɛ wɔle akɛ no ji kwashiai asusumɔ ni damɔɔɔ anɔkwale nɔ. Ani nakai baanyɛ afee anɔkwale yɛ sutsakemɔ tsɔɔmɔ lɛ he?” Kanemɔ hiɛkpamɔ wiemɔi ni yɔɔ baafa 4 lɛ, koni nyɛgba Yesaia 42:5 lɛ mli sane.
3 Aloo obaanyɛ okɛ gbɛ ni tamɔ nɛkɛ atsu nii, kɛ́ oku osɛɛ oyasara lɛ:
◼ “Ewaaa akɛ okɛ mɛi ni heee Nyɔŋmɔ nɔ amɛyeee lɛ aaakpe. Yɛ afii komɛi ni eho lɛ amli lɛ, efɔɔɔ kaa kwraa. Mɛni hewɔ osusuɔ akɛ mɛi pii elaaje Nyɔŋmɔ mli hemɔkɛyeli lɛ? [Ŋmɛɛ gbɛ ni ewie.] Mɛi pii kɛɔ akɛ hemɔkɛyeli ni amɛbɛ lɛ jɛ basabasa-feemɔ kɛ haomɔ ni efa yɛ wɔje nɛɛ mli lɛ. Amɛtsɔɔ saji amli akɛ, kɛji Nyɔŋmɔ ofe ko yɛ lɛ, mɛni hewɔ ekɛ amanehului nɛɛ fɛɛ baaa naagbee? Bei pii lɛ mɛi ni nyɛɛɛ ana nakai sanebimɔ lɛ hetoo ni haa mɔ tsui nyɔɔ mɔ mli lɛ batsɔmɔɔ mɛi ni kɛɔ akɛ Nyɔŋmɔ bɛ. Shi odaseyelii babaoo yɛ ni tsɔɔ akɛ Nyɔŋmɔ yɛ ni akɛ etsɛŋ ni ebaafee shikpɔŋ nɛɛ hé ni miishɛɛ kɛ toiŋjɔlɛ yɔɔ.” Okɛ Ŋmalɛ mli saji ahesusumɔi ni anaa yɛ kuku 19 yɛ baafa 196 lɛ atsu nii ni okɛtsa sanegbaa lɛ nɔ.
4 Be mli ni ohiɛ o-Biblia lɛ, obaanyɛ oje sanegbaa lɛ shishi kɛtsɔ enɛ kɛɛmɔ nɔ:
◼ “Wɔba ni wɔbasara bo ekoŋŋ koni wɔtsɔɔ nɔ hewɔ ni abaanyɛ akɛ Biblia mli nii ni akaseɔ lɛ atsu nii yɛ wɔbei nɛɛ amli lɛ. Mɛi pii yɛ Biblia, shi mɛi fioo pɛ taoɔ be ni amɛkaneɔ. Mɛi komɛi kɛɔ wɔ yɛ faŋŋ mli akɛ amɛbɛ hekɛnɔfɔɔ babaoo yɛ Biblia lɛ mli dɔŋŋ. Te onuɔ enɛ he ohaa tɛŋŋ? [Ŋmɛɛ gbɛ ni ewie.] Nibii ni haa wɔnaa nɔmimaa akɛ Biblia lɛ ji Nyɔŋmɔ Wiemɔ ni jɛ mumɔŋ lɛ ekome ji emli gbalɛi lɛ amlibaa.” Tsɔɔmɔ Ŋmalɛi ni yɔɔ kuku 6 yɛ baafa 234 lɛ.
5 Ekolɛ abaakpɛlɛ sane he susumɔ nɛɛ nɔ jogbaŋŋ:
◼ “Wɔbaanyɛ wɔna nɔ ni yɔɔ fɛo kɛ nilee he odaseyeli ni yɔɔ naakpɛɛ lɛ yɛ nibii ni ebɔle wɔhe kɛkpe yɛ shikpɔŋ nɛɛ nɔ lɛ he. Hulushinyɔɔ he mfoniri fɛfɛo nɛɛ ji nɔkwɛmɔ nɔ ko ni sa jogbaŋŋ.” Tsɔɔmɔ mfoniri ni yɔɔ baafai 12 kɛ 13 lɛ. Tsii tã otsɔɔ saji otii ni jɛ “Some Things to Think About” lɛ mli ni otsɔɔ bɔ ni wolo nɛɛ kɛ sanebimɔi ni he hiaa yɛ wɔje lɛ he lɛ hetoo ni haa mɔ tsui nyɔɔ emli lɛ haa.
6 Wɔbaanyɛ wɔtsɔmɔ jɔɔmɔ wɔha mɛi krokomɛi kɛtsɔ wolo nɛɛ ni wɔkɛbaatsu nii ni wɔkɛye wɔbua amɛ ni amɛna shishitoo ni wa kɛha amɛ Bɔlɔ lɛ mli hemɔkɛyeli.