Ani Wɔnuko Nakai Pɛŋ?
1 Eka shi faŋŋ akɛ wɔ́nu pɛŋ! Yehowa tĩɔ saji babaoo amli yɛ e-Wiemɔ lɛ mli koni ehe aba sɛɛnamɔ aha ewebii lɛ. Bei pii lɛ Yesu tĩɔ enitsɔɔmɔi ni kɔɔ Maŋtsɛyeli lɛ fãi srɔtoi ahe lɛ mli. Ebɔfoi lɛ kɛ mɛi ni efi shi shiŋŋ yɛ anɔkwale lɛ mli lɛ tĩɔ mumɔŋ saji amli be fɛɛ be.—Rom. 15:15; 2 Pet. 1:12, 13; 3:1, 2.
2 Yehowa gbɛjianɔtoo lɛ eto gbɛjianɔ yɛ wɔbe nɛɛ mli koni atĩ nibii ni he hiaa ni akaseɔ lɛ amli aahu shii abɔ yɛ asafoŋ kpeei ashishi. Akase woji komɛi shii abɔ. Hɛɛ, ehe miihia ni wɔnu saji ni wɔnu momo lɛ!
3 Saji Amlitĩi Tsuɔ Hiamɔ ko He Nii: Yehowa kaimɔi lɛ haa wɔshishinumɔ yaa hiɛ waa, ehaa wɔsusumɔ yaa hiɛ, ni ehaa bɔ ni wɔtswa wɔfai shi akɛ wɔɔya nɔ daa yɛ mumɔŋ lɛ mli bawaa. (Lala 119:129) Tɛi ni Nyɔŋmɔ efolɔ eshwie shi kɛ eshishitoo mlai amlitĩi lɛ tamɔ nɔ ni aakwɛ hiɛ yɛ ashwishwɛ mli. Eyeɔ ebuaa wɔ koni wɔpɛi wɔmli ojogbaŋŋ wɔkwɛ, ni ewuɔ eshiɔ henumɔ ni wɔɔná akɛ wɔɔfee “mɔ ni nuɔ ni ehiɛ kpaa nɔ” lɛ.—Yak. 1:22-25.
4 Kɛ wɔyaaa nɔ wɔkaiii wɔhe anɔkwale lɛ, nibii krokomɛi baaná wɔtsuii anɔ hewalɛ. Nyɔŋmɔ kaimɔi lɛ woɔ wɔ hewalɛ koni wɔte shi wɔwo Satan je lɛ mli nibii ni fiteɔ mɔ lɛ. (Lala 119:2, 3, 99, 133; Fil. 3:1) Kaimɔi ni kɔɔ Nyɔŋmɔ yiŋtoi amlibaa he, ní wɔnine shɛɔ nɔ daa lɛ tsirɛɔ wɔ koni ‘wɔsara.’ (Mar. 13:32-37) Ŋmalɛ mli anɔkwalei lɛ amlitĩi lɛ yeɔ ebuaa wɔ ní wɔya nɔ wɔnyiɛ naanɔ wala gbɛ lɛ nɔ.—Lala 119:144.
5 Bɔ ni Wɔɔfee Koni Wɔ Diɛŋtsɛ Wɔná He Sɛɛ: Esa akɛ ‘wɔkudɔ wɔtsuii kɛya Nyɔŋmɔ kaimɔi lɛ ahe.’ (Lala 119:36) Kɛ abaakase nɔ ko ni ale momo yɛ asafoŋ kpee shishi lɛ, esa akɛ wɔsaa wɔhe kɛtsɔ hiɛ, ní wɔtao ŋmalɛi ni aŋmalako emli wiemɔi lɛ, ní wɔsusu bɔ ni wɔɔfee wɔkɛ sane lɛ atsu nii lɛ he. Nyɛkahaa wɔshiaa niŋmaa kaa ni yɔɔ Teokrase Sɔɔmɔ Skul lɛ mli lɛ, ní wɔɔsusu akɛ ehe ehiaaa. (Luka 8:18) Nyɛkahaa wɔfea mɛi ni booo nɔ ni akaseɔ lɛ toi akɛni atĩɔ shishijee anɔkwalei amli yɛ bei babaoo mli yɛ wɔkpeei ashishi lɛ hewɔ.—Heb. 5:11.
6 Eba akɛ wɔɔfee wɔnii tamɔ lalatsɛ lɛ, ní wie akɛ: “Mimli filiɔ mi yɛ [okaimɔi, NW ] lɛ agbɛ lɛ nɔ, taakɛ bɔ ni mɔ mli filiɔ mɔ yɛ nifálɛ fɛɛ he lɛ.” (Lala 119:14) Hɛɛ, wɔnu nɛkɛ saji ni jara wawai nɛɛ pɛŋ, ni ekolɛ wɔbaasaa wɔnu ekoŋŋ. Mɛni hewɔ? Ejaakɛ Yehowa le akɛ ehe miihia ni wɔnu!