Kpokpaa Nɔ Kpee He Gbɛjianɔtoo Hee

Mɛɛ sɛɛnamɔi diɛŋtsɛ onine shɛɔ nɔ amrɔ nɛɛ kɛjɛɔ Yehowa ni okɛ lɛ nyiɛɔ lɛ mli? Te ooofee tɛŋŋ okpoo kaa ni ji nibii ni jeee teokrase nii lɛ asɛɛ ni ooodi ni oha ebaye Maŋtsɛyeli nibii anajiaŋ yɛ klɛŋklɛŋ gbɛhe yɛ oshihilɛ mli? (Mat. 6:33) Ani ewaa kɛhaa bo akɛ obaayoo ekpakpa kɛ efɔŋ yɛ jeŋ ni haa nɔ fɔŋ jeɔ kpo akɛ nɔkpakpa lɛ mli? (Heb. 5:14 ) Abaagbala saji nɛɛ amli yɛ “Ná Nyɔŋmɔ Gbɛ̀i lɛ Anɔ Nyiɛmɔ He Sɛɛ Amrɔ Nɛɛ” kpokpaa nɔ kpee, ni baaje shishi yɛ February 2000 lɛ.—Lala 128:1.

Nifeemɔ hee ko ni abaafee Hɔɔ yɛ nɛkɛ kpokpaa nɔ kpee nɛɛ shishi lɛ ji bɔ ni abaafee Sɔɔmɔ Kpee lɛ aha lɛ he nɔkwɛmɔnɔ. Nyɛ kpokpaa nɔkwɛlɔ lɛ baatswa asafo lɛ adafi yɛ gbɛjianɔ ni ato lɛ he bɔni afee ni mɛi fɛɛ asaa amɛhe kɛba ni amɛbaná gbɛjianɔtoo lɛ mli ŋɔɔmɔ kɛmɔ shi.

Fã ni hiɛ yitso akɛ “Gbɛgbalɔi—Nyɛkwɛa Bɔ ni Nyɛnyiɛɔ Nyɛhaa lɛ Jogbaŋŋ” lɛ baatsɔɔ wɔ bɔ ni wɔkɛ nilee kɛ hiɛshikamɔ baatsu nii koni wɔkɛhe be kɛha gbɛgbamɔ nitsumɔ lɛ. (Efe. 5:15-17) Saneyitso ni ji “Nyɛkwɛa Nyɛhe ni Ahia Yɛ Gbɛ̀i ni Tamɔ Jalɛ Nɔ lɛ Ahe” lɛ baatsɔɔ wɔ bɔ ni wɔɔfee wɔná nɔmimaa yɛ nɔ ni Nyɔŋmɔ kpɛlɛɔ nɔ yɛ shihilɛi fɛɛ amli. Wiemɔ ni ji “Bɔni Gbalɛi ni Eba Mli lɛ Saa Wɔhe Ehaa” lɛ baaye ebua ni wɔjwɛŋmɔi kɛ wɔtsuii amli ayimɔ obɔbɔ kɛ suɔmɔ kɛha Nyɔŋmɔ Wiemɔ lɛ. Maŋshiɛmɔ ni ji “Nyɔŋmɔ Gbɛ̀i Lɛ—Mɛɛ Sɛɛnamɔ Yɔɔ He!” lɛ baama sɛɛnamɔi diɛŋtsɛ ni nine shɛɔ nɔ amrɔ nɛɛ kɛjɛɔ Yehowa jalɛ taomɔ nii lɛ anaa ni aaanyiɛ yɛ lɛ anɔ mi.

Ani eji oshwelɛ akɛ okɛ nu mli baptisimɔ aaafee lɛ faŋŋ akɛ oosumɔ ni onyiɛ yɛ Nyɔŋmɔ gbɛ̀i lɛ anɔ akɛ etsuji ni ejɔɔ amɛhe nɔ lɛ ateŋ mɔ kome? No lɛ okɛ sɛinɔtalɔ lɛ awie bɔni afee ni ato gbɛjianɔi ni sa lɛ.

Tswaa ofai shi akɛ ohaŋ nɛkɛ kpokpaa nɔ kpee ni yɔɔ ebe naa nɛɛ aŋmɛɛ bo. Ba gbii enyɔ gbɛjianɔtoo lɛ fɛɛ shishi, ejaakɛ “Ajɔɔ mɔ fɛɛ mɔ ni sheɔ Yehowa, ni enyiɛɔ egbɛ̀i lɛ anɔ lɛ!”—Lala 128:1.