Okɛ Kɔɔyɔɔ Akanɔ
1. Te 1 Korintobii 9:26 lɛ kɔɔ sɔɔmɔ nitsumɔ lɛ he tɛŋŋ?
1 Bɔfo Paulo ŋma akɛ: “Foi ni midaa nɛɛ, midaaa lɛ butubutu; nɔmɔ ni minɔɔ nɛɛ, jeee kɔɔyɔɔ mikɛnɔɔ.” (1 Kor. 9:26) No mli lɛ, Paulo miiwie mumɔŋ otii ni ekɛmamɔ ehiɛ, kɛ bɔ ni ehaaa nɔ ko kwraa agbala ejwɛŋmɔ kɛjɛ nakai otii lɛ ahe lɛ he. Shi yɛ anɔkwale mli lɛ, wiemɔi nɛɛ kɔɔ sɔɔmɔ nitsumɔ lɛ hu he. Esa akɛ wɔkɛ hiɛshikamɔ atsu nii koni wɔkɛ kɔɔyɔɔ akanɔ, loo wɔkagbo deŋme yaka, bɔni afee ni wɔmɔdɛŋbɔi lɛ awo yibii jogbaŋŋ. Te wɔɔfee tɛŋŋ wɔfee nakai?
2. Te wɔɔfee tɛŋŋ wɔkase Paulo kɛ klɛŋklɛŋ afii 100 lɛ mli shiɛlɔi krokomɛi lɛ kɛ́ wɔmiitao wɔna be kɛ he ni esa akɛ wɔyashiɛ yɛ?
2 Yaa He ni Obaana Mɛi Yɛ: Paulo kɛ klɛŋklɛŋ afii 100 lɛ mli shiɛlɔi krokomɛi shiɛ yɛ hei ni amɛle akɛ amɛbaana mɛi yɛ. (Bɔf. 5:42; 16:13; 17:17) No hewɔ lɛ, kɛ́ mɛi ni yɔɔ wɔshikpɔŋkuku lɛ mli lɛ ateŋ mɛi babaoo hiɔ shĩa gbɛkɛ lɛ, ekolɛ be nɛɛ baafee be ni hi jogbaŋŋ akɛ wɔɔshiɛ yɛ shĩa kɛ shĩa. Ani mɛi babaoo hiɔ lɔle loo oketeke daamɔhe ni yɔɔ he ni oyɔɔ lɛ leebi maŋkpa beni mɛi miiya nitsumɔ, loo gbɛkɛnaashi beni mɛi ekpa kɛmiiba shĩa? Mɛɛ be mɛi babaoo yaa shwapoi ni yɔɔ nyɛshikpɔŋkuku lɛ mli lɛ amli? Nɛkɛ beaŋ baanyɛ afee be ni sa jogbaŋŋ kɛha gbɛjegbɛi ahe odaseyeli.
3. Mɛɛ gbɛ nɔ wɔɔtsɔ wɔkɛ hiɛshikamɔ atsu wɔshikpɔŋkuku lɛ mli nii koni ekafee tamɔ wɔkɛ kɔɔyɔɔ miinɔ?
3 Okɛ Hiɛshikamɔ Atsu Oshikpɔŋkuku lɛ mli Nii: Esa akɛ wɔkɛ hiɛshikamɔ atsu nii koni bɔ ni wɔtsuɔ wɔshikpɔŋkuku lɛ mli nii wɔhaa lɛ akafee tamɔ wɔkɛ kɔɔyɔɔ miinɔ. Ákɛ nɔkwɛmɔnɔ lɛ, kɛ́ akɛ shiɛlɔi akuu ko ní yi fa tee he kome too lɛ nɔŋŋ lɛ, ebaahe be kɛ mɔdɛŋbɔɔ babaoo dani abaanyɛ ato kuu lɛ he gbɛjianɔ bɔ ni mɔ fɛɛ mɔ baashiɛ jogbaŋŋ. No hewɔ lɛ, ebaahi jogbaŋŋ akɛ ajara kuu lɛ mli bibiibibii. Nakai nɔŋŋ hu kɛ́ wɔkadi shĩai ni wɔyanaaa mɔ ko yɛ mli lɛ (yɛ S-8 wolo lɛ nɔ lɛ), bei pii lɛ, no baaye abua wɔ koni wɔkaya shĩai kome too lɛ nɔŋŋ amli daa otsi. Wɔbaanyɛ wɔbi ni aha wɔ shikpɔŋkuku ko ni bɛŋkɛ wɔshĩa lɛ, koni wɔkafite be kɛmiifã gbɛ kakadaŋŋ.
4. Mɛni baaye abua wɔ koni wɔfee “gbɔmɛi ahe wolɛi” ni he esa jogbaŋŋ?
4 Yesu kɛ shiɛlɔi to “gbɔmɛi ahe wolɛi” ahe. (Mar. 1:17) Nɔ hewɔ ni wolɛɛnyo yaa wuo lɛ ji ní eyagbe loo, jeee ni eyafɔ̃ yaa kɛkɛ. No hewɔ lɛ, wolɛi ni he esa lɛ yaa he ni amɛkpaa gbɛ akɛ amɛbaaná loo yɛ, ni kɛ́ amɛshɛ jɛmɛ lɛ, amɛfiteee be. Hɛɛ, amɛkɛ hiɛshikamɔ tsuɔ nii koni amɛkagbo deŋme yaka. Nyɛhaa wɔkɛ mɔdɛŋbɔɔ ni tamɔ nakai nɔŋŋ atsua wɔsɔɔmɔ nitsumɔ lɛ.—Heb. 6:11.