Yehowa Gbɛjianɔtoo lɛ He Miihia Wɔ

ANI ónu pɛŋ ni mɔ ko miiwie akɛ, “Miheɔ Nyɔŋmɔ nɔ miyeɔ, shi mikɛ jamɔ he gbɛjianɔtoo ko tsuuu nii”? Bei pii lɛ aŋkroaŋkroi ni kulɛ amɛji sɔlemɔyalɔi ni yɔɔ ekãa waa ni amrɔ nɛɛ amɛhɛle shi akɛni amɛjamɔ lɛ nyɛɛɛ atsu amɛmumɔŋ hiamɔ nii ahe nii hewɔ lɛ ejie susumɔi ni tamɔ nɛkɛ kpo. Eyɛ mli akɛ kɛ́ aaawie lɛ, jamɔŋ gbɛjianɔtoi eha mɛi babaoo anijiaŋ eje wui moŋ, shi amɛmiima nɔ mi lolo akɛ amɛmiisumɔ ni amɛjá Nyɔŋmɔ. Shi kɛlɛ, amɛheɔ amɛyeɔ akɛ ehi akɛ amɛaajá lɛ yɛ gbɛ ni amɛsumɔɔ nɔ moŋ fe ni amɛkɛ amɛhe aaabɔ sɔlemɔ ko loo gbɛjianɔtoo kroko ko he ni amɛkɛfee nakai.

Mɛni Biblia lɛ kɛɔ? Ani Nyɔŋmɔ miisumɔ ni Kristofoi kɛ amɛhe abɔ gbɛjianɔtoo ko?

Mra Be Mli Kristofoi Ná Amɛhe Gbɛjianɔ ni Ato lɛ He Sɛɛ

Yɛ Pentekoste 33 Ŋ.B. lɛ, jeee heyelilɔi fioo ko ni etsetsee amɛhe banee lɛ anɔ Yehowa fɔse emumɔ krɔŋkrɔŋ lɛ eshwie, shi efɔse eshwie hii kɛ yei akuu ni babua amɛhe naa “yɛ hekome” ni ji ŋwɛitsu ko ni yɔɔ Yerusalem maŋtiase lɛ mli lɛ anɔ. (Bɔfoi lɛ Asaji 2:1) Yɛ nakai beaŋ lɛ, ato Kristofoi asafo lɛ ni batsɔ majimaji ateŋ gbɛjianɔtoo lɛ shishi. Enɛ bafee jɔɔmɔ diɛŋtsɛ kɛha mra be mli kaselɔi lɛ. Mɛni hewɔ? Nɔ kome ji akɛ, akɛ nitsumɔ ko ni he hiaa lɛ ewo amɛdɛŋ—no ji Nyɔŋmɔ Maŋtsɛyeli lɛ sanekpakpa lɛ ni yɛ naagbee lɛ amɛbaashiɛ yɛ “je nɛŋ fɛɛ” lɛ. (Mateo 24:14) Yɛ asafo lɛ mli lɛ, mɛi heei ni atsake amɛ kɛba mli lɛ baanyɛ akase bɔ ni amɛaatsu amɛshiɛmɔ nitsumɔ lɛ he nii kɛjɛ nanemɛi heyelilɔi ni yɔɔ niiashikpamɔ lɛ aŋɔɔ.

Etsɛɛɛ ni Maŋtsɛyeli shɛɛ sane lɛ gbɛ eshwã aahu kɛfoŋ yɛ Yerusalem. Kɛjɛ afi 62 kɛyashi afi 64 Ŋ.B. lɛ, bɔfo Petro ŋma eklɛŋklɛŋ wolo lɛ eyaha Kristofoi “ni egbɛ eshwã Ponto, Galata, Kapadokia, Asia kɛ Bitinia” ni fɛɛ yɔɔ ŋmɛnɛŋmɛnɛ beaŋ Turkey lɛ. (1 Petro 1:1) Heyelilɔi hu yɛ Palestine, Lebanon, Aram, Kipro, Hela, Kreta, kɛ Italia. Taakɛ Paulo ŋma wolo kɛyaha Kolosebii lɛ yɛ afi 60-61 Ŋ.B. lɛ, ‘ashiɛ’ sanekpakpa lɛ ‘atsɔɔ bɔɔnii fɛɛ ni yɔɔ ŋwɛi shishi lɛ.’—Kolosebii 1:23.

Sɛɛnamɔ ni ji enyɔ ni jɛɔ gbɛjianɔtoo ni akɛ he bɔɔ he lɛ mli kɛbaa ji hewalɛwoo ni Kristofoi baanyɛ amɛkɛha amɛhe. Yɛ be mli ni Kristofoi kɛ amɛhe bɔɔ asafo lɛ, amɛnyɛɔ amɛboɔ maŋshiɛmɔi atoi, amɛfeɔ ekome kɛkaseɔ Ŋmalɛi Krɔŋkrɔŋi lɛ, amɛgbaa niiashikpamɔi ni woɔ mɔ hemɔkɛyeli hewalɛ, ni amɛkɛ nanemɛi heyelilɔi feɔ ekome kɛsɔleɔ. (1 Korintobii, yitso 14) Ni hii ni edara yɛ mumɔŋ nyɛɔ ‘amɛkwɛɔ Nyɔŋmɔ asafoku lɛ nɔ.’—1 Petro 5:2.

Ákɛ asafo lɛ mli bii lɛ, Kristofoi hu baleɔ amɛteŋ mɔ fɛɛ mɔ, ni amɛbanáa suɔmɔ amɛhaa amɛhe. Yɛ be mli ni mra be mli Kristofoi lɛ nuuu he kwraa akɛ amɛhe ni amɛkɛbɔɔ asafo lɛ efee jatsu yɛ amɛnɔ lɛ, atswaa amɛ amaa shi ni akɛwoɔ amɛ hewalɛ.—Bɔfoi lɛ Asaji 2:42; 14:27; 1 Korintobii 14:26; Kolosebii 4:15, 16.

Yiŋtoo kroko hu ni jeŋ muu fɛɛ asafo lɛ, aloo gbɛjianɔtoo ni efee ekome lɛ he hiaa ji koni akɛha ekomefeemɔ aya nɔ. Kristofoi kaseɔ bɔ ni amɛaafee ni ‘amɛnaabu afee ekome.’ (1 Korintobii 1:10) Enɛ he miihia. Esoro woloŋlee ni asafo lɛ mli bii ateŋ mɔ fɛɛ mɔ yɔɔ, ni amɛjɛ shihilɛi srɔtoi amli. Amɛwieɔ wiemɔi srɔtoi, ni amɛyɛ subaŋi srɔtoi ni yɔɔ faŋŋ. (Bɔfoi lɛ Asaji 2:1-11) Bei komɛi lɛ, amɛnáa susumɔi srɔtoi ni ja. Shi kɛlɛ, ayeɔ abuaa Kristofoi koni amɛsaa béi ni tamɔ nɛkɛ yɛ asafo lɛ mli.—Bɔfoi lɛ Asaji 15:1, 2; Filipibii 4:2, 3.

Akɛ sanebimɔi ni mli wa ni asafoi lɛ amli onukpai lɛ nyɛɛɛ atsu he nii lɛ yahaa nɔkwɛlɔi gbɛfalɔi ni amɛdara yɛ mumɔŋ tamɔ Paulo. Akɛ saji ni kɔɔ tsɔɔmɔi ahe lɛ yahaa nɔyeli kuu ni kudɔɔ nibii yɛ Yerusalem lɛ. Klɛŋklɛŋ lɛ, mɛi ni yɔɔ nɔyeli kuu lɛ mli ji Yesu Kristo bɔfoi lɛ, shi sɛɛ mli lɛ akɛ hegbɛ lɛ ha koni hii onukpai ni yɔɔ asafo ni yɔɔ Yerusalem lɛ mli lɛ afata amɛhe. Asafo fɛɛ asafo yɔseɔ nɔyeli hegbɛ ni Nyɔŋmɔ kɛha nɔyeli kuu lɛ kɛ enajiaŋdamɔlɔi lɛ koni amɛto shiɛmɔ nitsumɔ lɛ he gbɛjianɔ, ní amɛhala hii amɛwo sɔɔmɔ hegbɛi amli, ní amɛfee yiŋkpɛi ni damɔ tsɔɔmɔ mli saji anɔ. Kɛ nɔyeli kuu lɛ tsu sane ko he nii lɛ, asafoi lɛ kpɛlɛɔ yiŋkpɛɛ lɛ nɔ, ni ‘amɛmii shɛɔ amɛhe yɛ miishɛjemɔ lɛ hewɔ.’—Bɔfoi lɛ Asaji 15:1, 2, 28, 30, 31.

Hɛɛ, Yehowa kɛ gbɛjianɔtoo ko tsu nii yɛ klɛŋklɛŋ afii oha lɛ mli. Ni ŋmɛnɛ hu?

Gbɛjianɔtoo He Miihia Wɔ Ŋmɛnɛ

Ákɛ mɛi ni tamɔ amɛnanemɛi ni hi shi yɛ klɛŋklɛŋ afii oha lɛ mli lɛ, Yehowa Odasefoi ni yɔɔ ŋmɛnɛ lɛ kɛ famɔ ni akɛha amɛ koni amɛshiɛ Maŋtsɛyeli lɛ he sanekpakpa lɛ tsuɔ nii kɛ hiɛdɔɔ. Gbɛ kome ni amɛtsɔɔ nɔ amɛtsuɔ nitsumɔ nɛɛ ji kɛtsɔ Bibliai lɛ kɛ Biblia kasemɔ woji ajaramɔ nɔ, ni enɛ biɔ gbɛjianɔtoo.

Esa akɛ aŋmala Kristofoi awoji jogbaŋŋ, akwɛ ni efee nɔ ni ja kɛmɔ shi, kɛkɛ lɛ akala, ni no sɛɛ lɛ akɛmajeɔ asafoi lɛ. Kɛkɛ lɛ, esa akɛ Kristofoi aŋkroaŋkroi lɛ kɛ amɛhe aha koni amɛkɛ woji lɛ ayaha mɛi ni sumɔɔ ni amɛkane lɛ. Maŋtsɛyeli shɛɛ sane lɛ eyashɛ mɛi akpekpei abɔ ŋɔɔ yɛ nɛkɛ gbɛ nɔ. Sanekpakpa lɛ shiɛlɔi lɛ bɔɔ mɔdɛŋ koni amɛtsu amɛshiɛmɔ nitsumɔ lɛ he nii yɛ gbɛjianɔtoo naa, ní amɛkwɛɔ koni akatsu shikpɔŋkuku lɛ eko mli nii fe nine yɛ be mli ni akuɔ hiɛ ashwieɔ ekomɛi anɔ. Enɛɛmɛi fɛɛ biɔ gbɛjianɔtoo.

Akɛni “Nyɔŋmɔ jeee mɛi ahiɛaŋkwɛlɔ” hewɔ lɛ, esa akɛ atsɔɔ Bibliai lɛ kɛ Biblia he woji ashishi. (Bɔfoi lɛ Asaji 10:34) Amrɔ nɛɛ, wolo tɛtrɛɛ nɛɛ yɛ wiemɔi 132 mli, ni akalaa ehefatalɔ Awake! lɛ yɛ wiemɔi 83 mli. Enɛ biɔ wiemɔ shishitsɔɔmɔ kui ni ato amɛhe gbɛjianɔ yɛ je lɛŋ fɛɛ.

Awoɔ asafo lɛ mli bii ahewalɛ kɛ́ amɛtee Kristofoi akpeei kɛ kpeei wuji. Jɛmɛ ji he ni amɛboɔ maŋshiɛmɔi ni damɔ Biblia nɔ lɛ atoi yɛ, ni amɛfeɔ ekome kɛkaseɔ Ŋmalɛi lɛ, amɛgbaa niiashikpamɔi ni tswaa mɔ emaa shi, ni amɛfataa nanemɛi jálɔi ahe yɛ sɔlemɔ mli. Ni taakɛ amɛnyɛmimɛi ni hi shi yɛ klɛŋklɛŋ afii oha lɛ mli lɛ ji lɛ, amɛnáa miishɛɛ kɛji akɛ nɔkwɛlɔi gbɛfalɔi ni yɔɔ suɔmɔ yasara amɛ ni amɛkɛ hemɔkɛyeli mli hewalɛwoo wiemɔi ha amɛ lɛ. No hewɔ lɛ, Kristofoi ni yɔɔ ŋmɛnɛ lɛ feɔ “kuu kome kɛ kwɛlɔ kome.”—Yohane 10:16.

Yɛ anɔkwale mli lɛ, Yehowa Odasefoi yeee emuu, ni nakai nɔŋŋ amɛnanemɛi ni hi shi kɛtsɔ amɛhiɛ lɛ ji. Ni kɛlɛ, amɛbɔɔ mɔdɛŋ ni amɛtsu nii yɛ ekomefeemɔ mli. Nɔ ni ejɛ mli eba ji akɛ, aatsu Maŋtsɛyeli shiɛmɔ nitsumɔ lɛ yɛ shikpɔŋ nɔ fɛɛ.—Bɔfoi lɛ Asaji 15:36-40; Efesobii 4:13.

[Mfoniri ni yɔɔ baafa 31]

Kristofoi ni yɔɔ ŋmɛnɛ lɛ feɔ “kuu kome kɛ kwɛlɔ kome”