Nɔyelɔ ko ni Yɔɔ Kɔɔyɔŋ Tsakemɔ nɔ Hewalɛ

Be ni Yesu tsɔ naakpɛɛ gbɛ nɔ elɛ́ mɛi akpei abɔ lɛ, mɛi lɛ ná he miishɛɛ waa. Amɛkɛɛ akɛ, “mɔ nɛ ji Gbalɔ ni baa je lɛ mli lɛ lɛɛlɛŋ,” ni tsɔɔ akɛ lɛ ji Mesia lɛ, ni ebaafee nɔyelɔ ni sa jogbaŋŋ. (Yohane 6:14; 5 Mose 18:18) No hewɔ lɛ, mɛi lɛ kpaŋ akɛ amɛbaamɔ Yesu ni amɛwó lɛ maŋtsɛ.

Shi Yesu yɔse nɔ ni mɛi lɛ kpaŋɔ lɛ. Ewo asafoku lɛ gbɛ, ni efã ekaselɔi lɛ ni amɛbote lɛlɛ lɛ mli. Nɛgbɛ amɛyaa? Amɛkɛ amɛhiɛ tsɔɔ Betsaida, koni amɛya Kapernaum. Shi Yesu lɛ, ekome too egbala ehe shi kɛtee gɔŋ lɛ nɔ koni eyasɔle nakai nyɔɔŋ lɛ mli.

Maŋkɛ hima be ni nyɔɔŋtsere lɛ miikpɛ lolo lɛ, Yesu na lɛlɛ lɛ yɛ shɔŋŋ. Kɔɔyɔɔ ni naa wa ko miitswa ni ŋshɔ lɛ miifee hamahama, ni ‘eetɔ bɔfoi lɛ kɛ wirimɔ akɛni amɛmiikpee kɔɔyɔɔ lɛ hewɔ.’ (Marko 6:48) Yesu kpeleke shi kɛjɛ gɔŋ lɛ nɔ ni ebɔi ŋshɔkei lɛ anɔ nyiɛmɔ kɛmiiya amɛŋɔɔ. No mli lɛ, “amɛwiri aaafee shitoi etɛ loo ejwɛ.” (Yohane 6:19) Kaselɔi lɛ na Yesu, shi efee tamɔ eeho amɛhe, ni gbeyei mɔmɔ amɛ ni amɛbɔi bolɔmɔ akɛ: “Ninaa nɛ!”​—Marko 6:49.

Yesu hã amɛtsui akɛ: “Nyɛnáa ekãa! Mi ni; nyɛkashea gbeyei.” Shi Petro kɛɛ akɛ: “Nuŋtsɔ, kɛ́ bo ni lɛ, fã mi koni matsɔ nu lɛ hiɛ kɛba oŋɔɔ.” Yesu kɛɛ lɛ akɛ: “Ba!” Kɛkɛ ni Petro je lɛlɛ lɛ mli, ni enyiɛ nu lɛ hiɛ kɛmiiya Yesu ŋɔɔ. Shi be ni Petro kwɛ bɔ ni kɔɔyɔɔ lɛ tswaa waa lɛ, eshe gbeyei ni ebɔi shiumɔ. Kɛkɛ ni ebo akɛ: “Nuŋtsɔ, heremɔ mi!” Yesu kpa enine mli ni emɔ Petro mli ni ekɛɛ: “Bo ni ohemɔkɛyeli faaa, mɛni hewɔ ohã oyiŋ fee bo kɔshikɔshi?”​—Mateo 14:27-31.

Yesu kɛ Petro bote lɛlɛ lɛ mli, ni kɔɔyɔɔ lɛ fɔ̃ɔ tswaa. Kaselɔi lɛ anaa kpɛ amɛhe, shi ani esa akɛ amɛnaa akpɛ amɛhe? Eji amɛnu “aboloi lɛ ahe sane lɛ,” ni ji mɛi akpei abɔ ni Yesu tsɔ naakpɛɛ gbɛ nɔ elɛ́ amɛ yɛ ŋwɛlɛtswai fioo ni tsɔ hiɛ lɛ mli lɛ “shishi” kulɛ, efeŋ amɛ naakpɛɛ akɛ Yesu nyiɛ ŋshɔ hiɛ ni ehã kɔɔyɔɔ lɛ fɔ̃ɔ tswaa. Amrɔ lɛ, amɛkotokotoo lɛ ni amɛkɛɛ: “Nyɔŋmɔ Bi ji bo lɛɛlɛŋ.”​—Marko 6:52; Mateo 14:33.

Etsɛɛɛ ni amɛyashɛ Genesaret ŋa ni nɔ yɔɔ fɛo ni nɔ tsei woɔ yibii waa ni kã Kapernaum wuoyi lɛ nɔ. Amɛŋmɛ lɛlɛ lɛ sɛkɛ, ni amɛyimɔ shi yɛ lɛlɛ lɛ mli. Mɛi lɛ yoo Yesu, ni amɛ kɛ mɛi ni yɔɔ jɛmɛ niiaŋ fɛɛ ŋɔ helatsɛmɛi kɛba eŋɔɔ. Be ni helatsɛmɛi lɛ tara Yesu atade nɔhaanɔ lɛ naamuu lɛ he lɛ, amɛhe wa amɛ kwraa.

Sɛɛ mli lɛ, asafoku ni Yesu tsɔ naakpɛɛ gbɛ nɔ elɛ́ amɛ lɛ yɔse akɛ Yesu eshi. No hewɔ lɛ, be ni lɛji bibii komɛi jɛ Tiberia ba lɛ, mɛi lɛ botebotee lɛji lɛ amli ni amɛtee Kapernaum koni amɛyatao Yesu. Be ni amɛna lɛ lɛ, amɛbi lɛ akɛ: “Rabi, mɛɛ be oba biɛ?” (Yohane 6:25) Yesu kã amɛhiɛ, ni wɔbaana nɔ hewɔ ni esa jogbaŋŋ akɛ efee nakai lɛ yɛ sane ni nyiɛ sɛɛ lɛ mli.