SANEBIMƆI NI BIBLIA LƐ EHA HETOO
Ani abaanyɛ ahi shi kɛya naanɔ?
Mɛɛ gbɛjianɔtoo baanyɛ aha wɔye wɔhe kɛjɛ gbele dɛŋ?
Adam, ni ji klɛŋklɛŋ gbɔmɔ lɛ hi shi afii ohai komɛi. Shi naagbee lɛ, egbɔ ni egbo. Kɛjɛ no beaŋ kɛbaa nɛɛ, mɛi ebɔ mɔdɛŋ amɛfee nibii srɔtoi koni amɛkagbɔlɔ. Fɛɛ sɛɛ lɛ, mɔ ko kwraa nyɛko ejo gbele naa foi. Mɛni hewɔ? Adam gbɔ ni egbo akɛni egbo Nyɔŋmɔ nɔ toi kɛfee esha lɛ hewɔ. Wɔgbɔɔ ejaakɛ wɔná esha kɛ ehe nyɔmɔwoo, ni ji gbele lɛ, kɛjɛ Adam ŋɔɔ.—Kanemɔ 1 Mose 5:5; Romabii 5:12.
Ehe miihia ni mɔ ko awo nyɔmɔ kɛkpɔ̃ wɔ bɔni afee ni wɔná naanɔ wala. (Hiob 33:24, 25) Kpɔ̃mɔnɔ ji nyɔmɔ ni awoɔ bɔni afee ni akɛha mɔ ko aye ehe, ni yɛ wɔgbɛfaŋ lɛ, ehe miihia koni wɔye wɔhe kɛjɛ gbele dɛŋ. (2 Mose 21:29, 30) Yesu wo nakai nyɔmɔ lɛ beni egbo eha wɔ lɛ.—Kanemɔ Yohane 3:16.
Te wɔbaafee tɛŋŋ wɔná naanɔ wala?
Jeee mɔ fɛɛ mɔ abaaha eye ehe kɛjɛ hela kɛ gbɔlɛ he. Anɔkwa, mɛi ni booo Nyɔŋmɔ toi taakɛ Adam fee lɛ, naŋ naanɔ wala. Mɛi ni akɛ amɛhe eshai efa amɛ lɛ pɛ baaná naanɔ wala.—Kanemɔ Yesaia 33:24; 35:3-6.
Kɛ́ akɛ wɔhe eshai baafa wɔ lɛ, esa akɛ wɔfee nɔ ko. Ehe miihia ni wɔle Nyɔŋmɔ kɛtsɔ e-Wiemɔ ni ji Biblia lɛ ni wɔbaakase lɛ nɔ. Biblia lɛ tsɔɔ wɔ bɔ ni wɔbaafee wɔná shihilɛ kpakpa kɛ bɔ ni wɔbaafee wɔná Nyɔŋmɔ hiɛ duromɔ kɛ naanɔ wala.—Kanemɔ Yohane 17:3; Bɔfoi lɛ Asaji 3:19.