Sanebimɔi Ni Jɛ Kanelɔi Adɛŋ
Be ni Maria fɔ Yesu lɛ, mɛni hewɔ Yosef kɛ Maria ekuuu amɛsɛɛ kɛyaaa Nazaret, shi moŋ amɛtee nɔ amɛhi Betlehem lɛ?
Biblia lɛ etsɔɔɔ nɔ hewɔ. Shi etsɔɔ wɔ nibii komɛi ni eeenyɛ efee akɛ no hewɔ amɛfee nakai.
Ŋwɛibɔfo ko bakɛɛ Maria akɛ ebaaná musu ni ebaafɔ. Be ni bɔfo lɛ kɛ Maria wie lɛ, no mli lɛ Maria kɛ Yosef fɛɛ yɛ Galilea maŋ ko ni atsɛɔ lɛ Nazaret lɛ mli. (Luka 1:26-31; 2:4) Sɛɛ mli lɛ, amɛfã kɛtee Ejipt, ni amɛku amɛsɛɛ amɛba Nazaret ekoŋŋ. Akɛni Yesu hu bada yɛ Nazaret hewɔ lɛ, abale lɛ akɛ Nazaretnyo. (Mat. 2:19-23) Enɛ hewɔ lɛ, mɛi susuɔ akɛ Yesu, Yosef, kɛ Maria jɛ Nazaret.
No mli lɛ, Maria yɛ wekunyo ko yɛ Yudea ni atsɛɔ lɛ Elizabet. Elizabet wu ji osɔfo Zakaria, ni amɛbi ji Yohane Baptisilɔ lɛ. (Luka 1:5, 9, 13, 36) Maria yasara lɛ yɛ Yudea ni ehi eŋɔɔ nyɔji etɛ. Kɛkɛ ni eku esɛɛ kɛba Nazaret. (Luka 1:39, 40, 56) Enɛ hãa wɔnaa akɛ, Maria baale Yudea kpokpaa lɛ nɔ saŋŋ.
Be ko lɛ, akɛ famɔ hã akɛ mɔ fɛɛ mɔ ‘ayaŋma egbɛ́i.’ Yosef bo famɔ nɛɛ toi. No hewɔ lɛ, ekɛ Maria fã gbɛ kɛjɛ Nazaret kɛtee Betlehem. Betlehem ji “David maŋ” lɛ kɛ maŋ ni agba akɛ abaafɔ Mesia lɛ yɛ mli lɛ. (Luka 2:3, 4; 1 Sam. 17:15; 20:6; Mika 5:2) Maria fɔ Yesu yɛ jɛmɛ, shi no sɛɛ lɛ, Yosef hãaa Maria kɛ abifao lɛ afã gbɛ kakadaŋŋ kɛku amɛsɛɛ kɛba Nazaret. Amɛtee nɔ amɛhi Betlehem. Betlehem kɛ Yerusalem teŋ jekɛmɔ aaafee kilomitai nɛɛhu. Enɛ hewɔ lɛ, ewaŋ kɛhãŋ amɛ akɛ amɛkɛ abifao lɛ baaya sɔlemɔ shĩa lɛ ni amɛyashã afɔle ni esa akɛ amɛshã lɛ.—3 Mo. 12:2, 6-8; Luka 2:22-24.
Be ni ŋwɛibɔfo lɛ basara Maria lɛ, ehã ele akɛ Yehowa kɛ “David maŋtsɛ sɛi lɛ” baahã binuu ni ebaafɔ lɛ, ni ‘ebaaye Maŋtsɛ.’ Ani eeenyɛ efee akɛ enɛ hewɔ lɛ, Yosef kɛ Maria nu he akɛ ehi waa akɛ afɔ Yesu yɛ David maŋ lɛ mli? (Luka 1:32, 33; 2:11, 17) Kɛ́ nakai lɛ, belɛ ekolɛ amɛnu he akɛ ebaafee nɔ ni hi waa akɛ amɛbaaya nɔ amɛhi jɛmɛ ni amɛkwɛ nɔ ni Yehowa baakɛɛ amɛ.
Wɔleee be abɔ ni amɛye yɛ Betlehem dani ŋulamiiaŋkwɛlɔi lɛ basara amɛ lɛ. Shi nɔ ni wɔle ji akɛ, be ni shɛɔ nakai be lɛ, amɛyahi shĩa ko mli ni Yesu jeee abifao dɔŋŋ. (Mat. 2:11) No hewɔ lɛ eeenyɛ efee akɛ, nɔ najiaŋ ni amɛbaaku amɛsɛɛ kɛya Nazaret lɛ, amɛhi Betlehem bei saŋŋ.
Sɛɛ mli lɛ, Herode fã ni agbe ‘gbekɛbii hii fɛɛ ni yɔɔ Betlehem ni eye afii enyɔ kɛ mɛi ni yeko nakai lɛ.’ (Mat. 2:16) Yehowa bɔfo ko bɔ Yosef kɔkɔ yɛ enɛ he. No hewɔ lɛ, Yosef kɛ Maria kɛ Yesu fɛɛ jo foi kɛtee Ejipt, ni amɛhi jɛmɛ kɛyashi Herode gbo. Sɛɛ mli lɛ, Yosef kɛ amɛ tee Nazaret. Mɛni hewɔ amɛkuuu amɛsɛɛ kɛyaaa Betlehem lɛ? Nɔ hewɔ lɛ ji, no mli lɛ Herode binuu Arkelao miiye nɔ yɛ Yudea, ni ale lɛ akɛ eyitsoŋ wa waa. Agbɛnɛ hu, Nyɔŋmɔ bɔ Yosef kɔkɔ akɛ eyɛ oshãra akɛ ekɛ eweku lɛ baaya jɛmɛ. Nazaret yɛ shweshweeshwe, ni Yosef baanyɛ etsɔse Yesu yɛ jɛmɛ koni ebatsɔ Nyɔŋmɔjalɔ.—Mat. 2:19-22; 13:55; Luka 2:39, 52.
Ekã shi faŋŋ akɛ, Yosef gbo dani Yesu gbele gbɛ ehã mɛi akɛ amɛbaanyɛ amɛya ŋwɛi. No hewɔ lɛ, abaatee Yosef shi ni ebaahi shikpɔŋ nɛɛ nɔ. Enɛ baahã mɛi babaoo aná hegbɛ amɛbi lɛ nɔ hewɔ ni ekɛ Maria tee nɔ amɛhi Betlehem yɛ Yesu fɔmɔ sɛɛ lɛ.