Matié

6 « Prangad pa fè bèl bagay douvan moun jiskont pou yo wè zòt ; pas si zòt fè sa, Papa-zòt ki an sièl-la pé ké béni zòt. 2 Kidonk, lè’w ka fè lézòt dibien, pa kouri alé di dòt moun sa. Pas sé sa sé ipokrit-la ka fè an lari-a épi adan sé koté-a yo ka adoré Bondié. Yo ka fè sa pou moun di bon bagay anlè yo. Asiré-pa-pétèt, sé sa sèlman yo kèy trapé ba kòyo. 3 Men wou, lè’w ka fè lézòt dibien, fòk pa lanmen gòch ou sav sa lanmen dwèt ou ka fè. 4 Fè ofwann-ou an sikré. Alò Papa’w ki an sièl-la, ki ka wè tout bagay, ké rékonpansé’w. 7 Lè zòt ka prédié, pa anni répété tout lè menm bagay-la, kon moun lé nasion ka fè, pas yo konprann sé afòs yo ka palé, Bondié kay kouté yo. 8 Pa fè kon yo, pas Papa-zòt sav sa zòt bizwen avan menm zòt mandé’y. 9 « Kidonk, zòt pou prédié konsa : « “Papa-nou ki an sièl-la, fòk non’w vini sen. 10 Fòk wayòm-ou rivé. Fòk volonté’w fèt asou latè, menm manniè i ja ka fèt an sièl-la. 11 Ba nou pen-an nou bizwen pou jòdi-a. 12 Padonnen péché-nou, menm manniè nou osi nou ka padonnen moun ki ka péché kont nou. 13 É pa kité nou tonbé anba tantasion, men délivré nou anba lanmen méchan-an.” 14 « Pas si zòt ka padonnen lézòt fòt-yo, Papa-zòt ki an sièl-la ké padonnen zòt tou. 15 Men si zòt pa ka padonnen lézòt fòt-yo, Papa-zòt pé ké padonnen fòt-zòt non pli. 20 Plivomié anmasé trézò adan sièl-la ; koté pa ni, ni ti bèt ni lawouy ki ka détwi tout bagay, épi koté pa ni vòlè. 22 « Sé zié-a ki lanp kò-a. Si zié’w ka gadé an sèl bagay, tout kò’w ké kléré. 23 Men si zié’w ka chèché twòp bagay, tout kò’w ké an fè-nwè. Si limiè-a ki andidan’w sé fè-nwè, alòs fè-nwè tala gran menm ! 24 « Pèsonn pé pa travay kon èsklav ba dé mèt : swa i kèy rayi yonn épi enmen lòt la, swa i kèy kolé anlè yonn épi méprizé lòt la. Zòt pé pa travay kon èsklav an menm tan pou Bondié épi pou Lajan. 25 « Mi sé pou sa man ka di zòt : Arété entjété kòzòt pou lavi-zòt, parapòt a sa zòt ké manjé, sa zòt ké bwè, ouben pou kòzòt, parapòt a rad zòt ké mété. Ès lavi-a pa pli enpòwtan ki manjé-a, é kò-a pli enpòwtan ki rad-la ? 26 Pran tan gadé sé zwézo-a : yo pa ka simen, yo pa ka rékòlté é yo pa ka mété manjé asou koté ; poutan, Papa-zòt ki an sièl-la ka nouri yo. Ès zòt pa ni plis valè pasé yo ? 27 Ki moun adan zòt, lè i ka entjèt, pé ba lavi’y plis londjè, menm tibren ? 28 Poutji zòt ka kasé tèt-zòt parapòt a rad zòt ké mété ? Gadé sa sé flè savann-lan ka aprann zòt : yo ka pousé san fòsé é yo pa bizwen koud rad. 29 Men man ka di zòt, menm Salomon, épi tout laglwa’y, pa té ganmé kon yo. 30 Si Bondié ka abiyé zèb savann konsa, zèb ki la jòdi men ki ké an difé dèmen, ès i pé ké abiyé zòt ankò plis, zòt ki mantjé lafwa ? 31 Kidonk pa janmen entjèt épi mandé kòzòt : “Kisa nou ké manjé ?” ouben : “Kisa nou ké bwè ?” ouben : “Ki rad nou ké mété ?” 32 Sé dèyè sé bagay-tala sé nasion-an ka kouri toulong. Papa-zòt ki an sièl-la sav zòt bizwen tout sé bagay-tala. 33 « Kidonk, kontinié chèché Wayòm-lan èk lajistis Bondié, an prèmié, épi zòt kèy trapé tout sé lézòt bagay-la. 34 Pa jen entjèt pou dèmen, dèmen ké ni pwòp lentjétid-li. Chak jou ni pwoblèm-li ki ta’y.