Sòm

139 O Jéova, ou ka ègzaminé mwen é ou konnèt mwen. 2 Ou sav lè mwen ka asiz é lè mwen ka lévé. Menmsi ou lwen, ou ka rivé wè sa mwen ka pansé. 3 Ou ka pran tan gadé mwen lè man ka vwayajé é lè man ka kouché ; ou konnèt tout ti chimen lavi-mwen. 4 Avan menm an pawòl sòti an bouch-mwen, pou vré, o Jéova, ou ja sav tousa man lé di. 5 Dèyè mwen é douvan mwen, ou ka vlopé mwen ; épi ou ka pozé lanmen’w anlè mwen. 6 Man pa ka rivé konprann ki manniè ou pé konnèt mwen bien konsa. Sa two wo pou mwen. 7 Ki koté man pé chapé pou lèspri’w pa jwenn mwen, é ki koté man pé kouri séré lwen di’w ? 8 Si man té ka monté an sièl-la, ou té ké la, é si man té ka fè kabann-mwen an Tonm-lan, asiré ou té ké la tou. 9 Si man té ka volé opipiri-chantan pou man rété bò lanmè koté solèy-la ka kouché, 10 la ankò, lanmen’w té ké mennen mwen, lanmen dwèt ou té ké tjenbé mwen. 11 Si man té ka di : « Asiré-pa-pétèt, fè-nwè ké séré mwen ! », alò, tout oliwon mwen, lannuit té ké vini limiè. 12 Menm fè-nwè pa té ké two nwè ba’w, men lannuit té ké kléré kon lajounen. Ba’w, pa ni diférans ant fè-nwè épi limiè. 13 Sé wou ki kréyé ren-mwen, sé wou ki pwotéjé mwen adan bouden manman-mwen. 14 Man ka gloriyé’w lè man ka wè ki manniè èstwòdinè ou fè mwen, an manniè pou man pòté’w rèspé. Tousa ou fè sé kon mirak, man sav sa bien. 15 Zo-mwen ki zo-mwen, ou té ka wè yo an koté pèsonn pa té ka wè, lè yo koud mwen fil pa fil an zantray latè-a. 16 Zié’w wè mwen dépi antan man té toupiti andidan bouden manman-mwen ; tout mòso kò-mwen épi jou fòwmasion-yo té ja matjé adan liv-ou, avan menm an sèl adan yo koumansé ègzisté. 17 Sé pa ti valè pansé’w ni pou mwen ! O Bondié, i ni bon tibren, sa èstwòdinè ! 18 Ki manniè man sé pé konté yo ? Yo ka fè siwawa, plis pasé sab lanmè ! Lè mwen lévé, man toujou la épi’w.