LISON 32

Wayòm Bondié enstalé !

Modèl pou enprimé

Wayòm Bondié koumansé gouvèné an sièl-la an 1914. Sé a moman-tala tou, lé dènié jou dominasion lézòm koumansé. Ki manniè nou sav sa ? Mi dé bagay ka pèwmèt nou di sa : sé pwofési Labib-la épi sa nou ka wè an monn-lan dépi 1914. Annou dékatiyé sé ti lidé-tala.

1. Kisa Labib-la té anonsé ?

Liv Daniel-la té ka di wayòm Bondié-a té ké koumansé gouvèné, lè an lépòk ki té pou diré « sèt tan » té ké fini (Danièl 4:16, 17). Sièk-tan apré sa, Jézi kriyé menm lépòk-tala « tan-an yo ba sé nasion-an », é i di, i pòkò té bout (Lik 21:24). É kon nou ké wè, sé sèt tan-tala bout an 1914.

2. Kisa nou ka wè ka fèt adan monn-lan dépi lanné 1914 ?

Disip Jézi mandé’y : « Ki tan sé bagay-tala ké fèt, é ki sin ké montré prézans-ou èk lafen monn-lan la ? » (Matié 24:3). Jézi di yo konsa, lè i té kèy vini Wa wayòm Bondié, té kèy ni anpil bagay ki té kèy fèt asou latè. Kontèl ladjè, lafanmin, épi tranmanntè (li Matié 24:7). Labib-la té ka di osi, adan sé « dènié jou-a », manniè-a sé moun-lan té kèy konpòwté kòyo, té ké rann lavi-a ‘rèd pou sipòté’ (2 Timoté 3:1-5). Sé sa nou ka wè, èspésialman dépi lanné 1914.

3. Poutji monn-lan an léta-tala dépi wayòm Bondié enstalé ?

Lamenm apré i vini Wa Wayòm-lan, Jézi pété an ladjè épi Satan é sé démon’y lan an sièl-la. Satan pèd ladjè-tala. Labib-la ka di « yo jété’y anlè latè, ki li, ki zanj-li » (Révélasion 12:9, 10, 12). Satan sav bien i kèy détwi. Sé pou sa i anrajé toubannman épi i ka simen anlo malè épi soufwans toupatou asou latè. Sa ka endé nou konprann poutji monn-lan an bétiz konsa ! Wayòm Bondié kèy rézoud tout sé pwoblèm-tala.

ANNOU PLI LWEN

Annou wè ki prèv nou ni Wayòm-lan koumansé gouvèné an 1914 épi kisa sa lé di ba nou.

4. Katjil-la ki ka pèwmèt nou touvé 1914

Gadé VIDÉWO-a.

VIDÉWO : Wayòm Bondié koumansé gouvèné lanné 1914 (5:02)

Ni an patjé tan, Bondié vréyé an rèv ba Nabikodonozò, wa Babilòn. Rèv-tala épi sinifikasion-an Danièl ba asou’y ka konsèné wayòm Nabikodonozò épi wayòm Bondié toua (li Danièl 4:17).

Li Danièl 4:20-26 épi sèvi tablo-a pou réponn sé kèsion-an ka vini an :

A) Kisa Nabikodonozò wè adan rèv-la ? (gadé vèsé 20 épi 21).
B) Kisa ka rivé piébwa-a ? (gadé vèsé 23-a).
C) Kisa ka fèt lè ‘sèt tan-an’ fini ? (gadé vèsé 26-la).

Liannaj-la ki ni ant piébwa rèv-la épi wayòm Bondié-a

PWOFÉSI-A (Danièl 4:20-36)

Renn-lan ka alé

A) An kalté bidim piébwa

Renn-lan sispann

B) « Jété piébwa-a atè [...] jiktan sèt tan pasé asou’y »

An chous piébwa sèklé épi an zanno an fè èk an zanno an tjuiv.

Renn-lan viré doubout

C) « Yo ké viré ba’w wayòm-ou »

Lè pwofési-a réyalizé pou prèmié fwa...

D) Ki moun piébwa-a té ka riprézanté ? (gadé vèsé 22-a).
E) Ki manniè renn-li sispann ? (li Danièl 4:29-33).
F) Kisa ki rivé Nabikodonozò lè ‘sèt tan-an’ fini ? (li Danièl 4:34-36).

PRÈMIÉ RÉYALIZASION

Renn-lan ka alé

D) Nabikodonozò, wa Babilòn

Wa Nabikodonozò dwèt doubout, fidji’y matjé épi lòwgèy.

Renn-lan sispann

E) Apré 606 avan Jézikri, Nabikodonozò ka pèd tèt-li é pandan 7 lanné i pé pa gouvèné ankò

Nabikodonozò ka manjé zèb a kalpat adan an chan.

Renn-lan viré doubout

F) Nabikodonozò djéri épi i ka rikoumansé gouvèné

Wa Nabikodonozò ka lévé bra’y an sièl pou gloriyé Jéova.

Lè pwofési-a réyalizé dézièm fwa-a...

G) Ki moun piébwa-a ka riprézanté ? (li 1 Kwonik 29:23).
H) Koumanniè renn-tala sispann ? Koumanniè nou sav renn-tala pòkò té rikoumansé lè Jézi té anlè latè ? (li Lik 21:24).
I) Ki koté é ki tan renn-tala rikoumansé ?

DÉZIÈM RÉYALIZASION

Renn-lan ka alé

G) Wa izrayélit ki ka riprézanté renn Bondié

An séri wa izrayélit asiz anlè twòn. I ni an limiè ki ka sòti an sièl-la pou kléré yo.

Renn-lan sispann

H) Jérizalèm krazé, piès wa izrayélit pa ka rénié pandan 2 520 lanné

An gwo difé ka détwi Jérizalèm an 607 avan Jézikri. 2 520 lanné ka pasé apré sa.

Renn-lan viré doubout

I) Adan sièl-la, Jézi ka divini Wa wayòm Bondié

Dépi 1914, Jézi asiz anlè an twòn an sièl-la, ka gouvèné latè. I ka vréyé réyon limiè.

Konben tan sé sèt tan-an diré ?

I ni pati adan Bib-la ki ka endé nou konprann dòt pati. Kontèl, liv Larévélasion ka èsplitjé 3 tan é dimi égal épi 1 260 jou (Révélasion 12:6, 14). 7 tan égal épi 2 fwa 3 tan é dimi, kidonk 2 520 jou. Délè, adan Labib-la, an jou ka riprézanté an lanné (Ézékièl 4:6). Sé menm bagay la pou pwofési 7 tan-an ki adan liv Danièl-la : sé 7 tan-an ka riprézanté 2 520 lanné.

5. Dépi 1914 monn-lan chanjé

Gadé VIDÉWO-a.

VIDÉWO : Dépi 1914 monn-lan chanjé (1:10)

Jézi di ki manniè monn-lan té kèy yé lè i té kèy Wa. Li Lik 21:9-11 épi diskité kèsion-tala :

Adan tousa ou fini li a, kisa ou ka wè ka fèt jòdi ?

Lapòt Pòl té di koumanniè sé moun-lan té kèy yé adan sé dènié jou-a. Li 2 Timoté 3:1-5 épi diskité kèsion-tala :

Ès ou ka wè moun konsa jòdi-a ?

Montaj : Zimaj ka riprézanté bagay ki ka fèt adan monn-lan pandan sé dènié jou-a. 1. Anlè an podiòm, an militè ka kriyé épi pwen’y lévé. 2. Kay krazé apré an tranmanntè. 3. Avion militè. 4. Moun ka maché an lari é yo ni mas anlè fidji-yo. 5. New York, sé tou jimèl-la pri difé apré an atak téworis. 6. An nonm ka dwogé kòy. 7. An nonm ka bat madanm-li épi i ka kriyé anlè’y. 8. Boutèy lalkòl épi pliziè kalté dwòg. 9. Dé fanm ki ni lenj lanmòd épi gwo bijou ka fè sèlfi. 10. An D. J. ka mété mizik adan an konsè. 11. An ribèl ka jété an kòktèl Molotòf.

6. Montré ou ka kwè wayòm Bondié-a ka dirijé alè la

Li Matié 24:3, 14 épi diskité sé kèsion-tala :

Ki travay enpòwtan ka montré wayòm Bondié-a ja koumansé gouvèné ?
Ki manniè ou pé partisipé adan travay-tala ?

Wayòm Bondié-a ja koumansé gouvèné, é talè, i kay gouvèné latè. Li Ébré 10:24, 25 épi diskité kèsion-tala :

Anmizi-anmizi nou wè « jou-a tou pré rivé », kisa nou chak la dwé fè ?

Montaj : 1. An étidian labib adan an réyinion Témwen Jéova. 2. Menm étidian-an ka préché ba an madanm i konnèt. — Si’w té vini konnèt an bagay ki pé sové ki lavi’w ki ta lézòt, kisa ou té kèy anvi fè ?

AN MOUN SÉ PÉ MANDÉ’W : « Poutji sé Témwen Jéova-a ka palé di 1914 konsa ? »

Kisa ou té kèy di ?

SA’W APRANN

Sé pwofési-a ki adan Labib épi sa ka pasé adan monn-lan ka montré wayòm Bondié-a ja ka gouvèné. Nou ka montré nou ka kwè sa, lè nou ka préché épi lè nou ka alé réyinion.