Ki tan wayòm Bondié kèy dirijé latè ?

KI ÉVÈNMAN JÉZI ANONSÉ ?

Jézi di : « Nasion kèy lévé kont nasion é wayòm kont wayòm. Kèy ni gwo tranmanntè épi, an koté apré lòt, kèy ni lafanmin épi pidémi » (Lik 21:10, 11). Tou kon lin dwèt ka fòmé an anprent, tout sé évènman-tala té kèy fòmé an sin ki bien klè. É tou kon an anprent dwèt ka pèwmèt rikonnèt an moun, sin-tala té kèy pèwmèt konprann ki « wayòm Bondié tou pré ». Ès nou ka wè dé évènman konsa ka fèt an menm tan épi asou tout latè ? Annou wè yonn-dé prèv.

1. LADJÈ

An 1914 an ladjè pété éti moun pa té janmen wè adan tout listwa lézòm. Souvan sé istorien-an ka di 1914 sé an kalté viraj adan Listwa, pas sé lanné-tala pou prèmié fwa an ladjè pété anlè tout latè-a. Mitrayèt, bonb avion ka ladjé, gaz tòksik, cha konba... Moun pa té janmen sèvi zam konsa pou tjwé otan moun. Apré sa, an dézièm ladjè pété anlè tout latè-a, kou-tala yo sèvi zam nikléyè. Dépi lanné 1914, toujou ni ladjè pasi-pala adan monn-lan. Sé ladjè-tala tjwé pliziè milion moun.

2. TRANMANNTÈ

Dapré sa lansiklopédi Britannica Academic ka di, chak lanné, yo ka konté an santèn gwo tranmanntè ki pé fè « gwo déga ». Enstiti létid jéolojik Lézétazini ka di « dapré enfòmasion yo trapé asou pliziè lanné (dépi apéprè lanné 1900), fòk nou atann kònou apipré a 16 gwo tranmanntè chak lanné ». Dapré sa yonn-dé moun ka di, sa ki pé fè yo kwè ni plis tranmanntè, sé pas yo ka rivé détèkté yo pli fasilman. Magré sa, gran tranmanntè ka simen soufwans épi lanmò kon nou pa janmen wè.

3. LAFANMIN

Adan anchay koté anlè latè, ladjè, lakoripsion, kriz ékonomik, an mové manniè jéré lagrikilti oben an mové préparasion asou fénonmenn klimatik danjéré, ka fè ki moun ka mò fen. Silon an rapò Pwogram alimantè mondial pou lanné 2018, « adan monn-lan, 821 milion moun pa ni asé manjé, 124 milion adan yo ka mò fen ». Malnitrision sé lakòz lanmò chak lanné 3,1 milion ti-manmay. An 2011, i té rèsponsab 45 % lanmò ti-manmay an monn-lan.

4. MALADI ÉPI PIDÉMI

An jounal Òwganizasion mondial asou lasanté ka di : « 21^ièm sièk-la ja benyen épi dé gwo pidémi. Atjèlman nou ka viré wè anlo maladi ki té disparèt (koléra, lapès épi lafièv-jòn) épi dòt maladi ki ka parèt (SRAS, lagrip pandémik, MERS, Ébola épi Zika). » Dènié-a ki tonbé anlè nou sé pandémi Covid-19 la. Magré lasians épi lanmèdsin dékouvè anlò bagay, yo pa ka rivé touvé trètman kont tout sé maladi-a.

5. AN PRÉDIKASION ANLÈ TOUT LATÈ-A

Pou palé di an lòt éléman sin-lan, Jézi té anonsé : « Épi yo kay préché bon nouvèl Wayòm-lan toupatou anlè latè, pou sèvi témwayaj pou tout nasion. Apré sa sé kèy lafen » (Matié 24:14). Toupandan monn-lan ka nenyen anba térib pwoblèm, pasé yuit milion moun tout nasion ka anonsé bon nouvèl wayòm Bondié adan 240 péyi é téritwa, é sa, an pasé 1 000 lang. Sa pòkò janmen fèt !

KISA FÒK KONPRANN ?

Sé diféran éléman sin-lan Jézi ba-a ka fèt jòdi-jou. Poutji fòk nou entérésé kònou a sa ? Pas Jézi di : « Lè zòt kèy wè sé bagay-tala rivé, sav ki wayòm Bondié tou pré » (Lik 21:31).

Sin-lan Jézi ba é kwonoloji biblik-la ka pèwmèt nou konprann, ki Bondié mété anplas wayòm sélès li-a an 1914a. Sé alè-tala i mété Yich-li Jézikri, wa (Sòm 2:2, 4, 6-9). Talè, wayòm Bondié-a kèy dirijé monn-lan, détwi tout gouvèlman ki ka opozé a li, é i kay fè latè-a vini an paradi éti lézòm kay viv pou létèrnité.

Dan pa lontan, sé pawòl lapriyè modèl-la Jézi ansénié kay réyalizé : « Fèt ki wayòm-ou vini. Ki volonté’w fèt anlè latè kon nan sièl » (Matié 6:10). Men kisa Wayòm-lan ka fè dépi kon i anplas an 1914 ? Épi ki bèl landèmen nou kay konnèt jou-a éti wayòm-tala kay dirijé tout limanité ?