Lison nou pé aprann asou sa Jakòb di yich-li avan lanmò’y (mòso 2)

1. Di kisa nou kèy palé adan awtik-tala ?

TOUT yich Jakòb alantou’y. Yo ka bien kouté sa papa-yo ni pou di yo chak la. Kon nou wè adan prèmié awtik-la, sa Jakòb prédi asou Ribèn, Siméon, Lévi épi Jida dwèt siwpwann yo épi mété yo an katjil. Asiré, yo dwèt ka mandé kòyo, kisa i ké di sé uit-la ka rété a. Annou wè ki lison nou pé aprann di sa Jakòb di Zabilon, Isaka, Dàn, Gad, Azè, Nèftali, Jozèf épi Benjamena.

ZABILON

2. Kisa Jakòb di Zabilon, é ki manniè pawòl-li réyalizé ? (Jénèz 49:13 ; gadé osi kad-la).

² (Li Jénèz 49:13.) Jakòb prédi ki sé désandan Zabilon-an té ké viv bòd lanmè. Téritwè-yo té ké li-nò Péyi pwonmès-la. Sé pasé 200 lanné plita, tribi Zabilon trapé an mòso tè. Mòso tè-tala pa té ègzaktiman bò lanmè-a, men i té plasé ant lanmè Galilé épi Laméditérané. Mi sa Moyiz té pwofétizé : « Pran plézi, o Zabilon, adan vwayaj-ou » (Dét. 33:18). Pétèt sé pawòl Moyiz-la té lé di, ki davwè tribi Zabilon té ké ant 2 lanmè, sa té ké pli fasil ba yo vwayajé anlè dlo épi fè bon biznès. Kidonk, sé désandan Zabilon-an té ké ni sa ki fo pou ni tjè-kontan.

3. Kisa ki ké endé nou fè épi sa nou ni ?

³ Kisa nou ka aprann ? Kisiswa la nou ka viv ouben sitiyasion-nou, nou ni bon rézon ni tjè-kontan. É pou nou toujou ni tjè-kontan, fòk nou fè épi sa nou ni (Sòm 16:6 ; 24:5). Ès délè, nou ka yenki sonjé sa nou pa ni, pito ki sonjé sé bèl bagay-la ki ka rivé nou ? Alò, annou éséyé mété lèspri-nou anlè sa ki pozitif adan sitiyasion-nou (Gal. 6:4).

ISAKA

4. Ki bénédision Jakòb prédi ba Isaka, é ki manniè pawòl-li réyalizé ? (Jénèz 49:14, 15 ; gadé osi kad-la).

⁴ (Li Jénèz 49:14, 15.) Jakòb félisité Isaka pas i té ka travay rèd. I di, Isaka té fò kon an bourik ki pé pòté chaj ki lou. I di osi, Isaka té ké pran plézi viv asou an bèl mòso tè. Annakò épi sa Jakòb di, désandan Isaka risivwè toupré Jouden-an, mòso tè ka pòté anpil (Joz. 19:22). Asiré, yo maré ren-yo pou travay tè-a, men yo travay rèd tou, pou endé lézòt (1 Wa 4:7, 17). Pa ègzanp, lè jij Barak épi pwofétès Débora mandé sé Izrayélit-la pou endé yo douvan Siséra, tribi Isaka vini ba yo an pal. É a dòt moman ankò, yo goumen ba pèp-la (Jij 5:15).

5. Poutji fòk nou travay rèd ?

⁵ Kisa nou ka aprann ? Tribi Isaka té ka travay rèd, é sa té ni anpil valè ba Jéova. Menm manniè-a, lè nou ka travay rèd ba Jéova, sa ni anpil valè ba’y (Ékl. 2:24). Pa ègzanp, sonjé sé frè-a ki ka travay rèd pou pran swen di lasanblé-a (1 Tim. 3:1). Sé frè-tala pa ka goumen pou vré. Men, yo ka travay rèd pou pwotéjé sé frè èk sè-a di bagay ki sé pé krazé rilasion-yo épi Jéova (1 Kor. 5:1, 5 ; Jid 17-23). Yo ka travay rèd tou, pou préparé épi prézanté diskou ki ké ankourajé épi ba sé sanblé-a plis fòs (1 Tim. 5:17).

DÀN

6. Ki mision tribi Dàn-lan té ni ? (Jénèz 49:17, 18 ; gadé osi kad-la).

⁶ (Li Jénèz 49:17, 18.) Jakòb di ki Dàn té kon an sèpan ka mòdé zannimo ki lontan pli gwo pasé’y, kon an chouval yo ka sèvi adan ladjè. Kidonk, tribi Dàn-lan té ké danjéré menm ba lènmi Izrayèl. Lè sé Izrayélit-la té ka alé adan Péyi pwonmès-la, tribi Dàn-lan té ka pwotéjé yo, pas « sé yo ki té ka maché pa dèyè tout sé lézòt tribi-a pou pwotéjé yo » (Nonb 10:25). Menmsi lèrèstan nasion-an pa té ka wè tousa tribi Dàn-lan té ka fè dèyè yo, mision-yo té vréman potalan.

7. Kisa fòk nou pa jen bliyé, kisiswa sa nou ka fè ba Jéova ?

⁷ Kisa nou ka aprann ? Délè, ou pé fè an travay, épi ou ni lenprésion pèsonn pa wè travay-la ou fè a. Pétèt ou ja partisipé pou nétwayé ouben antritni sal Wayòm-ou, ouben fè an sèvis adan an lasanblé siwkonskripsion ouben réjionnal, ouben endé an lòt manniè ankò. Woulo-bravo, sa bèl sa’w fè a ! Pa jen bliyé ki Jéova ka wè tousa ou ka fè, é i ka ba’y anlo valè. Sa Jéova ka aprésié, sé ki ou sèvi’y pa pou trapé louwanj, men pas ou enmen’y vréman é ou lé montré’y sa (Mat. 6:1-4).

GAD

8. Lè yo té adan Péyi pwonmès-la, poutji sa té fasil ba lènmi Izrayèl atatjé tribi Gad-la ? (Jénèz 49:19 ; gadé osi kad-la).

⁸ (Li Jénèz 49:19.) Jakòb té prédi ki an bann vòlè té ké atatjé tribi Gad. Pasé 200 lanné plita, tribi Gad trapé an mòso tè pabò Jouden-an. Kivédi, yo té ni menm fwontiè ki lènmi Izrayèl. Si té ni an ladjè, sé yo prèmié ki té ka pran fè ! Men magré sa, tribi Gad-la té lé viv asou mòso tè-tala, pas zèb-la té bèl, kifè sé zannimo-a té ké trapé bon manjé (Nonb 32:1, 5). Sa klè, yo pa té ka mantjé kouraj. Men anplis, yo té asiré sèten ki Jéova té ké endé yo défann péyi-a i té ba yo, kont tout sé bann vòlè-a. Pandan pliziè lanné, yo vréyé sòlda pou endé sé lézòt tribi-a pran sé téritwè Péyi pwonmès-la ki té pa lòt bò Jouden-an (Nonb 32:16-19). Davwè sé nonm-lan té pati ladjè, yo té asiré sèten ki Jéova té ké pwotéjé madanm-yo épi timanmay-yo. Jéova béni yo ba kouraj-yo é pas yo endé lézòt menm lè bagay-la té rèd (Joz. 22:1-4).

9. Si nou ka fè Jéova konfians, ki chwa nou ké fè adan lavi-nou ?

⁹ Kisa nou ka aprann ? Pou kontinié sèvi Jéova menm lè bagay-la rèd, fòk nou toujou fè’y konfians (Sòm 37:3). Menmsi sa pa toujou fasil, anlo frè é sè jòdi-a ka travay rèd pou konstwi sal Wayòm épi dòt batiman ba lòwganizasion. Yo ka préché la éti ni bizwen plis pwoklamatè, ouben yo ka endé lòwganizasion Jéova dòt manniè ankò. Yo ka asèpté fè tousa, pas yo asiré Bondié-yo ké toujou pran swen di yo (Sòm 23:1).

AZÈ

10. Kisa tribi Azè pa fè ? (Jénèz 49:20 ; gadé osi kad-la).

¹⁰ (Li Jénèz 49:20.) Jakòb té prédi ki tribi Azè té ké rich, é sé sa ki rivé. Tribi Azè trapé mòso tè pami sa ki té ka pòté plis adan tout péyi Izrayèl-la (Dét. 33:24). Anplis, téritwè-yo té ka lonjé Laméditérané, éti ou té ka touvé pò lavil Sidon, an pò éti ou té pé fè bon zafè. Men tribi Azè pa chasé moun Kanaan ki té ka viv an réjion-an (Jij 1:31, 32). Asiréman, mové lenfliyans moun Kanaan épi richès yo trapé, fè yo pèd balan-yo pou vré adorasion-an. Pa ègzanp, lè jij Barak té ka chèché volontè pou konbat kont an alians kananéyen, yo bat dèyè. Sé pou sa, malè pou yo, yo pa wè mirak-la Jéova fè ba sé Izrayélit-la pou yo trapé laviktwa « bò sous Mégido » (Jij 5:19-21). Tribi Azè dwèt té wont, lè yo tann Barak épi Débora chanté : « Azè, li, té asiz dé lanmen balan bò lanmè-a » ! (Jij 5:17).

11. Poutji lajan pa pou poto-mitan lavi-nou ?

¹¹ Kisa nou ka aprann ? Sa nou lé, sé ba Jéova sa nou ni di méyè. Sé pou sa nou ka prangad pou nou pa fè kon sé moun-lan adan monn-lan. Yo ka pansé ki lajan épi tousa yo pé achté, sé sa ki pli enpòwtan adan lavi-a (Pwo. 18:11). Menmsi nou bizwen lajan, nou pa ka pansé ki, ni anpil lajan pli enpòwtan ki sèvi Jéova (Ékl. 7:12 ; Ébré 13:5). Annou pa pèd tan-nou ka kouri dèyè lajan épi bagay ki pa vréman nésésè, pas sa pé fè nou moli adan sa nou ka fè ba Jéova. Kidonk, dépi aprézan, annou fè tousa nou pé pou ba Jéova tan-nou épi lafòs-nou. Pas si nou rété fidèl, talè, Jéova ké ba nou an bèl lavi adan monn nouvo a. É a moman-tala, nou pé ké mantjé ayen (Sòm 4:8).

NÈFTALI

12. Koumanniè sa Jakòb prédi asou Nèftali dwèt réyalizé ? (Jénèz 49:21 ; gadé osi kad-la).

¹² (Li Jénèz 49:21.) Jakòb prédi ki Nèftali té ké « palé an bèl manniè ». Pwofési-tala dwèt réyalizé pandan ministè Jézi. Yo té konnèt Jézi pou bèl lansèyman’y. Jézi viv an patjé tan Kafarnawòm, an vil ki té adan téritwè Nèftali. Sé poutji yo kriyé Kafarnawòm « vil-li » (Mat. 4:13 ; 9:1 ; Jan 7:46). É Izayi pwofétizé ki Jézi té ké vini « an gran limiè » ba moun Zabilon épi Nèftali (Iza. 9:1, 2). Pou vré, gras a lansèyman’y, Jézi té vini « vré limiè-a ki ka kléré tout kalté moun » (Jan 1:9).

13. Kisa fòk nou fè pou pawòl-nou fè Jéova plézi ?

¹³ Kisa nou ka aprann ? Sa nou ka di épi manniè nou ka palé enpòwtan ba Jéova. Kisa fòk nou fè pou nou « palé an bèl manniè », é konsa fè Jéova plézi ? Pou koumansé, fòk nou di lavérité (Sòm 15:1, 2). Fòk nou di bagay osi ka ankourajé lézòt — pa ègzanp félisité yo lè yo ka fè sa ki bien. É fòk nou pa présé kritiké épi plenn kònou (Éfé. 4:29). Pou fini, annou fè éfò pou vini pli filé pou koumansé dé ti-kozé épi moun, pou rivé ba témwayaj-la.

JOZÈF

14. Ki manniè sa Jakòb prédi anlè Jozèf réyalizé ? (Jénèz 49:22, 26 ; gadé osi kad-la).

¹⁴ (Li Jénèz 49:22, 26.) Jakòb dwèt té fiè di yich-li Jozèf. Jéova pèwmèt i « séparé di sé frè’y la », é i itilizé’y an manniè èspésial. Jakòb di ki Jozèf sé « boujon an piébwa ki ka pòté fwi ». Piébwa-a sé té Jakòb, é Jozèf sé té an boujon piébwa-tala. Sé té prèmié yich Rachèl, madanm-lan Jakòb té sitèlman enmen. Jakòb té prédi sé Jozèf ki té ké trapé léritaj prèmié yich-la, menmsi sé Ribèn ki té prèmié gason’y (Jén. 48:5, 6 ; 1 Kwo. 5:1, 2). Pwofési-tala réyalizé lè désandan 2 yich Jozèf, Éfrayim épi Manasé, divini 2 tribi ki trapé yo chak la an téritwè (Jén. 49:25 ; Joz. 14:4).

15. Koumanniè Jozèf réyaji douvan lenjistis i sibi ?

¹⁵ Jakòb té palé osi di moun ki té « tiré flèch [anlè Jozèf] » é ki « té rayi’y » (Jén. 49:23). Avrédi, sé té sé frè’y la, ki té jalou’y, é ki té dèyè tout soufwans i té sibi. Men Jozèf pa rayi sé frè’y la ouben akizé Jéova pou sa ki té rivé’y. Jakòb di asou Jozèf : « I té ka tjenbé lark-li an manniè solid, é lanmen’y té ka rété fò épi aplon » (Jén. 49:24). Jozèf té toujou paré sèvi lark-li, men i pa tiré flèch lahenn kont sé frè’y la. I plito tiré flèch lanmou épi padon. Lè i té anba léprèv, Jozèf apiyé anlè Jéova. I pa sèlman padonnen sé frè’y la, men i aji osi épi jantiyès (Jén. 47:11, 12). I kité léprèv-la fè’y vini an méyè moun (Sòm 105:17-19). Kifè, Jéova sèvi’y pou fè bagay èstwòdinè.

16. Koumanniè nou pé imité Jozèf lè nou anba léprèv ?

¹⁶ Kisa nou ka aprann ? Annou pa jenmen kité piès léprèv séparé nou di Jéova ouben di frè é sè-nou. Sonjé ki Jéova pé pèwmèt an léprèv pou fòwmé nou (Ébré 12:7). Fòwmasion Jéova ka endé nou travay ankò plis kalité kontèl konpasion épi aprann padonnen (Ébré 12:11). Jéova ké rékonpansé nou, menm manniè i rékonpansé Jozèf.

BENJAMEN

17. Ki manniè sa Jakòb prédi anlè Benjamen réyalizé ? (Jénèz 49:27 ; gadé osi kad-la).

¹⁷ (Li Jénèz 49:27.) Jakòb té prédi ki désandan Benjamen té ké sòlda ki danjéré, konsidiré sé té dé lou (Jij 20:15, 16 ; 1 Kwo. 12:2). Sayil, ki té prèmié wa Izrayèl, sòti adan tribi Benjamen. I goumen kont sé Filisten-an épi kouraj (1 Sam. 9:15-17, 21). Sièk-tan plita, rèn Èstè épi Mardoché, ki té désandan Benjamen, rivé sové sé Izrayélit-la pou yo pa disparèt (Èstè 2:5-7 ; 8:3 ; 10:3).

18. Koumanniè nou pé rété fidèl kon tribi Benjamen-an ?

¹⁸ Kisa nou ka aprann ? Tribi Benjamen dwèt té fiè di wè yonn adan yo vini wa, kon Jakòb té prédi. Men anfinaldikont, lè Jéova chwazi David pou vini wa adan tribi Jida-a, yo asèpté soutienn li (2 Sam. 3:17-19). É pliziè lanné plita, lè sé lézòt tribi-a ribélé kòyo, tribi Benjamen-an kontinié rété fidèl a wa-a Jéova té chwazi, ki té sòti adan tribi Jida (1 Wa 11:31, 32 ; 12:19, 21). Nou osi, annou soutienn épi fidélité sé moun-lan Jéova ka chwazi pou dirijé pèp-li jòdi-a (1 Tés. 5:12).

19. Pwofési Jakòb-la pé sèvi nou anpil. Koumanniè ?

¹⁹ Pwofési-a Jakòb ba avan lanmò’y pé sèvi nou anpil. Si nou ka pran tan ègzaminé manniè i réyalizé, sa pé rann lafwa-nou pli fò adan sé lézòt pwofési-a ki adan Pawòl Bondié. É si nou ka médité asou bénédision sé yich Jakòb-la trapé, sa pé endé nou konprann plimié sa fòk nou fè pou ba Jéova tjè-kontan.