Jézi « aprann lobéyisans »

Jézi toujou obéyi Jéova (Jan 8:29). Alò poutji Bib-la ka di : « Soufwans i sibi fè’y aprann lobéyisans » ? (Ébré 5:8).

Lè Jézi té asou latè, i jwenn sitiyasion i pa té jen konnèt lè i té an sièl-la. Pa ègzanp, paran’y pa té pawfé menmsi yo té enmen Bondié (Lik 2:51). Chèf rèlijié méchan épi dirijan politik pèsékité’y (Mat. 26:59 ; Mak 15:15). Anplis, « i chwézi vini tou piti é i obéyi jiktan i mò ». É lanmò-a i sibi a té rèd toubonnman (Fil. 2:8).

Sé sitiyasion-tala aprann Jézi obéyi, kon i pa té janmen fè’y an sièl-la. Kifè, sa pèwmèt li divini an Wa épi an Gran Prèt pawfé, ki té kéy kapab ni konpasion ba nou (Ébré 4:15 ; 5:9). Aprézavwè i aprann lobéyisans palakòz soufwans i sibi, Jézi vini ni ankò plis valè an zié Jéova. Sé menm bagay-la ba nou. Nou pé ni plis valè an zié Jéova, é nou pé vini zouti ankò pli filé an lanmen’y. Pou sa, fòk nou rivé rété obéyisan adan sé mision-an i ka ba nou, magré léprèv nou ka jwenn (Jak 1:4).