1925 : I ni 100 lanné di sa

AN BAGAY OU KA ÈSPÉRÉ ÉPI KA TADÉ

Anpil Étidian Labib té ka atann paradi-a asou latè an 1925. Poutji ? Frè Albert Schroeder, ki té kèy vini an manb Komité santral-la plita, èsplitjé : « Nou té ka kwè, sé lanné 1925 sé wen-an té kèy monté an sièl-la jwenn Jézikri, épi moun ki té sèvi Jéova épi fidélité, kontèl Abraam épi David té kèy résisité asou latè-a pou dirijé’y. » Anmizi lanné-a té ka pasé, sé Étidian Labib-la pa té ka wè sa yo té ka atann lan rivé. Yo trapé an désèpsion, é nou ka konprann sa (Pwo. 13:12).

Magré désèpsion-tala, laplipa sé Étidian Labib-la kontinié préché épi balan, é yo pran konsians rèsponsabilité-a yo té ni di témwayé an favè Jéova. Annou wè pa èkzanp, ki manniè yo sèvi laradio pou préché ba an patjé moun.

NOUVO ÈSTASION RADIO KA DOUBOUT

Èstasion radio WBBR tèlman bien maché lanné-a ki té pasé, ki sé Étidian Labib-la désidé konstwi bò Chikago, adan Lilinwa, an lòt èstasion radio pli puisan. Yo kriyé’y WORD. Ralph Leffler mété lanmen pou konstwi èstasion-tala é i di :« Lè i té ka fè frèt, an patjé moun ki té ka viv lwen, té ka rété lakay-yo épi té ni lokazion kouté radio-tala. » An fanmi ka viv an koté yo ka kriyé Pilòt Èstasion, Lalaska, a 5 000 kilomèt radio-a, rivé tann yonn adan sé prèmié pwogram-lan ki té ka pasé. É aprézavwè fanmi-tala kouté pwogram-lan, i ékri létjip-la ki té ka travay adan radio-a. I di yo mèsi, pas yo préparé an bèl pwogram èspiritièl ki té ankourajan.

Tou di Gad-la 1^ié désanm 1925 an anglé, ka ba yonn-dé détay asou gwo travay-la radio-tala té ka fè. I ka di : « WORD, sé té yonn adan sé radio-a ki pli puisan adan tout Lézétazini. Ou pé kouté’y san pwoblèm toupatou Lézétazini, men osi, Kiba épi linò Lalaska. Gras a radio-tala, an patjé moun ki pa té janmen tann palé di lavérité lé sav plis atjèlman. »

Adan menm périòd-tala, sé Étidian Labib-la fè tousa yo té pé, pou sèvi radio-a o maksimòm pou préché bon nouvèl-la Kanada. An 1924, sé Étidian Labib-la konstwi an èstasion radio yo kriyé CHUC, pa koté Saskatoun, an Saskatjéwàn. Sé té yonn adan sé prèmié radio-a ki té ka palé di rilijion atè Kanada. An 1925, yo té pou déplasé ti èstasion radio-tala. Sosiété Watch Tower rékipéré’y, épi enstalé’y adan an batiman yo ka kriyé Réjan. Sé té an ansien sinéma yo té achté épi ranjé pou sa.

Saskatjéwàn té ni réjion ki pa té ni anlo abitan. Men gras a radio-a, anpil adan yo tann bon nouvèl-la pou prèmié fwa. Pa èkzanp, apré i kouté an émision, Man Graham, ki té ka viv adan an vil éti pa té ni anlo moun, ékri pou mandé piblikasion biblik. Frè George Naish ka rakonté : « Sé té konsi i té ka sipliyé nou : “Ansénié nou !” Tèlman i té anvi sav plis, nou vréyé ba’y tout sé volim liv-la Études des Écritures. » Lamenm, Man Graham koumansé préché mésaj Wayòm-lan koté ki té ni ankò mwens moun.

NOU APRANN VÉRITÉ KI POTALAN

Adan Tou di Gad-la an anglé, 1^ié maws 1925, té ni an awtik ki té ni kont lenpòwtans-li. Tit-li sé té « Nasion-an wè jou ». Poutji i té enpòtan konsa ? Yonn-dé tan avan, sé Étidian Labib-la konprann Satan té ni an òwganizasion. An mòso an sièl-la épi sé démon-an, épi lòt mòso-a asou latè, adan’y ni sistèm politik la, sistèm komèrsial-la épi sistèm rilijié-a. Men épi awtik-tala, « lèsklav fidèl é prévwayan » endé sé frè èk sè-a konprann, Jéova osi ni an sèl òwganizasion ka ini sèvitè’y ki an sièl épi sèvitè’y asou latè. Òwganizasion-tala toutafètman séparé épi òwganizasion Djab-la. I ka travay pou soutni Jéova épi opozé kòy a Satan épi tou sa ki anba lanmen’y (Mat. 24:45). Anplis, lèsklav-la èsplitjé ki Wayòm Bondié té wè jou an 1914. Lanné-tala an gwo ladjè pété an sièl-la. Kifè, yo kouri dèyè Satan èk sé démon-an, épi yo jété yo obò latè (Rév. 12:7-9).

Yonn-dé pa rivé asèpté nouvo lansèyman-tala, kidonk awtik-la di konsa : « Nou ka ankourajé sé lèktè “Tou di Gad-la” ki pa dakò épi nouvo lansèyman-tala pran pasians, épi kontinié fè Jéova konfians toupandan yo ka sèvi’y épi fidélité. »

Men Tom Eyre, ki té sòti Langlitè, é ki té kòlpòtè, (sé konsa yo té ka kriyé sé pionié-a avan), èsplitjé koumanniè près tout sé Étidian Labib-la réaji, lè yo tann nouvo lansèyman-tala : « Sé frè-a té ni tjè-kontan menm, lè yo risivwè nouvo èsplikasion Révélasion 12-la. Atjèlman, difèt nou konprann Wayòm Bondié-a té enstalé atjèlman an sièl-la, nou té présé anonsé bon nouvèl-la alantou nou. Sa ankourajé nou préché plis, é sa endé nou konprann Jéova ka djidé pèp-li pou bagay pli gran ké rivé talè. »

POTALANS BA AN TÉMWAYAJ AN FAVÈ JÉOVA

Jòdi-a, sé Témwen Jéova-a bien konnèt sé pawòl-la ki adan Izayi 43:10, oti nou ka li : « Jéova ka di : “Zòt ka sèvi mwen témwen, sèvitè-mwen man chwézi ba kòmwen.” » Avan 1925, yo pa té ka djè analizé vèsé-tala adan piblikasion-nou. Men van-an té kèy tounen. An 1925, yo ègzaminé Izayi 43:10 épi vèsé 12-la adan 11 Tou di Gad !

Fen out 1925, sé Étidian Labib-la alé adan an gran ssanblé Indianapolis, Indiana. Adan pwogram-lan, frè Joseph Rutherford té mété an mésaj pou di sé délégé-a labienvini. Mi sa ki té matjé : « Nou vini adan gran sanblé-tala, pou Senyè-a ba nou lafòs ritounen préché épi plis balan ankò, pou nou témwayé an favè’y. » Pandan sé 8 jou gran sanblé-tala, yo ankourajé sé asistan-an témwayé ba Jéova, dépi yo ni an lokazion.

Sanmdi 29 out, frè Rutherford ba an diskou. Tit-li sé té : « Mété kòzòt an mannèv ». I palé di lenpòwtans témwayé an favè Jéova. I di konsa : « Jéova di sèvitè’y : “Zòt sé témwen-mwen é mwen man sé Bondié-zòt.” Apré sa, i ba an mésaj puisan lè i di : “Mété an sin doubout ba tout pèp.” Sé sèlman sèvitè Jéova ka mété an sin doubout ba tout pèp asou latè, pas sé yo ki ni lèspri Senyè-a. Kidonk, sé yo, ka témwayé ba Bondié. » (Iza. 43:12 ; 62:10).

Lè diskou frè Rutherford fini, tout asistans-lan tonbé dakò pou an rézolision ki té ni pou tit : « An mésaj lèspwa ». I té ka prézanté wayòm Bondié kon sèl zouti « ki pé pòté bénédision étèrnèl, ki ka pèwmèt ou risivwè lapé, pòspérité, lasanté, lavi étèrnèl, libèté épi ni tjè-kontan pou tout tan ». Yo tradui rézolision-tala an pliziè lang, épi yo jis fè trak épi’y. Yo distribié oliwon 40 milion trak.

Sé sèlman yonn-dé lanné plita sé Étidian Labib-la pran non Témwen Jéova. Men yo konprann, piti a piti, rèsponsabilité-yo di vini Témwen Bondié.

NOU KA VIRÉ POU KONTINIÉ TI KOZÉ ÉPI SÉ MOUN-LAN

Davwè nonb Étidian Labib té ka fléché-monté toupatou asou latè, yo ankourajé yo ritounen wè moun ki té montré yo té entérésé pa bon nouvèl-la. Apré yo distribié trak-la An mésaj lèspwa, Bulletin-anb ba yo enstriksion-tala : « Pran dispozision pou viré lakay sé moun-lan oti sé ouvriyé-a [sa lé di sé pwoklamatè-a] pa kité sèlman piblikasion, men koté yo kité trak-la An mésaj lèspwa. »

Adan Bulletin-an an anglé, janvié 1925, i té ni an témwayaj an Étidian Labib ki té ka rété Plano, Tèksas. I di konsa : « Nou rété èstébékwé lè nou wè, ki lè nou fè an téritwè pliziè fwa, souvan sa ka pòté plis ki an téritwè nou pa janmen fè. An dizan, nou préché 5 fwa adan an ti vil téritwè-nou. […] Pa ni lontan, sè Hendrix épi manman-mwen viré adan. Yo kité an kantité liv yo [pa té jen kité] avan. »

Pa koté Panama, an kòlpòtè ékri : « An patjé moun té kouri dèyè mwen lè mwen té wè yo prèmié fwa-a. Men lè man viré dé-twa fwa, yo chanjé konpòwtasion. Lanné-tala, man ka pasé plis tan ka viré wè sé moun-lan man té ja jwenn lan. É lè man ka palé épi yo, sé bokantaj-la vréman pli bèl. »

ZIÉ-NOU ANLÈ TRAVAY-LA KI KA ATANN NOU

Adan lèt-la frè Rutherford ka vréyé chak lanné ba sé kòlpòtè-a, i fè an ti viré-gadé anlè sa yo fè dènié lanné-a ki té pasé, é i palé yo di travay-la ki té ka atann yo. I ékri : « Lanné-a ki pasé a, zòt trapé privilèj konsolé an patjé moun adan téritwè-a épi bon nouvèl-la. Travay-tala ba zòt anpil jwa […]. Lanné-a ka vini kèy ba zòt dòt lokazion ba an témwayaj an favè Bondié èk wayòm-li, épi mété doubout an sin ba sé pèp-la […]. Annou kontinié ansanm-ansanm voyé lavwa, pou louwé Bondié-nou épi Wa-nou. »

Alòs ki lanné 1925 té ka bout, sé frè-a té ka prévwa agrandi bétèl Bwouklin. Lanné 1926 té ké ouvè épi pli gran pwojé konstriksion lòwganizasion-nou ba lépòk-tala.