Kouté Bondié pou ni an mariyaj éré

Sé Jéovaa ki sélébré prèmié mariyaj-la. Labib-la ka di aprézavwa I kréyé madanm-lan, I « mennen’y ba’y ». Adan té tèlman éré i di épi jwa : « Mi atjèlman, yonn ki zo mwen menm, yonn ki lachè mwen menm » (Jénèz 2:22, 23). Jòdi ankò, Jéova lé bonè moun mayé.

Lè nou ka mayé, an tèt nou, tout bagay kèy woulé luil. Mé fo pa nou twonpé kò nou : menm an nonm é an madanm ki vréman ni lanmou yonn pou lòt, kèy jwenn pwoblèm (1 Korentjen 7:28). Adan bwochi tala, zòt kèy touvé prensip Labib é si zòt ka aplitjé yo, ki mariyaj zòt, ki lafanmi zòt kèy éré (Sòm 19:8-11).

1 ASÈPTÉ WÒL-LA JÉOVA BA ZÒT LA

SA LABIB-LA KA DI : Mari-a sé chèf lafanmi (Éfézien 5:23).

Wou ki sé mari-a, Jéova lé’w pran swen di madanm-ou épi tandrès (1 Piè 3:7). I fè di madanm-ou an konpangn ki ka alé épi’w é I lé ou ba’y lonnè épi lanmou (Jénèz 2:18). Fòs lanmou-a ou ni ba’y-la, kèy ba’w lanvi fè lavantaj-li pasé avan ta’w (Éfézien 5:25-29).

Wou ki sé madanm-lan, Jéova lé ou ni anpil rèspé ba mari’w é I lé ou endé’y mennen fanmi-an (1 Korentjen 11:3 ; Éfézien 5:33). Soutni désizion’y é travay kantékant épi’y, é fè sa épi tout fon tjè’w (Kolosien 3:18). Fè konsa, é lè Jéova épi mari’w kèy gadé’w, yo kèy wè ou bèl menm ! (1 Piè 3:1-6).

SA ZÒT PÉ FÈ :

• Mandé konjwen’w sa ou pé fè pou pé sa divini an méyè mari oben an méyè madanm. Bien kouté répons-li é apré, fè tou sa ou pé pou fè pli bien.

• Fòk ou pasian. Yonn épi lòt kèy bizwen tan pou aprann rann lòt-la biennéré.

2 SOUSIÉ KÒ’W ANPIL DI SANTIMAN KONJWEN’W

SA LABIB-LA KA DI : Ou dwèt chèché lavantaj konjwen’w (Filipien 2:3, 4). Fòk ou rikonnèt valè konjwen’w, é sonjé Jéova ka di moun ka sèvi’y, fo yo « dous épi tout moun » (2 Timoté 2:24). « Pawòl an moun ka di san réfléchi kon kout-kouto, men lang an moun ki ni sajès ka djéri. » Alò, pran tan bien chwazi pawòl-ou (Pwovèb 12:18). Lèspri Jéova kay endé’w palé épi jantiyès épi lanmou (Galat 5:22, 23 ; Kolosien 4:6).

SA ZÒT PÉ FÈ :

• Avan’w palé di bagay enpòwtan épi konjwen’w, priyé Bondié pou I endé’w rété dous épi ni an lèspri ouvè.

• Bien réfléchi sa ou kay di épi manniè ou kay di’y.

3 TRAVAY AN ÉTJIP

SA LABIB-LA KA DI : Lè ou vini mayé, wou épi konjwen’w, zòt ka divini « an sèl lachè » (Matié 19:5). Men sonjé, zòt sé dé moun diféran ki pa toujou ni menm lidé. Kidonk zòt pou aprann lianné pansé épi santiman zòt (Filipien 2:2). Liannaj tala enpòwtan menm pou pran bon désizion. Labib-la ka di : « Lè ou ka mandé konsèy, sa ou prévwa ka maché » (Pwovèb 20:18). Lè zòt ka pran désizion enpòwtan ansanm, kité prensip Labib-la kléré zòt (Pwovèb 8:32, 33).

SA ZÒT PÉ FÈ :

• Pa anni di konjwen’w sa ou ka pansé : di’y sa ou ka risanti tou.

• Avan ou angajé kò’w adan an bagay, mandé konjwen’w sa i ka pansé.