Koumanniè pou mentienn lapé épi moun lafanmi zòt

Mariyaj-la ka kréyé an fanmi ki nouvo. An tout manniè, ou kèy toujou enmen épi rèspèkté lé paran’w mé atjèlman moun-lan ki ka konté plis an lavi’w sé konjwen’w. Pétèt sa pa fasil pou yonn dé moun lafanmi’w asèpté sa. Mé prensip Labib-la pé endé’w touvé an étjilib pou rivé mentienn lapé épi moun lafanmi’w toupandan ou ka konstwi lavi fanmi’w ki tou nèf.

1 KONTINIÉ BIEN WÈ LÉ PARAN’W

SA LABIB-LA KA DI : « Ba papa’w épi manman’w lonnè yo » (Éfézien 6:2). Kisiswa laj-ou, fodré’w toujou ba lé paran’w lonnè épi rèspé. Rikonnèt ki konjwen’w, sé an yich ki ni an papa épi an manman, i ni pou bien otjipé di yo tou. « Lanmou pa jalou », sé pou sa, fo pa ou santi kò’w an danjé si’y ni rilasion épi yo (1 Korentjen 13:4 ; Galat 5:26).

SA ZÒT PÉ FÈ :

• Évité di pawòl kontèl, « fanmi’w toujou ka kritiké mwen », oben « manman’w pa janmen enmen sa mwen ka fè ».

• Éséyé wè bagay-la épi zié konjwen’w.

2 PA MOLI SI SA NÉSÉSÈ

SA LABIB-LA KA DI : « Sé poutji an nonm kay kité papa’y épi manman’y, i kay lianné épi madanm-li, é yo kay divini an sèl lachè » (Jénèz 2:24). Pétèt apré mariyaj-ou, paran’w pé santi ki yo toujou rèsponsab-ou é yo kay lé mélé adan mariyaj-ou plis ki yo dwé fè’y.

Sé wou épi konjwen’w ki pou mété kò zòt dakò pou sav jis ki koté yo pé alé, épi apré, palé yo di sa épi jantiyès. Zòt pé palé franchman san pasé pa kat chimen é san britalizé yo (Pwovèb 15:1). Si zòt ni limilité, dousè épi pasians, zòt kay pé antann bien épi moun lafanmi zòt é yonn kay pé kontinié « sipòté lòt adan lanmou » (Éfézien 4:2).

SA ZÒT PÉ FÈ :

• Si ou ka touvé lé paran ka mélé twòp adan lavi zòt, palé di sa épi konjwen’w lè zòt tou lé dé-a bien dispozé.

• Mété kò zòt dakò anlè manniè réglé pwoblèm-lan.