LISON 6

Itilizé sé vèsé-a an manniè ki klè

Jan 10:33-36

KISA POU FÈ : Pa anni li vèsé-a toubannman épi chanjé lidé lamenm. Fòk ou asiré moun-lan bien wè liannaj-la ki ni ant vèsé-a épi lidé-a ou ka èsplitjé a.

KI MANNIÈ POU FÈ SA :

Mété apa sé mo-a ki pòtalan. Lè’w fini li an vèsé, mété douvan sé mo-a ki lianné épi lidé-a ki enpòtan. Ou pé fè sa, lè’w ka répété sé mo-a ki enpòtan, oben lè’w ka pozé sé moun-lan an kèsion pou endé yo touvé sé mo-tala.

Si’w ka ripran lidé vèsé-a épi dòt mo, travay pou sé moun-lan toujou bien wè liannaj-la ki ni ant sa Labib ka di épi lidé-a ki enpòtan.
Mété lidé-a douvan. Si’w èsplitjé poutji ou kay li an vèsé, montré rilasion ki ni ant mo pòtalan vèsé-a, épi rézon-an ki fè’w li’y.

Apré ou li an vèsé, toupandan ou ka dékatiyé’y, tjenbé Bib-la ouvè. Sa kay endé sé moun-lan lianné sa’w ka di épi vèsé-a.
Fè an itilizasion ki senp. Pa palé anlo asou bagay ki pa ni piès liannaj épi lidé pòtalan-an. Pa rapò a sa sé moun-lan ja konnèt asou sijé-a, pou sa klè épi fasil pou aplitjé, gadé pou wè kantité enfòmasion ou ka ba.