Koumanniè ou pé pwofité lèkti Labib-la o maksimòm ?

Ès ou ja trouvé kòw doubout douvan an bidim travay pou fè ? Ou dwèt touvé sa té twòp pou’w... Alò, pou rann sa pli fasil, ou séparé travay-la an pliziè ti mòso. Sé menm bagay-la lè nou lé li Labib. Pétèt ou ka mandé kòw pa ki koté pou koumansé. Adan lison-tala, nou kay wè lidé tou senp ki kay endé’w enmen li épi étidié Labib.

1. Poutji fòk li Labib régilièrman ?

An moun ka li Labib régilièrman, ouben « lalwa Jéova », kay éré é kay réyisi sa i ka fè (li Sòm 1:1-3). Pou koumansé, éséyé li Labib an ti moman chak jou. Pli ou kay fè konésans épi Labib, pli ou kay enmen li’y.

2. Ki manniè bien pwofité lèkti Labib-ou ?

Pou pwofité a fon lèkti Labib-la, fòk ou pran tan réfléchi asou sa ou ka li, kivédi « médité » anlè’y (Jozié 1:8, nòt). Toupandan ou ka li, mandé kòw : « Kisa pasaj-tala ka aprann mwen anlè Jéova ? Ki manniè man pé sèvi’y adan lavi-mwen ? Ki manniè man pé itilizé’y pou endé dòt moun ? »

3. Koumanniè touvé tan pou li Labib ?

Ès ou ka touvé difisil pran an tan pou li Labib ? Ou pa tou sèl. Fòk ou goumen pou « sèvi tan ou ni méyè manniè ou pé » (Éfézien 5:16). Kontèl, ou pé chwézi an moman prési pou li Labib chak jou. Ni sa ka li’y gran bonnè lé bonmaten, dòt sé lé midi, épi dòt ankò sé léswè avan yo alé dòmi. É wou, ki moman ou simié ?

ANNOU PLI LWEN

4. Aprann enmen li Labib

Lè’w ka koumansé li Labib sa pa toujou fasil, men ou pé ‘aprann swèf’ li’y, kon an moun ki ka aprann aprésié an nouvo manjé. Li 1 Piè 2:2, épi diskité kèsion-tala :

• Si ou ka li Labib-la chak jou, ou kay fini pa enmen sa, é ou kay présé moman-tala rivé, sa’w di ?

Gadé VIDÉWO-a pou wè ki manniè jenn aprann enmen li Labib. Apré diskité sé kèsion-an ka vini an.

VIDÉWO : Jenn ki ka aprann enmen Pawòl Bondié (5:33)

• Ki difikilté sé jenn-lan rivé travèsé ?

• Kisa ki endé yo kontinié li Labib touléjou ?

• Kisa ki pèwmèt yo rann lèkti Labib-la pli entérésan ?

Ti lidé pou koumansé :

• Chwazi an tradiksion ou pé fè konfians é modèrn. Éséyé Labib-la Traduction du monde nouveau.

• Koumansé pa an mòso ki ka entérésé’w. Ou pé touvé lidé adan tablo-a « Pran plézi adan lèkti Labib-la ».

• Matjé sa ou li. Sèvi tablo-a « Lèkti Labib-mwen ».

• Sèvi aplikasion-an JW Library^®. Épi’y, ou pé li ouben kouté Labib toupatou, épi an téléfòn pòwtab ouben an lòt aparèy.

• Jété an zié asou annexes adan Traduction du monde nouveau. Ou pé touvé kat, tablo épi an ti-diksionnè ki kay rann lèkti’w la pli bèl ankò.

5. Préparé létid Labib-ou

Li Sòm 119:34, épi diskité kèsion-tala :

• Poutji sé an bon bagay priyé avan li Labib ouben avan préparé létid Labib-ou ?

Ki manniè bien pwofité chak lison ? Lè’w ka préparé an lison liv-tala, éséyé métòd-tala :

1. Li sé prèmié paragraf lison-an.

2. Chèché èk li sé vèsé-a, épi éséyé konprann liannaj-yo épi sé matiè-a.

3. Soulinié sé mo enpòwtan-an ouben sé mòso fraz-la ki ka réponn sé kèsion-an ; sa kay endé’w lè ou kay diskité asou lison-an épi ansénian’w lan.

Ès ou té sav sa ?

Lé Témwen Jéova té ka sèvi diféran modèl tradiksion Labib, men yo simié sèvi La Bible. Traduction du monde nouveau pas i ègzak épi klè, é pas non Bondié andidan’y (li awtik-la « Ès Témwen Jéova ni pwòp Bib-yo ? » asou jw.org).

SA’W APRANN

Pou pwofité o maksimòm lèkti Labib-la, pwogramé an moman pou li’y, priyé pou konprann sa’w ka li é préparé létid Labib-ou.

An ti viré gadé

• Koumanniè ou pé pwofité lèkti Labib-ou o maksimòm ?

• Ki moman ou pé pran pou li épi pou étidié Labib-la ?

• Poutji sa bon ba’w paré létid Labib-ou ?

TIBREN PLIS ANKÒ

Lidé ki ka pèwmèt ou pwofité a fon di lèkti Labib-ou.

« Une lecture qui vous apportera beaucoup » (La Tour de Garde n^o 1 2017)

Twa manniè pou li Labib.

« Koumanniè Labib-la pé endé mwen ? (1^ié mòso) : Chèché dékouvè Labib-ou » (awtik jw.org)

Ki manniè pran plézi li Labib ?

« Koumanniè Labib-la pé endé mwen ? (2^ièm mòso) : Pran plézi adan lèkti Labib-ou » (awtik jw.org)

Moun ki ni labitid li Labib dépi lontan ka di manniè yo ka fè.

An bon létid pèsonèl (2:06)