LISON 17

Ki kalté moun Jézi yé ?

Modèl pou enprimé

Lè nou ka li tousa Jézi di épi fè asou latè, sa ka ba nou anvi vini zanmi épi’y èk vini zanmi épi Papa’y, Jéova. Ki kalité i ni ? É koumanniè nou pé imité Jézi ?

1. Poutji nou pé di Jézi ka sanm Papa’y menm ?

Lè i té an sièl-la, Jézi bien gadé manniè Papa’y té ka fè pandan milia lanné, é i aprann anpil asou’y. Kifè pansé’y, santiman’y épi aksion’y té ègzaktiman kon ta Papa’y (li Jan 5:19). Poutoudi, Jézi imité sitèlman bien kalité Papa’y, ki i rivé di : « Moun-lan ki wè mwen, wè Papa-a tou » (Jan 14:9). Pli ou ké aprann kalité Jézi, sé pli ou kèy konnèt Jéova. Pa èkzanp, Jézi té ka pran lapenn moun pou ta’y ; sa ka montré nou sa Jéova ka risanti ba nou.

2. Ki manniè Jézi montré i enmen Jéova ?

Jézi di : « Pou monn-lan sav man enmen Papa-a, man ka fè toutafètman sa Papa-a ka mandé mwen fè » (Jan 14:31). Lè i té anlè latè, Jézi montré grandè lanmou’y ba Papa’y lè i obéyi menm lè sa té rèd. Sé osi pas i té enmen Papa’y i té ka palé di’y é i té ka endé tout moun vini zanmi épi’y (Jan 14:23).

3. Ki manniè Jézi montré i enmen tout moun ?

Jézi ka di adan Labib « sé yich lézòm man té pli enmen » (Pwovèb 8:31). Sé lanmou-tala ki té ka fè’y ankourajé épi endé tout moun san atann ayen apré. Mirak i fè montré i té puisan, men siwtou ki soufwans lézòt té ka fann tjè’y (Mak 1:40-42). Jézi té bon anpil é ba’y, tout moun té moun. I té ka konsolé moun sensè ki té ka kouté’y é i té ka riba yo lèspwa. Sé pas i té enmen tout moun i asèpté soufè épi mò ba yo. Men, i ni an lanmou èspésial ba moun ka kouté sa i ansénié (li Jan 15:13, 14).

ANNOU PLI LWEN

Annou pran tan katjilé asou kalité Jézi, é annou gadé koumanniè imité lanmou’y épi jénérozité’y.

4. Lanmou Jézi ba Papa’y

Sé Jézi ki montré nou ki manniè fòk nou enmen Bondié. Li Lik 6:12, épi Jan 15:10 épi 17:26. Apré chak vèsé, diskité kèsion-tala :

Ki manniè nou pé montré nou enmen Jéova ?

Jézi ka priyé. — Jézi té enmen Papa’y ki an sièl é i té ka prédié tout lè.

5. Lanmou Jézi ba moun

Jézi té ka sonjé lézòt avan i sonjé kòy. Menm si i té las, i té ka ba tan’y épi lafòs-li. Li Mak 6:30-44 épi diskité sé kèsion-tala :

Ki diféran manniè Jézi montré i té ka sousié kòy di lézòt ? (gadé vèsé 31, 34, 41 épi 42).
Kisa ki té ka pousé Jézi endé lézòt ? (gadé vèsé 34).
Jézi té ka imité Papa’y. Kisa manniè i fè ka aprann nou anlè Jéova ?
Ki diféran manniè nou pé montré nou ka sousié kònou ba lézòt kon Jézi ?

Épi an mirak, Jézi ka nouri milié moun lè i ka miltipliyé senk pen épi dé ti pwason. I ka ba sé disip-li a manjé-a pou yo distribié’y ba nonm, fanm épi timanmay.

6. Jénérozité Jézi

Jézi pa té ni anlo bagay, men tjè’y té an lanmen’y é i ankourajé nou imité’y. Li Akt 20:35 épi diskité kèsion-tala :

Dapré Jézi, kisa ka mété lajwa an tjè-nou ?

Gadé VIDÉWO-a épi diskité kèsion-an ka vini an.

VIDÉWO : « Ou ka jwenn plis bonè lè ou ka ba » (mòso) (4:00)

Menm si nou pa ni anlo bagay, ki diféran manniè nou pé ba ?

Ès ou té sav sa ?

Labib ka èsplitjé fòk nou priyé Jéova an non Jézi (li Jan 16:23, 24). Lè nou ka priyé an non Jézi, nou ka montré ki nou sav sé gras a Jézi nou pé vini zanmi épi Jéova.

NI MOUN KA DI : « Bondié ni dòt bagay pou fè ki otjipé di nou. »