LISON 16
Kisa Jézi fè lè i té asou latè ?
Anlo moun ka wè Jézi kon an ti-bébé, an pwofèt, ouben sèl bagay yo sav anlè’y sé manniè i mò. Men kisa nou pé aprann anlè’y ankò, lè nou ka étidié koumanniè lavi’y té yé asou latè ? Nou kèy palé asou dé-twa bagay enpòwtan Jézi fè é nou kèy wè poutji yo ka konsèné nou.
1. Ki aktivité prensipal Jézi té ni ?
Aktivité prensipal Jézi sé té « anonsé bon nouvèl wayòm Bondié-a » (li Lik 4:43). Mi bon nouvèl-la i té ka préché : Bondié té ké mété an wayòm ouben an gouvèlman ki té kèy réglé tout pwoblèm limanitéa. Pandan 3 lanné é dimi Jézi pa sispann préché mésaj lèspwa-tala (Matié 9:35).
2. Kisa mirak Jézi montré ?
Labib ka palé di pliziè ‘bagay èstwòdinè épi mirak épi sin Bondié fè lè i sèvi Jézi’ (Akt 2:22). Gras a puisans Bondié, Jézi rivé arété an gran tanpèt, ba milié moun manjé, djéri moun malad é résisité moun mò (Matié 8:23-27 ; 14:15-21 ; Mak 6:56 ; Lik 7:11-17). Mirak Jézi montré sé Bondié ki vréyé’y. Yo montré tou, Jéova ni pouvwa réglé tout pwoblèm-nou.
3. Sa lavi Jézi ka aprann nou ?
Jézi toujou obéyi Jéova (li Jan 8:29). Magré moun té kont li, Jézi fè tousa Papa’y té ka mandé’y jiktan i mò. I montré sa posib ba lézòm sèvi Bondié menm lè sa pa fasil. Sé konsa Jézi ba nou ‘an lègzanp pou suiv larèl-li épi fidélité’ (1 Piè 2:21).
ANNOU PLI LWEN
Annou gadé sa Jézi fè pou moun tann bon nouvèl-la é annou palé di mirak i fè.
4. Jézi fè moun tann bon nouvèl-la
Pou préché bon nouvèl-la ba an patjé moun, Jézi maché santenn kilomèt asou chimen plen lapousiè. Li Lik 8:1 épi diskité sé kèsion-tala :
Ès Jézi préché sèlman ba moun ki té ka vini kouté’y ?
Ki éfò Jézi fè pou alé jwenn moun ?
Bondié té prédi Mési-a té ké anonsé an bon nouvèl. Li Izayi 61:1, 2 épi diskité sé kèsion-tala :
Koumanniè Jézi akonpli pwofési-tala ?
Ès ou ka pansé jòdi-a tou ni moun ki bizwen tann bon nouvèl-tala ?
5. Jézi ansénié vérité ki enpòwtan
Jézi préché bon nouvèl wayòm Bondié-a épi i ansénié lison ki itil. Annou gadé dé-twa lègzanp ki sòti adan Diskou-a asou mòn-lan tout moun konnèt. Li Matié 6:14, 34 épi 7:12, épi diskité sé kèsion-tala :
Ki konsèy itil Jézi ka ba adan sé vèsé-tala ?
Ès zòt ka pansé sé konsèy-tala toujou itil ?
6. Jézi fè mirak
Jéova ba Jézi pouvwa fè anpil mirak. Annou pran an ègzanp : li Mak 5:25-34 ouben gadé VIDÉWO-a. Apré diskité sé kèsion-an ka vini an.
Ki lasirans madanm-lan ki té malad la té ni ?
Poutji mirak-tala èstwòdinè ba’w ?
Li Jan 5:36 épi diskité kèsion-tala :
Di kisa mirak Jézi ka « témwayé » ?
Ès ou té sav sa ?
Près tousa nou sav asou Jézi nou pran’y adan sé 4 liv Labib-la nou ka kriyé Lézévanjil : Matié, Mak, Lik épi Jan. Yo chak la ni divès enfòmasion asou Jézi. Tout sé enfòmasion-tala ka ba nou an bèl pòtré lavi Jézi.
MATIÉ
ékri Évanjil-li an prèmié. I ka palé anpil sa Jézi ansénié, èspésialman sa i di anlè wayòm Bondié.
MAK
ékri Lévanjil-la ki pli kout. I ka rakonté an patjé lévènman épi anpil aksion.
LIK
ka mété douvan lapriyè é manniè Jézi té janti épi fanm.
JAN
ka rakonté pliziè konvèsasion Jézi té ni épi bon zanmi’y ouben dòt moun. Gras a sa, nou ka aprann plis asou manniè Jézi té yé.
NI MOUN KA DI : « Jézi sé Bondié Tou-Puisan. »
Sa’w ka di di sa ?
SA’W APRANN
Jézi préché wayòm Bondié, i fè mirak, é i obéyi Jéova tout lè.
An ti viré gadé
Ki aktivité prensipal Jézi té ni lè i té anlè latè ?
Kisa mirak Jézi ka aprann nou ?
Jézi ansénié pliziè lison ki itil. Kilès ?
TIBREN PLIS ANKÒ
Di kisa Jézi té ka yenki palé ?
« Le Royaume de Dieu : son importance pour Jésus » (La Tour de Garde, 1ié òktòb 2014)
Yonn-dé prèv mirak Jézi fèt poubon.
« Les miracles de Jésus : que vous enseignent-ils ? » (La Tour de Garde, 15 juiyé 2004)
An misié chanjé lè i wè manniè Jézi té ka pasé tan’y ka otjipé di lézòt.
« Je ne vivais que pour moi » (La Tour de Garde, 1ié òktòb 2014)
Moman enpòwtan adan ministè Jézi adan lòd-la yo rivé a.
a Lison 31 a 33 ka ba plis détay asou wayòm Bondié.