Adan Labib-la, mésaj-la ki pli enpòwtan sé wayòm Bondié. Jéova kéy sèvi wayòm-tala pou réyalizé pwojé-a i té ni, lè i kréyé latè. Wayòm-lan sé kisa ? Koumanniè nou sav i ka dirijé jòdi-a ? Kisa i ja fè ? É kisa i kéy fè dèmen ? Lison 31, 32 épi 33 ké réponn sé kèsion-tala.

1. Wayòm Bondié sé kisa, é ki moun ka dirijé’y ?

Wayòm Bondié sé an gouvènman Jéova établi. Sé Jézikri ki wa Wayòm-tala, é i ka gouvèné dépi sièl-la (Matié 4:17 ; Jan 18:36). Labib-la ka di ki Jézi « kèy wa [...] pou tout tan » (Lik 1:32, 33). Pas i Wa wayòm Bondié i ké dirijé tout moun anlè latè.

2. Ki moun ka dirijé épi Jézi ?

Jézi sé pa sèl dirijan Wayòm-lan ni. Labib ka di « moun tout tribi, lang, pèp, épi nasion [...] pou vini wa pou dirijé latè » (Révélasion 5:9, 10). Konben moun kéy dirijé épi Kris ? Dépi Jézi vini anlè latè, i ni milion moun ki vini disip-li. Men sé pa yo tout ki ké alé an sièl pou dirijé épi’y. I ni sèlman 144 000 moun ki ké gouvèné épi Jézi (li Révélasion 14:1-4). Tout sé lézòt krétjen-an kéy viv anlè latè anba dominasion Wayòm-lan (Sòm 37:29).

3. Poutji wayòm Bondié pli bon pasé gouvènman lézòm ?

Menm lè yo lé fè bon bagay, sé dirijan-an pa ni pouvwa fè tousa yo lé. Épi an jou, dòt dirijan ka pran plas-yo. Délè, sé moun ki pa ni bon lentansion ki ka ranplasé yo. Men wa wayòm Bondié-a, li, pé kéy janmen ranplasé. Pas, Bondié établi « an wayòm ki pé kèy janmen disparèt » (Danièl 2:44). Anplis, Jézi ké ni pouvwa anlè tout latè, é i pé kéy fè piès préférans. Sé an wa ki plen lanmou, ki bon épi ki jis. Épi, i kéy aprann lézòm ni menm kalité épi’y : lanmou, labonté épi lajistis (li Izayi 11:9).

4. An gouvènman puisan ki kéy dirijé anlè tout latè

Jézikri, sé wa-a ki ni plis pouvwa latè pòté. Li Matié 28:18 épi diskité kèsion-tala :

• Ki diférans ki ni ant pouvwa Jézi ni é ta moun ki ka dirijé lézòm ?

Gouvènman lézòm ka chanjé tout lè, é yo chak sé an pati sèlman an monn-lan yo ka dirijé. É wayòm Bondié-a ? Li Danièl 7:14 épi diskité sé kèsion-tala :

• Dominasion wayòm Bondié « pé ké jen bout ». Poutji sé an bon bagay ?

• Wayòm Bondié-a kèy dirijé tout latè. Poutji sé an bon bagay ?

5. Gouvènman lézòm pé pa rézoud pwoblèm-nou

Poutji fòk wayòm Bondié pran plas gouvènman lézòm ? Gadé VIDÉWO-a épi diskité kèsion-an ka vini an.

VIDÉWO : Wayòm Bondié sé kisa ? (mòso) (1:41)

• Poutji nou pé di gouvènman lézòm pa ba lézòm satisfaksion ?

Li Éklézias 8:9 épi diskité kèsion-tala :

• Dapré’w, poutji sa nésésè wayòm Bondié ranplasé gouvènman lézòm ?

6. Dirijan ki ka konprann nou

Jézi, Wa-nou an, vini an nonm ki viv asou latè, kifè i kapab « konprann féblès-nou » (Ébré 4:15). Kantapou sé 144 000 moun-lan, Jéova chwazi pou rénié épi Jézi, sé dé nonm épi dé fanm ki sòti « tout tribi, lang, pèp, épi nasion » (Révélasion 5:9).

• Jézi épi sé 144 000 moun-lan ki ka rénié épi’y pé konprann pwoblèm-ou épi sa ou ka risanti. Ès sa ka fè’w dibien sav sa ? Poutji ?

7. Lwa wayòm Bondié pli bon pasé ta lézòm

Sé gouvènman-an ka mété lwa pou pwotéjé sitwayen péyi-yo. Wayòm Bondié tou ni lwa sijé’y pou rèspèkté. Li 1 Korentjen 6:9-11 épi diskité sé kèsion-tala :

• Dapré’w, lè tout moun kéy suiv lwa Bondiéa ki manniè monn-lan kèy yé ?

• Dapré’w, ès sa rézonnab Jéova mandé moun ki lé viv anba Wayòm-li rèspèkté sé règ-tala ? Poutji ?

• Kisa ka pèwmèt nou di moun ki ka suiv sé règ-tala pé chanjé ? (gadé vèsé 11-lan).

SA’W APRANN

Wayòm Bondié sé an gouvènman réyèl ki o sièl. Talè, i kèy dirijé tout latè.

An ti viré gadé

• Ki moun ki ka dirijé wayòm Bondié ?

• Poutji wayòm Bondié pli bon pasé tout gouvènman lézom ?

• Jéova ka mandé sitwayen Wayòm-lan rèspèkté divès règ. Ès ou pé ba yonn-dé ?

TIBREN PLIS ANKÒ

Ès Jézi ansénié Wayòm-lan andidan chak moun ?

« Ès wayòm Bondié adan tjè’w ? » (awtik jw.org)

Kisa sé Témwen Jéova-a paré fè pou montré fidélité-yo ba wayòm Bondié ?

Fidèlement attachés au Royaume (1:43)

Sa Labib-la ka di anlè sé 144 000 moun-lan Jéova chwézi pou rénié épi Jézi.

« Ki moun ki kèy o sièl ? » (awtik jw.org)

Kisa ki ba an madanm lasirans sé Bondié sèlman ki pé mété lajistis anlè latè.

« J’ai découvert la solution à l’injustice » (Réveillez-vous !, novanm 2011)

Wayòm Bondié koumansé gouvèné an sièl-la an 1914. Sé a moman-tala tou, lé dènié jou dominasion lézòm koumansé. Ki manniè nou sav sa ? Mi dé bagay ka pèwmèt nou di sa : sé pwofési Labib-la épi sa nou ka wè an monn-lan dépi 1914. Annou dékatiyé sé ti lidé-tala.

1. Kisa Labib-la té anonsé ?

Liv Daniel-la té ka di wayòm Bondié-a té ké koumansé gouvèné, lè an lépòk ki té pou diré « sèt tan » té ké fini (Danièl 4:16, 17). Sièk-tan apré sa, Jézi kriyé menm lépòk-tala « tan-an yo ba sé nasion-an », é i di, i pòkò té bout (Lik 21:24). É kon nou ké wè, sé sèt tan-tala bout an 1914.

2. Kisa nou ka wè ka fèt adan monn-lan dépi lanné 1914 ?

Disip Jézi mandé’y : « Ki tan sé bagay-tala ké fèt, é ki sin ké montré prézans-ou èk lafen monn-lan la ? » (Matié 24:3). Jézi di yo konsa, lè i té kèy vini Wa wayòm Bondié, té kèy ni anpil bagay ki té kèy fèt asou latè. Kontèl ladjè, lafanmin, épi tranmanntè (li Matié 24:7). Labib-la té ka di osi, adan sé « dènié jou-a », manniè-a sé moun-lan té kèy konpòwté kòyo, té ké rann lavi-a ‘rèd pou sipòté’ (2 Timoté 3:1-5). Sé sa nou ka wè, èspésialman dépi lanné 1914.

3. Poutji monn-lan an léta-tala dépi wayòm Bondié enstalé ?

Lamenm apré i vini Wa Wayòm-lan, Jézi pété an ladjè épi Satan é sé démon’y lan an sièl-la. Satan pèd ladjè-tala. Labib-la ka di « yo jété’y anlè latè, ki li, ki zanj-li » (Révélasion 12:9, 10, 12). Satan sav bien i kèy détwi. Sé pou sa i anrajé toubannman épi i ka simen anlo malè épi soufwans toupatou asou latè. Sa ka endé nou konprann poutji monn-lan an bétiz konsa ! Wayòm Bondié kèy rézoud tout sé pwoblèm-tala.

ANNOU PLI LWEN

4. Katjil-la ki ka pèwmèt nou touvé 1914

VIDÉWO : Wayòm Bondié koumansé gouvèné lanné 1914 (5:02)

Ni an patjé tan, Bondié vréyé an rèv ba Nabikodonozò, wa Babilòn. Rèv-tala épi sinifikasion-an Danièl ba asou’y ka konsèné wayòm Nabikodonozò épi wayòm Bondié toua (li Danièl 4:17).

Li Danièl 4:20-26 épi sèvi tablo-a pou réponn sé kèsion-an ka vini an :

• A) Kisa Nabikodonozò wè adan rèv-la ? (gadé vèsé 20 épi 21).

• B) Kisa ka rivé piébwa-a ? (gadé vèsé 23-a).

• C) Kisa ka fèt lè ‘sèt tan-an’ fini ? (gadé vèsé 26-la).

Liannaj-la ki ni ant piébwa rèv-la épi wayòm Bondié-a

PWOFÉSI-A (Danièl 4:20-36)

Renn-lan ka alé

A) An kalté bidim piébwa

Renn-lan sispann

B) « Jété piébwa-a atè [...] jiktan sèt tan pasé asou’y »

Renn-lan viré doubout

C) « Yo ké viré ba’w wayòm-ou »

Lè pwofési-a réyalizé pou prèmié fwa...

• D) Ki moun piébwa-a té ka riprézanté ? (gadé vèsé 22-a).

• E) Ki manniè renn-li sispann ? (li Danièl 4:29-33).

• F) Kisa ki rivé Nabikodonozò lè ‘sèt tan-an’ fini ? (li Danièl 4:34-36).

PRÈMIÉ RÉYALIZASION

Renn-lan ka alé

D) Nabikodonozò, wa Babilòn

Renn-lan sispann

E) Apré 606 avan Jézikri, Nabikodonozò ka pèd tèt-li é pandan 7 lanné i pé pa gouvèné ankò

Renn-lan viré doubout

F) Nabikodonozò djéri épi i ka rikoumansé gouvèné

Lè pwofési-a réyalizé dézièm fwa-a...

• G) Ki moun piébwa-a ka riprézanté ? (li 1 Kwonik 29:23).

• H) Koumanniè renn-tala sispann ? Koumanniè nou sav renn-tala pòkò té rikoumansé lè Jézi té anlè latè ? (li Lik 21:24).

• I) Ki koté é ki tan renn-tala rikoumansé ?

DÉZIÈM RÉYALIZASION

Renn-lan ka alé

G) Wa izrayélit ki ka riprézanté renn Bondié

Renn-lan sispann

H) Jérizalèm krazé, piès wa izrayélit pa ka rénié pandan 2 520 lanné

Renn-lan viré doubout

I) Adan sièl-la, Jézi ka divini Wa wayòm Bondié

5. Dépi 1914 monn-lan chanjé

Gadé VIDÉWO-a.

VIDÉWO : Dépi 1914 monn-lan chanjé (1:10)

Jézi di ki manniè monn-lan té kèy yé lè i té kèy Wa. Li Lik 21:9-11 épi diskité kèsion-tala :

• Adan tousa ou fini li a, kisa ou ka wè ka fèt jòdi ?

Lapòt Pòl té di koumanniè sé moun-lan té kèy yé adan sé dènié jou-a. Li 2 Timoté 3:1-5 épi diskité kèsion-tala :

• Ès ou ka wè moun konsa jòdi-a ?

6. Montré ou ka kwè wayòm Bondié-a ka dirijé alè la

Li Matié 24:3, 14 épi diskité sé kèsion-tala :

• Ki travay enpòwtan ka montré wayòm Bondié-a ja koumansé gouvèné ?

• Ki manniè ou pé partisipé adan travay-tala ?

Wayòm Bondié-a ja koumansé gouvèné, é talè, i kay gouvèné latè. Li Ébré 10:24, 25 épi diskité kèsion-tala :

• Anmizi-anmizi nou wè « jou-a tou pré rivé », kisa nou chak la dwé fè ?

SA’W APRANN

Sé pwofési-a ki adan Labib épi sa ka pasé adan monn-lan ka montré wayòm Bondié-a ja ka gouvèné. Nou ka montré nou ka kwè sa, lè nou ka préché épi lè nou ka alé réyinion.

An ti viré gadé

• Pwofési Danièl ka palé di sèt tan. Kisa ki fèt lè yo bout ?

• Poutji ou asiré wayòm Bondié-a koumansé gouvèné an 1914 ?

• Ki manniè ou pé montré ou ka kwè Wayòm-lan ka dirijé dépi atjèlman ?

TIBREN PLIS ANKÒ

Gadé kisa istowyen épi èspésialis di anlè chanjman ki fèt adan monn-lan dépi 1914.

« Depuis quand ce déclin brutal ? » (Réveillez-vous !, avril 2007)

Gadé ki manniè pwofési Matié 24:14 chanjé lavi an misié.

« J’aimais le baseball plus que tout au monde ! » (La Tour de Garde n^o 3 2017)

Ki manniè nou sav pwofési Danièl chapit 4 ka konsèné wayòm Bondié ?

« Quand le Royaume de Dieu a-t-il commencé à régner ? (1^re partie) » (La Tour de Garde, 1^ié òktòb 2014)

Kisa ka montré sé ‘sèt tan-an’ Danièl chapit 4 ka palé bout an 1914 ?

« Quand le Royaume de Dieu a-t-il commencé à régner ? (2^e partie) » (La Tour de Garde, 1^ié novanm 2014)

Wayòm Bondié enstalé an sièl-la. Talè, i kay chanjé an patjé bagay anlè latè. Annou wè ki bon bagay i kèy fè.

1. Ki manniè wayòm Bondié-a kèy viré mété lapé épi lajistis anlè latè ?

Jézi, Wa wayòm Bondié, ké détwi sé moun méchan-an épi sé gouvènman-an pandan ladjè Armagédon (Révélasion 16:14, 16). A moman-tala, pwonmès Labib-tala kèy vini réyalité : « Adan an ti moman, pé ké ni méchan ankò » (Sòm 37:10). Gras a Wayòm-lan, Jézi kay plen latè épi lapé èk lajistis (li Izayi 11:4).

2. Koumanniè lavi-a kay yé lè volonté Bondié kèy fèt anlè latè ?

Lè wayòm Bondié kéy dirijé latè, « moun ki jis, latè kay ta yo épi yo kay viv anlè’y pou tout tan » (Sòm 37:29). Imajinen sa ! Tout moun kay bon ; tout moun kay enmen Jéova é enmen lézòt. Pé kéy ni moun malad ankò, é nou kéy ni an bèl lavi pou toujou.

3. Apré dèstriksion sé méchan-an, kisa wayòm Bondié-a kèy fè ?

Apré dèstriksion sé méchan-an, Jézi kéy gouvèné pandan 1 000 lanné ankò. Pandan tout tan-tala, épi sé 144 000 moun-lan ki ké dirijé épi’y, Jézi kéy endé lézòm vini pawfé. Lè sé 1 000 lanné-tala kèy bout, latè kèy an bèl paradi plen épi moun biennéré pas yo ka obéyi lwa Jéova. Alò, Jézi kay rimèt Papa’y Wayòm-lan, é ‘non Jéova kèy vini sen’ kon sa pa janmen fèt avan (Matié 6:9, 10). A moman-tala, tout moun kay wè Jéova sé an bon dirijan ki ka pran swen tout moun ki ka sèvi’y. Apré sa, Jéova kèy détwi Satan, sé démon-an épi tout sé moun-lan ki chwazi ribélé kont dominasion’y (Révélasion 20:7-10). Tout bon bagay wayòm Bondié-a ké fè kay diré pou tout tan.

ANNOU PLI LWEN

4. Wayòm Bondié-a kèy fè gouvènman lézòm disparèt

« Nonm ka dominé asou nonm, pou fè yo soufè » (Éklézias 8:9). Gras a wayòm-li, Jéova kèy réglé lenjistis-tala.

Li Danièl 2:44 épi 2 Tésalonisien 1:6-8, épi diskité sé kèsion-tala :

• Kisa Jéova épi Jézi kèy fè sé gouvènman-an épi sé moun-lan ki ka soutjenn yo ?

• Silon sa ou aprann anlè Jéova épi Jézi, poutji ou asiré yo kèy aji épi jistis ?

5. Jézi sé pli bon wa ki ni

Jézi, Wa wayòm Bondié-a kèy pòté anpil bienfé ba moun ki kay viv anba dominasion’y anlè latè. Gadé VIDÉWO-a pou wè koumanniè Jézi ja montré i anvi endé sé moun-lan, épi osi manniè Bondié ba’y pouvwa fè sa.

VIDÉWO : Jézi montré sa Wayòm-lan kèy fè (1:13)

Lè i té anlè latè, Jézi ba an ti lidé asou sa Wayòm-lan kèy fè. Adan sé bénédision-tala, kilès ou pli présé wè ? Pou chak bénédision, li sé vèsé-a yo ka pwopozé’w.

6. Wayòm Bondié kèy ba nou an bèl lavni

VIDÉWO : An kout zié anlè bèl lavi-a ki ka atann nou (4:38)

Li Sòm 145:16 épi diskité kèsion-tala :

• Jéova kay ba « tout kréyati ki vivan [...] tousa yo anvi ». Kisa sa ka fè’w sav sa ?

SA’W APRANN

Wayòm Bondié ké atenn òbjèktif-li. I kèy fè latè-a vini an paradi éti sèvitè Jéova kèy viv pou toujou.

An ti viré gadé

• Koumanniè wayòm Bondié kèy rann non Jéova sen ?

• Poutji nou asiré wayòm Bondié kèy réyalizé pwonmès Labib-la ?

• Adan tousa Wayòm-lan kèy fè, kisa ou présé wè toubannman ?

TIBREN PLIS ANKÒ

Armagédon, kisa sa yé ?

« Ladjè Armagédon sé kisa ? » (awtik jw.org)

Gadé sa ki kèy fèt pandan périòd-la Jézi kriyé « gran tribilasion-an » (Matié 24:21).

« Qu’est-ce que la grande tribulation ? » (awtik jw.org)

An fanmi ka imajinen ki manniè lavi-yo kèy yé adan paradi-a.

Wè kòw adan Paradi-a (1:50)

Adan awtik-la « J’étais tourmenté par de nombreuses questions », an ansien militan politik ka èsplitjé koté i touvé répons kèsion i té ka pozé kòy.

« La Bible transforme des vies » (La Tour de Garde, 1^ié janvié 2012)