Kon Jézi, annou préché épi balan

1. Palé di an bagay ka montré ki sèvitè Jéova bien diféran di sé lézòt moun-lan ki ka di yo krétjen.

SÈVITÈ Jéova ka préché bon nouvèl-la épi tout tjè-yo é yo ka travay rèd pou fè sa (Tit 2:14). Kifè, yo bien diféran di sé lézòt moun-lan ki ka di yo krétjen. Men ès sa rèd ba’w kontinié préché épi balan ? An ansien ka travay rèd di konsa : « Délè, man pa anvi préché. » Ès wou osi, délè, ou pa anvi préché ?

2. Kisa ki pé fè nou ni mwens balan lè nou ka préché ?

² Pétèt nou simié fè dòt bagay adan sèvis Jéova-a pito ki préché. Poutji ? Pas lè nou ka konstwi épi antritni sal di Wayòm, partisipé adan opérasion soukou ouben ankourajé frè èk sè-nou, nou ka wè rézilta-a lamenm, é nou ka santi nou itil. An plis di sa, nou tout ka travay adan lapé épi lanmou, é nou sav sé frè é sè-a enmen sa nou ka fè ba yo. Pa an lòt koté, pétèt nou ka préché dépi nanni-nannan adan menm téritwè-a, san nou trapé anlo rézilta. Ouben pétèt i ni moun ki pa ka kouté nou. Épi nou sav, pli nou ka pwoché lafen monn-tala, pli nou ké jwenn lopozision (Mat. 10:22). Kisa ki ké endé nou toujou ni balan épi bay bwa pou préché ankò plis ?

3. Kisa lègzanp-lan nou ka touvé adan Lik 13:6-9 ka aprann nou anlè Jézi ?

³ Jézi sé té an bèl lègzanp moun ki té ni balan. Kisa i ka aprann nou ? Lè i té ka préché, Jézi té toujou ni bon balan. Avrédi, pli tan-an té ka pasé, é pli i té ni difé adan prédikasion’y (li Lik 13:6-9). Jézi fè kon kiltivatè-a ki adan lègzanp-lan. Pandan twazan, i otjipé di an pié fig-fwans ki pa té ka pòté. Pou vré, pandan oliwon twazan, Jézi préché ba sé Juif-la menmsi près yo tout la pa té ka djè kouté mésaj-li. Toukon kiltivatè-a pa pèd lèspwa pié fig-fwans lan té ké pòté fwi, Jézi pa sispann préché ba sé moun-lan, ni menm moli adan prédikasion’y. Okontrè, i mété kòy ankò plis an travay pou touché tjè sé moun-lan.

4. Kisa nou ké wè adan awtik-tala ?

⁴ Adan awtik-tala, nou ké wè balan Jézi té ni lè i té ka préché, èspésialman pandan sé 6 dènié mwa-a i fè anlè latè (gadé adan Bib-la ki fèt pou étidié an fwansé, nòt lètid-la « après cela » adan Lik 10:1). Nou ké wè 4 bagay ki té ka ba’y balan : 1) fè volonté Jéova té toujou an lèspri’y, 2) i té véyatif parapòt a sé pwofési-a, 3) i té ka apiyé anlè Jéova, é 4) i té ka rété pozitif pas i té toujou ni lèspwa ki yonn-dé moun té ké kouté’y. Si nou ka katjilé asou lansèyman’y, é si nou ka imité’y, nou osi nou ké gadé balan-nou.

VOLONTÉ JÉOVA TÉ TOUJOU AN LÈSPRI’Y

5. Koumanniè Jézi montré ki sa ki té pli enpòtan ba’y, sé fè volonté Jéova ?

⁵ Jézi préché ‘bon nouvèl Wayòm-lan’ épi balan, pas i té sav sé pou sa Jéova té vréyé’y asou latè (Lik 4:43). I toujou té ka mété prédikasion-an douvan-douvan. Pandan sé dènié mwa ministè’y la, i kontinié vwayajé « an vil apré lòt, épi an vilaj apré lòt » pou ansénié sé moun-lan (Lik 13:22). An lòt bagay i fè, i fòwmé ankò plis disip pou yo préché bon nouvèl-la menm manniè ki’y (Lik 10:1).

6. Menmsi nou pé partisipé adan pliziè aktivité, ki manniè Jéova lé nou wè prédikasion-an ? (gadé zimaj-la osi).

⁶ Jòdi-a tou, Jéova épi Jézi lé nou ba prédikasion-an prèmié plas-la (Mat. 24:14 ; 28:19, 20). Prédikasion-an lianné épi tout sé lézòt aktivité-a. Pa ègzanp, nou ka konstwi sal di Wayòm, pou sé moun-lan adan téritwè-a pé sa vini adoré Jéova. Travay-la nou ka fè osi adan sé Bétèl-la, ouben dòt koté ankò, ka soutienn travay prédikasion-an. É lè nou ka òwganizé opérasion soukou, sé pa sèlman pou endé frè é sè-nou, men sé pou pèwmèt yo ripran aktivité èspiritièl yo, kontèl laprédikasion. Si nou pran konsians ki préché enpòtan, é si nou ka gadé an lèspri-nou ki Jéova lé nou ba’y prèmié plas-la, nou ké préché régilièrman. An rapò épi sa, János, an ansien Lawongri ka di : « Man toujou ka sonjé ki travay prédikasion-an sé aktivité prensipal nou. Piès dòt aktivité èspiritièl pé pa ranplasé’y. »

7. Poutji Jéova lé nou kontinié préché ? (1 Timoté 2:3, 4).

⁷ Nou ké ni plis balan pou préché, si nou ka wè sé moun-lan kon Jéova ka wè yo. I lé an maksimòm moun tann bon nouvèl-la épi asèpté’y (li 1 Timoté 2:3, 4). Sé pou sa, Jéova ka endé nou vini pli filé pou palé ba sé moun-lan adan ministè-a, pas mésaj-tala ka sové lavi moun. Pa ègzanp, bwochi-a Fè disip épi lanmou ka ba nou konsèy ki itil pou endé nou koumansé ti-kozé épi létid biblik. Menmsi jòdi-a, yonn-dé moun pa paré sèvi Jéova, yo pé chanjé lidé avan lafen gran tribilasion-an. Plita, yo ké pétèt sonjé sa nou té di yo, épi yo ké lé sèvi Jéova. Men sa pé fèt sèlman si nou ka kontinié préché.

I TÉ KA KITÉ SÉ PWOFÉSI-A AJI ADAN LAVI’Y

8. Ki lenfliyans sé pwofési-a té ni anlè manniè Jézi désidé sèvi tan’y ?

⁸ Jézi té sav ki manniè sé pwofési-a té ké réyalizé. Pa ègzanp, i té sav i té pou préché twazan é dimi sèlman, i té sav ki tan i té ké mò, é ki modèl lanmò i té ké sibi (Dan. 9:26, 27 ; Lik 18:31-34). Pas i té sav kisa ki té ké fèt, Jézi sèvi tan’y méyè manniè ki ni. Sa endé’y préché épi balan épi akonpli mision-an Jéova té ba’y la.

9. Poutji sé pwofési Labib-la ka endé nou préché épi balan ?

⁹ Si nou ka médité asou sé pwofési Labib-la, nou osi, sa ké endé nou préché épi balan. Nou sav monn-tala ké disparèt talè. Nou ka wè adan dé zié-nou ki sa ki ka pasé adan monn-lan épi konpòwtasion sé moun-lan, ka korèsponn épi sa Labib té di asou sé dènié jou-a. Nou konprann ki puisans Langlitè-Lézétazini ka goumen anba-fèy kont Larisi épi péyi ki lianné épi’y. Sa ka réyalizé pwofési-a ant wa li-Nò épi wa li-Sid « an tan lafen » (Dan. 11:40). É nou konprann ki puisans Langlitè-Lézétazini, sé sé pié èstati-a ki adan Danièl 2:43-45. Kifè, nou asiré sèten ki adan an ti moman, Wayòm Bondié-a ké détwi tout gouvènman lézòm, kon nou wè’y adan pwofési-tala. Sé pwofési-a ka montré nou toupré lafen. Kidonk, fòk nou sèvi tan-nou méyè manniè ki ni pou préché bon nouvèl-la.

10. Pou ki rézon ankò sé pwofési-a ka ankourajé nou préché ?

¹⁰ Anplis di sa, adan sé pwofési-a, i ni an bèl mésaj nou anvi partajé épi dòt moun. Carrie, an sè ka préché pa koté Répiblik Dominitjèn, ka èsplitjé : « Lè man ka réfléchi asou sé bèl pwonmès-la Jéova fè nou pou dèmen, sa ka ba mwen anvi di lézòt sa. » I ka di ankò : « Lè man ka wè pwoblèm sé moun-lan ka jwenn jòdi-a, man ka konstaté ki sé pwonmès-tala, sé pa ba mwen tou sèl, men sé ba yo tou. » Sé pwofési-a ka montré ki Jéova ka soutienn prédikasion-nou, é sa ka ankourajé nou pa moli an may. Leila, ki ka viv Lawongri, di parapòt a sa : « Izayi 11:6-9 ka montré ki tout moun pé chanjé gras a Jéova. Sa ka ba mwen fòs pou préché bon nouvèl-la ba tout moun, menm si i ni moun ka ba mwen lenprésion yo pé ké kouté mwen. » Christopher, an frè Zanbi, ka di kantapou li : « Kon Mak 13:10 té prédi, bon nouvèl-la ka simayé asou tout latè, é ba mwen, sé an lonnè fè pa ta mwen adan réyalizasion pwofési-tala. » É wou, ki pwofési ka ba’w balan pou kontinié préché ?

I TÉ KA APIYÉ ASOU JÉOVA

11. Poutji Jézi té pou apiyé anlè Jéova lè i té ka préché ? (Lik 12:49, 53).

¹¹ Jézi té ka apiyé asou Jéova pou kontinié préché épi balan. I té ka prangad pou pa fwasé pèsonn, men i té sav mésaj bon nouvèl-la té ké mennen gwo polémik épi an gwo lopozision (li Lik 12:49, 53). Dayè, sé pou sa, pliziè fwa, sé chèf rilijié-a éséyé tjwé’y (Jan 8:59 ; 10:31, 39). Men i kontinié préché, pas i té sav Jéova té ka ba’y fòs-la. I di konsa : « Man pa tou sèl, pas Papa-a ki vréyé mwen épi mwen. […] I pa kité mwen tou sèl, pas man toujou ka fè bagay ki ka fè’y plézi » (Jan 8:16, 29).

12. Ki manniè Jézi préparé sé disip-li a pou yo pa sispann préché, menm lè yo té ké jwenn lopozision ?

¹² Jézi fè sé disip-li a sonjé ki yo té pé apiyé asou Jéova. I pa sispann di yo pliziè fwa, ki Bondié-yo té ké épi yo, lè yo té ké pèsékité (Mat. 10:18-20 ; Lik 12:11, 12). Men i di yo an menm tan, fòk yo té ké prangad (Mat. 10:16 ; Lik 10:3). I èsplitjé yo ki yo pa té pou oblijé moun ki pa té lé kouté asèpté mésaj-la (Lik 10:10, 11) É i di yo, lè yo té ké pèsékité yo, fòk yo té ké chapé-kouri (Mat. 10:23). Menmsi i té ni balan pou préché, épi i té ni konfians an Jéova, Jézi li menm pa té ka mété lavi’y an danjé initilman (Jan 11:53, 54).

13. Poutji ou pé ni lasirans ki Jéova ké soutienn ou ?

¹³ Jòdi-a osi, nou bizwen Jéova soutienn nou pou kontinié préché épi balan magré lopozision (Rév. 12:17). Poutji ou pé asiré ki Jéova ké soutienn ou ? Sonjé lapriyè-a Jézi fè an Jan chapit 17. Jézi mandé Jéova jété an zié asou sé apòt-la, é Jéova fè sa i mandé’y. É sa vré, liv Akt-la ka èsplitjé koumanniè Jéova endé sé apòt-la préché épi balan, magré lapèsékision. Adan lapriyè-tala, i mandé Papa’y an lòt bagay ankò. I mandé’y jété zié anlè sé moun-lan ki té ké ni lafwa adan mésaj sé apòt-la. É ou pami sé moun-tala. É avrédi, jik jòdi, Jéova ka kontinié réponn lapriyè-tala Jézi té fè. Kidonk, i ké endé’w menm manniè i endé sé apòt-la (Jan 17:11, 15, 20).

14. Ki manniè nou sav nou ké toujou ni lafòs préché épi balan ? (gadé zimaj-la osi).

¹⁴ Pli nou ka pwoché di lafen, pétèt sa ké vini pli rèd préché bon nouvèl-la épi balan. Men nou pé asiré nou ké ni pal-la nou ni bizwen (Lik 21:12-15). Kon Jézi é sé disip-li a, annou kité sé moun-lan chwézi kouté ouben pa kouté, épi annou pa rantré adan piès déba initil. Menm adan sé péyi-a éti yo ka entèwdi nou préché kon nou lé, sé frè é sè-nou an ka rivé préché bon nouvèl-la pas yo ka apiyé asou Jéova, é pa asou pwòp fòs-yo. Kon i fè épi sé prèmié krétjen-an, Jéova ka ba sèvitè’y lafòs « pou prédikasion-an akonpli toutafètman », é sa, kon i lé (2 Tim. 4:17). Kidonk, ou pé asiré, si ou ka apiyé asou Jéova, ou ké pé kontinié préché épi balan.

I TÉ KA RÉTÉ POZITIF

15. Kisa ka montré Jézi té toujou pozitif lè i té ka préché ?

¹⁵ Jézi té toujou pozitif lè i té ka préché. Sa té ka endé’y gadé lajwa’y épi kontinié travay rèd adan prédikasion-an. Pa koté lafen lanné 30 apré Jézikri pa ègzanp, Jézi koumansé préché. I wè ki anlo moun té paré asèpté mésaj-la, é i konparé yo épi an chan ki paré pou larékòlt (Jan 4:35). Apipré an lanné plita, Jézi di sé disip-li a : « Rékòlt-la gran » (Mat. 9:37, 38). É plita ankò, i di yo : « Rékòlt-la gran […]. Kidonk, priyé Mèt rékòlt-la pou vréyé ouvriyé adan rékòlt-li a » (Lik 10:2). Jézi té asiré i té ké ni moun ki té ké kouté bon nouvèl-la, é i té kontan lè moun té ka asèpté lavérité (Lik 10:21).

16. Ki ègzanp Jézi sèvi pou ankourajé sé disip-li a wè prédikasion-an an manniè pozitif ? (Lik 13:18-21 ; gadé zimaj-la osi).

¹⁶ Pou endé sé disip-li a toujou ni balan, Jézi fè yo sonjé ki mésaj-la yo ka préché ka pòté rézilta ki bèl toubonnman. Koumanniè i fè sa ? I sèvi 2 ègzanp (li Lik 13:18-21). Pou koumansé, ègzanp grenn moutad-la té ka montré ki mésaj Wayòm-lan té ké simayé an manniè èstwòdinè é ki ayen ni pèsonn pa té ké pé anpéché sa. Apré, i palé di ègzanp lèvi-a. Ègzanp-tala té ka montré ki mésaj Wayòm-lan, té ké simayé an patjé koté anlè latè, é an plis di sa, anlo moun té ké kouté épi fè chanjman, menmsi nou pa té ké wè sé chanjman-tala lamenm. Gras a sé ègzanp-tala, Jézi endé sé disip-li a konprann ki mésaj-la yo té ka préché té ké endé an patjé moun.

17. Ki rézon nou ni di rété pozitif lè nou ka préché ?

¹⁷ Jòdi-jou, lè nou ka katjilé asou rézilta prédikasion-nou asou tout latè, sa ka ba nou fòs pou kontinié préché épi balan. Chak lanné, milion moun ka asisté Mémoriyal-la épi ka étidié Labib épi nou, pas mésaj-la ka entérésé yo. Pliziè milié pami yo ka désidé préché épi nou, épi ka pran batenm. Nou pa sav konben moun ankò ké kouté mésaj-la. Men sa nou sav, sé ki Jéova ké sanblé an gran foul-moun ki ké travèsé vivan gran tribilasion-an ki toupré rivé (Rév. 7:9, 14). Mèt rékòlt-la, Jéova, ni lasirans ki an patjé moun ankò ké asèpté bon nouvèl-la. Kidonk, annou kontinié préché !

18. Kisa nou lé sé moun-lan wè épi konprann ?

¹⁸ Sé disip Jézi-a toujou préché bon nouvèl-la épi balan. Pa ègzanp, sé apòt-la préché épi tèlman balan èk chalè, ki sé moun-lan ki té ka kouté yo, konprann yo « té épi Jézi » (Akt 4:13). Jòdi-a tou, nou lé préché bon nouvèl-la épi balan, pou sé moun-lan wè épi konprann ki nou osi, nou ka suiv lègzanp Jézi.