AWTIK POU ÉTIDIÉ 26
KANTIK 123 Nou soumi a latéokrasi
Épi limilité, annou asèpté nou pa sav tout bagay
« Konprann Tou-Puisan an, sa two fò ba nou » (JÒB 37:23).
MI SA NOU KÉ WÈ
Nou pé viv bien menmsi nou pa sav tout bagay. Pou nou rivé fè sa, fòk asèpté lidé-tala épi limilité, fè épi sa nou sav, épi mété konfians-nou an Jéova.
1. Ki kapasité Jéova ba nou é poutji ?
JÉOVA kréyé nou épi kapasité èstwòdinè. Nou kapab réfléchi, aprann nouvo bagay épi aji épi sajès. Poutji i ba nou sé kapasité-tala ? Pas i lé nou aprann konnèt li. É i lé nou apiyé asou Pawòl-li pou pran désizion ki saj lè nou ka sèvi’y. (Pwo. 2:1-5 ; Wom. 12:1).
2. a) Ki limit nou ni ? (Jòb 37:23, 24 ; gadé zimaj-la osi). b) Poutji sa enpòtan asèpté nou pa bizwen sav tout bagay ?
2 Menmsi Jéova kréyé nou épi kapasité aprann, i toujou ni anlo bagay nou pa sav (li Jòb 37:23, 24). Annou palé di Jòb. Jéova pozé Jòb anlo kèsion pou endé’y konprann i té ni anlo bagay i pa té konnèt. Kozé-a Jéova fè épi Jòb endé’y réyalizé i té bizwen plis limilité épi chanjé manniè wè’y (Jòb 42:3-6). Menm manniè-a, si épi limilité, nou ka asèpté nou pa sav tout bagay, sa ké bon ba nou. An limilité konsa ka endé nou fè Jéova konfians, pas nou sèten i ké toujou ba nou enfòwmasion nou vréman bizwen pou pran bon désizion (Pwo. 2:6).
Asèpté i ni bagay nou pa sav, bon ba nou, menm manniè sa té bon ba Jòb (gadé paragraf 2-a).
3. Di kisa nou kèy palé adan awtik-tala ?
3 Adan awtik-tala, nou ké palé di yonn-dé bagay nou pa sav, é nou ké wè poutji, lè nou pa konnèt sé bagay-tala, sa pé tèrbolizé lèspri-nou. Men nou ké wè osi, poutji sa méyè pa konnèt yo. Analiz-tala ké ba nou lasirans ki Jéova, « Moun-lan ki konnèt tout bagay », ka di nou tousa nou vréman bizwen sav (Jòb 37:16).
NOU PA SAV KI TAN LAFEN KÉ RIVÉ
4. Silon Matié 24:36, kisa nou pa sav ?
4 (Li Matié 24:36.) Nou pa sav ki tan lafen monn-tala ké rivé. Menm Jézi pa té konnèt « jou-tala èk lè-tala » lè i té anlè latèa. Plita, i èsplitjé sé apòt-li a, ki sé Jéova ki ni dwa désidé ki tan yonn-dé lévènman pou rivé, pas avrédi, tan-an ‘anba pwòp pouvwa’y [ouben : lotorité’y]’ (Akt 1:6, 7). Jéova ja désidé ki jou lafen monn-tala ké rivé, men nou piès la pa kapab di ki tan sa ké fèt.
5. Davwè nou pa sav ki tan lafen ké rivé, koumanniè nou pé pran sa ?
5 Parapòt a sa Jézi di, nou pa sav konben tan nou ké ni pou atann avan lafen rivé. Sa pé fè nou mantjé pasians, ouben dékourajé nou, sirtou si nou ka atann lafen monn-tala dépi nanni-nannan. Anplis, nou pé dékourajé osi, si moun adan lafanmi-nou, ouben dòt moun, ka mété nou alafèt pas lafen pòkò rivé (2 Piè 3:3, 4). Nou pé pansé tou, si Jéova té ba nou dat lafen-an, sa té ké pli fasil montré kònou pasian, é sipòté moun ka mété nou alafèt.
6. Poutji sé an bon bagay pa sav ki tan lafen ké rivé ?
6 Jéova chwézi pa fè nou sav ki tan lafen ké rivé. Kifè, sa ka ba nou posibilité montré nou ka sèvi’y pas nou enmen’y, épi montré’y nou ka fè’y konfians. Nou lé sèvi Jéova pou toujou. Nou pa lé sèvi’y épi an dat an tèt-nou. Olié nou rété ka katjilé yenki asou moman-an « jou Jéova-a » ké rivé, annou mété lèspri-nou asou tout bèl bagay jou-tala ké pòté. Sé konsa nou ké rann lanmou-nou ba Bondié pli fò, épi montré’y nou ka fè’y konfians (2 Piè 3:11, 12).
7. Kisa nou sav ?
7 Annou katjilé asou sa nou sav. Nou sav ki dépi 1914, nou ka viv sé dènié jou-a. Adan Pawòl-li, Jéova ba nou yonn-dé pwofési ka montré ki lanné-tala té ké potalan. Anplis di sa, i ba nou an patjé détay asou manniè monn-lan té ké tounen dépi lanné-tala. Konm nou ka wè réyalizasion sé pwofési-tala douvan zié-nou, nou asiré sèten ki « gran jou Jéova-a près rivé » (Sof. 1:14). Nou sav osi sa Jéova lé nou fè : i lé nou palé di « bon nouvèl Wayòm-lan » ba an maksimòm moun (Mat. 24:14). Nou ka préché bon nouvèl-la adan oliwon 240 péyi é adan plis ki 1 000 lang. Kidonk, nou pa bizwen konnèt « jou-tala èk lè-tala », pou préché épi balan pou sové lavi moun.
NOU PA SAV SA JÉOVA KÈY FÈ BA NOU
8. Kisa ti pawòl-tala « travay vré Bondié-a » lé di ? (Éklézias 11:5).
8 Nou pa ka toujou konprann « travay vré Bondié-a » (li Éklézias 11:5). Ti pawòl-tala ka palé di tousa Jéova ka mété an plas pou fè an bagay, ouben tousa Jéova ka pèwmèt ki rivé pou akonpli volonté’y. Nou pé pa sav ègzaktiman poutji Jéova ka pèwmèt an bagay rivé, ouben kisa i ké fè ba nou pou toulbon (Sòm 37:5). Labib ka konparé travay vré Bondié-a épi manniè an bébé ka grandi an vant manman’y. Menm sé siantifik-la pa ka konprann toutafètman koumanniè sa ka pasé. Menm manniè-a, nou pa ka konprann toutafètman manniè Jéova ka aji.
9. Lè nou pa sav ègzaktiman ki manniè Jéova ké endé nou, ki manniè sa pé aji anlè nou ?
9 Lè nou pa sav ègzaktiman manniè Jéova ké endé nou, nou pé fè dèyè lè nou ni désizion pou pran. Kifè, nou sé pé ézité fè sakrifis ki sé pé pèwmèt nou fè plis adan ministè-a, kontèl ni an lavi pli senp, ouben déménajé an koté éti ni bizwen plis pwoklamatè. Ouben nou sé pé pansé ki Jéova pa kontan nou lè nou ka sibi yonn-dé sitiyasion, kontèl : lè nou lé fè plis ba Jéova men nou pa ka rivé atenn òbjèktif-nou. Ouben nou ka bat rèd an prédikasion, men nou pa ka rivé ni létid Labib. Ouben ankò, lòwganizasion ba nou an mision èspésial, men nou ka jwenn bon bwa-koré.
10. Davwè Jéova pa ka di nou ègzaktiman koumanniè i ké aji, ki kalité sa ka fè nou travay ?
10 Difèt nou pa sav ègzaktiman ki manniè Jéova ka aji, sa ka ba nou lokazion travay kalité ki enpòwtan, kontèl limilité. Sa ka fè nou konprann osi, ki manniè wè épi manniè fè Jéova, lontan pli méyè ki ta nou (Iza. 55:8, 9). É anfen, sa ka aprann nou fè Jéova konfians zié fèmen épi apiyé anlè’y. Kidonk, lè nou ka trapé bon rézilta adan ministè-a, ouben nou ka rivé bout an mision adan sèvis-li, annou ba’y tout lonnè-a, pas sé gras a li nou rivé (Sòm 127:1 ; 1 Kor. 3:7). É si ayen pa ka maché kon nou té èspéré, fòk nou sonjé ki Jéova, li, ka jéré sitiyasion-an (Iza. 26:12). Annou fè ta nou é Jéova ké fè ta’y. Menmsi i pa ka fè mirak kon avan, nou asiré i ké djidé nou (Akt 16:6-10).
11. Ki bagay enpòwtan nou sav ?
11 Annou sonjé sa nou sav. Nou sav Jéova ka toujou aji épi lanmou, jistis épi sajès. Nou sav i ka aprésié anpil sa nou ka fè ba’y é ba sé frè é sè-a. Épi nou sav i ka toujou rékonpansé moun ki fidèl (Ébré 11:6).
NOU PA SAV KISA DÈMEN KÉ PÒTÉ
12. Silon Jak 4:13, 14, kisa nou pa sav ?
12 (Li Jak 4:13, 14.) Nou pa sav kisa ki ké rivé nou dèmen. Sé an vérité vré. Adan monn-tala, « léprèv épi sa yo pé pa prévwè » pé anni tonbé anlè nou (Ékl. 9:11). Kidonk, nou pé pa sav si nou ké réyalizé pwojé-nou, ouben menm, si nou ké viv asé lontan pou rivé an bout-yo.
13. Lè nou pa sav sa dèmen ké pòté ba nou, ki manniè sa pé aji anlè nou ?
13 Lè nou pa sav sa dèmen kèy pòté, sa pé tèrbolizé lèspri-nou. É sa pé menm fè nou pèd lajwa-nou. Pou vré, adan an bat-zié, sitiyasion ki danjéré pé anni tonbé anlè nou, é sa pé rann nou tris épi malmennen nou. É lè sa nou ka èspéré pa ka rivé, sa pé désivwè nou épi koupé jaré-nou (Pwo. 13:12).
14. Kisa nou bizwen fè épi sav pou ni vré bonè-a ? (gadé sé zimaj-la osi).
14 Lè nou ka tjenbé doubout, kisiswa difikilté nou ka jwenn, nou ka montré nou ka sèvi Jéova pas nou enmen’y, é pa pou trapé an bagay. Adan Labib, i ni pliziè listwa ka montré fòk pa nou atann Jéova tiré tout léprèv nou ké jwenn. Épi Jéova pa ka désidé alavans sa ki ké rivé adan lavi-nou. I sav nou pé ni vré bonè-a, menmsi nou pa sav kisa ki ké rivé nou. É pou trapé bonè-tala, fòk nou chèché konsèy-li épi obéyi’y (Jér. 10:23). Lè nou ka chèché sav sa i ka pansé avan nou pran an désizion, nou pé ké entjèt parapòt a sa ki pé rivé nou. Nou ké di, kon Jak : « Si Jéova lé, nou ké viv é nou ké fè sa oben sa » (Jak 4:15).
Chèché konsèy Jéova épi obéyi sa i ka di nou ké an vré pwotèksion ba noub (gadé paragraf 14-15).
15. Kisa nou sav parapòt a dèmen ?
15 Nou pa sav kisa chak jou ké pòté, men nou sav Jéova pwonmèt nou lavi étèrnèl, asou latè ouben an sièl. Nou sav osi Jéova pé pa manti, é ayen pé pa anpéché’y réyalizé tout pwonmès-li (Tit 1:2). Li sèl pé ‘prévwè manniè sa kèy fini’, épi lontan alavans, « anonsé bagay ki poko fèt ». Avrédi, sé sa ki fèt antan Labib, é sé sa ki ké fèt dèmen (Iza. 46:10). Anplis, nou asiré sèten ki ayen pé pa anpéché Jéova enmen nou (Wom. 8:35-39). I ké ba nou sajès-la ki fo, konsolasion-an, épi fòs-la nou bizwen an pou tjenbé douvan kisiswa sitiyasion-an. Nou pé sèten Jéova ké endé nou épi béni nou (Jér. 17:7, 8).
NOU PÉ PA RIVÉ KONPRANN MANNIÈ JÉOVA KONNÈT NOU !
16. Kisa Jéova sav asou nou, é kisa nou ka risanti ? (Sòm 139:1-6).
16 (Li Sòm 139:1-6.) Kréyatè-nou sav ègzaktiman koumanniè nou fèt. I konnèt ki manniè kò-nou fèt, tousa nou ka risanti é tousa ki an lèspri-nou. Zié’y anlè nou tout lè. I sa fè diférans-lan ant sa nou ka di épi sa ki an tjè-nou. I sav sa nou ka fè é poutji nou ka fè’y. Kon wa David di, Jéova toujou paré pou endé nou, é i ka vlopé nou épi lanmou’y. Lè’w sav ki Senyè Mèt linivè-a, Kréyatè tou-puisan sièl-la épi latè-a, ni zié’y anlè’w, sa’w ka risanti ? Ès sa pa èstwòdinè ? Asiré, nou ni menm santiman ki David. I di konsa : « Man pa ka rivé konprann ki manniè ou pé konnèt mwen bien konsa. Sa two wo pou mwen » (Sòm 139:6).
17. Jéova konnèt tout fondòk nou. Kisa ki pé rann lidé-tala difisil pou asèpté ?
17 Parapòt a manniè nou élivé, koté-a nou lévé, ouben sa nou té ka kwè avan konnèt lavérité, pétèt sa difisil wè Jéova kon an papa ki enmen nou é ki ka entérésé kòy a nou. Ouben pétèt nou ka pansé nou fè bagay tèlman grav adan lavi-nou, ki an zié Jéova, nou vréman mové, kifè, i pé ké janmen aprann konnèt nou, pas i pa lé ni afè épi nou. Délè menm David risanti sa (Sòm 38:18, 21). Ouben pétèt an moun ki lé fè éfò pou fè chanjman adan lavi’y, épi viv an manniè ka fè Bondié plézi, pé di kòy : « Si Bondié ka konprann mwen vréman, poutji i ka mandé mwen chanjé, olié i pran mwen kon man yé a ? »
18. Poutji sa enpòtan asèpté lidé-a ki Jéova konnèt nou mié ki nou menm ? (gadé sé zimaj-la osi).
18 Nou pé aprann asèpté lidé-a ki Jéova konnèt nou mié ki nou menm. I pé rivé wè dé bagay ki bon lakay-nou, bagay nou menm pa ka rivé wè. I konnèt défo-nou, men pas i konnèt moun-lan nou lé divini, i enmen nou é i ka endé nou (Wom. 7:15). Lè nou ka réyalizé ki Jéova toujou ka wè modèl moun-lan nou pé divini, sa ka ba nou lafòs-la nou bizwen pou sèvi’y épi fidélité èk lajwa.
Jéova ka endé nou ni an lafwa pli vidjò adan bèl lavi-a nou ké ni adan monn nouvo a. Sa ka endé nou pa entjèt twòp parapòt a sa ki pé rivé nouc (gadé paragraf 18-19).
19. Kisa nou sav asou Jéova ?
19 Nou sav Jéova sé lanmou ; é nou pa ni piès dout asou sa (1 Jan 4:8). Nou sav lè i ka di nou fè ouben pa fè an bagay, sé pas i enmen nou é pas i lé nou ni an bèl lavi. Nou sav i lé nou viv pou létèrnité ; sé pou sa i vréyé Jézi mò ba nou. É kado-tala ka ba nou lasirans ki menmsi nou ka péché, nou pé sèvi’y an manniè ka fè’y plézi (Wom. 7:24, 25). Anfen, nou sav i « gran pasé tjè-nou é i konnèt tout bagay » (1 Jan 3:19, 20). I konnèt tout bagay anlè nou, é i sav nou kapab fè volonté’y.
20. Kisa ki ké endé nou pa entjèt twòp ?
20 Jéova pa ka séré piès enfòwmasion nou vréman bizwen sav. Si nou ka asèpté lidé-tala épi limilité, nou pé ké entjèt twòp parapòt a bagay nou pé pa métrizé, é nou ké mété lèspri-nou asou sa ki vréman enpòtan. Sé konsa nou ka montré nou ni limilité é nou ka mété tout konfians-nou an Jéova, « Moun-lan ki konnèt tout bagay » (Jòb 36:4). Sa vré, jòdi-a nou pa sav tout bagay. Men nou ni létèrnité pou Jéova kontinié aprann nou anlo bagay ankò. É sé pa ti kontan nou kontan sav, nou pé ké janmen sispann aprann nouvo bagay asou gran Bondié-nou, Jéova ! (Ékl. 3:11).
KANTIK 104 Jéova, ba mwen lèspri sen’w
a Padavwè sé Jézi kèy mennen ladjè-a kont monn méchan Satan-an, sa rézonnab pansé ki alè i konnèt dat Armagédon é i ja sav ki tan i ké pou « genyen […] an fwa pou tout » (Rév. 6:2 ; 19:11-16).
b DÉ-TWA MO ASOU SÉ ZIMAJ-LA : An papa épi yich-li ka préparé an sak soukou ba fanmi-yo pou sianka i ni an kouri-vini.
c DÉ-TWA MO ASOU SÉ ZIMAJ-LA : An frè ki ka jwenn pwoblèm ka sonjé bèl lavi-a i ké ni adan monn nouvo a.