Nou pa janmen tou sèl

1-2. a) Poutji nou pé di nou pé ké janmen tou sèl anba an léprèv ? b) Kisa nou kèy wè adan awtik-tala ?

LÈ AN patjé gwo pwoblèm ka anni tonbé anlè nou, nou ka santi sé konsi nou tou sèl asou an ti kanno an mitan an lanmè mové. Men fòk nou sonjé nou pa tou sèl. Papa-nou ki an sièl-la, i pa ka wè sèlman léprèv nou ka travèsé. Men anplis, i ka pwonmèt i ké endé nou. I ka fè nou bèl pwonmès-tala ki chajé épi lanmou : « Mwen kay endé’w » (Iza. 41:10).

² Adan awtik-tala, nou ké wè Jéova ka endé nou 1) lè i ka djidé nou, 2) lè i ka ba nou sa nou bizwen, 3) lè i ka pwotéjé nou é 4) lè i ka konsolé nou. Papa-nou ka pwonmèt nou i pé ké janmen bliyé nou, kisiswa difikilté nou ké jwenn. Non, janmen i pé ké ladjé nou. Kidonk, nou pé ké janmen tou sèl.

JÉOVA KA DJIDÉ NOU

3-4. Ki manniè Jéova ka djidé nou ? (Sòm 48:14).

³ (Li Sòm 48:14.) Jéova sav nou pa kapab dirijé kònou nou menm, é nou bizwen i djidé nou. Ki manniè i ka djidé moun ki ka sèvi’y épi fidélité jòdi-a ? An zouti i ka itilizé, sé Pawòl-li, Labib (Sòm 119:105). Gras a Pawòl-li i enspiré, i ka endé nou pran désizion épi travay kalité ki ka rann nou pli éré dépi aprézan, é ki ké endé nou trapé lavi étèrnèla. Pa ègzanp, i ka aprann nou pa gadé rantjin an tjè-nou, toujou onnèt adan tousa nou ka fè, épi enmen kònou fò épi tout tjè-nou (Sòm 37:8 ; Ébré 13:18 ; 1 Piè 1:22). Lè nou ka aji konsa, nou ka divini dé méyè paran, dé méyè konjwen épi dé méyè zanmi.

⁴ Anplis, Jéova mété adan Pawòl-li lèspérians moun ki jwenn léprèv, é ki té ni menm santiman ki nou (1 Kor. 10:13 ; Jak 5:17). Lè nou ka li lavi sé moun-tala, épi nou ka aplitjé sé lison-an yo ka aprann nou, nou ka trapé bénéfis 2 manniè diféran. Pou yonn, nou ka réyalizé nou pa tou sèl ka bat mizè. Pou vré, dòt moun avan nou jwenn sitiyasion ka sanm ta nou, é yo rivé tjenbé gras a Jéova (1 Piè 5:9). É pou dé, nou ka aprann kisa ki pé endé nou tjenbé douvan difikilté épi pa pèd lajwa-nou (Wom. 15:4).

5. Ki moun Jéova ka sèvi pou djidé nou ?

⁵ Jéova ka sèvi osi frè é sè-nou pou djidé noub. Pa ègzanp, sé rèsponsab siwkonskripsion-an ka pasé wè sé lasanblé-a pou ankourajé yo. Sé diskou-a yo ka fè ba nou, ka rann lafwa-nou pli djòk, épi ka ankourajé nou rété ini (Akt 15:40 – 16:5). Sé ansien-an osi ka travay rèd pou endé nou chak la rété anba bra Jéova (1 Piè 5:2, 3). Lé paran ka djidé timanmay-yo èspiritièlman, lè yo ka endé yo dévlopé kapasité yo ni pou réfléchi. Yo ka endé yo osi ni an bon konduit, épi bon labitid èspiritièl (Pwo. 22:6). É sé sè-a ki pli mi ka endé sè ki pli jenn épi bèl lègzanp-yo. Yo ka ba yo konsèy itil, épi ankourajman plen chalè (Tit 2:3-5).

6. Kisa fòk nou fè pou bénéfisié dirèksion Jéova ka ba nou ?

⁶ Jéova ba nou dirèksion-an nou bizwen pou pran bon désizion épi ni an bèl lavi. Men kisa fòk nou fè pou bénéfisié konsèy i ka ba nou ? Pwovèb 3:5, 6 ka di : « Mété konfians-ou adan Jéova épi tout tjè’w é pa apiyé anlè pwòp entélijans-ou. » Si nou ka fè sa, ‘i ké fè tout bagay maché bien an lavi-nou’, kivédi, gras a li, nou ké évité an patjé pwoblèm é nou ké pli éré. Nou ka di Jéova mèsi, pas i ka ba nou konsèy nou chak la bizwen, davwè i bien konnèt nou é i enmen nou anpil ! (Sòm 32:8).

JÉOVA KA BA NOU SA NOU BIZWEN

7. Ki manniè Jéova ka ba nou tousa nou bizwen ? (Filipien 4:19).

⁷ (Li Filipien 4:19.) Anplis di ba nou an dirèksion èspiritièl, Jéova ka béni éfò nou ka fè pou trapé manjé, rad, épi an koté pou viv (Mat. 6:33 ; 2 Tés. 3:12). Sa natirèl entjèt pou sé bagay-tala. Men Jéova ka ankourajé nou pa lésé yo pran tèt-nou twòp (gadé adan Bib-la ki fèt pou étidié an fwansé, nòt létid-la adan Matié 6:25). Poutji sa ? Pas Papa-nou pé ké jen ladjé yich-li ka sèvi’y épi fidélité, lè yo adan ladétrès (Mat. 6:8 ; Ébré 13:5). Asiré, i ké ba nou sa nou bizwen. Nou pé fè’y konfians zié fèmen.

8. Koumanniè Jéova endé David lè i jwenn pwoblèm ?

⁸ Annou wè kisa Jéova fè pou endé David. Sayil kouri dèyè David pou tjwé’y pandan pliziè lanné. Men Jéova ba’y, li épi sé boug-li a, tousa yo té bizwen pou yo viv. Lè i té ka sonjé manniè Jéova pran swen di’y pandan tout sé lanné-tala, David ékri : « Man té jenn, épi atjèlman man sé an gran-moun, men mwen pa janmen wè Bondié abandonnen an moun ki jis, ni kité timanmay-li chèché manjé » (Sòm 37:25). Asiré, wou osi, ou ja wè Jéova pran swen épi anpil lanmou di sèvitè’y ki fidèl.

9. Lè i ni an katastwòf, koumanniè Jéova ka ba sèvitè’y sa yo bizwen ? (gadé sé zimaj-la osi).

⁹ Lè i ni an katastwòf, la osi Jéova ka ba sèvitè’y sa yo bizwen. An 1^ié sièk-la, lè té ni lafanmin Jérizalèm, krétjen ki té ka abité dòt koté, vréyé soukou ba frè é sè-yo (Akt 11:27-30 ; Wom. 15:25, 26). Jòdi-a tou, sèvitè Bondié ka endé frè é sè-yo ki bizwen an pal. Épi lanmou, Jéova ka mété an tjè adoratè’y lanvi endé sa ki sibi an katastwòf. Koté i ni bon déga, yo ka vréyé prèmié bagay yo bizwen, kontèl dlo, rad épi médikaman. Gwoup konstriksion ka réparé sé kay-la épi sé sal Wayòm-lan ki krazé. Lòwganizasion Jéova ka fè mannèv pou konsolé épi ankourajé gras a Labib, moun ki pèd kay-yo oben ki pèd an mounc.

10-11. Kisa listwa Borys ka aprann nou ?

¹⁰ Jéova ka montré kòy donan osi lè sé pou endé moun ki poko ka sèvi’y. Nou ka imité Jéova, lè nou ka chèché lokazion fè moun dibien, menm si yo pa ka adoré’y (Gal. 6:10). Souvan, sa ka ba an bèl témwayaj. Annou ba dé kamo anlè Borys, an dirèktè lékòl ka viv Likrèn. I pa Témwen Jéova, men lè i té ni afè épi zélèv ki té Témwen, i toujou fè yo dibien épi rèspèkté kwayans-yo. Palakòz ladjè-a, i désidé chapé-kouri an koté ki té pli trantjil an péyi-a, é frè èk sè-nou ki té ka rété la, ba’y an bèl pal. Yonn-dé tan plita, i vini Mémoriyal lanmò Jézikri. Lè i ka viré-sonjé sa sé Témwen Jéova-a fè ba’y, i ka di : « Yo té vréman janti épi mwen, épi yo pran swen di mwen. Man ka di yo mèsi pou sa yo fè ba mwen. »

¹¹ Nou tout pé imité lanmizérikòd Papa-nou ki an sièl-la, lè nou ka montré lanmou ba moun ki adan ladétrès, é sa, ki yo Témwen, ki yo pa Témwen Jéova (Lik 6:31, 36). Nou ka èspéré lanmou-a nou ni ba yo, ké ba yo anvi sav plis anlè Jéova épi koumansé sèvi’y kantékant épi nou (1 Piè 2:12). Men menmsi yo pa chwazi sèvi Jéova, nou ké ni tjè-kontan, pas nou ka jwenn plis bonè lè nou ka ba (Akt 20:35).

JÉOVA KA PWOTÉJÉ NOU

12. Ki modèl pwotèksion Jéova pwonmèt pèp-li ? (Sòm 91:1, 2, 14).

¹² (Li Sòm 91:1, 2, 14.) Jéova pwonmèt i ké pwotéjé nou èspiritièlman. I pé ké janmen kité Satan anpéché pèp-li sèvi’y manniè i ka mandé (Jan 17:15). É pandan « gran tribilasion-an », nou pé asiré Jéova ké tjenn pwonmès-li di pwotéjé pèp-li èspiritièlman, men osi pwotéjé lavi-yo (Rév. 7:9, 14).

13. Koumanniè Jéova ka pwotéjé nou chak la ?

¹³ Koumanniè Jéova ka pwotéjé nou chak la ? I ka sèvi Labib-la pou nou rivé sav sa ki bien épi sa ki mal (Ébré 5:14). Lè nou ka suiv sé prensip Labib-la, nou ka pran bon désizion ki ka pwotéjé lavi-nou épi èspiritialité-nou (Sòm 91:4). Anplis di sa, Jéova ka sèvi lasanblé-a pou pwotéjé nou (Iza. 32:1, 2). Frè é sè-nou adan lasanblé-a enmen Jéova épi ka obéyi’y. Lè nou ka pasé tan épi yo adan sé réyinion-an, an prédikasion, é pandan anmizman, sa ka ankourajé nou é sa ka endé nou évité fè sa ki mové (Pwo. 13:20).

14. a) Poutji Jéova pa ka pwotéjé nou tout lè ? b) Ki lasirans Sòm 9:10 ka ba nou ? (gadé nòt-la osi).

¹⁴ Antan Labib, sa rivé ki Jéova mété lanmen pou anpéché yo tjwé pèp-li ouben blésé yo. Men i pa fè sa tout lè. Labib ka di ki pwoblèm « yo pé pa prévwè » pé rivé tout moun (Ékl. 9:11). Anplis di sa, pou ba laprèv Satan sé an mantè, Jéova pèwmèt ki yo pèsékité yonn-dé sèvitè’y é menm tjwé yo. (Jòb 2:4-6 ; Mat. 23:34). Menm manniè sa rivé moun ki té ka sèvi Jéova antan Labib, ében sé bagay ki pé rivé nou jòdi-a. Men nou pé asiré di an bagay : menmsi Jéova pa ka fè léprèv-nou disparèt atjèlman, i pé ké janmen ladjé moun ki enmen’yd (Sòm 9:10).

JÉOVA KA KONSOLÉ NOU

15. Kisa Jéova ka ba nou pou konsolé nou ? (2 Korentjen 1:3, 4).

¹⁵ (Li 2 Korentjen 1:3, 4.) Délè, nou pé tris, entjèt ouben chouboulé. Ès sé tan-tala, i ni an sitiyasion ki ka pran tèt-ou épi ka fè’w santi kòw tou sèl ? Ès i ni an moun ka konprann sa’w ka risanti ? Wi, Jéova. Anplis di konprann doulè-nou, i ka « konsolé nou adan tout léprèv-nou ». Ki manniè i ka fè ? Lè nou ka sipliyé’y adan an lapriyè, i ka ba nou lapé’y « ki wo pasé tou sa an moun pé konprann » (Fil. 4:6, 7). Nou ka touvé osi adan Pawòl-li, Labib, pawòl ka konsolé nou. Adan Labib, Jéova ka di nou i enmen nou, i ka ansénié nou sa pou fè pou ni lasajès, é i ka ba nou an lèspwa, é tout sé bagay-tala ka fè nou viré-pran tjè. Anfen, nou ka jwenn konsolasion adan réyinion-nou, oti, gras a Labib, nou ka aprann dé bagay ka ankourajé nou. É anplis, nou épi frè é sè-nou ki enmen nou.

16. Kisa listwa Nathan épi Priscilla ka aprann ou ?

¹⁶ Lègzanp Nathan épi Priscilla, an koup ka viv Lézétazini, ka bien montré Jéova ka konsolé nou épi ka ankourajé nou épi Pawòl-li. Ni pliziè lanné di sa, yo té pran désizion alé viv an koté éti té ni bizwen plis pwoklamatè. Nathan ka di : « Nou té asiré Jéova té ké béni éfò-nou. » Men, lè yo rivé koté-a yo té vréyé yo sèvi, yo trapé pwoblèm santé épi pwoblèm lajan yo pa té ka atann. Anfinaldikont, yo viré la yo té ka viv avan. Men menm la, yo té ka jwenn pwoblèm lajan. Nathan ka sonjé i té mandé kòy : « Poutji Jéova pa béni nou kon nou té èspéré ? Man jis mandé kòmwen si man pa té fè an bagay ki désivwè Jéova. » Men plita, Nathan épi Priscilla fini pa konprann ki Bondié pa té ladjé yo. Nathan ka présizé : « Pandan sé moman rèd tala, Bib-la vini ba nou kon an zanmi ki ni sajès, ki ka ankourajé nou épi ka ba nou bon konsèy. Nou aprann mété lèspri-nou anlè manniè Jéova endé nou tjenbé, olié nou rété yenki anlè éprèv-la. Aprézan, nou paré rété doubout épi lafwa douvan difikilté ki pou vini. »

17. Koumanniè Helga risivwè konsolasion ? (gadé zimaj-la osi).

¹⁷ Frè é sè-nou osi pé konsolé nou. Sé sa Helga, an sè ki ka viv Lawongri konstaté. Pandan dizenn lanné, i jwenn an patjé difikilté, kifè, i vini an moun ki èstrésé épi i té ka santi i pa té vo ayen. Men jòdi-a, lè i ka katjilé asou tousa, i ka réyalizé ki Jéova toujou konsolé’y gras a lasanblé-a. I ékri : « Jéova toujou endé mwen lè man té ka pèd fòs akòz di travay-mwen, tjanmay-mwen ki té malad man té pou otjipé, épi dòt léprèv ankò. Adan sé 30 lanné-a ki fini pasé, pa ni an jounen éti Jéova pa konsolé mwen. Souvan, i ka itilizé dòt moun pou ba mwen fòs. Gras a pawòl-yo plen lanmou épi jantiyès-yo, man ka santi man ni valè ba yo. Souvan, man té ka risivwè an mésaj, an kat ouben an félisitasion jiskont lè man té bizwen. »

18. Ki manniè nou pé konsolé lézòt ?

¹⁸ Nou ni an bèl privilèj, sé imité Jéova adan manniè i ka fè pou konsolé lézòt. Alò ki manniè nou pé fè kon’y ? Nou pé fè sa lè nou ka kouté yo épi pasians, lè nou ka palé ba yo an manniè pou konsolé yo, épi lè nou ka ba yo pal-la yo bizwen an (Pwo. 3:27). Annou fè tousa nou pé pou konsolé moun ka soufè, é menm moun ki poko ka sèvi Jéova. É lè moun ki oliwon nou adan lapenn, malad ouben entjèt, annou rann yo an ti vizit, kouté yo, épi annou sèvi vèsé Labib pou endé yo viré-pran fòs. Ki rézilta nou ké ni si nou ka imité Jéova, li ki « Bondié tout konsolasion » ? Nou ké endé frè èk sè-nou tjenbé douvan léprèv-yo. Men nou pé endé osi moun ki poko ka sèvi Jéova. É lè yo ké wè bien nou ka fè yo, sa ké ba yo anvi aprann plis anlè’y (Mat. 5:16).

JÉOVA TOUJOU LA ÉPI NOU

19. Kisa Jéova ka fè ba nou, é ki manniè nou pé imité’y ?

¹⁹ Jéova ka entérésé kòy vréman a tout moun ki enmen’y. I pa ka ladjé nou lè nou ni pwoblèm. Menm manniè an papa lanmou ka sousié kòy di yich-li, Jéova ka sousié kòy di sèvitè’y ki fidèl. I ka djidé nou, i ka ba nou sa nou bizwen, i ka pwotéjé nou épi ka konsolé nou. Nou ka imité lanmou Papa-nou ki an sièl-la, lè nou ka soutni épi ankourajé moun ki anba léprèv. Menmsi délè, pwoblèm ouben tristès ka krazé nou, nou toujou ni konfians ki Jéova épi nou, pas i pwonmèt : « Ou pa bizwen pè, pas mwen la épi’w » (Iza. 41:10). Pwonmès-tala ka rasiré nou épi ka ba nou lafòs. Nou sav nou pa janmen tou sèl !