Rèspèkté tout moun

1. Poutji tout moun enmen yo rèspèkté yo ? (Pwovèb 22:1).

LÈ YO ka rèspèkté’w, kisa ou ka risanti ? Asiré, sa ka fè’w dibien. Tout moun enmen lè yo ka rèspèkté yo. Sé pou sa, sa ka ba nou tjè-kontan lè yo ka rèspèkté nou. Kidonk, nou ka bien konprann poutji Labib ka di : « Plivomié yo ba’w rèspé’w, pasé ou ni lajan épi lò » ! (li Pwovèb 22:1).

2-3. Poutji sa pa toujou fasil rèspèkté lézòt, é kisa nou ké wè adan awtik-tala ?

² Délè, sa pa fasil rèspèkté lézòt pas prèmié bagay nou ka wè, sé défo-yo. Anplis di sa, jòdi-a, anlo moun pa ka rèspèkté lézòt. Men fòk nou diféran. Poutji ? Pas sé Jéova ki lé nou rèspèkté « tout kalté moun », épi ba yo lonnè-yo (1 Piè 2:17).

³ Adan awtik-tala, nou ké wè sa sa lé di rèspèkté lézòt, é koumanniè nou pé montré sa 1) adan fanmi-nou, 2) adan lasanblé-a é 3) ba tout kalté moun ki pa adan lasanblé-a. Nou ké wè ki manniè nou pé rèspèkté lézòt, èspésialman lè sa difisil.

RÈSPÈKTÉ LÉZÒT, KISA SA LÉ DI ?

4. Kisa sa lé di rèspèkté lézòt ?

⁴ Ba’w, rèspèkté lézòt sé kisa ? Rèspèkté an moun, sé ba’y lonnè-a i mérité. Kivédi, aji épi’y an manniè pou i santi i ni valè, épi santi kòy aprésié. Souvan, nou ka rèspèkté ouben onoré an moun ki ni bèl kalité, ka fè bèl bagay, ouben ki ni an lotorité anlè nou. Men sa enpòtan fè sa épi tout tjè-nou (Mat. 15:8).

5. Kisa ki ké ankourajé nou rèspèkté tout moun ?

⁵ Jéova lé nou rèspèkté tout moun. Pa ègzanp, i ka mandé nou rèspèkté « lotorité ki woplasé » (Wom. 13:1, 7). Men, pétèt yonn-dé pé di kòyo : « Si an moun lé rèspé, fòk i mérité’y ! » Men ès sé konsa fòk wè bagay-la ? Non. Nou ka konprann fòk nou rèspèkté moun, pa pas yo fè ouben yo pa fè an bagay, men pas Jéova lé nou rèspèkté yo. É lè nou ka fè sa, sa ka ba Jéova tjè-kontan (Joz. 4:14 ; 1 Piè 3:15).

6. Ès sa posib rèspèkté an moun ki pa ka rèspèkté nou ? (gadé osi zimaj-la).

⁶ Men i ni moun ki pé mandé kòyo : « Ès sa vréman posib rèspèkté an moun ki pa ka rèspèkté mwen ? » Annou wè yonn-dé ègzanp ka montré sa posib. Wa Sayil fè yich-li a Jonatan wont, douvan tout moun (1 Sam. 20:30-34). Poutan, Jonatan rèspèkté’y, é i goumen obò papa’y kont lènmi-yo, tout lavi’y (Ègz. 20:12 ; 2 Sam. 1:23). Gran prèt-la Éli té ka pansé Àn té boulé, kifè i palé an manniè rèd ba’y (1 Sam. 1:12-14). Magré sa, é magré tout moun Izrayèl té sav i pa té ka korijé yich-li, Àn ba gran prèt-la Éli tout rèspé’y (1 Sam. 1:15-18 ; 2:22-24). Annou wè an dènié ègzanp. Lè moun Atèn di Pòl té ka palé anpil pou ayen, sa ensilté’y, men i kontinié rèspèkté yo kanmenm (Akt 17:18, 22). Kisa sé lègzanp-tala ka aprann nou ? Si nou enmen Jéova fò, é si nou pa lé fè’y lapenn, sa kèy endé nou rèspèkté lézòt. Nou kèy fè sa pa sèlman lè sa fasil, men osi, lè yo ka mantjé nou rèspé. Annou wè aprézan ki moun ki mérité rèspé-nou, é poutji.

RÈSPÈKTÉ MOUN LAFANMI’W

7. Poutji sa pé rèd montré rèspé ba fanmi-nou ?

⁷ Difikilté-a : Nou ka pasé anpil tan épi fanmi-nou. Donk, nou konnèt kalité-yo men osi défo-yo. Pétèt nou ka otjipé di an pwòch ki malad, é sitiyasion-tala rèd pou jéré. Pétèt osi, nou ni an moun adan fanmi-nou ka fè kriz langwas. Ouben pétèt ankò, adan fanmi-nou, i ni ka blésé nou épi pawòl-yo ouben aksion-yo. Pou fini, i ni, olié yo mété lapé adan fanmi-an, yo ka simen panik é yo pa ka rèspèkté lézòt. Anfinaldikont, yo pa ka antann kòyo. Nou pé konparé fanmi-an épi an kò. An maladi pé anpéché kò an moun bien fonksionnen. Menm manniè a, si ni moun adan fanmi-an ki pa ka rèspèkté lézòt, sa pé anpéché fanmi-an bien antann. É menm manniè a i ni anlo maladi ki pé djéri, sa posib tout moun adan fanmi-an aprann ni rèspé yonn ba lòt.

8. Poutji sa potalan rèspèkté moun lafanmi-nou ? (1 Timoté 5:4, 8).

⁸ Poutji fòk rèspèkté moun fanmi-nou ? (li 1 Timoté 5:4, 8). Lè i ékri prèmié lèt-li ba Timoté, Pòl èsplitjé ki adan an fanmi, yonn pou pran swen di lòt. Kifè, yonn kèy ba lòt sa i bizwen. I èsplitjé Timoté fòk pa rèspèkté moun fanmiy-ou pas ou oblijé, men pas ou lé fè Bondié plézi. Sa lé di nou ka rèspèkté fanmi-nou pas nou enmen Jéova. É rèspé-tala ni an plas enpòtan adan ladorasion-nou. Kidonk, lè nou ni rèspé ba moun fanmi-nou, an vérité sé Jéova nou ka rèspèkté, pas sé li ki Kréyatè lafanmi (Éfé. 3:14, 15). Mi an rézon fondal-natal pou rèspèkté moun fanmi-nou !

9. Koumanniè an mari épi madanm-li pé ni rèspé yonn ba lòt ? (gadé sé zimaj-la osi).

⁹ Koumanniè ou pé rèspèkté moun fanmiy-ou : An mari ki ka rèspèkté madanm-li ka montré i ni valè an zié’y. I ka fè sa, ki douvan moun, ki dèyè do moun (Pwo. 31:28 ; 1 Piè 3:7). Janmen i pa ka bat li, pa ka fè’y wont, ouben fè’y kwè i pa vo ayen. Aria, ka viv Larjantin, ka di : « Konm madanm-mwen malad, délè i ka di pawòl ka blésé. Lè sa ka rivé, man ka sonjé i pa ka fè èspré. É man ka éséyé viré-sonjé 1 Korentjen 13:5, pou man palé ba’y épi rèspé épi pa faché kont li » (Pwo. 19:11). Aprézan, ki manniè an madanm ka rèspèkté mari’y ? Sé lè i ka palé an bien di’y ba lézòt (Éfé. 5:33). I pa ka palé ba’y an manniè rèd, pa ka mété’y alafèt, pa ka fè vié blag asou’y é i pa ka ensilté’y non pli. I ka pran konsians ki sé manniè fè tala pé vini kon lawouy ka wenyen fanmiy-li (Pwo. 14:1). An sè ka viv Itali ni mari’y ka fè kriz langwas toulong. I ka di : « Délè, man ka touvé mari-mwen ka entjèt pou ayen. Avan, man té ka mantjé’y rèspé, é yo té ka wè sa asou fidji-mwen épi asou manniè man té ka palé ba’y. Men man réyalizé, plis man ka pasé tan épi moun ka palé épi rèspé, sé plis man ka rèspèkté mari-mwen ».

10. Si’w jenn, ki manniè ou pé montré ou ka rèspèkté lé paran’w ?

¹⁰ Si’w sé an jenn, obéyi lè lé paran’w ka di’w fè an bagay (Éfé. 6:1-3). Palé ba yo épi rèspé (Ègz. 21:17). Sonjé ki lè yo kèy pran laj, yo kèy bizwen ou endé yo. Fòk ou ké fè tousa ou pé pou pran swen di yo. Pa ègzanp, papa María ki pa Témwen Jéova tonbé malad é i té pou otjipé di’y. Men papa’y pa té janti épi’y. I ka sonjé : « Man té ka mandé Jéova endé mwen ni rèspé ba papa-mwen an tjè-mwen, men osi pou rivé palé ba’y épi rèspé. Man té ka di kòmwen, si Jéova ka mandé mwen rèspèkté lé paran-mwen, i ké ba mwen fòs-la pou rivé fè’y. Tan pasé é man konprann, man pa pou atann papa-mwen chanjé pou ba’y rèspé. » Lè nou ni rèspé ba moun fanmi-nou magré défo-yo épi féblès-yo, nou ka rèspèkté Jéova, Kréyatè lafanmi.

RÈSPÈKTÉ FRÈ É SÈ’W ADAN LASANBLÉ-A

11. Poutji sa pé difisil ba frè é sè-nou rèspé-a yo mérité ?

¹¹ Difikilté-a : Nou sav frè èk sè-nou ka viv annakò épi sé prensip Labib-la. Men délè, sa pé rivé yo pa asé janti épi nou, yo ka mal jijé nou ouben fè nou lévé-faché. Si nou ni an ‘rézon plenn kònou’ di an frè ouben an sè, sa pé vini an mòn pou ba’y rèspé-a i mérité (Kol. 3:13). Kisa ki kèy endé nou ?

12. Poutji sa potalan rèspèkté frè é sè-nou adan lasanblé-a ? (2 Piè 2:9-12).

¹² Poutji fòk nou rèspèkté frè é sè-nou adan lasanblé-a ? (li 2 Piè 2:9-12). Adan dézièm lèt-li a, Piè palé di moun adan sanblé 1^ié sièk-la ki té ka malpalé sé ansien-an. Ki réyaksion sé zanj fidèl la té ni, lè yo wè sa ki té ka pasé ? Rèspé yo ni ba Jéova anpéché yo malpalé sé moun-tala. Katjilé anlè sa : menmsi sé zanj-lan pawfé, yo entèwdi kòyo palé an manniè rèd di sé moun-tala ki té awogan ! Yo kité Jéova jijé yo épi korijé yo (Wom. 14:10-12 ; konparé épi Jid 9). Ki lison sé zanj-lan ka aprann nou ? Nou pa pou trété san rèspé moun ki pa enmen nou. É si nou ka rèspèkté yo, a jijé-wè frè é sè-nou adan lasanblé-a. Poutoudi, fòk sé nou prèmié ki ba lézòt lonnè (Wom. 12:10). Sé konsa nou ké montré nou ka rèspèkté Jéova.

13-14. Koumanniè rèspèkté frè é sè-nou adan lasanblé-a ? Ba an ègzanp (gadé sé zimaj-la osi).

¹³ Ki manniè ou pé rèspèkté frè é sè’w adan lasanblé-a : Si’w ansien, fè tousa ou pé pou ansénié épi lanmou (Filém. 8, 9). É lè’w pou konséyé an moun, fè’y épi jantiyès é pa lè’w faché. Si’w sé an sè, ou pé endé lasanblé-a ni rèspé, lè’w pa ka malpalé lézòt ouben manti anlè yo (Tit 2:3-5). Nou tout, nou pé rèspèkté lé zansien adan lasanblé-a, lè nou ka travay kantékant épi yo, é lè nou ka di yo mèsi pou travay rèd la yo ka fè. Yo ka fè anpil éfò pou dirijé sé réyinion-an, pou òwganizé prédikasion-an é pou endé moun ki « fè chimen-kochi » (Gal. 6:1 ; 1 Tim. 5:17).

¹⁴ An sè yo ka kriyé Roza pa té ka rivé rèspèkté an ansien ki té ba’y an konsèy. I ka di : « Man té ka touvé i té aji an manniè rèd épi mwen. Lè man té lakay-mwen, man té ka malpalé’y. Menmsi man té ka éséyé séré sa, an fon tjè-mwen man té ka pansé i pa té lé antré anba lapenn-mwen. Kidonk man pa té lé kouté konsèy-la i té ba mwen. » Kisa ki endé Roza ? I ka èsplitjé : « Adan lèkti Labib-mwen, man tonbé asou 1 Tésalonisien 5:12, 13. A moman-tala, man rann kòmwen kont man pa té ka rèspèkté frè-tala. É konsians-mwen koumansé bat mwen. Alò man priyé Jéova é man fè richèch adan piblikasion-nou pou touvé yonn-dé lidé itil ki té pé endé mwen chanjé manniè wè mwen. Anfinaldikont, man réyalizé pwoblèm-lan, sé pa té frè-a. Sé té mwen ki té ni lòwgèy. Atjèlman, man ka konprann i ni an liannaj ant limilité épi rèspé nou ni ba lézòt. Menmsi man ni éfò pou fè ankò, man ka santi man an pé épi Jéova, pas man ka fè tousa man pé pou rèspèkté frè é sè-mwen. »

RÈSPÈKTÉ MOUN KI PA TÉMWEN JÉOVA

15. Poutji sa pé difisil ba nou rèspèkté moun ki pa Témwen Jéova ?

¹⁵ Difikilté-a : Lè nou ka préché, souvan, nou ka tonbé anlè moun ki pa enmen sé vérité Labib-la (Éfé. 4:18). Yonn-dé pa ka kouté nou parapòt a lédikasion-an yo risivwè lè yo té pli jenn. É lè nou an travay ouben lè nou lékòl, nou pé jwenn moun ki dézagréyab. Nou pé ni osi an patwon ouben an pwofésè ki pa janmen satisfèt travay-la nou ka fè a. Si nou pa véyatif, rèspé-a nou ni ba sé moun-tala pé fébli. Épi an lè, nou pé mantjé yo rèspé.

16. Poutji sa enpòwtan rèspèkté moun ki poko ka sèvi Jéova ? (1 Piè 2:12 ; 3:15).

¹⁶ Poutji fòk nou rèspèkté moun ki pa Témwen Jéova ? Fòk ou sonjé Jéova ka gadé osi si nou ka rèspèkté moun ki poko konnèt li. Lapòt Piè té fè sé krétjen-an sonjé ki bèl konduit-yo té pé ankourajé dòt moun « gloriyé Bondié ». Sé pou sa i ankourajé yo palé di lafwa-yo ba moun « épi dousè èk gran rèspé » (li 1 Piè 2:12 ; 3:15). Kisiswa lè nou ka pasé douvan an tribinal palakòz lafwa-nou, ouben lè nou ka défann kwayans-nou adan an diskision épi nenpòt ki moun, fòk nou trété tout moun konsi nou té douvan Bondié. Fòk pa nou bliyé, Jéova ka gadé nou épi ka kouté tousa nou ka di épi manniè nou ka di’y. Ès sé pa an rézon fondal-natal rèspèkté moun ki poko Témwen Jéova ?

17. Ki manniè ou pé rèspèkté moun ki pa Témwen Jéova ?

¹⁷ Koumanniè nou pé rèspèkté moun ki pa Témwen Jéova : Lè nou ka préché, nou pa lé fè sé moun-lan santi yo pa pèsonn pas yo pa konnèt anlo bagay anlè Labib. Okontrè, fòk nou toujou sonjé yo ni valè an zié Bondié, é fòk nou konsidéré yo pli wo pasé nou (Ajé 2:7 ; Fil. 2:3). Si an moun ensilté’w parapòt a kwayans-ou, pa cho réponn chou-pou-chou. Pa ègzanp, nou pa lé palé ba sé moun-lan konsidiré sé nou ki entélijan épi sé yo ki sòt (1 Piè 2:23). Anplis, si’w di an bagay ou pa té pou di, mandé padon lamenm. Lè’w an travay, koumanniè ou pé rèspèkté kolèg-ou ? Sé lè’w sérié adan travay-ou, é lè’w ka kondui kòw bien épi kolèg-ou épi patwon’w (Tit 2:9, 10). Épi lè’w onnèt épi ou ka travay rèd, ki yo enmen’w, ki yo pa enmen’w, pli enpòwtan an sé ki ou fè Jéova plézi (Kol. 3:22, 23).

18. Poutji fòk nou kontinié fè éfò pou rèspèkté tout moun ?

¹⁸ Vréman, nou pa ni piès èskiz pou mantjé moun rèspé ! Nou wè ki lè nou ka rèspèkté moun fanmi-nou, nou ka ba Jéova, Chèf fanmi-an, lonnè. Menm manniè-a, lè nou ka rèspèkté frè èk sè-nou, nou ka gloriyé Papa-nou ki an sièl-la. É lè nou ka rèspèkté moun ki pa Témwen Jéova, nou ka trasé an chimen pou yo rivé gloriyé gran Bondié-nou, Jéova. Menmsi ni moun ki pa ni piès rèspé ba nou, annou kontinié fè éfò pou rèspèkté yo, pas nou sav Jéova kèy béni nou. I ka pwonmèt nou : « Moun ki ka onoré mwen, mwen ké onoré yo » (1 Sam. 2:30).