LISON 05
Labib sé mésaj Bondié ba nou
Jéova fè nou an kado èstwòdinè : 66 liv sanblé adan an sèl gwo liv, Labib. Men pétèt ou ka mandé kòw : « Ki manniè nou fè pou ni Labib-la jòdi ? Ki moun ki lotè Labib ? » Pou réponn sé kèsion-tala, annou wè yonn-dé bagay èspésial asou Labib.
1. Si sé nonm ki ékri Labib, poutji nou ka di sé Bondié ki Lotè’y ?
Oliwon 40 nonm ékri Labib asou an périòd apéprè 1 600 lanné, yo koumansé lanné 1513 avan Jézikri épi yo fini’y pa koté lanné 98 lépòk-nou an. Sé ékriven-an té diféran yonn épi lòt. Té ni bèrjé, té ni maren-péchè, té ni wa. Men yonn pa ka kontridi lòt. Koumanniè sa posib ? Pas Bondié, sé Lotè Labib-la (li 1 Tésalonisien 2:13). Sé ékriven-an pa ékri pwòp lidé-yo, yo « palé pawòl ki sòti nan bouch Bondié épi lafòs lespri sen’ya » (2 Piè 1:21). Bondié sèvi lèspri sen’y pou enspiré nonm, kivédi i fè yo matjé pansé’y (2 Timoté 3:16).
2. Ki moun ki pé ni Labib ?
Moun « tout nasion, tout tribi, tout lang,tout pèp » pé konnèt bon nouvèl-la ki an Labib-la (li Révélasion 14:6). Bondié asiré kòy Labib disponib adan plis lang ki piès dòt liv. Jòdi, près tout moun pé li Labib, kisiswa koté-a yo ka viv ouben lang-lan yo ka palé a.
3. Kont kisa Jéova protéjé Labib-la ?
Labib-la té ékri anlè tjui (lapo bèt) épi papiris. Sé kalté matério-tala ka abimé. Men nonm ki té enmen Labib, kopié’y é viré kopié’y épi anpil swen. Menm si moun ki puisan éséyé fè’y disparèt, dòt té paré pèd lavi-yo pou protéjé’y. Jéova pa kité ayen ni piès moun fè’y disparèt. Labib-la ka di : « Pawòl Bondié-nou pa ka jenmen bout » (Izayi 40:8).
ANNOU PLI LWEN
Annou dékatiyé ki manniè Bondié enspiré sé rédaktè Labib-la, ki manniè i protéjé’y é sa i fè pou tout moun pé sa li’y.
4. Labib li menm ka di nou ki moun ki Lotè’y
Gadé VIDÉWO-a. Apré li 2 Timoté 3:16 épi diskité sé kèsion-an ka vini an.
Si sé nonm ki ékri Labib, poutji nou ka di sé Pawòl Bondié ?
Dapré’w, ès sa lojik kwè Bondié sé pé ba nonm pansé’y ?
An sèkrétè ka ékri an lèt, men mésaj-la ka vini di rèsponsab-li. Menm manniè-a, sé nonm ki ékri Labib, men mésaj-la ka vini di Bondié.
5. Labib chapé anba atak
Si poutoutbon Bondié sé Lotè Labib, nou pé pansé i ka protéjé’y. Dépi nanni-nannan, nonm puisan éséyé détwi Labib. Chèf rèlijié ki chèf rèlijié, éséyé anpéché moun li’y. Menm si yo jwenn lopozision épi yo minasé tjwé yo, anlo moun té paré pèd lavi-yo pou protéjé Labib-la. Pou sav plis, gadé VIDÉWO-a épi diskité sé kèsion-an ka vini an.
Lè’w ka réfléchi asou sa moun fè pou protéjé Labib-la, ès sa ka ba’w lanvi li’y plis ? Poutji ?
Li Sòm 119:97 épi diskité kèsion-tala :
Kisa ki mennen anlo moun mété lavi-yo an danjé pou tradui épi distribié Labib-la ?
6. An liv tout moun pé trapé
Labib, sé liv-la ki tradui plis épi ki distribié plis adan monn-lan. Li Akt 10:34, 35 épi diskité sé kèsion-tala :
Poutji Bondié lé yo tradui épi distribié Pawòl-li toupatou ?
Kisa ka kité’w èstébékwé asou Labib ?
Près
100 %
moun anlè tout latè
pé li Labib adan an lang i ka konprann.
Disponib adan pasé
3 000
lang
antiè ouben mòso.
Yo konté oliwon
5 000 000 000
Labib ki ja fèt.
Sé lontan plis pasé tout modèl liv.
NI MOUN KA DI : « Labib, sé jiskont an liv ansien, nonm ékri. »
Sa’w ka di di sa ?
Ki prèv nou ni Labib sé Pawòl Bondié ?
SA’W APRANN
Labib sé Pawòl Bondié, é Bondié asiré kòy chak moun pé li’y.
An ti viré gadé
Bondié enspiré nonm pou ékri Labib. Sa sa lé di ?
Adan tousa ou fini aprann anlè Labib, kisa ki touché tjè’w ?
Kisa ou ka risanti lè’w ka sonjé tousa Bondié fè pou palé ba’w ?
TIBREN PLIS ANKÒ
Listwa Labib dépi sé prèmié maniskri-a rivé adan sé tradiksion modèn-lan.
« Comment la Bible nous est parvenue » (Réveillez-vous !, novanm 2007)
Ki manniè Labib rézisté douvan twa gran danjé ?
« La Bible : histoire d’une rescapée » (La Tour de Garde no 4 2016)
Ris moun pran pou tradui Labib.
Yo tradui épi viré kopié Labib anpil fwa. Koumanniè nou pé sèten mésaj Labib-la pa brennen ?
« Ès yo chanjé ouben ès yo dénatiré Bib-la ? » (awtik jw.org)