Bagay térib ka fèt pandan ladjè
Viv an ladjè, sé yonn adan sé pli mové bagay-la ki pé rivé an moun. Annou wè sa sòlda épi moun adan lapopilasion, oliwon latè, ka di anlè sa.
MI SA SÒLDA KA DI
« Toupatou dé bagay térib ka rivé. Ou ka wè moun ka tjwé moun. Ou ka wè dòt ki blésé grav. Tout lè ou ka santi kòw an danjé » (Gary, Gran-Brètann).
« Man pran an bal an do épi an fidji. É man wè yo tjwé anlo moun, menm timanmay épi gran moun. Lè ou ka fè ladjè, ou pa sansib ankò lè ou ka wè moun soufè ouben mò » (Wilmar, Kolonbi).
« Lè yo ka tjwé an moun douvan’w, ou ka sonjé sa tout lavi’w. Sa ka tounen an tèt-ou toulong. Ou ka wè moun-lan, ou ka tann li ka soufè. Ou pé pa oubliyé moun-tala » (Zafirah, Lézétazini).
MI SA LAPOPILASION KA DI
« Man té ni lenprésion man pa té kèy janmen rivé ni tjè-kontan ankò. Ou pè mò, men sé pa sa sèlman ka fè’w pè ; ou pè osi yo tjwé fanmi’w épi zanmi’w » (Oleksandra, Ikrèn).
« Lè nou té ka fè latjé pou manjé dépi dézè-d’maten jik a wonzè-d’swè, nou té pè toubannman pas nou pa té sav a ki moman nou té pé pran an bal » (Daler, Tadjikistan).
« Papa-mwen épi manman-mwen mò pandan ladjè. Dépi jou-tala, man vini òflen é pa té ni pèsonn pou konsolé mwen épi choyé mwen » (Marie, Wannda).
Menmsi sé moun-tala soufè akòz di ladjè-a, aprézan yo touvé lapé. É anplis, yo asiré sèten talè tout sé ladjè-a kèy bout. Adan Tou di Gad-tala nou kèy sèvi Labib-la pou wè ki manniè sa kèy fèt.