Lison nou pé aprann asou sa Jakòb di yich-li avan lanmò’y (mòso 1)

1-2. Kisa Jakòb fè titak tan avan lanmò’y, é poutji ? (gadé osi zimaj-la).

JAKÒB té ni an bèl laj lè i sòti Kanaan pou alé Léjip épi tout fanmiy-li. I kontinié sèvi Jéova épi fidélité lè i té Léjip pandan 17 lanné (Jén. 47:28). Pandan tout sé lanné-tala, i té kontan menm davwè i ritouvé yich-li Jozèf i té si enmen, é pas atjèlman, tout fanmiy-lan té ansanm. Men aprézan, Jakòb ka santi lanmò-a ka vini. Alò i di tout sé yich-li a vini alantou’y, pas i té ni an bagay pou di yo chak la (Jén. 49:28).

² A lépòk-tala, an chèf fanmi té ni labitid sanblé moun lafanmi’y avan i mò, pou di yo dènié volonté’y. I té ka pwofité osi pou di yo, ki moun ki té kèy nouvo chèf fanmiy-lan (Iza. 38:1).

3. Dapré Jénèz 49:1, 2, poutji sa Jakòb di sé yich-li a avan i mò, toutafètman èspésial ?

³ (Li Jénèz 49:1, 2.) Men kou-tala, lè Jakòb réyini fanmiy-li, sé té pou an rézon èspésial. Jakòb sé té an pwofèt. É pandan réyinion-tala, Jéova enspiré’y pou i palé di lévènman enpòwtan ki té kèy rivé sé yich-li a épi désandans-yo adan lavni. Sé poutji, sa Jakòb di sé yich-li a avan i mò, sé an pwofési.

4. Kisa nou ké wè adan awtik-tala ? (gadé osi kad-la « Fanmi Jakòb »).

⁴ Adan awtik-tala, nou ké ègzaminé kisa Jakòb di sé 4 yich-li a : Ribèn, Siméon, Lévi épi Jida. Adan awtik-la ka suiv la, nou ké analizé sa i di lèrèstan sé gason’y lan. Nou ké wè ki pwofési Jakòb-la té ka konsèné non sèlman yich-li, men osi désandans-yo, ki té kèy fòwmé nasion Izrayèl-la. Nou ké analizé sa ki rivé nasion Izrayèl-la, pou konprann ki manniè sé pwofési Jakòb-la réyalizé. É nou ké wè osi, ki lison itil nou pé trapé é manniè yo ké endé nou fè Papa-nou Jéova plézi.

RIBÈN

5. Ki privilèj Ribèn pansé papa’y té ké ba’y ?

⁵ Jakòb palé ba Ribèn an prèmié. I di’y : « Ou sé prèmié yich-mwen » (Jén. 49:3). Ribèn té ka pansé, pas i té prèmié gason Jakòb, i té ké risivwè an pli gwo éritaj ki sé frè’y la. I dwèt té ka pansé osi sé li ki té pou vini chèf fanmiy-lan, é tout désandans-li, jénérasion apré jénérasion, té ké ni privilèj-tala.

6. Poutji Ribèn pa risivwè sa prèmié yich-la pou éritié ? (Jénèz 49:3, 4).

⁶ Men Ribèn pa risivwè léritaj prèmié yich-la (1 Kwo. 5:1). Poutji ? Pas yonn-dé lanné avan, i té kouché épi Bila, an kontjibin Jakòb. Rachèl sé té madanm-lan Jakòb té pli enmen, é Bila sé té sèvant-li (Jén. 35:19, 22). Ribèn li menm, sé té gason Léa, prèmié madanm Jakòb. Men poutji Ribèn fè bétiz-tala ? Lè Ribèn kouché épi Bila, pétèt i pansé Jakòb té ké méprizé Bila épi enmen manman’y plis. Ouben pétèt Ribèn té enmen wè Bila épi i pa kontwolé lanvi i té ni kouché épi’y. Kisiswa rézon-an, Jéova pa té kontan sa i fè a menm (li Jénèz 49:3, 4).

7. Ki manniè sa fini ba désandan Ribèn ? (gadé osi kad-la « Sa Jakòb prédi jiskont avan lanmò’y »).

⁷ Jakòb di Ribèn : « Ou pé ké prèmié douvan. » Koumanniè sa Jakòb di réyalizé ? Dapré sa nou sav, piès désandan Ribèn pa vini, ni wa, ni prèt, ni pwofèt. Men sé pa pou sa Jakòb rijété yich-li, é désandan Ribèn vini an tribi Izrayèl kon sé lézòt la (Joz. 12:6). Pou vré, Ribèn té montré dòt kalité adan dòt sitiyasion, é i ka sanm i pa janmen viré-ni konduit sèksièl ki pa pwòp (Jén. 37:20-22 ; 42:37).

8. Kisa lègzanp Ribèn ka aprann nou ?

⁸ Kisa nou ka aprann ? Fòk nou lité kont mové lanvi nou pé ni, épi métrizé kònou pou nou pa ni mové konduit sèksièl. Si nou ka santi nou anvi péché, annou pran tan katjilé asou lapenn nou ké fè Jéova, fanmi-nou épi dòt moun ankò. É annou pa bliyé, « sa an nonm ka simen, sé osi sa i ké rékòlté » (Gal. 6:7). Sa ki rivé Ribèn ka fè nou sonjé manniè Jéova sé an Bondié ka padonnen. Menmsi i pa ka fè nou chapé anba konsékans péché-nou, i ka béni éfò-nou pou fè sa ki bien.

SIMÉON ÉPI LÉVI

9. Poutji Jakòb pa té kontan Siméon épi Lévi ? (Jénèz 49:5-7).

⁹ (Li Jénèz 49:5-7.) Apré, Jakòb palé ba Siméon épi Lévi. É sa i di yo montré i pa té kontan yo menm. Yonn-dé lanné avan, an boug Kanaan yo té ka kriyé Sichèm té violé sè-yo, Dina. Lè sa fèt, tout sé yich Jakòb-la té tèrbolizé parapòt a sa ki té rivé sè-yo. Men Siméon épi Lévi lévé mouch wouj, kifè yo aji épi violans. Yo manti ba Sichèm lè yo pwonmèt li ki, si tout sé nonm-lan té ka fè kòyo siwkonsi, té ké ni lapé ant yo. Kidonk, yo tout asèpté siwkonsi. Men, alòs ki yo té ka tòd anba doulè toujou, Siméon épi Lévi « pran lépé-yo, yo antré adan lavil-la an dous é yo tjwé tout sé nonm-lan » (Jén. 34:25-29).

10. Koumanniè sa Jakòb prédi asou Siméon épi Lévi réyalizé ? (gadé osi kad-la « Sa Jakòb prédi jiskont avan lanmò’y »).

¹⁰ Jakòb pa té kontan menm sé 2 gason’y lan, davwè yo tjwé anlo moun. Sé pou sa i prédi, ki éritaj-yo té ké papiyé toupatou adan péyi Izrayèl. Pwofési-tala réyalizé pasé 200 lanné plita, lè pèp Izrayèl-la rantré adan Péyi pwonmès-la. Tribi Siméon risivwè konm éritaj mòso tè ki té papiyé asou téritwè tribi Jida (Joz. 19:1). Épi tribi Lévi risivwè konm éritaj 48 vil papiyé asou tout téritwè Izrayèl (Joz. 21:41).

11. Ki bon bagay tribi Siméon épi Lévi fè ?

¹¹ Désandan Siméon épi Lévi pa fè sé menm lérè-a ki zansèt-yo. Tribi Lévi soutienn vré tjilt-la épi fidélité. Lè Moyiz monté anlè montann Sinayi-a pou Jéova ba’y Lwa-a, an patjé Izrayélit mété kòyo ka adoré an ti bèf an lò. Men sé Lévit-la rifizé adoré zidòl-tala. Apré sa, yo endé Moyiz détwi tout sé moun-lan ki té adoré ti bèf an lò a (Ègz. 32:26-29). Sé pou sa Jéova désidé ba tribi Lévi an gran privilèj : sé adan tribi-tala i chwazi nonm pou vini prèt an Izrayèl (Ègz. 40:12-15 ; Nonb 3:11, 12). É plita, tribi Siméon fè volonté Jéova, lè i endé tribi Jida konbat moun Kanaan lè yo pran Péyi pwonmès-la (Jij 1:3, 17).

12. Kisa nou pé aprann di sa ki rivé Siméon épi Lévi ?

¹² Kisa nou ka aprann ? Fòk nou métrizé kònou pou lakolè pa aji asou désizion-nou ouben konduit-nou. Si yo fè’w ditò ouben yo maltrété an moun fanmiy-ou, sa nòwmal ou santi kòw blésé (Sòm 4:4). Men sonjé ki Jéova pé ké kontan’w menm, si’w ka di ouben fè an bagay pou vanjé kòw (Jak 1:20). Lè an moun ka maltrété’w, ki moun-tala ka sèvi Jéova ouben ki moun-tala pa ka sèvi’y, fòk toujou aji an manniè ka fè Jéova plézi. Konsa, sa kèy endé’w pa fè, ni di an bagay ki ké fè lézòt ditò (Wom. 12:17, 19 ; 1 Piè 3:9). É si ou sé an jenn, épi lé paran’w ka fè bagay ki pa ka fè Bondié plézi, sonjé ou pa oblijé suiv lègzanp-yo. Fòk pa ou pansé ki sa pa posib fè Jéova plézi. Jéova kèy endé’w fè sa ki jis é i kèy rékonpansé’w pou sa.

JIDA

13. Poutji Jida té entjèt ?

¹³ Apré sa, Jakòb palé ba yich-li Jida. Lè i tann sa papa’y di sé gran frè’y la, Jida dwèt té entjèt. Pou vré, li osi té fè péché ki grav. Lè sé frè’y la alé pran tousa ki té adan lavil Sichèm, i partisipé épi yo (Jén. 34:27). Li épi sé frè’y la vann Jozèf pou sèvi èsklav, é yo manti ba papa-yo lè yo fè’y kwè i té mò (Jén. 37:31-33). É plita, apré lanmò gason’y, Jida kouché épi bèl fiy-li Tama, pas i té pran’y pou an pwòstitié (Jén. 38:15-18).

14. Ki bon bagay Jida fè ? (Jénèz 49:8, 9).

¹⁴ Men Jakòb di yenki bon bagay anlè Jida, é i pwonmèt ki li, ki désandans-li té ké béni (li Jénèz 49:8, 9). Jida té montré i té ka sousié kòy anpil di santiman papa’y ki té ja ni an gran laj. É i té montré osi anpil konpasion ba ti frè’y la, Benjamen (Jén. 44:18, 30-34).

15. Kon Jakòb té prédi, ki bénédision Jida trapé ?

¹⁵ Jakòb prédi ki Jida té ké chèf anlè sé frè’y la. Men sé oliwon 200 lanné plita, pwofési-tala koumansé réyalizé. Lè sé Izrayélit-la sòti Léjip, pami tout sé tribi-a, sé tribi Jida ki pran douvan adan dézè-a, pou antré an Péyi pwonmès-la (Nonb 10:14). Pliziè lanné plita, Jéova viré-chwazi Jida pou pran douvan adan konba-a kont moun Kanaan, pou yo pé sa pran Péyi pwonmès-la (Jij 1:1, 2). É David, sé té prèmié-a adan an patjé wa ki sòti adan tribi Jida. Men sa pa fini…

16. Ki manniè pwofési Jénèz 49:10 réyalizé ? (gadé osi kad-la « Sa Jakòb prédi jiskont avan lanmò’y »).

¹⁶ Jakòb prédi, ki moun-lan ki té ké dirijé limanité pou toujou, té ké sòti adan tribi Jida (li Jénèz 49:10 é nòt-la adan Bib-la ki fèt pou étidié, an fwansé). Dirijan-tala Jakòb kriyé Chilo, té ké Jézikri. Parapòt a Jézi, an zanj di : « Jéova Bondié ké ba’y twòn zansèt-li David » (Lik 1:32, 33). Yo ka kriyé Jézi osi « Lion tribi Jida-a » (Rév. 5:5).

17. Koumanniè nou pé imité Jéova adan manniè nou ka wè lézòt ?

¹⁷ Kisa nou ka aprann ? Menmsi Jida fè péché ki grav, Jéova béni’y. Pétèt sé frè Jida-a mandé kòyo poutji Jéova béni’y. Antouka, Jéova wè i té ni bèl kalité é i béni’y pou sa. Koumanniè nou pé suiv lègzanp Jéova ? Lè an frè ouben an sè-nou ka risivwè an privilèj èspésial, pétèt o dépa nou ka wè yenki défo i ni. Men fòk nou sonjé i ni kalité ka fè Jéova plézi, pas Jéova ka toujou chèché sa ki bon lakay sèvitè’y. Alò annou fè éfò pou suiv larèl-li.

18. Poutji fòk nou pasian ?

¹⁸ Kisa nou pé aprann ankò parapòt a tousa ki rivé Jida ? Fòk nou pasian. Jéova toujou ka réyalizé pwonmès-li, men sé pa toujou kon nou lé, ouben moman-an nou lé. Sé désandan Jida-a atann lontan avan yo dirijé pèp Bondié-a. Men avan sa rivé, yo soutienn épi fidélité sé moun-lan Jéova té chwazi pou dirijé pèp-la, kontèl Moyiz, ki té an Lévit, Jozié, ki té an Éfrayimit, oben wa Sayil, ki té an Benjaminit. Nou tou, annou fè menm bagay-la. Annou soutienn tout sé moun-lan Jéova ka chwazi pou dirijé nou (Ébré 6:12).

19. Kisa nou aprann asou pwofési-a Jakòb di avan i mò ?

¹⁹ Kisa nou aprann asou sa Jakòb di sé 4 prèmié yich-li a avan i mò ? Nou aprann ki « sa an nonm ka wè é sa Bondié ka wè sé pa menm bagay-la » (1 Sam. 16:7). Jéova ni anpil pasians é i ka padonnen anlo. I pa ka fèmen zié’y lè nou ni an mové konduit, men i pa ka atann nou obéyi an manniè pawfé non pli. I pé menm béni moun ki fè péché ki grav, men ki ripanti kòyo épi sensérité, é ki mété kòyo ka fè sa ki bon. Adan awtik-la ka vini an, nou ké wè sa Jakòb di sé 8 dènié gason’y lan.