AWTIK POU ÉTIDIÉ 44
KANTIK 138 Bèlté chivé blan
Kontinié ni tjè-kontan menmsi laj-la ka monté
« Lè yo kèy vini gran-moun, yo ké pòté toujou » (SÒM 92:14).
MI SA NOU KÉ WÈ
Nou ké wè poutji sa enpòwtan sé frè é sè ajé a kontinié ni tjè-kontan, é ki manniè yo pé rivé fè sa.
1-2. Kisa Jéova ka pansé di sèvitè’y ki ajé ? (Sòm 92:12-14 ; gadé osi zimaj-la).
LÈ’W ka pran laj, ou pa ka viv sa menm manniè-a silon koté-a ou ka viv asou latè. Ès ou ka sonjé prèmié fwa ou rimatjé an ti chivé blan anlè tèt-ou ? Pétèt ou éséyé raché’y pou pèsonn pa wè’y. Men ou konprann sé té chayé dlo an pannié, pas dòt té kèy rivé dèyè’y. Lègzanp-tala ka montré ki, ba anlo moun, sa rèd asèpté laj-la ka monté.
2 Ki manniè Papa-nou ki an sièl-la ka wè sèvitè’y ki ajé ? (Pwo. 16:31). I ka konparé yo épi piébwa ki gran é ki ni anpil prèstans (li Sòm 92:12-14). Poutji konparézon-tala entérésan ? Souvan, piébwa ki chajé épi fèy ouben flè, sé piébwa ki ja la dépi an patjé lanné. Yonn di sé pli bèl piébwa-a ou pé jwenn asou latè, sé an piébwa chajé épi flè ka lévé Japon. Yonn-dé adan sé piébwa-tala ni pasé 1 000 lanné. Menm manniè-a, fidèl sèvitè Jéova ki ajé, bèl épi ganmé kon sé piébwa-tala. Asiré, sé pa ti bèl yo bèl an zié Jéova ! Dèyè chivé blan yo, Jéova ka wè ki moun yo yé. Jéova ka wè tout bèl kalité yo ni. Pou vré, yo fidèl épi yo ka sèvi Jéova dépi an patjé lanné, adan bon épi mové moman.
Pié-bwa ki gran épi bèl ka kontinié fléri magré yo vié. Menm manniè-a, sé frè é sè ajé-a bèl épi yo ka kontinié pòté toujou (gadé paragraf 2-a).
3. Ba an ègzanp ka montré Jéova ka sèvi moun ki ja ni an laj pou réyalizé pwojé’y.
3 Valè an moun an zié Jéova pa ka fébli pas i ka pran laja. Okontrè, souvan, Jéova ka sèvi gran-moun pou réyalizé pwojé’y. Pa ègzanp, Sara té ja ni an bèl laj lè Jéova chwézi’y pou i vini manman an gran nasion, épi zansèt Mési-a (Jén. 17:15-19). Moyiz osi té ja ni an bèl laj lè Jéova ba’y an gwo mision : délivré sé Izrayélit-la anba lanmen sé Éjipsien-an (Ègz. 7:6, 7). Lapòt Jan osi té ja vié lè Jéova enspiré’y pou i ékri 5 liv adan Labib.
4. Dapré Pwovèb 15:15, kisa ki pé endé sé gran-moun lan tjenbé anba difikilté-yo ? (gadé zimaj-la osi).
4 Lè’w gran-moun, sé pa ti difikilté ou ka jwenn. An sè di konsa pou bladjé : « Vini vié, sé pa pou flègèdè ! » Men goumen pou ni lajwab, sé sa ki pé endé sé gran-moun lan tjenbé (li Pwovèb 15:15). Adan awtik-tala, nou ké wè kisa yo pé fè pou yo toujou ni tjè-kontan. Nou ké wè osi ki manniè sé frè èk sè-a adan lasanblé-a pé endé yo. Men avan, annou analizé poutji délè sa difisil ni tjè-kontan lè nou ka pran laj.
Si’w ka chèché wè épi aprésié tout bon bagay Jéova ka fè ba’w, ou ké pé ni tjè-kontan magré difikilté (gadé paragraf 4-la).
POUTJI SA RÈD NI TJÈ-KONTAN LÈ’W KA PRAN LAJ
5. Kisa ki sé pé dékourajé frè é sè ki ajé ?
5 Si’w gran-moun, kisa ki pé dékourajé’w ? Pétèt ou anbété pas ou pé pa fè sa’w té ka fè avan. Ou dwèt ka sonjé épi tristès lè’w té jenn épi ou té ni an bon santé (Ékl. 7:10). An sè yo ka kriyé Ruby ka èsplitjé : « Man ni di mal pou abiyé, pas man ni doulè é kò-a rèd. An bagay osi fasil ki lévé pié-mwen pou mété an chosèt, sé an mòn ba mwen. Akòz di lanmen-mwen ki angoudi épi lartwòz, man pa ka rivé fè bagay tou senp. » É Harold, ki sèvi adan an Bétèl, di konsa : « Man pa ka rikonnèt kòmwen, é délè, sa ka égri mwen. Man té ka fè anpil ispò. É bézbòl, sé sa man té enmen jwé plis. Sé jwè-a té ka di souvan : “Vréyé bal-la ba Harold, sé li kèy fè nou genyen !” Men aprézan, man ka pansé man pé pa menm vréyé bal-la. »
6. a) Pou ki rézon ankò sé frè é sè ajé a sé pé dékourajé ? b) Kisa ki pé endé an gran-moun wè si fòk arété kondui ? (gadé adan Tou di Gad-tala, awtik-la « Ès man pou arété kondui ? »)
6 Ou pé santi ou dékourajé osi pas i ni bagay ou pé pa fè tou sèl ankò. Pa ègzanp, pétèt ou bizwen an moun endé’w, ouben pétèt ou bizwen ay viv kay an timanmay-ou. Pétèt osi, pas ou malad, ouben pas ou pa ka bien wè ankò, ou pé pa alé tou sèl la ou anvi alé ; é pétèt menm, ou pa pé kondui loto’w ankò. Sa nòwmal si’w an lapenn parapòt a tousa. É fòk ou asiré sèten Jéova ka konprann sa’w ka risanti. Men fòk sonjé tou, ki valè’w an zié Jéova é an zié lézòt, pa ka dépann di kapasité ou ni di pran swen di pwòp kòw, viv tou sèl, ouben kondui an loto. Ba Jéova, sa ki ni plis valè, sé wotè lanmou ou ni ba’y épi ba frè é sè’w (1 Sam. 16:7).
7. Si’w an lapenn pas ou ka pansé lafen monn-tala pé ké ni tan rivé pandan ou vivan, kisa ki pé endé’w ?
7 Pétèt ou tris pas ou ka pansé ou pé ké ni tan wè lafen monn-tala. Si sa ka chagrinen’w, kisa ki pé endé’w ? Pa bliyé ki Jéova pwonmèt monn méchan tala kèy bout, men i ka di nou poutji i ka pran pasians (Iza. 30:18). Gras a pasians-li, milion moun ni tan aprann konnèt li épi sèvi’y (2 Piè 3:9). Kidonk, lè’w dékourajé, sonjé tout sé moun-tala kèy bénéfisié pasians Jéova avan lafen rivé. Pétèt menm, pami sé moun-tala, kèy ni moun adan fanmiy-ou.
8. Ki manniè maladi ouben doulè pé aji asou an gran-moun ?
8 Kisiswa laj-nou, lè nou pa ka santi kònou bien, pétèt nou pé di ouben fè bagay nou pé rigrété apré (Ékl. 7:7 ; Jak 3:2). Pa ègzanp, menmsi Jòb sé té an nonm fidèl, i di « pawòl anlè », tèlman i té ka soufè (Jòb 6:1-3). Anplis, palakòz an maladi ouben an rimèd i ka pran, an gran-moun pé di ouben fè an bagay ki pa ka sanm li. Asiré, sé pa pas nou ka pran laj ouben pas nou ni an mové santé, ki fòk nou dézagréyab ouben sirè épi moun ki alantou nou. É si nou ka rann kònou kont nou di ouben fè an bagay ki blésé an moun, lamenm annou èskizé kònou (Mat. 5:23, 24).
KOUMANNIÈ OU PÉ KONTINIÉ NI TJÈ-KONTAN
Ki manniè ou pé ni tjè-kontan magré laj-la ka monté ? (gadé paragraf 9-13).
9. Poutji frè é sè ki ajé pa pou ézité asèpté moun endé yo ? (gadé sé zimaj-la osi).
9 Asèpté lézòt endé’w (Gal. 6:2). O dépa, ou kèy pétèt touvé sa rèd asèpté yo endé’w. An sè yo ka kriyé Gretl ka rikonnèt : « Délè, man pa ka rivé asèpté yo endé mwen, pas man ka santi man sé an chaj ba lézòt. Sa mandé mwen tan pou chanjé manniè man té ka wè, épi asèpté épi limilité man té bizwen lézòt. » Lè’w ka asèpté an moun endé’w, ou ka fè’y an kado : ou ka ba’y laposibilité ni lajwa, pas ou asèpté i ba’w an pal (Akt 20:35). É asiré, sa ké fè’w dibien di wè manniè lézòt enmen’w épi lé otjipé di’w.
(gadé paragraf 9-la).
10. Poutji sa enpòwtan pran labitid di mèsi ? (gadé sé zimaj-la osi).
10 Pran labitid di mèsi (Kol. 3:15 ; 1 Tés. 5:18). Lè yo ka fè nou dibien, nou toujou anvi di mèsi. Men nou pé oubliyé montré rikonésans-nou ba sa yo ka fè ba nou. Si’w souri ba frè é sè’w épi ou ka di yo mèsi, yo kèy santi yo ni valè. Yo kèy wè osi ou ka aprésié yo. Leah, ki ka otjipé di frè èk sè ajé adan an Bétèl ka di : « An sè ajé ni labitid matjé asou ti fèy papié dé ti mo pou di mwen mèsi. Yo pa two long, men sa tèlman janti fè sa ! Sé ti mo-tala toujou ka fè mwen dibien. É sav i ka aprésié sa man ka fè ba’y ka ba mwen tjè-kontan. »
(gadé paragraf 10-la).
11. Koumanniè sé frè é sè-a ki ajé pé endé lézòt ? (gadé sé zimaj-la osi).
11 Fè sa’w pé pou endé lézòt. Si nou ka ba lézòt tan-nou épi lafòs-nou, sa ké endé nou pa rété anlè pwoblèm-nou. An pwovèb afritjen ka konparé sé gran-moun lan épi bibliyotèk ki chajé épi liv ki ni an patjé trézò sajès adan. Men si nou pa ka li sé liv-la, yo pé pa aprann nou ayen. Menm manniè-a, ou pé pa aprann sé jenn-lan lison ki enpòwtan adan lavi-a, si’w pa di yo sa’w konnèt. Pozé yo kèsion épi kouté yo. Èsplitjé yo poutji rèspèkté sa Jéova ka mandé yo ké toujou fè yo dibien é ba yo tjè-kontan. Asiré, lè’w ka konsolé épi ou ka ba zanmi’w lafòs, wou menm sa ka ba’w tjè-kontan (Sòm 71:18).
(gadé paragraf 11-lan).
12. Dapré Izayi 46:4, kisa Jéova pwonmèt fè ba sèvitè’y fidèl ki ajé ? (gadé sé zimaj-la osi).
12 Mandé Jéova lafòs. Délè, ou pé santi kò-a las menm, é pétèt sa ka dékourajé’w. Men sonjé sé pa lafòs Jéova mantjé. Labib ka di « janmen i pa ka fatidjé, janmen i pa ka las » (Iza. 40:28).Kidonk i pé ba’w fòs-la ki fo pou tjenbé. (Iza. 40:29-31). Avrédi, Jéova pwonmèt i ké endé’w (li Izayi 46:4). É i toujou ka fè sa i pwonmèt (Joz. 23:14 ; Iza. 55:10, 11). Ès ou pa ni tjè-kontan lè, apré an lapriyè, ou ka santi lanmou Jéova épi soutien’y ?
(gadé paragraf 12-la).
13. Silon 2 Korentjen 4:16-18, kisa fòk pa nou bliyé ? (gadé sé zimaj-la osi).
13 Sonjé ou pé ké toujou vié. Si nou ka sonjé sitiyasion rèd tala sé pou an tan, sa kèy pli fasil tjenbé. Dayè, Labib-la ka di nou, vini vié épi maladi sé pou an tan (Jòb 33:25 ; Iza. 33:24). Kidonk ou pé ja ni tjè-kontan pas pli ta pli bèl (li 2 Korentjen 4:16-18). Atjèlman, annou wè sa lézòt pé fè pou endé’w.
(gadé paragraf 13-la).
SA LÉZÒT PÉ FÈ BA’W
14. Poutji sa enpòwtan ay wè épi kriyé sé frè é sè-a ki ajé ?
14 Annou ay wè épi téléfònen sé frè é sè ajé a souvan (Ébré 13:16). Sé gran-moun lan pé santi kòyo sèl. Camille, an frè ki fèmen kay-li ka di : « Man kay-mwen bonmaten, an midi, oswè, é sa ka rivé man ka annuyé kòmwen anpil. Délè, man ni lenprésion man kon an bèt yo fèmen adan an kaj. Lè sa ka rivé, man ka santi mwen èstrésé épi man an kolè. » Lè nou ka alé wè frè é sè-nou ki ajé, nou ka montré nou enmen yo é yo enpòwtan ba nou. É sa ka rasiré yo. Sa ja rivé nou tout la ni lentansion kriyé oben alé wè an gran-moun ki adan lasanblé-nou, épi, anfinaldikont, nou pa fè’y. Nou tout la bien otjipé. Alò, kisa ki pé endé nou « rivé wè kisa ki pli enpòwtan », kontèl ay wè frè é sè-nou ki ajé adan sanblé-a ? (Fil. 1:10). Nou pé matjé non-yo an koté pou sonjé vréyé an mésaj ba yo ouben kriyé yo. Nou pé osi chwazi an jou pou ay wè yo. Men fòk pa sé silon van !
15. Ki aktivité sé pli jenn lan pé fè épi sé gran-moun lan ?
15 Nou ki pli jenn, pétèt nou ka mandé kònou, di kisa nou pé palé épi sé gran-moun lan, ouben kisa nou pé fè épi yo. Men, fòk pa sa pran tèt-nou twòp. Annou jiskont vini zanmi-yo (Pwo. 17:17). Avan ouben apré sé réyinion-an, annou ay wè yo pou fè an ti palé. Nou pé mandé yo ki vèsé yo préféré. Nou pé mandé yo osi rakonté nou an ti bagay komik ki rivé yo lè yo té pli jenn. Nou pé envité yo gadé épi nou an émision JW Télédifizion. Nou pé pétèt osi endé yo fè an bagay yo pé pa fè tou sèl. Pa èkzanp, poutji pa pwopozé yo pou enstalé sé dènié mizajou-a asou aparèy élèktwonik yo, oben téléchajé sé piblikasion-an ki fèt pou étidié ? An sè yo ka kriyé Carol ka ba ti lidé-tala : « Ou pé pwopozé sé gran-moun lan pou fè bagay ou enmen. Menmsi man pa jenn ankò, man toujou anvi pwofité di lavi. Man enmen fè magazen, manjé rèstoran épi fè ti ponponm lakanpay. » É an sè yo ka kriyé Maira ka rakonté : « Man ni an zanmi ki ni katrèvendizan. I ni 57 lanné anplis ki mwen. Men souvan, man ka oubliyé nou pa menm laj, pas nou enmen ri épi gadé fim ansanm. É lè nou ni an pwoblèm, yonn ka mandé lòt konsèy. »
16. Poutji sa itil alé épi sé frè èk sè ajé a lè yo ka alé kay dòktè-a ?
16 Annou alé épi yo kay dòktè-yo. Anplis di mennen yo kay dòktè-a, si sa posib, bien gadé si sé moun-lan janti épi yo, épi ka bien otjipé di yo (Iza. 1:17). Pétèt nou pé matjé ba yo sa dòktè-a ka di yo. Ruth, an sè ajé, ka èsplitjé : « Souvan, lè man ka alé kay dòktè-a tou sèl, i pa ka djè pran mwen o sérié. Délè yo ka di bagay kontèl : “Ou pa malad ; sé an tèt-ou sa yé.” Men lè an moun ka vini épi mwen, dòktè-a ka aji an lòt manniè. Sé pa ti kontan man kontan, lè sé frè èk sè-a ka pran tan vini épi mwen, lè man ka alé kay dòktè-a. »
17. Ki manniè sé pli jenn lan pé endé sa ki pli gran pou yo préché osi ?
17 Annou préché épi sé frè é sè ajé nou an. Yonn-dé adan yo pa ni lafòs ankò pou préché kay an kay. Ès nou pé pwopozé, pa ègzanp, an sè ajé fè prézantwè épi nou ? Nou pé menm prévwè an chèz pou i asiz bò prézantwè-a. Ouben ès nou pé pwopozé an frè ajé vini adan an létid épi nou ? Nou pé jik fè létid-la lakay-li. Anplis, sé ansien-an pé katjilé pou fè sé réyinion prédikasion-an lakay sé frè é sè ajé a, pou sa pli fasil ba yo préché. Tousa nou ka fè pou ba sé frè é sè ajé a lonnè vo lapenn (Pwo. 3:27 ; Wom. 12:10).
18. Di kisa nou kèy palé adan awtik-la ka vini an ?
18 Awtik-tala fè nou sonjé, Jéova enmen sé frè é sè ajé a, é i ka ba yo lonnè. Sé menm bagay-la adan sanblé-a. Si’w ajé, ou ka bien wè pli laj-la ka monté, sé pli ou ka jwenn difikilté. Men Jéova la épi’w, i pé endé’w ni tjè-kontan (Sòm 37:25). Davrè ou sav pli ta pli bèl, ès sa pa ka ba’w fòs ? Men kisa nou pé di asou sé moun-lan ka otjipé di an moun malad ? Yonn-dé ka otjipé di an paran ajé, an timanmay ouben an zanmi ki malad. Koumanniè yo pé kontinié ni tjè-kontan ? Sé sa nou ké wè adan awtik-la ka vini an.
KANTIK 30 Zanmi-mwen, Bondié-mwen, Papa-mwen
a Gadé asou jw.org épi adan JW Library® vidéwo-a Chrétiens âgés : vous avez un rôle important.