Ès man pou arété kondui ?

Ès ou adan an sitiyasion konsa ? Si sé wi, kisa ki pé endé’w désidé si fòk ou kontinié kondui ?

Adan yonn-dé péyi, lè’w ja ni an bèl laj, fòk sé an dòktè ki ba’w lotorizasion kontinié kondui. Adan sé péyi-tala, sé krétjen-an ka obéyi lalwa (Wom. 13:1). Men kisiswa koté-a ou ka rété, ou ni mwayen pou sav si ou ni tout kapasité’w pou kondui an sékirité.

GADÉ SI OU TOUJOU KAPAB KONDUI

Kon an lòwganizasion pou moun ki ajé ka konséyé, pou koumansé, ou pé pozé kòw sé kèsion-tala :

• Ès sa difisil ba mwen li sé panno-a ouben wè lannuit ?

• Ès man toujou kapab tounen tèt-mwen pou gadé adan sé rétwovizè-a, épi la sé rétwovizè-a pa ka pèwmèt mwen wè ?

• Ès man ni difikilté pou réyaji lamenm, pa ègzanp pou tiré pié-mwen asou pédal aksélératè-a épi mété’y asou pédal fren-an ?

• Ès man ka kondui kon an mòlòkòy, kifè man ka jennen lézòt asou lawout-la ?

• Ès sé tan-tala, sa rivé mwen souvan mantjé fè an aksidan, ouben ès loto-mwen kalbosé épi griji pas man ka bité anlè bagay ?

• Ès lapolis ja arété mwen anlè lawout palakòz konduit-mwen ?

• Ès man ja péché lanbi pandan man té ka kondui ?

• Ès man ka pran médikanman ki sé pé aji anlè konduit-mwen ?

• Ès lafanmi-mwen ouben zanmi-mwen ka di yo entjèt lè man ka kondui ?

Si’w réponn wi a 1 ouben 2 adan sé kèsion-tala, pétèt sa nésésè ou fè yonn-dé chanjman. Pa ègzanp, ou pé désidé kondui mwens, èspésialman lannuit. Rété véyatif anlè pwòp kòw pou wè si ou toujou ka kondui bien. Ou pé mandé an manb lafanmi’w ouben an zanmi di’w sa i ka pansé asou manniè ou ka kondui. Pétèt osi ou pé pran yonn-dé lison pou aprann kondui épi plis sékirité. Men, si’w réponn wi a plis ki 2 kèsion adan sé kèsion-an ki pli wo, pétèt sa té kèy méyè ba’w ou arété konduia.

KOUMANNIÈ PRENSIP LABIB PÉ ENDÉ’W PRAN BON DÉSIZION ?

Nou pa ka toujou rann kònou kont ki nou ka pèd lanmen piti-a-piti. É pétèt nou pa menm anvi sonjé fòk arété kondui toubannman. Alò, ki prensip biblik pé endé’w wè bagay-la an manniè klè épi pran an désizion ki saj ? Annou wè 2 prensip.

Rikonnèt limit-ou (Pwo. 11:2). Anmizi-anmizi nou ka viéyi, nou ka réyaji mwen vit, épi zié-nou, zorèy-nou épi fòs-nou ka fébli. Dayè, épi laj-la ka monté, anlo ka sispann fè dé modèl ispò, pas yo sav yo pé blésé kòyo pli fasilman. Sa bon suiv prensip-tala osi lè’w ka kondui loto. Sa vré, an lè, an moun pé rikonnèt fòk i arété kondui pou pwòp sékirité’y (Pwo. 22:3). É si moun ki alantou’y ka di yo entjèt, an moun ki ka rikonnèt limit-li ké asèpté épi kouté konsèy yo ka ba’y (konparé épi 2 Samièl 21:15-17).

Nou pa lé tjwé pèsonn (Dét. 22:8). Si an moun ka kondui an loto san pran prékosion, sé konsi i ni an zam an lanmen’y. Moun-lan ki ka kontinié kondui, alòs ki piti-a-piti i ka pèd lanmen, sé pé mété lavi’y épi ta lézòt an danjé. Anplis, i sé pé rèsponsab lanmò an moun.

Pa pansé ki lézòt pé ké rèspèkté’w ankò si’w arété kondui. Jéova enmen’w pas ou ka rikonnèt limit-ou, ou ni limilité épi ou ka sousié kòw di sékirité lézòt. É i ka pwonmèt i ké soutienn ou épi konsolé’w (Iza. 46:4). I pé ké jen ladjé’w. Sé poutji, toupandan ou ka désidé si ou pou arété ouben kontinié kondui, mandé Jéova endé’w ni sajès épi sèvi sé prensip Labib-la.